ကော့ကရိတ် တောင်တက်လမ်းအစမှာ ချောချောမွေ့မွေ့ ဖြစ်သည်။ ရန်ကုန်-မြဝတီ
ကားများ အတွက် အခက်အခဲမရှိလှ။ တောင်လယ်လမ်းမှာ လောလောလတ်လတ် မိုးရွာထားသည်က
တစ်ကြောင်း၊ ကျောက်စရစ်ခဲပုံများ ပုံလျက် ဖောက်လုပ်ဆဲ ဖြစ်သည်က တစ်ကြောင်း
အကြောင်းနှစ်ကြောင်း ပေါင်းဆုံ၍ ရွှံ့ဗွက် ထူလျက်ရှိသည်။ ကားတစ်စီးနှင့်
တစ်စီးမှာ လိပ်သွား သွားနေရသည်။ စိတ်ရှိလက်ရှိ မောင်း၍မရ။
တောင်ပတ်လမ်းဘေးရှိ ချောက်ကမ်းပါးများကို ကားပေါ်က ကြည့်လိုက်သည်နှင့်
ကားဘီးကို ခေါင်းပြူပြီး ငုံ့ငုံ့ကြည့်မိသည်။ အခန့်မသင့်၍ ဘီးတစ်ချက်
ချော်ရုံမျှဖြင့် ကားကိုတစ်စစီ ဖြစ်သွားစေနိုင်လောက်သော ချောက်ကမ်းပါး
ဖြစ်သည်။
လမ်းမှာတစ်လမ်းသွားဖြစ်ပြီး
တောင်တက် တောင်ဆင်းကို တစ်ရက်စီ သတ်မှတ်ထားသည်။ ကျွန်တော်တို့ကားနှင့်
အတော်လေး ခပ်ဝေးဝေးရှိ ကားတစ်စီးမှာ တောင်အတက်အဆင်း လုပ်နေသော
ဆိုင်ကယ်တစ်စီးနှင့် တိုက်မိပြီး ချောက်ထဲ ထိုးကျသွားရာ ယင်းကားကို
အပေါ်ပြန်တင်ရန် လမ်းပိတ်ထား၍ တစ်နာရီကျော်ကျော်ခန့် စောင့်ယူရသည်။
ကားထွက်ပြီး သိပ်မကြာလိုက်၊ ရှေ့ကားတစ်စီး တောင်နံရံကို ဝင်ပွတ်မိသဖြင့်
နာရီဝက်ခန့် စောင့်လိုက်ရပြန်သည်။ ယင်းလမ်းမှာ ထိုင်းနိုင်ငံမှ
မြန်မာနိုင်ငံ၏ မန္တလေးနှင့် ရန်ကုန်ကဲ့သို့ မြို့ကြီးများရှိ
ဈေးကွက်များသို့ အထွေထွေ ကုန်စည်များ စီးဆင်းရာလမ်းလည်း ဖြစ်သည်။
ကရင်ပြည်နယ် မြဝတီမြို့နယ် ဆုံဆည်းမြိုင် ကျေးရွာတွင် အခြေစိုက်သော
ဒီကေဘီအေ ဌာနချုပ်ကို သတင်းသွားယူမည့် ကျွန်တော်တို့အတွက် ဤလမ်းမှာ
စွန့်စားခန်း၏ နိဒါန်းဟု စိတ်နှလုံးပိုက်ပြီး အတော်ကြာ မေ့မေ့လျော့လျော့
ဖြစ်နေခဲ့သော ဘုရား၊ တရားကို မသိမသာ ခပ်တိုးတိုး ရွတ်ဆိုမိသည်။
သတင်းထောက်အဖွဲ့ ကားနှင့်အတူ လိုက်ပါလာသော သံဃာများမှာ
ကော့ကရိတ်မြို့သို့ ရောက်ရန် စိတ်လောလျက်ရှိသည်။ ကားရပ်စောင့်နေရသော
အချိန်ကြောင့် နေမွန်းတည့်ပြီး နေ့ဆွမ်းနှင့်လွဲကိန်း ဆိုက်နေသည်။
ကားပေါ်တွင်ပါလာသော ၈၈ မျိုးဆက် ကျောင်းသားတစ်ဦးက ဆရာတော်တို့ကို လှမ်း
နောက်သည်။
“အရှင်ဘုရား၊ ဘာမှမပူနဲ့။ ရေသန့်ဘူးတွေပါတယ်။ ရေဆွမ်းဘုဉ်းလို့ရတယ်”
ကော့ကရိတ် တောင်တက်လမ်း တစ်လျှောက်တွင် ရေခဲပုံးလေးများကို
လက်တွင်ချိတ်ပြီး အအေးဘူး လိုက်ရောင်းနေသော ကလေးငယ်တချို့ကို တွေ့ရ သည်။
သူတို့ရေခဲပုံးလေးများထဲတွင် အအေးဘူးများနှင့်အတူ ဂျက်ပြားပုလင်းတချို့လည်း
တွေ့ရသည်။ ဂျက်ပြားပုလင်း ဆိုသည်မှာ ဂရင်းရွိုင်ရယ် အမျိုးအစား
အရက်ပုလင်းငယ်ကို ဆိုလိုပါသည်။
ခရီးသည်တင်ကားများဘေးတွင် အအေးဘူးများ လိုက်ရောင်းသည်ကို အညာဒေသတွင်
မြင်ဖူးတွေ့ဖူး ပါသည်။ သို့သော် အရက်ပုလင်းကို လက်ပွေ့ရေခဲပုံးဖြင့်
ထည့်ရောင်းသည်ကိုမူ ယခုအကြိမ် ပထမဆုံးမြင်ဖူးခြင်း ဖြစ်သည်။
သတင်းထောက်အဖွဲ့
စီးနင်းလိုက်ပါလာသည့်ကား ကော့ကရိတ်မြို့သို့ ဆိုက်လျှင် ဆိုက်ချင်း ဒီကေ
ဘီအေတပ်ဖွဲ့မှ ဗိုလ်မှူးကြီး စိုးမြင့်တို့ လာကြိုသည်။ အကြိုလာသော
ဗိုလ်မှူးစိုးမြင့်တို့နှင့်အတူ မြဝတီမြို့ထဲ ရောက်ရန် နာရီဝက်ခန့်
မောင်းလိုက်ရသည်။ ပြီးနောက် ထမင်းဆိုင်တစ်ဆိုင်ဝင်၍ ထမင်းစားကြသည်။
ဒီကေဘီအေ ဌာနချုပ်တွင် ပြည်တွင်းဖုန်းလိုင်း မမိသည့်အပြင် အင်တာနက်ပါ
သုံးမရဟု ကြိုသိထား သဖြင့် နေ့စဉ်ထုတ် သတင်းစာများအတွက် သတင်းအချိန်မီ
ပို့နိုင်ရန် မြဝတီမြို့ထဲမှာပင် ကြိုတင်ပြင်ဆင်သမှု ပြုရသည်။ Dtacd
အမျိုးအစား ထိုင်းဆင်းမ်ကတ်နှင့် ငွေဖြည့်ကတ် ဝယ်ရသည်။ သို့မှသာ၊
သတင်းစာအတွက် သတင်းအမီ ပို့နိုင်ပေမည်။
အားလုံးထမင်းစားပြီးနောက်၊ ဒီကေဘီအေ ဆက်ဆံရေးရုံးသို့ ခေတ္တဝင်နားသည်။
ကျွန်တော်တို့အဖွဲ့ ဌာနချုပ်သို့ ခရီးဆက်နိုင်ရန် ဒီကေဘီအေ စစ်ဗျူဟာမှူး
ဗိုလ်မှူးစောစန်းအောင်က တောင်တက်ကား သုံးစီးခန့် စီစဉ်ပေးသည်။
တောင်တက်ကားများမှာ အမိုးဖွင့်၊ ဘီးမြင့်ကားများ ဖြစ်သည်။
ဒေါနတောင်တက်လမ်းမှာ မိုး ဖြောက်ဖြောက်ကြောင့် ရွှံ့ထလျက် ချောတွတ်တွတ်
ဖြစ်နေသည်။ တောင်အတက်၊ တောင်အကွေ့တွင် ကားနောက်မှ စီးလိုက်လာသည့်
ကျွန်တော်တို့အဖွဲ့မှာ ဆန်ကောထဲ ဆီးဖြူသီး ထည့်လှိမ့်သကဲ့သို့ ဘယ်ယိမ်း
ညာနွဲ့။
ရှေ့ဆုံးကားကို စီးလာသည့် ကျွန်တော်တို့သည် နောက်ကားကို
ကြည့်လိုက်သောအခါ မျက်လုံးပင် ပြူးသွားမိသည်။ ကားသည် အဖြောင့်မသွား၊
ရွှံ့ထဲတွှင် ဘေးတိုက်သွားနေသည်။ ဘေးတိုက်ရွှေ့လိုက် နောက်ပြန်ရှေ့တိုး
လုပ်လိုက်ဖြင့် မောင်းနေသောကားကို ကြည့်ပြီး သက်ပြင်းချမိသည်။
ကားခေတ္တ
ရပ်နားသောအခါ ကျွန်တော်တို့ကားကို မောင်းပေးသည့် ဒီကေဘီအေ ဗိုလ်မှူးကို
တောင်တက်လမ်းကို ဘာကြောင့် မပြင်တာလဲဟု မေးစမ်းမိသည်။ စစ်ဗျူဟာအရ အစိုးရတပ်
အလွယ်တကူ ချီတက် မလာနိုင်စေရန် လမ်းမပြင်ခြင်း ဖြစ်ကြောင်း ဗိုလ်မှူးက
ဖြေသည်။
ကျွန်တော်တို့အတွက်သာ လမ်းကကြမ်းနေသော်လည်း တပ်သားများ
အတွက်မူ နေသား ကျနေသည်။ ကားနောက်ပိုင်းတွင် ကျွန်တော်တို့နှင့်
အတူစီးလိုက်လာသည့် တပ်သားဆိုလျှင် ပုခက်ထဲ လွှဲသိပ်နေသလို၊
ကားအချိုးအကွေ့နှင့် လိုက်လျော ညီထွေစွာ လမ်းတစ်လျှောက် ယိမ်းယိမ်းနွဲ့နွဲ့
အိပ်ငိုက် လိုက်ပါလာသည်။
ဆုံဆည်းမြိုင်ရွာ
ရောက်သောအခါ ညနေစောင်းပြီ။ ကျွန်တော်တို့ အဖွဲ့ကို သုံးဖွဲ့ခန့်ခွဲပြီး
ကရင်အိမ်များတွင် နေရာချပေးသည်။ သတင်းသမားများက တစ်အိမ်၊ ရေဝါရောင်
သံဃာများက တစ်အိမ်၊ ကျန်နိုင်ငံရေးသမားများက တစ်အိမ်သုံးအိမ်ခွဲ
နေရာချပေးသည်။
ညထမင်းကို ဒီကေဘီအေက ကျွေးသည်။ ကရင်ခေါင်းဆောင်ကြီး စောဘဦးကြီး
အထိမ်းအမှတ် စိုက်ထူထားသည့် ကျောက်တိုင်ဘေးရှိ ဇရပ်ကလေးတွင် သွားစားရသည်။
ထမင်းခဲကို တစ်စေ့ချင်း ခွဲ၍မရ။ မာကျစ်သော ထမင်းခဲဖြစ်သည်။ တပ်သားများကို
ကျွေးသည့်ဆန်ကို ယူချက်ထားသည်ဟု ထမင်းချက် ကရင်အဒေါ်ကြီးက ပြောပြသည်။
ဟင်းမှာ ဝက်သားအားလူးချက်။ ဟင်းချို မှာ ဝက်သားအာလူး ပါးပါးလှီးထားသော
ရေလုံပြုတ်။ ထမင်းတစ်ဝိုင်းလုံးကို ခြုံပြောရလျှင် ဝက်သားနှင့်
အာလူးမင်းမူသော ထမင်းဝိုင်း ဖြစ်သည်။
ဆုံဆည်းမြိုင် ရွာကလေးတွင် ငါးရက်ခန့်မျှ နေခဲ့ရာ ဟင်းမပြောင်းချေ။
ဝက်သား အာလူးဟင်းနှင့်ပင် နှစ်ပါးသွားခဲ့ရသည်။ ဝက်သားဟင်း စားရလွန်းသဖြင့်
နဂိုအသံ ထွက်လာမလား၊ ဝက်သံထွက်လာမလား သိရအောင် တစ်ချက်လောက်
အော်ကြည့်စမ်းပါဟု ကျွန်တော်တို့အချင်းချင်း နောက်ပြောင်မိသည်။
ပြောသာပြောသော်လည်း ကျွန်တော်တို့ကို ကျွေးသောဟင်းကို အထူးအရေးပေး
ချက်ထားခြင်း ဖြစ် သည်။ ကျွန်တော်တို့နှင့် ရင်းနှီးသော တပ်သားကလေးများကို
ဘာနှင့်စားလဲဟု မေးလိုက်တိုင်း ထမင်းနှင့် ငါးပိရည်ဆိုသော အဖြေကမပြောင်း။
ဒီကေဘီအေ ဦးစီးပြုလုပ်သည့် ပြည်ထောင်စု တိုင်းရင်းသားပေါင်းစုံ
သဘောထားအမြင် ဆွေးနွေးပွဲ ကို ဇွန်လ ၁၅ ရက်နေ့မှ စတင်ကျင်းပမည် ဖြစ်ရာ
ဇွန်လ ၁၄ ရက်နေ့ နံနက်တွင် အားနေသဖြင့် ကျွန်တော်တို့ သတင်းအဖွဲ့သည်
ဒီကေဘီအေတပ်မှ ကားဖြင့် ထိုင်းနယ်စပ်ရှိ သောင်ရင်းမြစ်ကမ်းကို သွားသည်။
သောင်ရင်းမြစ်ကို ထိုးဝါး အားပြုသော လှေငယ်ကလေးဖြင့် ဖြတ်ကူးပြီး
ထိုင်းနိုင်ငံတွင်းရှိ မော်လီချိုင်းရွာ ဈေးကလေးသို့ သွားလည်ကြသည်။
လှေစီးခ ဘတ်ငွေ နှစ်ရာပေးရသည်။
မော်လီချိုင်းဈေးမှာ လူမစည်လှ။ ခြောက်ကပ်ကပ် နိုင်လှသည်။ ဒေသခံများ
အဆိုအရ၊ တနင်္လာနေ့ မှသာ တစ်ပတ်တစ်ခါ ဈေးရှိသဖြင့် လူစည်ကားသည်ဟု ဆိုသည်။
ဆုံဆည်းမြိုင်ရွာမှ ဈေးသည်တို့မှာ ယင်းဈေးလေးသို့ တစ်ပတ်စာလာရောက်
ဝယ်ခြမ်းတတ် ကြသည်ဟုဆိုသည်။
ဆုံဆည်းမြိုင်သို့
ပြန်ရောက်သောအခါ ညနေစောင်းလေပြီ။ မင်္ဂလာချောင်းတွင် ရေဆင်းချိုးပြီးနောက်
ဒီကေဘီအေ တပ်ရင်း အခမဲ့ ဆေးပေးခန်းသို့ သွားလည်သည်။ ယင်းတပ်ရင်း
ဆေးပေးခန်းကလေးကို ဗိုလ်မှူးကြီး စောအာနိုးက တာဝန်ယူ အုပ်ချုပ်သည်ဟု
သိရသည်။
စောအာနိုးမှာ နာမည်ရင်းမဟုက်။ ဗလတောင့်တောင့်၊
ဂိုက်ဖြောင့်ဖြောင့် ရှိသောကြောင့် စောအာနိုး အမည်ဖြင့် နာမည်ပြောင်
တွင်သွားခြင်း ဖြစ်သည်။
ဆေးပေးခန်းတွင် သစ်သားခုတင် ငါးလုံးခန့် တွေ့ရသည်။
အမျိုးသမီးနှစ်ဦးနှင့် အမျိုးသားတစ်ဦးတို့ လဲလျောင်းနေသည်ကို
မြင်ခဲ့ရသည်။ တပ်ရင်း ဆေးပေးခန်းများကို တိုးချဲ့ဖွင့်လှစ်နိုင်ရန်
စီစဉ်နေသည်ဟု ဗိုလ်မှူးစောအာနိုးက ဆိုသည်။ ဆုံဆည်းမြိုင်ရွာအတွက်မူ
ခုတင်ငါးဆယ်ဆံ့ ဆေးပေးခန်းတစ်ခု ဆောက်နေသည်ဟု သိရသည်။ အခြားကရင်ရွာ
လေးရွာတွင်လည်း ဒီကေဘီအေ အခမဲ့ဆေးပေးခန်းများ ဆောက်သွားရန် ရှိသည်ဟု
ဗိုလ်မှူးစောအာနိုးက ဆိုသည်။
စားပွဲပေါ်တွင် တင်ထားသော ဆေးများအနက်
ငှက်ဖျားဆေးဘူးမှာ အခြားဆေးဘူးများထက် ပိုကြီး ပြီး ပို၍များများ
ထည့်ထားသည်ကို သတိထားမိသည်။ ယင်းဒေသတွင် ငှက်ဖျားလူနာ အများဆုံးဖြစ်သည်ဟု
ဗိုလ်မှူးစောအာနိုးက အတည်ပြု ပြောကြားသည်။
လူနာပြုစုရန်အတွက်မူ
ကရင်တိုင်းရင်းသူလေးများကို လပိုင်းသင်တန်းများပေးပြီး ဆေးပညာ သင်ပေးသည်ဟု
ဆိုသည်။ သူနာပြု ကရင်တိုင်းရင်းသူလေး နှစ်ယောက်ကိုလည်း ယင်းဆေးပေးခန်းတွင်
တွေ့ခဲ့ရသည်။
ထမင်းဆိုင်မှ မင်္ဂလာတံတားဘက်သို့ လမ်းလျှောက် ပြန်လာစဉ် မှောင်ရိပ်ကျသော
ကင်းတဲထဲမှ တပ်သားနှစ်ဦးကို မည်းတဲတဲ မြင်ရသည်။ ဗိုလ်ကြီးတို့၊
ထမင်းစားပြီးပလားဟု ကျွန်တော်တို့က လှမ်းနှုတ်ဆက်လိုက်သည်။
ကရင်သဝဲဝဲဖြင့် မစားရသေးဘူးဟု ပြန်ဖြေသည်။ အသံမှာ လူကြီးသံမဟုတ်၊
ကလေးသံဖြစ်သည်။ သို့နှင့် အာလာပသလာပပြောရင်း၊ မိတ်ဖွဲ့ရင်းနှီးလိုသော
ရည်ရွယ်ချက်ဖြင့် ဗိုလ်ကြီးတို့နဲ့ စကား ပြောချင်လို့ပါဟု လောကွတ်လုပ်ပြီး
ကင်းတဲနားသို့ ကပ်သွားသည်။
အနီးရောက်မှ ဖုန်းတွင်ပါလာသောမီးကို
အသာဖွင့်ကြည့်မိသည်။ တပ်သားများမှာ ကျွန်တော့် ထက်ပင် အသက်ငယ်သည်။
ကလေးတပ်သားများ ဖြစ်သည်။ တပ်သားတစ်ဦး၏ နာမည်မှာ မောင်မြင့် (နာမည်ရင်း
အုန်းမြင့် ဖြစ်သော်လည်း မောင်မြင့်ဟုသာ အခေါ်ကြိုက်သည်ဟု ဆိုသည်) ဖြစ်ပြီး
နောက်တပ်သားနာမည်မှာ အဲချမ်း ဖြစ်သည်။
မောင်မြင့်သည် အဲချမ်းထက် အသက်ပိုကြီးဟန်ရှိသည်။ ဆံပင်တိုတို၊
အသားညိုညိုနှင့် အရပ်ပုပု၊ ဗလတောင့်တောင့် ဖြစ်သည်။ အဲချမ်းမှာ အသားဖြူသည်၊
မျက်ပေါက်ကျဉ်းသည်၊ လူပုံသွယ်လျသည်။ နှစ်ယောက်စလုံးမှာ
ဆယ့်ကိုးနှစ်အောက်သာ ရှိသေးသည်ဟု ဆိုသည်။ စစ်စိမ်းရောင် အင်္ကျီကျားကို
နှစ်ယောက် ဆင်တူဝတ်ဆင်ထားပြီး သေနတ်တစ်လက်စီ ကိုင် ဆောင်ထားသည်။
ဒီကေဘီအေ တပ်ထဲသို့ ဝင်သည်မှာ လွန်ခဲ့သည့် နှစ်နှစ်သုံးနှစ်ခန့်လောက်က
ဟုဆိုသည်။ မောင်မြင့်သည် ကျောင်းတက်စဉ်က ဆရာမနှင့် ရန်ဖြစ်ပြီး
ကျောင်းလစ်တတ်သည်ဟု ဆိုသည်။ ငယ်စဉ်ကပင် လက်နက်ကိုင်ပြီး စစ်သားဖြစ်လိုသော
ဆန္ဒရှိခဲ့သောကြောင့် ဒီကေဘီအေ တပ်ထဲဝင်ခဲ့ကြောင်း မောင်မြင့်က ရင်ဖွင့်သည်။
ပထမဆုံး လက်နက်ပေးကိုင်သောနေ့ကဆိုလျှင် အင်မတန် စိတ်လှုပ်ရှားခဲ့ရသည်ဟု
မောင်မြင့်ကဆိုသည်။
အဲချမ်းမှာမူ မောင်မြင့်နှင့်မတူ။
အိမ်တွင်လယ်ယာနှင့် ပတ်သက်သော အလုပ်ကြမ်းများ လုပ်ရသဖြင့် အလုပ်မလုပ်ဘဲ
အေးအေးလူလူစားပြီး သာသာယာယာ ကင်းထိုင်စောင့်ရသော တပ်သားဘဝကို
ခြေစုံပစ်ဝင်ခဲ့သည်ဟု အဲချမ်းက သူတပ်ထဲဝင်ရသည့် အကြောင်းအရင်းကို
ပြောပြသည်။
အမှန်တကယ်ဆိုလျှင် အဲချမ်းနှင့် မောင်မြင့်တို့ အရွယ်မှာ
ကျောင်းစိမ်းဝတ်စုံဝတ်ပြီး စာအံနေရမည့် အရွယ်ကလေးတွေ ဖြစ်သည်။ သို့သော်လည်း
ယင်းဒေသတွင် စာသင်ကျောင်းနှင့် ဆရာမရယ်လို့ ဟုတ်ဟုတ်ညားညားမရှိ။
ကိုယ်ထူကိုယ်ထ အလယ်တန်း ကျောင်းကလေးသာ ရှိသည်ဟုဆိုသည်။ စာတတ်သူများ
အဖို့လည်း အလုပ်အကိုင် မရှိပေ။ အချိန်တန်လျှင် လယ်စိုက်၊ ပြောင်းစိုက်
လုပ်ချင်လုပ် သို့မဟုက် လက်နက်ကိုင် တပ်သားဘဝ ခံယူရုံမျှသာ
ရှိသည်။အခြားတစ်ပါး မျှော်လင့်ချက် မရှိပေ။
အတန်ငယ် မြော်မြင်တတ်သော ကရင်အမျိုးသမီးကြီးတစ်ဦးကမူ သူ့သားသမီးများကို
ထိုင်းနိုင်ငံ ဘက်တွင် ဒုက္ခသည် အမည်ခံဖြင့် ပညာသင်ကြားစေသည်ဟု ဆိုသည်။
ထိုင်းအစိုးရသည် အထက်တန်းအဆင့်အထိ ထောက်ပံ့မှုများ ရှိသဖြင့်
စရိတ်အနည်းငယ်မျှဖြင့် ပညာသင်နိုင်သည်ဟု ၎င်းကပြောပြသည်။ ထိုင်းနိုင်ငံတွင်
ဆယ့်နှစ်တန်းအထိ ပညာသင်ပြီးပါက ကုမ္ပဏီတစ်ခုတွင် အလုပ်ဝင်နိုင်ပြီး
ကလေးများ၏ အနာဂတ်ရေး ဖြောင့်ဖြူးနိုင်သည်ဟု ကရင်အမျိုးသမီးကြီးက
သားသမီးများအတွက် သူ့မျှော်လင့်ချက်ကို ရင်ဖွင့်သည်။
ဒီကေဘီအေ
တပ်ဖွဲ့၏ စစ်ဦးစီးချုပ် ဗိုလ်ချုပ် စောလားပွယ်ခေါ် ဗိုလ်နှုတ်ခမ်းမွှေးကို
ငြိမ်းချမ်း ရေးဆွေးနွေးပွဲ အခမ်းအနားတွင် စတင်တွေ့မြင်ဖူးသည်။ သူ့ပုံစံမှာ
အကြည့်စူးရှသည်။ စကားနည်းသည်။ အေးအေးသာသာ စကားဆိုတတ်သည်။
ဗိုလ်နှုတ်ခမ်းမွှေးဟု အမြင်တွင်လှသဖြင့် နှုတ်ခမ်းကို ကြည့်သော်လည်း
နှုတ်ခမ်းမွှေး တစ်မျှင်မျှမရှိပေ။ ရိတ်ထားဟန်တူသည်။
အခမ်းအနားအဖွင့်တွင် အစိုးရ၏ ငြိမ်းချမ်းရေး ဖော်ဆောင်မှုနှင့် ပတ်သက်၍
ဗိုလ်ချုပ်စောလားပွယ်က “လက်ရှိအခြေအနေက အသက်ရှုခွင့်ပဲ ပေးထားတာ။
အသက်ရှင်သန်ခွင့် မရှိသေးဘူး” ဟု သွယ်ဝိုက် မှတ်ချက်ပြုသည်။
ယင်းဆွေးနွေးပွဲသို့ အဖွဲ့အစည်း ၃၉ ဖွဲ့မှ ကိုယ်စားလှယ် ၈၄ ဦး တက်ရောက်
ဆွေးနွေးကြသည်။ မြေပြန့်ဒေသမှ ရွှေဝါရောင် သံဃာတော်များ၊ စာရေးဆရာများ၊
နိုင်ငံရေး အကျဉ်းသားဟောင်းများ၊ ၈၈ မျိုးဆက်ကျောင်းသားများ
ပါဝင်ဆွေးနွေးပြီး တိုင်းရင်းသားဒေသဘက်မှ ထိုင်းနိုင်ငံ အခြေစိုက်
ကရင်အဖွဲ့အစည်းများ၊ ဒေသခံ ရပ်မိရပ်ဖများ၊ ဒီကေဘီအေ ဗိုလ်မှူးများနှင့်
အခြားသော တိုင်းရင်း သား အဖွဲ့အစည်းအချို့တို့ တက်ရောက် ဆွေးနွေးကြသည်။
ရှမ်းတပ်ပေါင်းစုဌာန ကိုယ်စားလှယ် ဦးစိုင်းထွန်းအေးက ၂၀၁၅
ရွေးကောက်ပွဲတွင် ဒီမိုကရေစီ အင်အားစုများက ပြည်ထောင်စု ကြံ့ခိုင်ရေးနှင့်
ဖွံ့ဖြိုးရေးပါတီကို အနိုင်ယူနိုင်ရန် လုပ်ဆောင်သင့်သော အချက်များကို
ယင်းဆွေးနွေးပွဲတွင် အကြံပြုသည်။
ယင်းပါတီကို အနိုင်ယူနိုင်ရေးအတွက်
တိုင်းရင်းသားလူမျိုးစု အားလုံးနှင့် NLD ပါတီ အပါအဝင် ဒီမိုကရေစီ
အင်အားစုအားလုံး ပူးပေါင်း လုပ်ဆောင်သင့်ကြောင်း ၎င်းက ထောက်ပြသည်။
“တိုင်းရင်းသား မဲဆန္ဒနယ်မှာ NLD ပါတီ အနေနဲ့ တိုင်းရင်းသားပါတီတွေနဲ့
ညှိလုပ်သင့်တယ်။ ဒီလိုမဟုတ်ဘဲ ဒီမိုကရေစီ အင်အားစုချင်း ပြိုင်နေရင် NLD က
မဲ ၃၀ ရာခိုင်နှုန်း၊ တိုင်းရင်းသားပါတီက မဲ ၃၀ ရာခိုင်နှုန်း၊ ကြံ့ခိုင်ရေးက
၄၀ ရာခိုင်နှုန်းဆိုရင် ကြံ့ခိုင်ရေးပါတီက ဒိုင်စားသွားလိမ့်မယ်။ NLD ပါတီ
ဝင်မပြိုင်ရင် တိုင်းရင်းသားပါတီက ၆၀၊ ကြံ့ခိုင်ရေးက ၄၀ ရာခိုင်နှုန်းရရင်
ဒီမိုကရေစီ အင်အားစုတွေ အနိုင်ရမယ်” ဟု ဦးစိုင်းထွန်းအေးက ဆွေးနွေးသည်။
သုံးရက်ကြာ ပြုလုပ်သော ဆွေးနွေးပွဲ နောက်ဆုံးနေ့တွင် ဖွဲ့စည်းပုံ
အခြေခံဥပဒေသစ် ရေးဆွဲနိုင်ရေး အတွက် အမျိုးသားညီလာခံ ခေါ်ယူမည် ဆိုသောအချက်
အပါအဝင် အခြားသော အချက်ခုနှစ်ချက်ခန့်ကို အဖွဲ့အစည်း ၃၉ ဖွဲ့လုံးက သဘောတူ
ထုတ်ပြန်ခဲ့ကြသည်။
ယင်းဖွဲ့စည်းပုံသစ် ရေးဆွဲရေး ညီလာခံကို ၂၀၁၄
ခုနှစ် ဒီဇင်ဘာလ နောက်ဆုံးထား ခေါ်ယူသွားမည်ဖြစ်ပြီး ဖွဲ့စည်းပုံသစ်တစ်ခု
ရေးဆွဲကာ လူထုဆန္ဒမဲ ခံယူပြီး လက်ရှိလွှတ်တော်တွင် မဲမခွဲဘဲ အတည်ပြုစေမည်
ဖြစ်ကြောင်း NLD (လွတ်မြောက်နယ်မြေ) ပါတီက ဦးထွန်းအောင်ကျော်က ဆိုသည်။
ကျွန်တော်တို့ သတင်းသမားများကို ဗိုလ်ချုပ် စောလားပွယ် (ခ)
ဗိုလ်နှုတ်ခမ်းမွှေးက ၎င်း၏နေအိမ်သို့ ဖိတ်ကြားသည်။ ဗိုလ်နှုတ်ခမ်းမွှေးသည်
၎င်း၏နေအိမ်တွင် သာမန်အရပ်သားကဲ့သို့ အင်္ကျီစွပ်ကျယ် အဖြူနှင့် ပုဆိုးကို
ဝတ်ဆင်ထားသည်။ အိမ်ကလေးမှာ ရေနံဆီဝအောင် သုတ်ထားသော ပျဉ်ထောင်အိမ်ကလေး
ဖြစ်သည်။ အိမ်ရှေ့တွင် သစ်ခွပန်းများ စိုက်ထားသည်။
ဗိုလ်နှုတ်ခမ်းမွှေးသည် စကားနည်းသူပီပီ မီဒီယာများကို ခေတ္တမျှ
ဧည့်ခံပြီးနောက် သတင်း သမားများ၏ မေးမြန်းသမျှကို ဖြေကြားပေးရန်
ဒုတိယစစ်ဦးစီးချုပ် ဗိုလ်ချုပ်စောမိုရှေးကို ထားရစ်ခဲ့သည်။
စောမိုရှေးမှာ ကတုံးဆံပင်ပေါက်နှင့်ဖြစ်ပြီး သတင်းသမား ၁၅ ယောက်ခန့် မေးသမျှကို စိတ်ရှည်စွာ တစ်ဦးတည်း ဒိုင်ခံဖြေပေးရှာသည်။
မူးယစ်ဆေးဝါး
အမြစ်ပြတ် ချေမှုန်းရေးကို လုပ်ဆောင်နေသည့် ဒီကေဘီအေ တပ်အနေနှင့် ဒီကေဘီအေ
တပ်သားများကိုယ်တိုင် မူးယစ်ဆေးဝါး ရောင်းဝယ်ခြင်း ပြုလုပ်ပါက မည်သို့
အရေးယူပေးသနည်းဟု ကျွန်တော်ကမေးသည်။
မူးယစ်ဆေးဝါး ရောင်းဝယ်သော ဒီကေဘီအေ တပ်သားများကို ပြစ်မှုအလိုက် အပြစ်ပေး အရေးယူရန် ထုတ်ပြန်ထားသည်များ ရှိကြောင်း ၎င်းကဖြေကြားသည်။
ယင်းမေးခွန်းကို စစ်ဗျူဟာမှူး ဗိုလ်မှူး စောစန်းအောင်ကို မေးမြန်းစဉ်ကမူ
မူးယစ်ဆေးဝါး ရောင်းဝယ်သော တပ်သားကို လက်ပူးလက်ကြပ်မိပါက သေနတ်ဖြင့်ပစ်သတ်
အရေးယူသွားမည်ဟု ဆိုသည်။
ယခင်နှစ်က ဗိုလ်နှုတ်ခမ်းမွှေးကို မူးယစ်ရာဇာအဖြစ် ထိုင်းအစိုးရက
ဖမ်းဝရမ်း ထုတ်ခဲ့ဖူးသဖြင့် ဒီကေဘီအေတပ် အပေါ်တွင် သံသယ မဖြစ်စေလိုဟန်တူသည်။
ထိုင်းအစိုးရဘက်မှ ထောက်လှမ်းရေးက ၎င်းတို့ထုတ်ပြန်ချက်နှင့် ပတ်သက်၍
ဗိုလ်နှုတ်ခမ်းမွှေးထံ လာရောက် တောင်းပန်ခဲ့သည်ဟု ဗိုလ်ချုပ်စောမိုရှေးက
ထည့်သွင်းပြောကြားသည်။
ဒီကေဘီအေ တပ်အနေနှင့် ယာခင်းတွင်
ပြောင်းစိုက်ပျိုးပြီး ငွေကြေး ရှာဖွေနေကြောင်း ၎င်းက ရှင်းပြ သည်။
အစိုးရလုပ်ပိုင်ခွင့် ပြုထားသော ခနောက်စိမ်း လုပ်ငန်းကိုမူ ယခုတိုင်
လုပ်ကိုင်ရခြင်း မရှိသေးဟု ဆိုသည်။
ဒီကေဘီအေ ဌာနချုပ်တွင် လေးရက်ခန့် နေပြီးနောက် ရန်ကုန်သို့
ပြန်လာခဲ့သည်။ အပြန်လမ်းတွင် စိုးရိမ်ကြောင့်ကြခြင်း သိပ်မရှိလှ။
အလာတစ်ခေါက် စီးခဲ့ပြီးဖြစ်သဖြင့် မကြောက်တော့သည်လည်း ပါသည်။
အခွင့်ကြုံလျှင် ဒေါနတောင်တန်းသို့ နောက်တစ်ခေါက် ရောက်လိုပါသေးသည်။
Written by
ဉာဏ်မျိုးအောင်
Credit To The Voice Weekly