ထွက်ပေါက် Exit ဒေါက်တာအောင်ကိုကို (စီးပွားရေးပညာ၊ စီးပွားရေးပေါ်လစီ)

ထွက်ပေါက် (Exit) ဟူသည် အကျဉ်းအကျပ်၊ အကျပ်အတည်းမှ လွတ်မြောက်ရာ တံခါးဝ သို့မဟုတ် ပိုမိုကောင်းမွန်သော အနာဂတ်ဆီသို့ ဦးတည်ရာ တံခါးဝဟု ထင်မြင်မိသည်။

သို့ဆိုလျှင် ၂၀၁၂ ကြားဖြတ် ရွေးကောက်ပွဲသည် ထိုစဉ်က လိပ်ခဲတည်းလည်း ဖြစ်နေခဲ့သော နိုင်ငံရေး အကျဉ်းအကျပ် ထွက်ပေါက် ဖြစ်ခဲ့သော်လည်း ယင်းမှာ အရေးပေါ် ထွက်ပေါက် (Emergency Exit) မျှသာဟုပင် ပြောနိုင်မည်ဟု ထင်မြင်မိသည်။ အကြောင်းမှာ ယင်းအရေးပေါ် ထွက်ပေါက်သာ မရှိခဲ့လျှင် ယနေ့မြန်မာနိုင်ငံ၏ အခြေအနေမှာ စဉ်းစား၍ပင် မရနိုင်သော အခြေအနေမျိုးစုံနှင့် ရင်ဆိုင် နေပေလိမ့်မည်ဟု ထင်မြင်မိသည်။

ယင်းအရေးပေါ် ထွက်ပေါက် (Emergency Exit) သည် နှစ်ဦးနှစ်ဖက် အပြန်အလှန် နားလည်မှု တစ်စုံတစ်ခုသော အတိုင်းအတာအထိ ရရှိခဲ့သည်ကိုလည်း တွေ့မြင်ခဲ့ရသည်။ သို့သော် ယင်းထွက်ပေါက်သည် အရေးပေါ် ထွက်ပေါက်မျှသာ ဖြစ်ခဲ့၍ ၂၀၁၅ ရွေးကောက်ပွဲသည် ယနေ့ပြည်သူ သန်း ၆၀ ၏ ဒီမိုကရေစီ နည်းလမ်းများဖြင့် ရွေးချယ်သော ပြိုင်ဆိုင်မှုကို အခြေခံသော ရွေးကောက်ပွဲဟူသော ပင်မ ထွက်ပေါက် (Main Exit ) ပင် ဖြစ်ပေလိမ့်မည်ဟု ယူဆမိသည်။

အကြောင်းမှာ ၂၀၁၂ ကြားဖြတ် ရွေးကောက်ပွဲကြီး အောင်မြင်စွာ ပြီးစီးခဲ့ချိန်မှစ၍ ယနေ့အချိန်ထိ များစွာသော ပြောင်းလဲမှုများ (ဥပမာ- လွှတ်တော်နိုင်ငံရေး အခင်းအကျဉ်း၊ နိုင်ငံတကာ အကူအညီများ၊ GSP အခွင့်အရေးများ၊ တားဆီး ပိတ်ဆို့ခံခဲ့ရသော စီးပွားရေး အခွင့်အလမ်းများ အစရှိသဖြင့်) သည် ယင်းအရေးပေါ် ထွက်ပေါက်၏ အကျိုးရလဒ်များပင် ဖြစ်ပေလိမ့်မည်။

သို့သော် ယင်းအရေးပေါ် ထွက်ပေါက် (Emergency Exit) မှသည် အဓိကထွက်ပေါက် (Main Exit) သို့ ပြောင်းလဲ ထွက်ရှိနိုင်ပါက ကျန်ရှိသော (ကျန်ရှိနေသေးသော) ပြဿနာများစွာသည် ပြေလည်သွားနိုင် သို့မဟုတ် ပြေလည်သွားနိုင်ရန် လမ်းစများ၊ နည်းလမ်းများကို ရှာဖွေ သွားနိုင်မည်ဟု ယူဆမိသည်။

နှစ်ပေါင်းများစွာ အကျပ်အတည်း ပေါင်းစုံကို ရင်ဆိုင် ဖြတ်သန်းနေခဲ့ရသော မြန်မာပြည်သူ ပြည်သားတို့သည် မိမိတို့၏ ဘဝရှေ့ရေး အနာဂတ်ကို မည်သို့ ပုံစံချရမည် ဆိုသည်ကို လက်တွေ့ကျကျ မလုပ်ဆောင် နိုင်ကြသေးသည်ကို တွေ့မြင်နိုင်ပြီး အခြေခံ လူနေမှု အဆင့်အတန်းမှာလည်း နိမ့်ကျမြဲ နိမ့်ကျဆဲ ဖြစ်နေသေးသည်ကို တွေ့ မြင်ရသည်။

အနာဂတ်ဟူသော တံခါးဝကို ရောက်ရှိရန်အတွက် ပစ္စုပ္ပန်ဟူသော တံခါးမှ ဝင်ရောက်ရမည် ဖြစ်သောကြောင့် မည်သည့်နိုင်ငံသားမဆို မိမိတို့၏ ဘဝလုံခြုံမှုအတွက် စိတ်အေးလက်အေး ဖြတ်သန်းလိုကြသည် ဖြစ်သည်ကို တွေ့နိုင်သည်။

ဆိုလိုသည်မှာ များမကြာမီ  ဖြတ်သန်းရမည့် ၂၀၁၅ ဟူသော ရွေးကောက်ပွဲကြီးသည် မျှတသော ပြိုင်ဆိုင်မှု မျှတသော ယှဉ်ပြိုင်မှု (Fair Competition) မရှိလျှင် ယနေ့အထိ တည်ရှိနေဆဲဖြစ်သော တည်ရှိမှုနှင့် ဖွံ့ဖြိုးတိုးတက်မှုတို့ကို သက်ရောက်မှု ပေးနိုင်သည်ဟုလည်း ထင်မြင်မိသည်။

တစ်နည်းအားဖြင့် ၂၀၁၅ ဟူသော အဓိက ထွက်ပေါက် (Main Exit) မှ ချောချောမောမော အောင်အောင်မြင်မြင် ထွက်နိုင်သွားလျှင် ယနေ့ကာလ လက်ရှိပြဿနာများမှာ စုပေါင်းတိုင်ပင် စုပေါင်းဆွေးနွေး စုပေါင်းတည်ဆောက် စုပေါင်းကာကွယ်သော ဒီမိုကရေစီနိုင်ငံကြီး ပေါ်ပေါက်လာရန် အတွက် လိုအပ်သော အင်အားများ (အင်အားများစွာ) ရရှိလာမည် ဖြစ်သည်။

မိမိတို့နိုင်ငံကို အခြားနိုင်ငံများနည်းတူ ဖွံ့ဖြိုးတိုးတက်စေလိုလျှင် ညီညွတ်မှု (Unity) နှင့် တရားမျှတသော ယှဉ်ပြိုင်မှု (Fair Competition) ကို တည်ဆောက် ရပေလိမ့်မည်။
 Credit To The Voice Weekly