မလွယ်ခဲ့သည့် နိုင်ငံရေးသမားအဖြစ် ရပ်တည်မှု
ခေတ်အဆက်ဆက်က အုပ်စိုးသူ အာဏာရှင်တွေက နိုင်ငံရေးအလုပ်ဆိုတာ ထောင်နှုတ်ခမ်းမှာ လမ်းလျှောက်နေရတဲ့ အလုပ်လို့ ထင်မြင်လာအောင် ဖန်တီးခဲ့တာ တွေ့ရှိခဲ့ပါတယ်။ မြန်မာနိုင်ငံမှာ အာဏာရှင်တွေက အာဏာလက်လွတ်ရမှာ စိုးတဲ့အတွက် နိုင်ငံအရေး ဆောင်ရွက်သူတွေကို ပြင်းထန်စွာ နှိပ်ကွပ်မှုနဲ့အတူ နိုင်ငံရေးသမား မျိုးဆက်ပျက်အောင် အကြိမ်ကြိမ် ဆောင်ရွက်ခဲ့ကြလို့ နိုင်ငံရေးသမားတွေရဲ့ ရှင်သန်ခွင့်နဲ့ မြန်မာ့နိုင်ငံရေးအပေါ် သက်ရောက်မှု ရှိစေခဲ့တာ ဖြစ်ခဲ့ပါတယ်။ နိုင်ငံရေးသမားဆိုရင်တိုင်း ပြည်အတွက် အရေးပါတဲ့ လုပ်ဆောင်ချက်တွေ လုပ်ဆောင်နေသူတွေလို့ မမြင်အောင် ဖန်တီးလုပ်ဆောင်ထားပြီး လုပ်တဲ့သူတွေကိုလည်း ထောင်နှစ်ရှည်ချမှတ်ခြင်း၊ စီးပွားရေး၊ လူမှုရေးတွေမှာ ခေါင်းမထောင်နိုင်အောင် အဘက်ဘက်က ပိတ်ဆို့ခဲ့တဲ့ နည်းဗျူဟာတွေကို အာဏာရှင်တွေက ကျင့်သုံးခဲ့တာ ဖြစ်ပါတယ်။ အာဏာရှင်တွေဟာ လူအများစုရဲ့ စိတ်ထဲမှာ နိုင်ငံရေးလုပ်လိုစိတ် မဖြစ်ပေါ်အောင်၊ လုပ်သူတွေနဲ့လည်း မဆက်ဆံရဲအောင် နည်းအမျိုးမျိုးကိုသုံးပြီး နှိပ်ကွပ်ခဲ့တာဟာ သူတို့ရဲ့ အာဏာကို လက်မလွတ်လိုတဲ့ စိတ်ထားတွေကြောင့်ပဲ ဖြစ်ပါတယ်။
မဆလကို ဦးဆောင်ခဲ့တဲ့ ဗိုလ်ချူပ်ကြီးဟောင်းဖြစ်သူ ဦးနေ၀င်းဟာ သူအာဏာ အစဉ်အဆက် ရယူခဲ့တဲ့ တစ်လျှောက်မှာ တစ်သွေးတစ်သံ တစ်မိန့်နဲ့ အုပ်ချုပ်ခဲ့သလို သူနဲ့သဘောမညီတဲ့ နိုင်ငံရေး လှုပ်ရှားသူတွေကိုလည်း ပြင်းထန်စွာ နှိပ်ကွပ်ခဲ့ပါတယ်။ နိုင်ငံရေး လှုပ်ရှားသူတွေကို နှိပ်ကွပ်ရာမှာ အထူးသဖြင့် တပ်ပိုင်းဆိုင်ရာ ထောက်လှမ်းရေးတွေကို ကိုင်တွယ်စေခဲ့ပြီး သူအာဏာလက်လွတ်ဖို့ နီးကပ်လာချိန်မှာ လက်သပ်မွေးတပည့်ဖြစ်ပြီး ဗိုလ်ချူပ်ကြီးဟောင်း တစ်ဦးဖြစ်ခဲ့တဲ့ ဦးခင်ညွှန့်ကို တပ်ရဲ့ထောက်လှမ်းရေးမှာ ရာထူးအမြင့်ဆုံးနေရာမှာ တာဝန်ပေးအပ်ခဲ့ပြီး ၈၈ အာဏာသိမ်း အစိုးရလက်ထက်အထိ နိုင်ငံရေးသမားတွေကို နှိပ်ကွပ်ဖို့ စီမံနိုင်ခဲ့သူ ဖြစ်ပါတယ်။ နိုင်ငံရေးသမားတွေကို ခေတ်အဆက်ဆက် နှိပ်ကွပ်ခဲ့ရာမှာ ၈၈ အာဏာသိမ်း အစိုးရလက်ထက်မှာလည်း အစိုးရနဲ့ သဘောမညီတဲ့ နိုင်ငံရေးလှုပ်ရှားသူတွေကို ပြင်းပြင်းထန်ထန် နှိပ်ကွပ်ခဲ့တာကြောင့် နိုင်ငံရေး လှုပ်ရှားသူတွေဟာ သူတို့ရဲ့ ကိုယ်ပိုင်ဘ၀၊ မိသားစုဘ၀တွေမှာ ထိခိုက်နစ်နာမှုတွေ အများကြီးရှိခဲ့ပြီး အချိန်ကာလများစွာကို ထောင်ထဲမှာသာ ကုန်ဆုံးခဲ့ကြရပါတယ်။ နိုင်ငံရေးသမားအဖြစ် မရပ်တည်နိုင်အောင် အဘက်ဘက်ကနေ ထိုးနှက်မှုတွေ ပြုလုပ်ခဲ့ရာမှာတော့ ကာယကံရှင်တွေ သာမက မိသားစုဝင်တွေ အပေါ်လည်း စီးပွားရေး၊ လှုမှုရေးအရ သက်ရောက်မှုတွေ ရှိခဲ့တာကြောင့် ပြီးခဲ့တဲ့ နှစ်ပိုင်းတွေမှာ နိုင်ငံရေးသမားအဖြစ် ရပ်တည်ဖို့ဆိုတာ လွယ်ကူတဲ့ ရပ်တည်မှုတော့ မဟုတ်ခဲ့ပါဘူး။
မျိုးဆက်သစ် နိုင်ငံရေးသမား လိုအပ်ချက်
အဘက်ဘက်က နှိပ်ကွပ်မှုတွေကြောင့် နိုင်ငံရေးဆောင်ရွက်သူ အချို့ဟာ နိုင်ငံရေးလှုပ်ရှားမှု ၀န်းကျင်က ထွက်ခွာခဲ့ကြပြီး အချို့ဟာလည်း နိုင်ငံရေးလှုပ်ရှားမှုတွေကနေ ခေတ္တအနားယူခဲ့သူတွေ ရှိခဲ့သလို နိုင်ငံရေးကိုပဲ တစိုက်မတ်မတ် ဆောင်ရွက်ခဲ့သူတွေလည်း ရှိနေခဲ့ပါတယ်။ နိုင်ငံရေး ဆောင်ရွက်သူတွေကို ပစ်မှတ်ထား ဆောင်ရွက်ခဲ့တာဟာ မြန်မာ့နိုင်ငံရေး အပြောင်းအလဲတွေအပေါ် သက်ရောက်မှု ရှိခဲ့သော်လည်း နိုင်ငံရေးသမား မျိုးဆက်သစ်တွေကတော့ ထွက်ပေါ်နေဆဲ ဖြစ်ပါတယ်။ ပြီးခဲ့တဲ့ ၁၀ စုနှစ် အတွင်းမှာတော့ နိုင်ငံရေးမျိုးဆက်သစ်တွေ ထွက်ပေါ်လာမှုဟာ အမျိုးမျိုးသော နှိပ်ကွပ်မှုတွေရဲ့အောက်မှာ အနည်းငယ် အားနည်းခဲ့ရတာ ဖြစ်ပါတယ်။
| နိုင်ငံရေးရဲ့ အနှစ်သာရ၊ နိုင်ငံရေး ဆောင်ရွက်သူတွေရဲ့ တကယ်အမှန် သရုပ်မှန်၊ စိတ်ထားကစပြီး နိုင်ငံရေး ဆောင်ရွက်မှုဟာ နိုင်ငံသားအားလုံးနဲ့ ဘာကြောင့်သက်ဆိုင်တယ် ဆိုတာတွေကို အများပြည်သူတွေ ကျယ်ကျယ်ပြန့်ပြန့်သိအောင် ပညာပေးပြီး နိုင်ငံသားတွေရဲ့ နိုင်ငံရေးရေချိန်ကို မြှင့်တင်ပေးဖို့ လိုပါတယ်။ နိုင်ငံရေးမျိုးဆက်တွေ ထွက်ပေါ်လာဖို့ လက်ရှိနိုင်ငံရေး ပါတီတွေမှာ တာဝန်အရှိဆုံးဖြစ်ပြီး ရေရှည်အတွက် . . . . . |
နိုင်ငံသားများ၏ နိုင်ငံရေးရေချိန်မြင့်ရန်
လိုအပ်ချက်တွေ ရှိနေတဲ့ နိုင်ငံအရေး ဆောင်ရွက်သူတွေကို ဘယ်လိုမွေးထုတ်ကြမလဲ။ အရင်ဆုံး နှစ်ကာလများစွာ နိုင်ငံရေးကို မစားကောင်းတဲ့ အသီးသဖွယ် ထင်မှတ်အောင် ဖန်တီးထားတဲ့ လုပ်ရပ်တွေကို ချေဖျက်ဖို့ အရင်လုပ်ဆောင်ကြရမှာ ဖြစ်ပါတယ်။ နိုင်ငံရေးလုပ်ရင် ထောင်ကျမယ်။ အဘက်ဘက်က တိုက်ခိုက်ခြင်း ပိတ်ဆို့ခြင်းတွေကို ကြုံရမယ်။ လူတွေက မဆက်ဆံရဲဘဲ ရှောင်ရှားကြမယ်ဆိုတဲ့ အရင်က အာဏာရှင် အစိုးရတွေရဲ့ ၀ါဖြန့်မှုတွေကို လူတွေရဲ့ အသိစိတ်မှာ ပျောက်ကွယ်သွားအောင်၊ လျော့နည်းသွားအောင် လုပ်ဆောင်ကြရမှာ ဖြစ်ပါတယ်။ နိုင်ငံရေးရဲ့ အနှစ်သာရ၊ နိုင်ငံရေး ဆောင်ရွက်သူတွေရဲ့ တကယ်အမှန် သရုပ်မှန်၊ စိတ်ထားကစပြီး နိုင်ငံရေး ဆောင်ရွက်မှုဟာ နိုင်ငံသားအားလုံးနဲ့ ဘာကြောင့်သက်ဆိုင်တယ် ဆိုတာတွေကို အများပြည်သူတွေ ကျယ်ကျယ်ပြန့်ပြန့်သိအောင် ပညာပေးပြီး နိုင်ငံသားတွေရဲ့ နိုင်ငံရေးရေချိန်ကို မြှင့်တင်ပေးဖို့ လိုပါတယ်။ နိုင်ငံရေးမျိုးဆက်တွေ ထွက်ပေါ်လာဖို့ လက်ရှိနိုင်ငံရေး ပါတီတွေမှာ တာဝန်အရှိဆုံးဖြစ်ပြီး ရေရှည်အတွက် အစီအမံတွေ အသေးစိတ်ချမှတ် ဆောင်ရွက်ကြရမှာ ဖြစ်ပါတယ်။ နိုင်ငံရေးရေချိန်ကို မြှင့်တင်ပေးရာမှာ ၀ါရင့်နိုင်ငံရေး သမားတွေ အပါအ၀င် ခေတ်အဆက်ဆက်က နိုင်ငံရေး မျိုးဆက်တွေဟာ များပြားလှတဲ့ သူတို့ရဲ့ အတွေ့အကြုံထဲကနေ ထုတ်နုတ်ပြီး မျိုးဆက်သစ်တွေအတွက် လက်ဆင့်ကမ်းရမှာ ဖြစ်ပါတယ်။ အစိုးရ တာဝန်ရှိသူတွေ အနေနဲ့လည်း အခြေခံပညာ ကျောင်းသင်ခန်းစာတွေမှာ နိုင်ငံရေး ဖြစ်ရပ်မှန်တွေနဲ့ နိုင်ငံရေးသမားတွေရဲ့ တိုင်းပြည်အတွက် အကျိုးဆောင်ခဲ့တဲ့ လုပ်ဆောင်ချက်တွေကို မှန်မှန်ကန်ကန်ဖော်ပြပြီး သမိုင်းသင်ခန်းစာတွေအဖြစ် နောင်လာနောင်သားတွေ အတုယူဖို့ သင်ခန်းစာယူဖို့အတွက် သင်ကြားနိုင်အောင် စီမံပေးရမှာ ဖြစ်ပါတယ်။
တချို့က နိုင်ငံရေးဆိုတာ နိုင်ငံရေးသမားတွေရဲ့ အလုပ်သာဖြစ်တယ် ငါတို့နဲ့မဆိုင်ဘူးလို့ ယူဆတဲ့သူတွေလည်း ရှိနေပါသေးတယ်။ မဆလခတ်မှာရော ၈၈ အာဏာသိမ်း အစိုးရလက်ထက်မှာရော အုပ်ချူပ်သူတွေက တရားမျှတပြီး အောင်မြင်တဲ့ နိုင်ငံရေး အခင်းအကျင်းကို မဆောင်ရွက်နိုင်ခဲ့မှုတွေနဲ့ နိုင်ငံရေးအရ စီမံခန့်ခွဲမှု အလွဲတွေကြောင့် ယနေ့အထိ တိုင်းပြည်မှာဖြစ်ပွားနေတဲ့ အချင်းချင်း မညီညွတ်မှု၊ အကျင့်ပျက်လာဘ်စားမှု၊ စီးပွားရေး၊ ပညာရေး ချွတ်ခြုံကျမှု အကျိုးဆက်တွေကို ပြည်သူတွေကျောကော့အောင် ခံခဲ့ရတာတွေဟာ နိုင်ငံရေးက နိုင်ငံသားတွေအပေါ် သက်ရောက်မှု ရှိမရှိကို စဉ်းစားကြည့်ကြဖို့ ကောင်းပါတယ်။ နိုင်ငံရေးကို ညစ်ပတ်တဲ့အရာလို့ မြင်ကြတာဟာ လူတချို့ရဲ့ နိုင်ငံရေးကို ခုတုံးလုပ်ပြီး ကိုယ်ကျိုးရှာမှုတွေကြောင့်ဖြစ်ပြီး နိုင်ငံရေး ကိုယ်ကျိုးရှာမှုတွေကို မှန်ကန်စွာ သုံးသပ်နိုင်ဖို့ နိုင်ငံရေး အသိအမြင်တွေ တိုးပွားလာအောင် လုပ်ဆောင်ကြရမှာ ဖြစ်ပါတယ်။ လူငယ်လူရွယ်တွေ အနေနဲ့လည်း နိုင်ငံရဲ့ ပြောင်းလဲလာတဲ့ နိုင်ငံရေးစနစ်အရ အရပ်ဘက် အုပ်ချူပ်ရေးနဲ့ ဒီမိုကရေစီကို ပီပြင်စွာ လေ့လာနိုင်ဖို့ အဆင့်အလိုက် နိုင်ငံရေး ဘာသာရပ်ဆိုင်ရာတွေကို လေ့လာကြဖို့ လိုပါတယ်။ အသက်ငယ်တယ်ကြီးတယ် သဘောမထားဘဲ တိုင်းပြည်ရဲ့ လိုအပ်ချက်ဖြစ်တဲ့ ပရော်ဖက်ရှင်နယ် နိုင်ငံအရေး ဆောင်ရွက်နိုင်သူတွေ ဖြစ်လာအောင် နိုင်ငံရေးသိပ္ပံကဲ့သို့ ဘာသာရပ်တွေကို လေ့လာဆည်းပူးကြဖို့ လိုပါတယ်။
ကိုယ့်အကျိုးထက် အများအကျိုးကိုကြည့်
နိုင်ငံရေးသမားကောင်း တစ်ယောက်ဖြစ်ရန် ဖြတ်သန်းဖို့ လိုအပ်တယ်လို့ ဆိုတဲ့နေရာမှာလည်း အရေးကြီးတဲ့ အချက်က သမိုင်းကို အမှန်သိဖို့လိုသလို တချို့ထင်နေသလို နိုင်ငံရေးသမားမှန်ရင် ထောင်အတွေ့အကြုံ ရှိရမယ်ဆိုတဲ့ အယူအဆဟာလည်း ယနေ့ခေတ် နိုင်ငံရေး အခြေအနေနဲ့ မကိုက်ညီတော့တဲ့ အယူအဆပဲ ဖြစ်ပါတယ်။ ယနေ့လို နိုင်ငံရေး အပြောင်းအလဲတွေ မြန်နေချိန်မှာ ထောင်ထဲမှာ အချိန်တွေကုန်ဆုံး ရမယ့်အစား လက်ရှိက ကမ္ဘာ့နိုင်ငံရေး မြန်မာ့နိုင်ငံရေး ဖြစ်ရပ်တွေအပေါ် မျက်ခြည်မပြတ် စောင့်ကြည့်ပြီး ဘယ်ထောင့်တစ်နေရာက ပါဝင်နိုင်မလဲ ဆိုတာကို လေ့လာကြဖို့ လိုပါတယ်။ ကိုယ့်အကျိုးထက် အများအကျိုးကို ကြည့်တတ်တဲ့ နိုင်ငံရေး သမားကောင်းတွေရဲ့ အလေ့အကျင့်တွေကို အခြေခံအဆင့်ကစပြီး လူအများစုရဲ့ စိတ်ထဲမှာ ပြန်လည်လက်ခံလာအောင် လုပ်ဆောင်ကြဖို့ အရေးကြီးပါတယ်။ နိုင်ငံရေး သမားကောင်းတွေဟာ ပြည်သူတွေအတွက် အကျိုးရှိတဲ့ နိုင်ငံရေး လုပ်ဆောင်ချက်တွေအတွက် ထောင်ကျမှာကို ကြောက်ရွံ့လေ့ မရှိပါဘူး။
လက်ဆင့်ကမ်းသူများ၏ တာဝန်
လူအများစုရဲ့စိတ်မှာ တာဝန်သိပြီး နိုင်ငံအရေး ဆောင်ရွက်တဲ့ နိုင်ငံရေးသမား စိတ်ထားတွေ ကိုယ်စီကိုယ်ငှ ထားရှိနိုင်ခြင်းဖြင့် လက်ရှိရင်ဆိုင်နေရတဲ့ နိုင်ငံရေး ပြဿနာအချို့နဲ့ အခက်အခဲတွေကို ဖြေရှင်းနိုင်ဖို့ အထောက်အကူ ဖြစ်စေမှာပါ။ ပြဿနာတွေကို တစ်ပွဲထိုး ဖြေရှင်းခြင်းတွေထက် လူတိုင်းမှာ နိုင်ငံအတွက် တာဝန်ရှိတယ်ဆိုတဲ့ နိုင်ငံအရေးအသိကို အခြေခံတဲ့ စိတ်ထားတွေ လူအများကြားမှာ ထွန်းကားလာဖို့ လိုပါတယ်။ နိုင်ငံသားတွေရဲ့ နိုင်ငံရေးရေချိန်မြင့်မှုကတစ်ဆင့် တစ်ချိန်မှာ တိုင်းပြည်အတွက် အားထားရတဲ့ နိုင်ငံရေးသမားကောင်းတွေ ပေါ်ထွက်လာဖို့ အခွင့်အလမ်းတွေ ရရှိလာကြမှာဖြစ်ပြီး နိုင်ငံသားတွေရဲ့ နိုင်ငံရေးအပေါ် သိနားလည်မှု အတိုင်းအတာက လာမယ့် ၂၀၁၅ ရွေးကောက်ပွဲ အပါအ၀င် ရွေးကောက်ပွဲတွေမှာ တိုင်းပြည်အတွက် စွမ်းဆောင်ရည်မြင့်မားတဲ့ လွှတ်တော်ကိုယ်စားလှယ်တွေကို မှန်ကန်စွာ ရွေးချယ်နိုင်ကြမှာ ဖြစ်ပါတယ်။ နိုင်ငံရေး အသိဥာဏ်တွေ တိုးတက်လာမှုနဲ့အတူ တိုင်းပြည်ရဲ့ နိုင်ငံရေး တာဝန်တွေကို လူငယ်လူရွယ်တွေ ပိုမိုထမ်းဆောင် လာကြမှာဖြစ်ပြီး တိုင်းပြည်ရဲ့ နိုင်ငံရေးတည်ငြိမ်မှု၊ ရင့်ကျက်မှု၊ နိုင်ငံသားတွေရဲ့ နိုင်ငံရေး အမြင်ကျယ်မှုတွေ ဖြစ်ပေါ်လာဖို့ ဆိုတာဟာ လက်ဆင့်ကမ်းသူများရဲ့ တာဝန်သာ ဖြစ်ပါတယ်လို့ ဆိုခြင်းပါတယ်။
Written by သစ်ထွဋ်
Credit To First-11
Post a Comment