ပြည်သူဝန်းရံသည့် တရားစီရင်ရေးသို့

(ဖြူး-တင့်အောင်)

ပြည်သူအချင်းချင်း လောဘ ဒေါသ မာန်မာန မောဟ တရားများ ဖုံးလွှမ်းနေ ကြရာမှ သင်္ဂဟတရား လေးပါးကို ပစ်ပယ်၍ ထားသဖြင့် တစ်ဦးနှင့်တစ်ဦး ထိတွေ့ ဆက်ဆံရာတွင် မကျေနပ်မှုများ၊ လှည့်စားမှုများ၊ တင်စီးမှုများ၊ ကတိတရား ပျက်ပြားလာခြင်းများမှတဆင့် အမုန်းတရားများ ပေါ်ပေါက် လာပြီး တရားတပေါင်များ ဖြစ်လာကြပါသည်။

လူ၏ မူလဘူတ သဘောအရ အတ္တသမား ဖြစ်သည်နှင့်အညီ မှန်သည်ဖြစ်စေ၊ မမှန်သည်ဖြစ်စေ၊ တရားသည်ဖြစ်စေ၊ မတရားသည်ဖြစ်စေ မိမိဘက်က အနိုင်လိုကြသည်။ တစ်ခါတစ်ရံ နိုင်ပါလျက်နှင့်ပင် မကျေနပ်နိုင် ဘဲ ရှိတတ်ကြပါသည်။ တစ်ဖက်ကို အပြစ်ပေးတာ နည်းသည်ဟူ၍ အတ္တ လွန်ကဲလာကြသောအခါ လိုက်ဖက်သည့် အပြင်အဆင်များဖြစ်သည့် ချဉ်းကပ်မှုများ၊ ပံ့ပိုးရမှုများ၊ အမျိုးမျိုး အထွေထွေ ပြုကြရသဖြင့် ပင်ပန်း ဆင်းရဲမှု ကြုံကြရပါသည်။

မိမိတို့ဘက်က ကြိုးပမ်းမှုများ အစွမ်းကုန် ပြုလုပ်ခဲ့ကြသော်လည်း မအောင်မြင်သည့် အခြေအနေနှင့် တွေ့ဆုံရသည့်အခါ အမျိုးမျိုးသော ပြစ်တင် ဝေဖန်မှုများ ပြုလာကြပါသည်။ ပထမဦးစွာ ညွှန်းဆိုသူမှာ ရှေ့နေ ညံ့လို့၊ ဒုတိယ ညွှန်းဆိုသူမှာ တရားသူကြီး ဘက် လိုက်လို့ တတိယ ညွှန်းဆိုသည်မှာ တရားစီရင်ရေးစနစ် မကောင်းလို့ဟု သတ္တုချတတ်ပါသည်။ နောက်ဆုံး တရားရေးမဏ္ဍိုင်ကို မယုံမကြည် ဖြစ် လာသည်အထိ ရှိလာကြပါသည်။

ထို့ကြောင့်လည်း နိုင်ငံတကာနှင့် သတင်း မီဒီယာများကပါ တရားရေးမဏ္ဍိုင် မကြံ့ခိုင်သရွေ့၊ တရားဥပဒေ မစိုးမိုးသရွေ့ တိုင်းပြည် ငြိမ်းချမ်း တည်ငြိမ်မှု မရှိဘဲ စီးပွားရေးကအစ တိုင်းပြည်ဖွံ့ဖြိုးမှု မရှိနိုင်ဟု တရားစီရင်ရေး ကဏ္ဍ ကို လက်ညှိုးထိုး ဝိုင်းဝန်း ဝေဖန်နေကြပါသည်။

တရားစီရင်ရေး အသိုင်းအဝန်းတွင် အမှုသည်များ၊ သက်သေများ၊ ရဲဝန်ထမ်း၊ ဥပဒေ ဝန်ထမ်း၊ ရှေ့နေများ၊ တရားသူကြီးများ ရှိနေကြပါသည်။ အချုပ်ဆိုရပါလျှင် အဆုံးအဖြတ် ပေးရသည့် တရားသူကြီး အခရာ ဖြစ် ပါသည်။ တရားသူကြီးကလည်း တရားခွင်တွင် ပေါ်ပေါက်သည့် အမှုနှင့် ပတ်သက်သော အကြောင်းချင်းရာများပေါ်တွင်သာ စီရင်ချက် ချမှတ် ရခြင်း ဖြစ်ပါသည်။

တရားသူကြီးတစ်ဦး၏ စီရင်ချက်သည် လုံးဝဥဿုံ မှန်သည်ဟု မဆိုသာပါ။ ဆုံးဖြတ် စီရင်သည့် တရားသူကြီး၏ ဖြတ်သန်းလာရသည့် တရားစီရင်ရေး နယ်ပယ်၏ အတွေ့အကြုံများ၊ သင်ကြား တတ်မြောက်လာရသည့် ဥပဒေ ပညာများဖြင့် ပေါ်ပေါက်လာသည့် အကြောင်းချင်းရာများအပေါ် စိစစ် ဝေဖန် တိုင်းဆ၍ ဆုံးဖြတ်ပေးခြင်းသာ ဖြစ်ပါသည်။

သို့ဖြစ်၍လည်း အယူခံ တရားရုံးများ ရှိနေကြခြင်းဖြစ်ပါသည်။ အယူခံ တရားရုံးအနေဖြင့် မူလအမှုအား ပြန်လည် တွေ့ဆုံ စစ်ဆေးခြင်း မဟုတ် ပါဘဲ မူလရုံး၏ အမှုတွဲကိုသာ ခေါ်ယူ၍ နှစ်ဖက် ရှေ့နေများ ၏ လျှောက်လွှဲချက်အပေါ် အောက်ရုံး၏ ဆုံးဖြတ် စီရင်ချက်အတိုင်း အတည်ပြုခြင်း၊ အောက်ရုံး၏ စီရင်ချက်ကို ပယ်ခြင်း၊ အမိန့်အသစ် ထပ်မံ ချခြင်းများသာ ပြုလုပ်ပါသည်။ အဆင့်ဆင့်သော တရားရုံးများတွင် ခရိုင်၊ တိုင်းဒေသကြီး၊ ဗဟို တရားရုံးများအပြင် တစ်ဦးထိုင်၊ နှစ်ဦးထိုင်၊ သုံးဦးထိုင် တရားရုံးများနှင့် စာချွန်လွှာ တရားရုံးများပင် ရှိနေကြသည်ကို တွေ့ရပါ သည်။

ဗဟို တရားရုံးတွင် တစ်ဦးထိုင်၊ နှစ်ဦးထိုင်၊ သုံးဦးထိုင် တရားစီရင်ရေးရုံးများ ရှိနေသည်မှာ အထင်ကရ ဖြစ်ပါသည်။ ဤသည့် အစီအစဉ်ကို ရေးဆွဲ ချမှတ် ခဲ့သည်မှာ တရားစီရင်ရေးတွင် အမှန်ကန်ဆုံး ဖြစ်အောင် စီစဉ် ချမှတ် ခဲ့သည်ဟု ယုံကြည်မိပါသည်။ တရားစီရင်သည့် နေရာတွင် သုံးဦးထိုင် စနစ် သည် နောက်ဆုံးဖြစ်၍ လူသုံးဦး ခေါင်း သုံးခေါင်းဖြင့် ဆုံးဖြတ်ချက် ချမှတ်ခြင်းသည် ပိုမိုခိုင်မာ မှန်ကန်သည်ဟု ယူဆသောကြောင့်သာ တရားသူကြီး သုံးဦးထိုင် စနစ်ကို ဖန်တီး တည်ဆောက်ခဲ့သည်ဟု ယူဆ ရပါသည်။

မြန်မာနိုင်ငံတွင် အစိုးရ အသိအမှတ်ပြု အတန်းပညာ တတ်သူများက နည်းပါးပါသည်။ အတန်းပညာ တတ်သူများက သဘာဝအားဖြင့် အသိအမြင် ချမ်းသာ၍ အတန်းပညာ နိမ့်သူများက အသိအမြင် ဆင်းရဲကြ ပါသည်။ အသိ ဆင်းရဲသူက များပြားသဖြင့် အသိ ချမ်းသာသူများ က လောကကြီး လှပ သာယာ အေးချမ်း အဆင်ပြေအောင် ဆောင် ရွက်ပေးနိုင်ရမည်ဟု ယူဆပါသည်။ ပြည်သူတွေရှိလို့ အစိုးရလည်း ရှိရပါ သည်။ ပြည်သူတို့ရဲ့ ရုပ်ဝတ္ထုများ ဆင်းရဲမှု၊ ပြည်သူတို့ရဲ့ စိတ်ဓာတ် ကျဆင်း၍ ပြည်သူတိုင်း စီးပွားရေး မပြေလည်မှုများ ကို ဖြေလျှော့ပေးနိုင်အောင် နိုင်ငံတော်ပိုင်းကလည်း တစ်စိုက် မတ်မတ် ဆောင်ရွက်ပေးနေသည်ကို တွေ့ရပါသည်။

နိုင်ငံတော် အကြီးအကဲဖြစ်သည့် သမ္မတကြီးကလည်း ၂၀၁၃ ခုနှစ် မေလ ၅ ရက်နေ့က ပါတီစုံမှ ပုဂ္ဂိုလ်များနှင့် တွေ့ဆုံရာတွင် ပြည်သူကို ဗဟိုပြုသည့် အုပ်ချုပ်ရေး စနစ်ကို ပြောင်းလဲ အုပ်ချုပ်ရန် ကြိုးစားနေကြောင်းနှင့် အုပ်ချုပ်ရေးဘက်က ချို့ယွင်း အားနည်းချက်ရှိပါက အထောက် အထား ပြည့်ပြည့်စုံစုံနှင့် တင်ပြပါက အသိအမှတ်ပြုပြီး ဆောင် ရွက်ပေးမည်ဖြစ်ကြောင်း မိန့်ကြားခဲ့ပါသည်။

အုပ်ချုပ်ရေးပိုင်းက ပိုမို ကောင်းမွန်သော နည်းလမ်းများ ရှာဖွေပြီး စနစ်ပြောင်း အုပ်ချုပ်ရေး အကောင် အထည်ဖော်ရန် ကြိုး စားနေကြောင်း ပြည်သူတွေ သိသင့်သလောက် သိနေကြပြီ ဖြစ်ပါသည်။ ယနေ့ ပြည်သူထဲက ထွက်ပေါ်နေသည့် တရားရေးမဏ္ဍိုင်နှင့် ပတ် သက်သော ပြည်သူ့အသံများ ထွက်နေပါသည်။ တရားရုံးများတွင် အာမခံပေးခြင်း ကိစ္စများမှစ၍ တရားစီရင်ရေး ကိစ္စများတွင် လာဘ်ပေး လာဘ်ယူမှုများ ရှိနေကြောင်း အချို့ အမှုစစ်ဆေးပြီးသော်လည်း အမိန့်မချ ဘဲ အချိန်ဆွဲနေသည့် ကိစ္စများ၊ အချို့ လောင်းကစား အမှုများတွင် အာမခံပေးထားပြီး အမှုအား ဆက် စစ်ဆေးခြင်းမပြုဘဲ အချိန်ဆွဲထားခြင်း များနှင့် ပတ်သက်၍ ပြည်သူ့ အသံများ ထွက်နေပါသည်။

ခက်မ သုံးဖြာတွင် ပါဝင်သည့် တရားစီရင်ရေး မဏ္ဍိုင် ကြံ့ခိုင်ပါမှ တရား ဥပဒေ စိုးမိုးမှု ရှိပါမှ နိုင်ငံဖွံ့ဖြိုး တိုးတက်မှုရှိမည်ဟု သတင်း မီဒီယာနှင့် နိုင်ငံတကာကပါ ရေးသား ဖော်ပြနေပါက တရားစီရင်ရေးပုံစံ တစ်ခုခုသို့ ပြောင်းလဲရန် ကြိုးစားရမည့် တာဝန်သည် သက်ဆိုင်သူ အကြီးအကဲများတွင် တာဝန်ရှိလာ ပါသည်။

အကြံပြုလိုပါသည်။ မူလစတင် စစ်ဆေး စီရင်သော တရားခွင်များတွင် တစ်ဦးထိုင်အစား သုံးဦးထိုင် စနစ်သို့ ပြောင်းလဲ စစ်ဆေး စီရင်ပါရန်နှင့် ထိုသုံးဦးထိုင်စနစ် ပြောင်းရန်အတွက် မူနှင့် စနစ် ချမှတ်ပေးပါရန် လိုမည်ဖြစ်ပါသည်။ ဤသို့ စနစ် ပြောင်းလဲ စစ်ဆေးပါက-

၁။ လာဘ်ပေး လာဘ်ယူ ပါးလျားသွားမည်။

၂။ တစ်ဦးတည်း ဆုံးဖြတ်ချက်ထက် သုံးဦး ဆုံးဖြတ်ချက်က ပိုမို ခိုင်မာ လာမည်။

၃။ အကြောင်းချင်းရာအပေါ် မှန်ကန်မှု ရှိလာမည်။

၎။ အမှုများ အမြန် ပြီးပြတ်မှု ရှိလာမည်။

၅။ ပြည်သူ ယုံကြည်မှု ရှိလာမည်။

စသည့် အကျိုးတရားများ ရရှိလာမည်ဟု မျှော်မှန်းမိပါသည်။ ပြည်သူများ ဝန်းရံသော တရားစီရင်ရေး၊ မ.ဆ.လ လက်ထက်က ပေါ်ပေါက်ခဲ့ဖူးပါသည်။ သို့သော် တရားသူကြီးကိုယ်တိုင် မပါဝင်ရဘဲ တရားလို၊ တရားခံ၊ သက်သေ များ၏ ထွက်ချက်များကို တရားသူကြီး (တရားရေး အကြံပေး) က ဥပဒေနှင့် ညီသည့် အချက်အလက်များ၊ အားသာချက်၊ အားနည်းချက် များကို ထောက်ပြသည့်အပေါ် တရားသူကြီး၊ ဥက္ကဋ္ဌနှင့် အဖွဲ့ဝင် နှစ်ဦးက စုပေါင်း တိုင်ပင်၍ စီရင်ချက် ရေးသား အမိန့်ချမှတ်ခဲ့ကြ ပါသည်။

မ.ဆ.လ လက်ထက်က ပေါ်ပေါက်ခဲ့သည့် သုံးဦးထိုင် တရားစီရင်ရေး လက်ထက်တွင် ကြီးမားသည့် တရားစီရင်ရေး ချို့ယွင်း အားနည်းချက်များ မရှိခဲ့ပါ။ အချို့ တရားစီရင်ရေးရုံးတွင် အားနည်း လွဲမှားမှု ရှိခဲ့ပါသည်။ မည်သည့် ဥပဒေက မည်သို့ဆိုစေဟု ဆိုပြီး တဇွတ်ထိုး စီရင်ချက် ချမှတ် ခဲ့သည်ကို ကြားရဖူးပါသည်။ သို့သော် အထက် အယူခံရုံး အဆင့်ဆင့် ရှိခြင်းက အမှန်ကို တည့်မတ် ဆောင်ရွက်နိုင်ခဲ့ပါသည်။

ပြည်သူများ ဝန်းရံသည့် သုံးဦးထိုင် စနစ် ဖော်ဆောင်ပါက တရားသူကြီး ကိုယ်တိုင် ပါဝင်ပြီး အကျင့်စရိုက် ကောင်း၍ အငြိမ်းစား ၆၅ နှစ်အောက်၊ ပညာအဆင့်ရှိ ပြည်သူများ ဝန်းရံ ဖော်ဆောင်ပါက အောင်မြင်မည်ဟု ယူဆ ပါသည်။

ခေါက်ရိုး ကျိုးနေသည့် ပြည်သူများ မျှော်လင့်နေသည့် အပြောင်းအလဲ တစ်ခုကို လွယ်လွယ်နှင့်တော့ ပြောင်း၍ မရပါ။ ကြိုးစားကြရမှာ ဖြစ်ပါသည်။ အခြေခံဥပဒေကိုပင် ပြင်ဆင်ရမည့် အနေအထားရှိနေပါကြောင်း တင်ပြ ရပါသည်။
Credit To The Voice Weekly