သမ္မတရာထူး ယှဉ်ပြိုင်ရေး မဟာဗျူဟာချမှတ်ရာတွင် ဒေါ်စု ထည့်သွင်းစဉ်းစား သင့်သည့် အရေးပါသောအချက်များ

Written by  ပိုက်တင်

ဒေါ်စုက သမ္မတဖြစ်လိုကြောင်း ပွင့်ပွင့်လင်းလင်း ကျယ်ကျယ်ပြန့်ပြန့် ပြောဆိုအပြီး၊ ပြည်ထောင်စု လွှတ်တော် နာယက အသစ်လည်းဖြစ်၊ ပြည်သူ့လွှတ်တော် ဥက္ကဋ္ဌလည်း ဖြစ်သူ၏ အမေရိကန် ပြည်ထောင်စု ခရီးစဉ်အတွင်း သမ္မတဖြစ်လိုကြောင်း အတိအလင်း ထုတ်ဖော် ပြောဆိုမှု အဆုံးမှာ ၂၀၁၅ခုနှစ် သမ္မတရာထူး ယှဉ်ပြိုင်ပွဲက အများကြီး ပိုပြီး စိတ်ဝင်စားဖွယ် ဖြစ်လာရုံမကဘဲ လူထုရဲ့ နိုင်ငံရေး နိုးကြားမှုကိုတောင်မှ အတိုင်းအတာ တစ်ခုအထိ မြင့်တက်စေခဲ့တာ ဖြစ်ပါတယ်။ ၂၀၁၅ မှာ သမ္မတ ဘယ်သူ ဖြစ်နိုင်တယ်၊ ဘယ်သူ ဖြစ်သင့်တယ် ဆိုတာတွေကို လူထုအကြား ပြောဆို ဆွေးနွေး ငြင်းခုံမှုတွေ ရှိလာတာ တွေ့ရပါတယ်။

ဘယ်လိုပဲဖြစ်ဖြစ် ၂၀၁၅ ဟာ ဒီမိုကရေစီ တည်ဆောက်ရေးလုပ်ငန်း ရှေ့တစ်လှမ်း တိုးမယ့်အချိန် ဖြစ်တယ်လို့တော့ အကြမ်းအားဖြင့် ပြောလို့ ရနိုင်ပြီး တကယ်လို့ Stakeholder များရဲ့ အားထုတ်မှု တွေဟာ ဟန်ချက်ပျက်ခဲ့မယ် ဆိုရင်တော့ နောက်ကို တစ်လှမ်းမက ဆုတ်သွားတာမျိုးလည်း ဖြစ်နိုင် ပါတယ်။ လောလောဆယ်မှာ သမ္မတ ရာထူးအတွက် ဝင်ရောက် ယှဉ်ပြိုင်မယ့်သူ သုံးဦး ရှိသွားပြီ ဖြစ်ပြီးတော့ တိုင်းရင်းသား လူမျိုးစုတွေထဲကနေလည်း သမ္မတလောင်း တစ်ဦးက သေချာပေါက် ပေါ်ပေါက်လာဦးမှာ ဖြစ်ပါတယ်။ ဒီတော့ ၂၀၁၅ မှာ သမ္မတ ဘယ်သူဖြစ်နိုင်သလဲ၊ ဘယ်သူဖြစ် သင့်သလဲဆိုတဲ့ ကိစ္စများဟာ ဘယ်သူတွေက သမ္မတဖြစ်ချင်သလဲဆိုတဲ့ ကိစ္စနဲ့အတူ အရေးပါတဲ့ Issue တစ်ခု ဖြစ်လာပါတော့တယ်။

ပြီးခဲ့တဲ့ လများအထိတော့ ပြည်တွင်းကရော ပြည်ပကပါ ဒေါ်စုကို သမ္မတ ဖြစ်စေလိုသူတွေက အများစု ရှိနေနိုင်တယ်လို့ ယူဆရပြီး လက်ရှိ သမ္မတကို လိုလားသူများလည်း မနည်းမနော ရှိနေခဲ့တာ ဖြစ်ပါတယ်။ ပြည်ထောင်စုလွှတ်တော် နာယကရဲ့ ထုတ်ဖော် ပြောဆိုမှု နောက်ပိုင်းမှာတော့ နိုင်ငံရေးလောကရဲ့အခြေအနေက လှုပ်လှုပ်ရှားရှား ဖြစ်သွားခဲ့ရတာပါ။သမ္မတရာထူး ရယူလိုသူ အားလုံးကလည်း အခြေအနေကောင်းများ ကိုယ်စီ ရှိနေကြလေတော့ ၂၀၁၅ ကို ၂၀၁၀ ထက်စာရင် ရင်ခုန်စရာ ပိုကောင်းနိုင်တယ်လို့ မျှော်လင့်မှုများ တိုးပွားလာရခြင်း ဖြစ်ပါတယ်။

၂၀၁၅ မှာ သမ္မတ ဘယ်သူဖြစ်မယ်ဆိုတဲ့ အချက်က အရေးပါလှပြီး ဒီမိုကရေစီ တည်ဆောက်ရေး လုပ်ငန်းစဉ်ကြီး တည်တံ့ ခိုင်မာဖို့နဲ့ လက်ရှိအနေအထားထက် ပိုမို အရှိန်အဟုန် မြင့်မားလာဖို့ ဆိုတဲ့ အချက်ကလည်း ပိုပြီး အရေးပါလှတယ်လို့ ဆိုရမှာ ဖြစ်ပါတယ်။ ဒေါ်စုရဲ့လက်ရှိ ရည်မှန်းချက်ထဲမှာ ၂၀၁၅ ခုနှစ် သမ္မတရာထူး ရရှိရေးဆိုတာ ပါလာပေမယ့် ဒေါ်စုရဲ့ အရေးအပါဆုံး (အန္တိမ) ရည်မှန်းချက်က မြန်မာနိုင်ငံမှာ စစ်မှန်ပြီး ခိုင်မာတဲ့ ဒီမိုကရေစီ ပေါ်ပေါက် ထွန်းကားရေး ဖြစ်ပါတယ်။ သမ္မတရာထူးကို ရရှိရင် လုပ်ပိုင်ခွင့်တွေ ပိုမို ပြည့်ပြည့်ဝဝ ရရှိနိုင်မှာမို့ ဒီမိုကရေစီ တိုးတက်ဖြစ်ပေါ်ရေး ပိုမို ထိရောက်စွာ ဆောင်ရွက်နိုင်မယ်လို့ သာမန်အားဖြင့် ယူဆစရာ ရှိပါတယ်။ သမ္မတရာထူးက နိုင်ငံတော်ရဲ့ အထွတ်အထိပ် ဖြစ်လေတော့ အတိုက်အခံခေါင်းဆောင်၊ လူထုခေါင်းဆောင်သာ ဒီရာထူးကို ရမယ်ဆိုရင် တိုင်းပြည်လည်း အခုထက် မျက်နှာပိုပွင့်လာစရာ ရှိရုံမျှမက တပ်မတော်နဲ့ လက်ရှိ အာဏာရပါတီတို့ရဲ့ ဂုဏ်ရည်ပါ အကြီးအကျယ် မြင့်တက်လာနိုင်တာလည်း ဖြစ်ပါတယ်။

ဒါပေမဲ့ လက်ရှိ ဖြစ်ပေါ်နေတဲ့ အနေအထားတွေအရ ဒေါ်စုအနေနဲ့ သမ္မတရာထူး ယှဉ်ပြိုင်ရေး မဟာဗျူဟာ ချမှတ်ရာမှာ အလေးအနက် ထည့်သွင်း စဉ်းစားသင့်တဲ့ အချက်အလက် (ပေးထားချက်) အချို့ ရှိနေပါတယ်။အဲဒီ အချက်အလက်များအနက်က အဓိကကျတဲ့ အချက် သုံးချက်ကို ဖော်ပြ လိုပါတယ်။ ၁။ ဒေါ်စု သမ္မတရာထူး ဝင်ရောက် ယှဉ်ပြိုင်ခွင့် ရရှိနိုင်ရေး အဟန့်အတားဖြစ်နေသော ဖွဲ့စည်းပုံပါ ပြဋ္ဌာန်းချက် ပြင်ဆင်ရေး ၂။ ၂၅ ရာခိုင်နှုန်းရဲ့ အခန်းကဏ္ဍနဲ့ ၃။ PR စနစ်တို့ ဖြစ်ပါတယ်။

ဖွဲ့စည်းပုံ ပြင်ဆင်ရေးကိစ္စက ပြေလည်သွားနိုင်စရာ ရှိပေမယ့် သေချာပေါက် လွယ်ကူသွားပြီလို့ မဆိုနိုင်သေးပါဘူး။ သူရ ဦးရွှေမန်း အမေရိကမှာ ပြောတဲ့ စကားအရ ဒေါ်စုအတွက် အဟန့်အတား ဖြစ်နေတဲ့ ကိစ္စတွေအတွက် သုံးသပ်တာ၊ ပယ်ဖျက်တာ ဖြည့်စွက်တာ ပြင်ဆင်တာတွေလုပ်ဖို့ ကြိုးစား မယ်ဆိုတဲ့ တိုးတက်မှု တစ်ခုတော့ ဖြစ်ထွန်းလာတယ်လို့ ပြောနိုင်ပေမယ့် ဒါဟာဒေါ်စုအတွက် လွယ်ကူသွားပြီဆိုတဲ့ သဘောတော့ လုံးဝ မဟုတ်သေးပါဘူး။ ဖွဲ့စည်းပုံကို ဘယ်လို ပြင်ဆင်မလဲ ဆိုတဲ့ အချက်က အရေးပါလှပါတယ်။ အခြေခံ ဥပဒေနဲ့အညီ လွှတ်တော်တွင်းမှာ ပြင်ဆင်ကြမှာလား နိုင်ငံရေးခေါင်းဆောင်များ လွှတ်တော် ပြင်ပမှာ အကျေအလည် ဆွေးနွေးညှိနှိုင်းပြီး ပြင်ဆင်ကြ မှာလား ဆိုတဲ့ အချက်ပေါ် လုံးလုံးလျားလျား မူတည်ပါတယ်။

လွှတ်တော်ပြင်ပမှာ ဆွေးနွေး ညှိနှိုင်းပြီး ပြင်ဆင်ပေးဖို့ဆိုတာက အခြေခံ ဥပဒေနဲ့ ကိုက်ညီခြင်း မရှိတဲ့ အတွက် ဖြစ်နိုင်ခြေ တော်တော် နည်းပါတယ်။အခြေခံဥပဒေကို ကျော်လွန်ပြီး လုပ်ကိုင်ဆောင်ရွက်ဖို့ ဆိုတာက တော်တော်ကြီး ခက်ခဲတဲ့အလုပ် ဖြစ်ပါတယ်။

လွှတ်တော်တွင်းမှာသာ အခြေခံဥပဒေနဲ့အညီ ဆွေးနွေး ညှိနှိုင်းပြီး ပြင်ဆင်မယ်ဆိုရင် ၂၀၁၅ မတိုင်ခင် ပြီးပြတ်အောင် ဆောင်ရွက်နိုင်ဖို့ တော်တော် သွက်သွက်လက်လက် လုပ်ကိုင်ဖို့ လိုအပ်တာဖြစ်ပြီး လူထုဆန္ဒခံယူပွဲ ကျင်းပ အတည်ပြုတဲ့အထိ လုပ်ရမှာဖြစ်ပါတယ်။ ဒီနေရာမှာ ဒေါ်စု မကြာခဏ ပြောသလို ၇၅ ရာခိုင်နှုန်းရှိတဲ့ အရပ်ဘက် ကိုယ်စားလှယ်များ အားလုံးနဲ့ တပ်ဘက် ကိုယ်စားလှယ် အနည်းဆုံး တစ်ယောက်က ထောက်ခံဖို့လိုတာဖြစ်လေတော့ ဘယ်လောက် လွယ်လွယ်ကူကူ လုပ်လို့ ကိုင်လို့ ရနိုင်မယ်ဆိုတာ တွက်ဆ ပြောဆိုဖို့ ခက်ခဲလှပါတယ်။

၂၅ ရာခိုင်နှုန်းသော တပ်ဘက် ကိုယ်စားလှယ်များရဲ့ အခန်းကဏ္ဍဟာ ဒီနေရာမှာ တော်တော် အရေးပါတာဖြစ်ပြီး ဒီထက် အရေးကြီးတဲ့ ကိစ္စတစ်ခုမှာ ဒီထက် အများကြီး ပိုအရေးပါနေတာကို သတိပြုဖို့ လိုပါတယ်။အဲဒါကတော့ ဒေါ်စု သမ္မတရာထူး ဝင်ရောက်ယှဉ်ပြိုင်ခွင့်ရပြီး အမှန်တကယ် သမ္မတရာထူး ရွေးချယ် တင်မြှောက်တဲ့အချိန် ဖြစ်ပါတယ်။ ၂၅ ရာခိုင်နှုန်းက စစ်ဘက် ကိုယ်စားလှယ် များ အဆို တင်သွင်းတဲ့ သမ္မတလောင်းကို ကျော်ပြီး ဒေါ်စုကို ထောက်ခံမဲပေးဖို့ ဘယ်လိုမှ မဖြစ်နိုင် ပါဘူး။ တပ်မတော်က ဒေါ်စုနဲ့ ပတ်သက်လို့ ရာခိုင်နှုန်း တော်တော်များများ ယုံကြည်မှု ရှိလာပြီဆိုတဲ့ အချက်ကတော့ အမှန်တကယ်ဖြစ်ပြီး ဒါဟာ ဒေါ်စုကို ယုံကြည်တာသာဖြစ်လို့ NLD ပါတီ တစ်ခုလုံးကို ယုံကြည်မှု ရှိလာခြင်း မဟုတ်သေးပါဘူး။ ဒေါ်စုကို နိုင်ငံရေးအရ ယုံကြည် လက်ခံမှုရှိကြောင်း ပြသတဲ့ အနေနဲ့ ကာကွယ်ရေး ဦးစီးချုပ်က တပ်မတော်နေ့ အခမ်းအနား တက်ရောက်ဖို့ ဒေါ်စုကို ဖိတ်ကြား ခဲ့ပါတယ်။ ဒါပေမဲ့ NLD ပါတီက သြဇာကြီးမားသူ အချို့ အပါအဝင် ပါတီဝင် အချို့က တပ်မတော် အပေါ် အမြင် ကြည်လင်မှုမရှိသေးဘဲ ဆန့်ကျင်ဘက် အမြင်များ ရှိနေကြဆဲ ဖြစ်ပါတယ်။

ဒီအချက်က ၂၅ ရာခိုင်နှုန်းသော တပ်မတော်သား ကိုယ်စားလှယ်များက ဒေါ်စု လိုချင်သော ထောက်ခံမဲကို ပေးကြဖို့ ကြီးစွာသော အဟန့်အတား ဖြစ်နေပါတယ်။ (သမ္မတဟာ အစိုးရဖွဲ့ခွင့် အာဏာရှိသူဖြစ်ပြီး ရွေးချယ်ခံ သမ္မတရဲ့ မိခင် ပါတီဝင် အများစုဟာ အစိုးရ အဖွဲ့ဝင် ဖြစ်လာလေ့ ရှိပါတယ်။ NLD ပါတီဝင် အများစု ပါဝင်တဲ့ အစိုးရအဖွဲ့ ပေါ်ပေါက်ရေးဆိုတာ နိုင်ငံရေးသမိုင်းအရ ဒုတိယ ရွေးကောက်ပွဲ သက်တမ်းမှာ ဖြစ်နိုင်ခြေ နည်းလွန်းပါသေးတယ်။)

ဒေါ်စုပြောသလို ရဲရင့်တဲ့ တပ်မတော်သား တစ်ယောက်က အခြေခံဥပဒေ ပြင်ဆင်ရေး ထောက်ခံပေး ရင် ရတယ်ဆိုတဲ့ အယူအဆက လက်ရှိ အခြေအနေနဲ့ အနည်းငယ် လွဲချော်မှု ရှိနေပါတယ်။ အကြောင်းကတော့ သူတို့ အားလုံးက တပ်မတော်သားများ ဖြစ်နေတာကြောင့်ပဲ ဖြစ်ပြီး အရေးကြီးတဲ့ ကိစ္စရပ်တွေမှာ ထောက်ခံစရာရှိရင် အားလုံးက ထောက်ခံဖို့နဲ့ ကန့်ကွက်စရာရှိရင် ကန့်ကွက်ဖို့ ဆုံးဖြတ်ပိုင်ခွင့်က တပ်မတော် ကာကွယ်ရေး ဦးစီးချုပ်ထံမှာ ရှိနေတာ ဖြစ်ပါတယ်။ စစ်တပ် ဖြစ်တဲ့ အတွက် ဒီလို ဖြစ်နေတာဟာလည်း သဘာဝအတိုင်းသာဖြစ်ပြီး တပ်မတော်နဲ့ (ကာကွယ်ရေးဦးစီးချုပ်နဲ့) ဒေါ်စုတို့ နားလည်မှု တစ်စုံတစ်ရာ ရနေတဲ့ အခြေအနေကနေ NLD နဲ့ပါ နားလည် ယုံကြည်မှု တည်ဆောက်နိုင်ဖို့ ပထမ လိုအပ်ပါတယ်။ လောလောဆယ် ချက်ချင်း ဒီလိုဖြစ်အောင် လုပ်ဖို့ မလွယ်ကူလှတာ ဖြစ်လေတော့ ဒေါ်စုက သမ္မတရာထူး ယှဉ်ပြိုင်မယ်ဆိုရင် အရပ်ဘက် ကိုယ်စားလှယ်များရဲ့ ထောက်ခံမှုကို အားကိုး အားထားပြုရမယ့် အနေအထား ဖြစ်ပါတယ်။ ဒီထောက်ခံမှုကို ရဖို့ကလည်း NLD က ၂၀၁၅ မှာ မဲအများစု အနိုင်ရဖို့လိုပြီး ဒီလို ရရှိဖို့အတွက် လက်ရှိ ရွေးကောက်ပွဲ စနစ်ကသာ မျှော်လင့်ချက် ရှိနိုင်ပါတယ်။ (သမ္မတရာထူးအတွက် အဟန့် အတားကို ဖယ်ရှားပေးဖို့ကတော့ လက်ရှိ လွှတ်တော်ကိုယ်စားလှယ် ၁၀၀ ရာခိုင်နှုန်း စလုံး ကတောင်မှ ထောက်ခံမှု ပေးနိုင်တဲ့ ဖြစ်နိုင်ခြေ တစ်ခုလည်း ရှိနေပါတယ်။)

ရွေးကောက်ပွဲကို PR စနစ် ပြောင်းလဲ ကျင့်သုံးရင်တော့ ဒေါ်စု သမ္မတဖြစ်ဖို့ အခွင့်အလမ်း တော်တော် နည်းသွားမှာ အသေအချာ ဖြစ်ပါတယ်။ PR စနစ်ကိုသာ ပြဋ္ဌာန်း ကျင့်သုံးခဲ့ရင် အကျိုးရှိနိုင်တာက လက်ရှိအာဏာရ ပါတီနဲ့ ပါတီငယ်များဖြစ်ပြီး တိုင်းရင်းသားပါတီကြီးများနဲ့ အတိုက်အခံ ပါတီကြီး ဖြစ်တဲ့ NLD တို့ကတော့ ရရှိနိုင်မယ့် လူထု ဆန္ဒမဲများ အလိုအလျောက် လျော့နည်းနိုင်တာ ဖြစ်တော့ အခက်အခဲရှိနိုင်တာ ဖြစ်ပါတယ်။အာဏာရ ပါတီအနေနဲ့ PR စနစ်ကိုသာ ကြိုက်နှစ်သက်မယ်ဆိုရင် ၂၅ရာခိုင်နှုန်းအပါအဝင် လက်ရှိလွှတ်တော် ကိုယ်စားလှယ် အများစုက ထောက်ခံပေးနိုင်တာကြောင့် ၂၀၁၅ မတိုင်ခင် PR ကို အတည်ပြုဖို့ ခက်ခက်ခဲခဲ လုပ်ရမှာ သိပ်မရှိလှဘူးလို့ ယူဆနိုင်ပါတယ်။ PR စနစ်သာ အတည်ပြုနိုင်ခဲ့ရင် အာဏာရ ပါတီရဲ့သမ္မတလောင်းဖြစ်စေ၊ တပ်ဘက်ကိုယ်စားလှယ်များရဲ့ သမ္မတလောင်းဖြစ်စေ ရွေးချယ် တင်မြှောက်ခံရဖို့ လွယ်ကူသွားမှာ ဖြစ်ပါတယ်။ (PR စနစ် ဖြစ်မလာ ရင်တောင်မှ အာဏာရ ပါတီအနေနဲ့ ၁၅ ရာခိုင်နှုန်းနဲ့ ၂၀ ရာခိုင်နှုန်းကြား ရွေးချယ် တင်မြှောက်ခံရ အောင် ကြိုးစားနိုင်ရင် သမ္မတရာထူးကို ရယူနိုင်ဖို့ မျှော်လင့်နိုင်သေးတာ ဖြစ်ပါတယ်။ အင်အား နည်းတဲ့ ပါတီငယ်များနဲ့ တိုင်းရင်းသား ပါတီများက ကိုယ်စားလှယ်များရဲ့ မဲအချို့နဲ့ တပ်ဘက် ထောက်ခံမဲ ပေါင်းလိုက်ရင် ၅၁ ရာခိုင်နှုန်း ရရှိနိုင်တာကြောင့် ဖြစ်ပါတယ်။)

ဒေါ်စုကို သမ္မတရာထူး ယှဉ်ပြိုင်ဖို့ ခွင့်ပြုခဲ့ရင် သမ္မတရာထူး ရရှိဖို့ အခွင့်အလမ်းအတွက် မီးကုန် ယမ်းကုန် အားထုတ်ဖို့ လိုအပ်လာတော့မှာဖြစ်ပြီး ဒုတိယ သမ္မတ ရာထူးကို ယူမယ်ဆိုရင်တော့ သေချာသလောက်ရှိတယ်လို့ တွက်ချက်ကြည့်လို့ ရပါတယ်။ ကျွန်တော့်အနေနဲ့ ဒေါ်စုအနေနဲ့ ဒုတိယ သမ္မတ ရာထူးလောက်ကိုပဲ ရယူသင့်တယ်လို့ ဘယ်လိုမှ ယူဆလို့မရဘဲ သမ္မတ ရာထူး မရခဲ့ရင် ဒုတိယ သမ္မတ ရာထူးလောက်နဲ့ ထိုက်တန်မှုလည်းမရှိဘဲ မူလ ရည်မှန်းချက်ဖြစ်တဲ့ စစ်မှန် ခိုင်မာတဲ့ ဒီမိုကရေစီ ရရှိရေးကို အကောင်အထည်ဖော်ဖို့ ခက်ခဲမယ့် ကိစ္စလို့ မြင်ပါတယ်။

ဗိုလ်ချုပ်ကြီးရွက်ဆစ် ဒေါ်စုနဲ့ တွေ့ဆုံစဉ်က ဒေါ်စုဟာ ဖက်ဒရယ်စနစ်ကို ယုံကြည်သူဖြစ်ကြောင်းနဲ့ သမ္မတဖြစ်လာရင် ဖက်ဒရယ်စနစ်ကို ထူထောင်မှာလား စောင့်ကြည့်ရမယ်လို့ ပြောခဲ့ပါတယ်။ ဒီအချက်ဟာ တစ်ဝက်မှန်ပြီး တစ်ဝက် မှားပါတယ်။ ဒေါ်စုက ဖက်ဒရယ်စနစ်ကို အပြည့်အဝ ယုံကြည်သူ ဖြစ်ပါတယ်။ ဒါပေမဲ့ သမ္မတ ရာထူးရရင် ဖက်ဒရယ်ကို အကောင်အထည် ဖော်ပေးလို့ မရနိုင်ပါဘူး။ ဘာလို့လဲဆိုတော့ executive power ဖြစ်တဲ့ သမ္မတ တာဝန်ဟာ (အထူးသဖြင့် ဒီမိုကရေစီ တည်ဆောက်နေတဲ့ ကာလမှာ) တိုင်းပြည် ဖွံ့ဖြိုး တိုးတက်ရေးကိစ္စ၊ အုပ်ချုပ်ရေးနဲ့ စီမံ ခန့်ခွဲရေး ကိစ္စတို့ကိုသာ ဆောင်ရွက်နိုင်တာဖြစ်ပြီး ဖက်ဒရယ် ထူထောင်ရေးအပါအဝင် ဒီမိုကရေစီ တိုးတက် ဖြစ်ထွန်းရေးကို power of legislature ဖြစ်တဲ့ လွှတ်တော်များကသာ ပိုမို ထိရောက်စွာ ဆောင်ရွက်နိုင်တာ ဖြစ်ပါတယ်။

၂၀၁၅ ရွေးကောက်ပွဲမတိုင်မီ နှစ်နှစ်တာ ကာလလောက် ရရှိတဲ့ အချိန်ကာလလေးမှာ မြန်မာ့နိုင်ငံရေး ကောင်းမွန်ဖို့ လုပ်ဆောင်စရာတွေက ထင်မှတ်ထားတာထက် များပြားပြီး ခက်ခဲလှတယ်ဆိုတာလည်း လူထုနဲ့အတူ stakeholder အားလုံးက သတိပြုရမှာ ဖြစ်ပါတယ်။ ဒေါ်စုအနေနဲ့ ရွေးကောက်ပွဲဆိုင်ရာ မဟာဗျူဟာကို ချမှတ်ရာမှာ အလေးအနက် ထည့်သွင်း စဉ်းစားရမယ့် အချက်အလက်တွေကို အပြည့်အဝ ထည့်သွင်း စဉ်းစားမယ်ဆိုရင် တိုင်းပြည်နဲ့ လူထုအတွက် အကျိုးများနိုင်တာ ဖြစ်ပါတယ်။

မြန်မာနိုင်ငံနဲ့ မြန်မာလူထုရဲ့ ကံကြမ္မာကို ဖန်တီးနိုင်သူ အနည်းငယ်သော လူပုဂ္ဂိုလ်များထဲမှာ ဒေါ်စုက ထိပ်တန်းက ပါဝင်နေသူဖြစ်တယ်ဆိုတဲ့ အချက်ကို အငြင်းပွားလို့မရပါဘူး။ ဒီလို စွမ်းဆောင်နိုင်ဖို့ ထိရောက် သေချာတဲ့ ဆုံးဖြတ်ချက်များနဲ့ မဟာဗျူဟာများ ချမှတ်ဖို့ မဖြစ်မနေ လိုအပ်တာဖြစ်ပြီး စစ်မှန် ခိုင်မာတဲ့ ဒီမိုကရေစီ အမြန်ဆုံး ထွန်းကား ပေါ်ပေါက်ရေးဆိုတဲ့ ပင်မ ရည်မှန်းချက်ကို ထိထိ ရောက်ရောက် အထောက်အပံ့ဖြစ်မယ့် ဆုံးဖြတ်ချက်များနဲ့ မဟာဗျူဟာများ ဖြစ်သင့်တယ်လို့ ယူဆ မိပါကြောင်း။
Credit To  thevoicemyanmar