ကင်ညာနိုင်ငံရဲ့ Nairobi အမျိုးသားဥယျာဉ်ကြီးထဲမှာ အိန္ဒိယလူမျိုးကလေးငယ်နှစ်ယောက်နဲ့ သူ့မိဘတွေဟာ စိတ်မကောင်းဖြစ်နေကြပါတယ်။ တောဆင်ရိုင်းတွေ ဖျက်ဆီးသွားတဲ့ သူတို့ စိုက်ခင်းလေးနဲ့ မီးဖိုချောင်လေးရဲ့အပျက်အစီးတွေကို ငူငူကြီးရပ်ကြည့်နေကြပါတယ်။ နေအိမ်ကလေးကို ခဏထားခဲ့ပြီး မြို့ပေါ်က ဆွေမျိုးတွေရှိရာ အလည်သွားနေစဉ်မှာ ဖြစ်သွားခဲ့တာပါ။ အသက်(၅)နှစ်လောက်သာရှိသေးတဲ့ Mike ကလေးဟာ သူအနှစ်သက်ဆုံးသစ်သားမြင်းရုပ်ကလေးရှေ့မှာရပ်ပြီး မျက်ရည်တွေ ကျနေရှာပါတယ်။ အရုပ်ကလေးကို သူနဲ့အတူမြို့ပေါ်ယူသွားခဲ့မိရင်ကောင်းမှာပဲလို့ တွေးချင်လည်းတွေးနေမှာပေါ့။ ခုတော့ တောဆင်ရိုင်းတွေရဲ့ ကြမ်းတမ်းတဲ့နင်းချေမှုအောက်မှာ မြင်းရုပ်ကလေးဟာ တစ်စစီကျိုးပဲ့နေခဲ့ပါပြီ။ အကိုဖြစ်တဲ့ Ishwar က Mike ရဲ့ ပခုံးလေးကို နှစ်သိမ့်တဲ့သဘောနဲ့ လာဖက်ရင်း ကလေးနှစ်ယောက်ဟာ ရှိုက်သံတွေတစ်ထပ်တည်းဖြစ်သွားတဲ့အထိပါပဲ။ ဒီအဖြစ်အပျက်တွေဟာ တကယ်မဟုတ်ဘဲ ခပ်ညံ့ညံ့ရုပ်ရှင်ကားတွေထဲကလို ဇာတ်ဝင်ခန်းတစ်ခုသာဖြစ်တယ်ဆိုပါစို့။ Mike ဆိုတဲ့ ကလေးလေးဟာကြီးလာရင် ဆင်သတ်သမား၊ ဆင်ဖမ်းသမား ဒါမှမဟုတ် ဆင်တွေကို အလွန်အမင်းမုန်းတီးသူတစ်ယောက် ဖြစ်လာရမယ်မဟုတ်လား။ မှားပါတယ်။ ခပ်ညံ့ညံ့ရုပ်ရှင်တွေဟာ အပြင်လောကနဲ့ တူအောင်ဇွတ်ဖန်တီးရင်း အပြင်လောကနဲ့အဝေးကြီးဝေးသွားတာမျိုး ကျွန်တော်တို့ တွေ့ဖူးပြီးပါပြီ။ ထားလိုက်ပါတော့။ အံ့သြစရာကောင်းတယ်လို့မထင်ဘူးလား။ Mike ဟာ အရွယ်ရောက်လာတဲ့အခါ ဆင်တွေအပါအ၀င် အခြားတိရိစ္ဆာန်တွေကို ဘ၀တစ်ခုလုံးပေးပြီးချစ်ပြခဲ့သူ၊ ကာကွယ်ခဲ့သူ၊ ကမ္ဘာကြီးကို လှပစိမ်းလန်းစေချင်ခဲ့သူတစ်ဦးဖြစ်လာပါတော့တယ်။
အသက် ၇ နှစ်မရှိတရှိအရွယ်မှာ ဦးလေးဖြစ်သူလက်ဆောင်ပေးတဲ့ ကင်မရာလေးတစ်လုံးနဲ့ ဟိုရိုက်ဒီရိုက်လျှောက်ဆော့ရင်း သူ့ဘ၀၊ သူ့ဝါသနာ၊ သူ့ကမ္ဘာဟာ ဘာလဲလို့ ရှာဖွေတွေ့ရှိခဲ့သူ Mike Pandey ဖြစ်ပါတယ်။ "ကျွန်တော်ရပ်နေတဲ့ ကမ္ဘာကြီးဟာ ဘယ်လောက်တန်ဖိုးကြီးကြောင်း ကင်မရာချောင်းကြည့်ပေါက်ထဲကနေမှ ကျွန်တော်နားလည်လာတာပါ" လို့ သူမကြာခဏပြောတတ်ပါတယ်။ ကျွန်တော်တို့သူ့ကိုကြည့်လိုက်တိုင်းလည်း ကင်မရာတစ်လုံးကို ကျော်ပြီးမှ မြင်ရတာ အမြဲပါပဲ။ အရွယ်ရောက်လာတဲ့အချိန်မှာတော့ အမေရိကန်နဲ့အင်္ဂလန်နိုင်ငံများမှာ ပညာသင်ယူခွင့်ရခဲ့ပါတယ်။ ကင်ညာနိုင်ငံမှာမွေးဖွားခဲ့ပေမယ့် အိန္ဒိယလူမျိုးဖြစ်တဲ့ Mike Pandey ဟာ အိန္ဒိယနိုင်ငံ နယူးဒေလီမြို့မှာပဲ အခြေချဖို့ဆုံးဖြတ်ခဲ့ပါတယ်။ အစောပိုင်းနှစ်များမှာ ရုပ်ရှင်ကားတွေအတွက် special effect တွေ ဖန်တီးပေးသူတစ်ဦးအဖြစ် ခေတ္တလုပ်ကိုင်ခဲ့ပါသေးတယ်။ ၁၉၇၃ခုနှစ်မှာတော့ Riverbank အမည်ရတဲ့ ရုပ်ရှင်စတူဒီယိုတစ်ခုကို တည်ထောင်လိုက်ပါတော့တယ်။ ရည်ရွယ်ချက်ကတော့ သဘာဝပတ်ဝန်းကျင်ထိန်းသိမ်းရေး၊ ပညာရေးနဲ့ ရှေးရိုးဆန်တဲ့ရိုးရာထုံးတမ်းတချို့ကို တော်လှန်တဲ့ မှတ်တမ်းရုပ်ရှင်တွေ ရိုက်ကူးဖန်တီးသွားဖို့ပဲဖြစ်ပါတယ်။ "အိန္ဒိယဆိုတဲ့ နိုင်ငံမှာက ဒီဘက်မှာခင်ဗျားရပ်ပြီး စကားပြောနေလိုက်၊ ဟိုဘက်မှာ ခင်ဗျားစကားပြောနေတဲ့ အခွေကိုဖွင့်ထားလိုက်။ လူတွေအားလုံးက တီဗီရှိရာပဲလှည့်နေကြမှာ အသေအချာဗျ" လို့ သူက ရယ်ရယ်မောမောနဲ့ဆိုတတ်တယ်။ မှတ်တမ်းရုပ်ရှင်တွေဟာ လူသားတွေရဲ့ မျက်စိတွေနားတွေကိုဖွင့်ပေးဖို့၊ ခေါင်းထဲက အတွေးဟောင်းတွေကို ရှင်းပစ်ဖို့ တကယ်ကောင်းတဲ့လက်နက်ဆိုတာ Mike Pandey ရိပ်မိခဲ့ပါတယ်။
အမေဇုန်တောကြီးဟာ ကာဗွန်ဒိုင်အောက်ဆိုဒ်တန်ချိန် ၇၅ဘီလီယံလောက်ကို စုပ်ယူပေးထားပါတယ်။ ဒီလောက်ကြီးမားတဲ့သစ်တောကြီးကို ကုန်အောင်ဘယ်လိုခုတ်မှာလဲ။ မကုန်ပါဘူးဆိုပြီး ခုတ်နေမှာလား။ ရပါတယ်။ ဒါပေမယ့် တောမီးလောင်မှုတွေကြောင့် အမေဇုန်သစ်တောကြီးက ပြန်လည်ထုတ်လွှတ်နေတဲ့ ကာဗွန်ဒိုင်အောက်ဆိုဒ်ဟာ တန်ချိန် သန်း၂၀၀လောက်ရှိနေပါတယ်။ သူ့အလိုလိုမှ ပေးတာနဲ့ယူတာ မမျှရတဲ့အထဲ ကျွန်တော်တို့ကပါ ဘေးကနေ ၀င်ကူပြီး ဖျက်ဆီးပေးနေဦးမှာလား။ ဒီကမ္ဘာမှာ ဘယ်သူကများသစ်ပင်တစ်ပင်ခုတ်တိုင်း တခြားသစ်ပင်တစ်ပင်ပြန်စိုက်လို့လဲ။ ပုဆိန်နဲ့ ပျိုးပင်ပေါက်ကို အတူကိုင်ပြီး တောထဲဝင်သွားတဲ့သစ်ခုတ်သမား ဘယ်သူရှိလို့လဲ။ ခုတ်တဲ့သူတွေကလည်း မအိပ်မနေခုတ်၊ စိုက်တဲ့သူတွေကလည်း မနားမနေစိုက်နေကြရတာပဲ မဟုတ်ဘူးလား။ ခုတ်တိုင်း ပြန်စိုက်တယ်ဆိုဦးတော့။ သစ်တောတစ်ခုဟာ လွယ်လွယ်နဲ့ဖြစ်လာတာမဟုတ်ပါဘူး။ သစ်တောကြီး ဖြစ်ရော့လဟယ် ဆိုပြီး သစ်ပင်တစ်ရာလောက် တစ်ခါတည်းစိုက်ပစ်လိုက်လို့လည်း သစ်တောတစ်ခုမဖြစ်ပါဘူး။ ဥတုရာသီပေါင်းများစွာ၊ နေဒဏ်လေဒဏ်များစွာ၊ သားရဲတိရိစ္ဆာန်တို့ရဲ့တွန်းတိုက်နင်းချေခြင်းများစွာ တို့ကို နှစ်ပေါင်းအတော်ကြာကျော်ဖြတ်ပြီးမှ သစ်တောတစ်ခုဖြစ်ဖို့ အစပျိုးရုံလေးပဲရှိပါသေးတယ်။ ပြီးတော့ သစ်တောတစ်ခုရဲ့ ၀ိသေသတွေဖြစ်တဲ့ ငှက်မျိုးစိတ်တွေ၊ သစ်တောအောက်ခြေက ချုံနွယ်ပိတ်ပေါင်းတွေ၊ လိပ်ပြာတို့ပုစဉ်းတို့လို ပျံသန်းနိုင်တဲ့အင်းဆက်မျိုးစိတ်တွေ၊ တခြားမပျံသန်းနိုင်တဲ့အင်းဆက်မျိုးစိတ်တွေ၊ သစ်တောကို အမှီပြုပြီးရှင်သန်ရမယ့် ပန်းမျိုးစိတ်တွေ၊ သစ်တောရဲ့စိုထိုင်းဆကို ထိန်းထားပေးမယ့် လတ်ဆတ်တဲ့လေထုအတွက် ရေကန်ကြီးတွေ၊ အဲဒီရေကန်ထဲက ရေသတ္တ၀ါမျိုးစိတ်တွေ၊ ဒါတွေကရော ကျွန်တော်တို့ ပြန်စိုက်လိုက်တဲ့သစ်ပင်တိုင်းမှာ အဆင်သင့်ပါနေပြီးသားအပိုပစ္စည်းတွေလား။
ပြီးတော့တောင်ကုန်းတွေ၊ တောင်တန်းတွေရော။ ဒီလောက်နည်းပညာအဆင့်မြင့်နေတဲ့ကမ္ဘာကြီးမှာတောင် သဘာဝဓာတ်ငွေ့တွေ၊ တွင်းထွက်သတ္တုတွေ၊ အဖိုးတန်ကျောက်မျက်တွေ၊ ကျွန်းသစ်တွေကို ထုတ်လုပ်ပေးနိုင်တဲ့ လူလုပ်တောင်ကုန်းတွေ၊ လူလုပ်တောင်တန်းတွေမတီထွင်မဖန်တီးနိုင်သေးဘူးမဟုတ်လား။ မြေကြီးတန်ချိန်ဘယ်လောက်၊
ကျောက်သားတန်ချိန်ဘယ်လောက်၊သဲတန်ချိန်ဘယ်လောက်ဆိုပြီး ရောမွှေလို့ ပြန်ပုံလိုက်တိုင်း
တောင်တန်းကြီး ပြန်ဖြစ်သွားမှာမဟုတ်ပါဘူး။ လိုရင်းပြောရရင်တော့ ဟောဒီကမ္ဘာဟာ နောက်ထပ်တစ်လုံးအပိုမရှိပါဘူး။
တစ်ရက်တစ်ရက် Mike ရဲ့ခေါင်းထဲမှာ ဝေလငါးတွေ၊ ဆင်တွေ၊ လဒတွေ၊ သစ်ပင်တွေ၊ ကောနေတဲ့မြစ်တွေ၊ ကောင်းကျိုးထက်ဆိုးကျိုးပိုများတဲ့ ရေလှောင်တမံတွေ၊ ကြွပ်ကြွပ်အိတ်တွေ၊ ပင်လယ်ထဲခဏခဏမှောက်နေတဲ့ ရေနံတင်သင်္ဘောတွေ၊ အရည်ပျော်ကျနေတ့ ရေခဲတောင်တွေ၊ အက်စစ်မိုးရွာချဖို့အသင့်ဖြစ်နေတဲ့လေထဲကဆာလဖာဒိုင်အောက်ဆိုဒ်တွေ၊ဖန်လုံအိမ်အကျိုးဆက်ကြောင့်
ရေခဲအိမ်တွေမဆောက်နိုင်တော့တဲ့ ပိုလာဝက်ဝံတွေဟာ အမြဲရှိနေပါတယ်။ Mikeနဲ့ သူ့အဖွဲ့သားတွေဟာ တောရိုင်းတိရိစ္ဆာန်များကာကွယ်စောင့်ရှောက်ရေးနဲ့ သဘာဝပတ်ဝန်းကျင်ထိန်းသိမ်းရေးအတွက် တိုက်ပွဲတစ်ခုကို အနှစ်နှစ်ဆယ်ကျော်လောက်တိုက်ခဲ့ရပါတယ်။ ရန်သူတွေကတော့အစိုးရအဆက်ဆက်၊ သစ်တောထွက်ပစ္စည်းရောင်းဝယ်ဖောက်ကားသူများနဲ့ သဘာဝပတ်ဝန်းကျင်ထိန်းသိမ်းရေးအသိမှာ အိပ်ပျော်နေကြတဲ့ လူတစ်ဦးချင်းစီပဲဖြစ်ပါတယ်။ Mike တို့ဟာ သူတို့ရဲ့ မှတ်တမ်းရုပ်ရှင်တွေကို ဒိုင်းလိုကာ၊ ဓားလိုသွေး၊ မြားလို့ချွန်ပြီး တိုက်ခဲ့ကြတာပါ။ ၁၉၉၄ခုနှစ်မှာတော့ Mike ဖန်တီးလိုက်တဲ့ The Last Migration(နောက်ဆုံးစားကျက်မြေသို့ထွက်ခွာခြင်း) ဆိုတဲ့ မှတ်တမ်းရုပ်ရှင်ဟာ အလွန်အမင်းအောင်မြင်ခဲ့ပါတယ်။ အဲဒီမှတ်တမ်းရုပ်ရှင်ကားဟာ သဘာဝပတ်ဝန်းကျင်ထိန်းသိမ်းရေးနဲ့ပတ်သက်ရင်ကမ္ဘာ့အကြီးဆုံးရုပ်ရှင်ပွဲတော်ဖြစ်တဲ့ တောရိုင်းတိရိစ္ဆာန်နဲ့ သဘာဝပတ်ဝန်းကျင်ဆိုင်ရာရုပ်ရှင်ပွဲတော် Wildscreen Festival မှာ ပြသခွင့်ရခဲ့ပါတယ်။ အင်္ဂလန်နိုင်ငံမှာကျင်းပတဲ့ ဒီရုပ်ရှင်ပွဲတော်ကနေ Mike ဟာ Green Oscar လို့တင်စားကြတဲ့ Panda ဆုကိုရရှိခဲ့ပါတယ်။ ဒီဇာတ်ကားကြောင့် အိန္ဒိယရဲ့ဆင်ကောင်ရေကျဆင်းနေမှုဟာ နှေးကွေးသွားတဲ့အတွက် Mike ရဲ့အနုပညာအပေါ်လူတွေခံစားမိကြကြောင်း ငြင်းစရာမလိုတော့ပါဘူး။ ကျေးရွာထဲ ဖြတ်သန်းသွားတဲ့ ဆင်တွေဟာ သေနတ်နဲ့ပစ်သတ်သင့်လောက်အောင် ကြမ်းတမ်းရက်စက်တဲ့သတ္တ၀ါတွေမဟုတ်ဘူးဆိုတာ Mike က မီးမောင်းထိုးပြခဲ့တာပါ။ ငယ်ငယ်တုန်းက သစ်သားမြင်းရုပ်အကျိုးအပဲ့လေးတွေကို အကျိုးအပဲ့လေးတွေအတိုင်းပဲ အတိတ်မှာထားခဲ့ပြီး ဆင်တွေကို မပစ်ကြပါနဲ့လို့ ဒီနေ့မှာ Mike က ကမ္ဘာကိုအော်ပြောနေပါတယ်။ Mike ရဲ့ အကြိုက်ဆုံးသစ်သားရုပ်လေးကို နင်းချေခဲ့မိတဲ့ ဆင်ရိုင်းကြီးသာ ဒီမှတ်တမ်းရုပ်ရှင်လေး ကြည့်မိမယ်ဆိုရင် နောက်ထပ်သစ်သားရုပ်တွေအများကြီး ၀ယ်လာပြီး Mike ကိုလက်ဆောင်ပေးမှာပဲလို့ ကျွန်တော်ယုံကြည်နေပါတယ်။
၂၀၀၀ခုနှစ်မှာတော့ Shores Of Silence(တိတ်ဆိတ်ခြင်းကမ်းခြေများ)ဆိုတဲ့ မှတ်တမ်းရုပ်ရှင်နဲ့ Green Oscar ဆုကို ထပ်မံရရှိခဲ့ပြန်ပါတယ်။ ဒီမှတ်တမ်းရုပ်ရှင်ကိုတော့ လပေါင်းများစွာ ဝေလငါးတွေအနောက်ကနေ သင်္ဘောနဲ့လိုက်ပြီးမှိန်းသေနတ်နဲ့ပစ်နေတဲ့ ဝေလငါးဖမ်းသမားတွေအတွက် ရည်ရွယ်ပါတယ်။ ကျောခုံးမှာ ဒဏ်ရာဗရပွနဲ့ ဝေလငါးကြီးတစ်ကောင်ရေပေါ်ကိုအသက်ရှုဖို့တက်လာတိုင်း ကင်မရာကိုင်ထားတဲ့လက်တွေ တုန်ရင်လာတဲ့အထိ စိတ်မကောင်းဖြစ်ရတယ်လို့ Mike ကပြောပါတယ်။ အိန္ဒိယနိုင်ငံပိုင်ရုပ်သံလိုင်းမှာပြသခဲ့တဲ့ Migration(ရေကြည်ရာမြက်နုရာရှာဖွေခြင်း)ဆိုတဲ့ Mike ရဲ့မှတ်တမ်းရုပ်ရှင်ဟာ လူသားနဲ့တိရိစ္ဆာန်ကြားက စားကျက်မြေလုယက်မှုတွေနဲ့ အစာအတွက်တိုက်ပွဲဝင်ကြပုံတွေကို ရည်ညွန်းထားတာဖြစ်ပါတယ်။ ဆင်တွေဟာ သူတို့ရဲ့အစွယ်တွေသာမရှိဘူးဆိုရင် အခုထက် ၁၀ပုံ၁ပုံလောက်ပဲ အသတ်ခံရမယ်လို့ ကြေကွဲစွာရှင်းပြထားပါတယ်။ ဒီမှတ်တမ်းရုပ်ရှင်ရဲ့ နောက်ဆက်တွဲအဖြစ် ၂၀၀၄ခုနှစ်မှာ ထွက်ရှိခဲ့တဲ့ Vanishing Giant (မျိုးတုံးပျောက်ကွယ်နေသောဧရာမသတ္တ၀ါကြီးများ)မှတ်တမ်းရုပ်ရှင်ဟာ အစိုးရနဲ့တောရိုင်းတိရိစ္ဆာန်ကာကွယ်သူတွေကြား အငြင်းပွားစေခဲ့ပါတယ်။ နောက်ဆုံးးမှာတော့ အစိုးရက ရိုးရာနည်းလမ်းများအသုံးပြုပြီးဆင်ရိုင်းဖမ်းဆီးမှုများအား ကန့်သတ်ပေးခဲ့ပါတယ်။ ဒါဟာ ဆင်တွေ မကြာခဏအသက်ဆုံးရှုံးရတဲ့အဖြစ်တွေထဲက တစ်ခုကို ကာကွယ်လိုက်နိုင်တာပါပဲ။
The Dormant Movings(ငြိမ်သက်နေသောရွေ့လျားခြင်းများ)ဆိုတဲ့ မှတ်တမ်းရုပ်ရှင်တစ်ကားကိုလည်း သူ့ခေါင်းထဲမှာပဲ ရိုက်ကူးနေသေးတယ်လို့ Mike ကပြောပါတယ်။ ဒါဟာ ကမ္ဘာ့သစ်တောတွေကို လေ့လာစောင့်ကြည့်နေတဲ့ Global Witness အဖွဲ့ကြီးရဲ့ ၂၀၁၂ခုနှစ်၊ မေလက ထုတ်ပြန်မှုတစ်ခုအပေါ်အခြေခံတယ်လို့ ဆိုပါတယ်။ ဒီထုတ်ပြန်မှုမှာ ကမ္ဘာ့သစ်တောပြုန်းတီးမှုအများဆုံး ၄ နိုင်ငံအဖြစ် ဘရာဇီး၊ အင်ဒိုနီးရှား၊ ဖိလစ်ပိုင်၊ မြန်မာ တို့ဟာ အစဉ်လိုက်စာရင်းဝင်ခဲ့ပါတယ်။ ဒါကြောင့် "ခင်ဗျားတို့သစ်တောတွေ ဘယ်ရောက်သွားလဲ"ဆိုတဲ့ မေးခွန်းနဲ့ စဖွင့်မယ်လို့ Mike ကပြောပါတယ်။ ၁၉၆၀ခုနှစ်မှာ တစ်နိုင်ငံလုံး သစ်တောဖုံးလွှမ်းမှုဧရိယာ ၇၀ရာခိုင်နှုန်း၊ ၁၉၇၀ခုနှစ်မှာ ၆၁ရာခိုင်နှုန်း၊ ၁၉၈၉ခုနှစ်မှာ ၅၉ရာခိုင်နှုန်း နဲ့ ၂၀၀၈ခုနှစ်မှာ ၂၄ရာခိုင်နှုန်း၊ အခုလက်ရှိမှာ ၂၀ရာခိုင်နှုန်းပဲကျန်ရှိတော့တဲ့ မြန်မာနိုင်ငံသားတစ်ယောက်အနေနဲ့ ကျွန်တော်ဟာ Mike ရဲ့ မှတ်တမ်းရုပ်ရှင်ကိုကြည့်ချင်နေပါတယ်ဆိုရင် ရယ်စရာများကောင်းနေမလားမသိတော့ပါဘူး။
Mike ရဲ့အကြီးကျယ်ဆုံးအောင်မြင်မှုတစ်ခုကတော့ ရုပ်သံဇာတ်လမ်းတွဲရှည်ဖြစ်တဲ့ Earth Matters အစီအစဉ်ပါပဲ။ အိန္ဒိယနိုင်ငံမှာ ၁၁နှစ်ကြာအောင်ပြသခဲ့တဲ့ ဒီရုပ်သံဇာတ်လမ်းမှာ Mike ဟာ ကမ္ဘာကြီးအတွက် ကျေးဇူးတရားများစွာယူဆောင်လာပေးပါတယ်။ ဒီရုပ်သံဇာတ်လမ်းတွဲတွေကြောင့် အိန္ဒိယနိုင်ငံအနှံ့အပြားမှာ အခြေခံလူထုအဆင့်အဖွဲ့အစည်းတွေ၊ အာဏာပိုင်တွေက ငွေကြေးထောက်ပံ့ပေးတဲ့အဖွဲ့အစည်းတွေ၊ တစ်ကိုယ်တော်သစ်ပင်စိုက်ပျိုးသူတွေ အများအပြားပေါ်ပေါက်လာခဲ့ပါတယ်။ Mike ဟာ အခုအချိန်ထိ မှတ်တမ်းရုပ်ရှင်ပေါင်း ၆၀၀လောက်ဖန်တီးရိုက်ကူးပြီး ဖြစ်ပါတယ်။ နိုင်ငံတွင်းရရှိတဲ့ဆုများအပါအ၀င်နိုင်ငံတကာဆုပေါင်း ၈၀ကျော်ရရှိနေပြီးဖြစ်ပါတယ်။ အခုလက်ရှိမှာတော့ The Return Of The Tiger(ကျားတစ်ကောင်ရဲ့အပြန်လမ်း)ဆိုတဲ့ မှတ်တမ်းရုပ်ရှင်အတွက် အိန္ဒိယနိုင်ငံမြောက်ပိုင်းကို ခရီးဆန့်နေပါတယ်။ Mike အမြဲတမ်းပြောနေကျစကားတစ်ခွန်းရှိပါတယ်။ "ကမ္ဘာမြေကြီးဟာ ကျွန်တော်တို့အားလုံးပိုင်တဲ့အရာဖြစ်တယ်။ အလုပ်ကိုကားလေးနဲ့ပဲမောင်းထွက်မသွားပါနဲ့။ ပါတီပွဲတွေတက်ဖို့ပဲစဉ်းစားမနေပါနဲ့။ ခင်ဗျားတို့ပတ်ဝန်းကျင်ကိုကြည့်ပါ။ တခုခုမှားနေရင် အဲဒါကို မှန်အောင်လုပ်ပေးပါ"
အော်စကာ(၂)ဆုရ အမေရိကန်ရုပ်ရှင်မင်းသားကြီး Robert Redford ရဲ့စကားတစ်ခွန်းကိုလည်း Mike က တော်တော်သဘောကျကြောင်းဝန်ခံဖူးပါတယ်။ "သဘာဝပတ်ဝန်းကျင်ထိန်းသိမ်းရေးကို နိုင်ငံတော်လုံခြုံရေးလုပ်ငန်း
ထဲ ထည့်သွင်းရမယ်လို့ ကျုပ်ထင်တယ်။ ကျုပ်တို့ရေမြေတောတောင်တွေကို ကာကွယ်ဖို့အရေးဟာ ပြည်ပရန်ကိုကာကွယ်ဖို့လိုပဲ အရေးကြီးတယ်။ ဒါမှမဟုတ်ရင် ကျုပ်တို့ကာကွယ်စရာ ဘာကျန်တော့မှာလဲ"။
သင်္ဘောစီးနေရင်းနဲ့ အမှိုက်ပစ်တော့မယ်ဆိုရင် အဲဒီအမှိုက်ကိုအစာအမှတ်နဲ့စားမိလို့ အစာလမ်းကြောင်းမှာ တစ်ဆို့ပြီး အသက်ဆုံးရှုံးသွားမယ့် ရေသတ္တ၀ါတွေကို မြင်ယောင်ပေးပါ။ ကားသော့တစ်ချက်လှည့်ပြီး လီဗာတစ်ချက်နင်းလိုက်တာနဲ့ ဖန်လုံအိမ်အာနိသင်အပေါ် အားပေးအားမြောက်ပြုမိလိုက်တာ သတိရပါ။ စက်မှုဇုန်တွေနားမှာ ဆာလဖာဒိုင်အောက်ဆိုဒ်တွေဟာ အက်စစ်မိုးတွေအဖြစ်ရွာချလိုက်ဖို့ အသင့်ဖြစ်နေကြောင်း ခေါင်းထဲထည့်ထားပါ။ နာမကျန်းဖြစ်နေသောကမ္ဘာကြီးကို ဆေးကုသဖို့ ကျွန်တော်တို့အားလုံးဟာ ဆရာဝန်တွေပါပဲ။ ကိုယ့်မိသားစု၊ ကိုယ့်သူငယ်ချင်း၊ ကိုယ့်လုပ်ဖော်ကိုင်ဖက်ဘယ်သူ့ကိုဖြစ်ဖြစ် ရသလောက်ပြောဆိုရှင်းလင်းပြပါ။ ကျွန်တော်တို့လူသားတွေရဲ့သက်တမ်းမှာ၊ လူရယ်လို့ဖြစ်လာတဲ့အဓိပ္ပါယ်အပေါ်မှာ ကမ္ဘာကြီးအတွက်ပြန်လည်တုံ့ပြန်ခြင်းဆိုတဲ့ အကန့်တစ်ကန့်ကို သပ်သပ်ခွဲထားပေးပါ။ ၀ါးရွက်ကလေးကို ဖြည်းဖြည်းချင်းဝါးနေတဲ့ ပန်ဒါဝက်ဝံလေးတွေ၊ အစွယ်နှစ်ချောင်းအတွက် အသက်ပေးရတော့မယ့် ဆင်ရိုင်းကြီးတွေ၊ အနှစ် ၅၀၊ ၁၀၀ မားမားရပ်လာပြီးမှ မိနစ်ပိုင်းအတွင်း အမြစ်တွေပေါ်အောင်လဲကျသွားတဲ့ ကျွန်းပင်ကြီးတွေ၊ ငါးဖမ်သင်္ဘောရဲ့သေနတ်ပြောင်းဝကနေ အချိန်ခံထားရတဲ့ဝေလငါးကြီးတွေ၊ စားကျက်မြေရှားပါးမှုကြောင့် လူနေရွာတွေထဲကို မဖြစ်မနေ၀င်လာရတဲ့ ကျားတွေ၊ကျားသစ်တွေ၊ ရေခဲပြင်ရှိရာ အပြင်းအထန်လိုက်ရှာနေတဲ့ ပင်ဂွင်းငှက်တွေ၊ ဆန်တက်စရာရေမရှိတဲ့ မြစ်တွေကြောင့် ထုံးအိုင်တွေထဲမှာ ဘ၀ဆုံးတော့မယ့် ဆယ်လမွန်ငါးတွေအတွက် Mike အလုပ်လုပ်နေပါတယ်။ ပြီးတော့ ကိုယ်ရပ်နေတဲ့မြေကြီးကို ကိုယ်တိုင်ကျေးဇူးကန်းနေတဲ့ ကျွန်တော်တို့အတွက် Mike အလုပ်လုပ်နေပါတယ်။ "ဘာအရေးလဲ၊ ကမ္ဘာမပျက်ခင်ငါသေမှာပဲ။ ဂရုစိုက်စရာမလိုပါဘူး"ဆိုသူတွေအတွက် Mike အလုပ်လုပ်နေပါတယ်။ သူ့ပခုံးဟာ ကင်မရာကြီးနဲ့ တသားတည်းတွဲဆက်ဂဟေဆော်ထားတာများလို့ ထင်ရတဲ့အထိ Mike အလုပ်လုပ်နေပါတယ်။ "သစ်ပင်စိုက်ပါ၊ ကမ္ဘာသူကမ္ဘာသားတိုင်းသာ သစ်ပင်တစ်ပင်စီစိုက်ပါ။ အစိမ်းရောင်ဟန်ချက်ညီမျှနေတဲ့ ဂေဟစနစ်ကို ကျွန်တော်တို့ပြန်ရမှာပါ"တဲ့။ အလုပ်လုပ်နေရင်း Mike ကပြောနေပါတယ်။ ကိုယ့်အလုပ်ကိုယ်သိပြီး ကြိုးစားပမ်းစားလုပ်သူလည်းရှိ၊ မသိဟန်ပြုပြီး နေနိုင်သူတွေလည်းရှိတဲ့ ကမ္ဘာမှာ Mike ဟာ ကျေးဇူးတင်စရာကောင်းသူတစ်ဦးဖြစ်တယ်လို့ ကျွန်တော်တို့ယူဆတဲ့အတွက် သူ့ကိုလေးစားဂုဏ်ပြုပါကြောင်း မှတ်တမ်းတစ်ခုလောက်တော့ ပေးပို့ပေးချင်ပါသေးတယ်။ အဲဒီအခါ စာရွက်အောက်ခြေက ပေးပို့သူများစာရင်းမှာ လက်မှတ်ထိုးဖို့ သားရဲတိရိစ္ဆာန်တွေ၊ ပျောက်ကွယ်လုလုရေသတ္တ၀ါတွေ၊ ငှက်တွေ၊ ကောင်းကင်ပြာပြာကြီး၊ အေးမြလတ်ဆတ်တဲ့လေပြည်တွေ၊ သစ်ပင်စိမ်းစိမ်းတွေ၊ ကြည်လင်ရှင်းသန့်နေတဲ့ စမ်းချောင်းလေးတွေကို ဖိတ်ကြားရပါဦးမယ်။ သူတို့လည်း Mike ကို ကျေးဇူးတင်နေမယ်လို့ ကျွန်တော်တို့ ယုံကြည်တဲ့အတွက်ပါပဲ။
Credit To ဟိန်း Face Book Page
