မြန်မာနိုင်ငံ ပဋိပက္ခများနှင့် မစ္စတာကင်တားနား သခင်


ယခုတစ်လော မြင်နေတွေ့နေရသော အဖြစ်အပျက် များကို ထောက်ရှုခြင်းဖြင့် နွားကွဲလျှင် ကျားဆွဲတတ်သည်ဟူသော စကားပုံအား ခဏခဏ သတိရမိပါသည်။ မြန်မာနိုင်ငံတွင် တအုံနွေးနွေးနှင့် သွေးအေးတော့မလို ဖြစ်နေသော ပဋိပက္ခများ တစ်ဖန် ခေါင်းထောင်ထလာသယောင် ထင်မိပါသည်။ သြဂုတ်လ ၁၁ ရက်နေ့က မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ် မစ္စတာကင်တားနား မြန်မာနိုင်ငံသို့ ရောက်ရှိ လာသောအခါ ဆန္ဒပြမှုများ ဖြစ်လာသည်။ လတ်တလော မီဒီယာမျိုးစုံတွင် တွေ့မြင်နေရသည့်အတိုင်း ရခိုင်တွင် ဆန္ဒပြကြသည်။

သိပ်မဆိုး။ မိတ္ထီလာသို့ ညအချိန်ရောက်သည်တွင် လူအုပ်နှင့် ဝိုင်းကာ ဆန့်ကျင်မှု ပြုသည်ကို မျက်မြင်ကိုယ်တွေ့ မစ္စတာကင်တားနား ကြုံခဲ့ရသည်။ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ်တစ်ဦးသည် မြန်မာနိုင်ငံမှ ပဋိပက္ခများအပေါ် လူမျိုးကြီးဟု နိုင်ငံတကာတွင် ခေါ်ဆိုနေသော မြန်မာတို့၏ သဘောထားကို လက်တွေ့ကြုံလိုက်ရခြင်း ဖြစ်သည်။ ထိုမျှနှင့်မပြီး သြဂုတ်လ ၂၁ ရက်နေ့ မစ္စတာကင်တားနား ပြန်ခါနီး သတင်းစာရှင်းလင်းပွဲတွင် ပြည်တွင်းပြည်ပ မီဒီယာများရှေ့၌ ဒုက္ခသည်များ၏ ကြောက်ရွံ့မှုမျိုးကို ခံစားခဲ့ရပါသည်ဟု ပြောကြားခဲ့သည်။ ဤတွင် ပြည်တွင်းမီဒီယာနှင့် အွန်လိုင်းမီဒီယာများပေါ်၌ သိသိသာသာ ဂိုဏ်းနှစ်ခု ကွဲထွက်လာသည်ကို တွေ့ရသည်။ ကင်တားနား မှန်သည်ဟူသည့် အုပ်စုနှင့် ကင်တားနားကို ရှုတ်ချသည့် အုပ်စုဟူ၍ ဖြစ်သည်။ ကင်တားနား မှန်သည်ဟူသော အများစုမှာ လစ်ဘရယ် အမည်ခံများဖြစ်ပြီး ကင်တားနားကို ဆန့်ကျင်ရှုတ်ချသော အုပ်စုမှာ အမျိုးသားရေးဝါဒီများ ဖြစ်သည် ကို တွေ့ရသည်။

သြဂုတ်လ ၂၂ ရက်နေ့တွင် ပြန်ကြားရေးဒုဝန်ကြီး ဦးရဲထွဋ်က မိတ္ထီလာကိစ္စမှာ မစ္စတာကင်တားနား နားလည်မှုလွဲခြင်းသာ ဖြစ်ကြောင်း ၎င်း၏ လူမှုကွန်ရက် စာမျက်နှာတွင် ဖော်ပြခဲ့သည်။ ကင်တားနားကို ဆန္ဒပြရန် လူထု ၂၀၀ ခန့်က စောင့်ဆိုင်းနေကြပြီး ၎င်း၏ ကားတန်းဝင်လာသောအခါ ၎င်းအား ပေးရန် ရည်ရွယ်ထားသည့် စာနှင့် ကင်တားနား၏ ဓာတ်ပုံကို အမှားခြစ်ထားသည့် ဆန့်ကျင်မှုသဘော ပြသသော တီရှပ်အား ကားအတွင်း ထည့်သွင်းပေးရန် ကားကိုထုနှက်ကြခြင်း ဖြစ်သည်ဟု ဦးရဲထွဋ်က ပြန်လည် ဖြေရှင်းထားသည်။ ထို့အပြင် မိတ္ထီလာမြို့နယ် အုပ်ချုပ်ရေးမှူးက ကင်တားနား၏ကားကို ထုခေါက်ခြင်းမှာ ရဲသားဖြစ်ပြီး ကားထွက်ရန် အချက်ပေးသောအားဖြင့် ပြုလုပ်ခြင်း ဖြစ်ကြောင်း သတင်းများ ထွက်ပေါ်လာသည်။ သို့ဖြင့် မစ္စတာကင်တာနား၏ အပြော၊ ပြန်ကြားရေး ဒုဝန်ကြီး၏ အပြောနှစ်ခုလုံးကို သူ့ဘက်ကိုယ့်ဘက်ကွဲကာ ငြင်းခုံမှုများ ပိုမိုလျှံကျလာတော့သည်။

ဤနေရာတွင် စာရေးသူ ဆိုလိုချင်သည်မှာ ယခုအဖြစ်အပျက်၏ မည်သူမှန်သည်၊ မည်သူမှားသည်ဆိုသော ယူဆချက် မဟုတ်ပါ။ မြန်မာ့ လူမှုဝန်းကျင်တွင် တွေ့မြင်ရလေ့ရှိသော ရန် - ငါ အစွဲဖြစ်သည်။

ဘာသာရေးအစွဲနှင့် ပတ်သက်သောကြောင့် အမျိုးသားရေးဝါဒီများဘက်မှ ပိုမိုပြင်းထန်စွာ တစ်ဖက်သတ်ဆန်ဆန် ပြောဆိုကြသကဲ့သို့ လစ်ဘရယ် အတွေးအမြင်ရှိသော နိုင်ငံတကာနှင့် အကျွမ်းဝင်သည့် ဖရီးသင့်ကာများ ဘက်ကလည်း တစ်ဖက်စောင်းနင်း ပြောဆိုမှုများ ပိုမိုပြုလုပ်လာကြသည်။

အချို့သော ပဋိပက္ခများတွင် ကြားအနေနှင့် နေသူများပါ အသံတိတ်သွားရတော့သည်။ အလွန်ထိရှလွယ်သော ကိစ္စရပ်ပင်ဖြစ်သည်။ အစိုးရပိုင်း တာဝန်ရှိသူများ ဘက်မှနေ၍ ယခုကိစ္စရပ်ကို ကိုင်တွယ်ဖြေရှင်းရာတွင် များစွာသတိထားရန် လိုအပ်သည်ကို သတိပြုသင့်ပါသည်။ မစ္စတာကင်တားနားမှာ ကမ္ဘာ့ကုလသမဂ္ဂ အဖွဲ့ချုပ်ကြီးမှ ခန့်အပ်တာဝန်ပေးထားသော လူ့အခွင့်အရေး ကိုယ်စားလှယ် ဖြစ်သည်။ သာမန်အမြင်ဖြင့် ကြည့်၍မရပေ။ နိုင်ငံတကာသည် သူနှင့် ဆက်စပ်နေသည်။

ဦးဝီရသူနှင့် Time မဂ္ဂဇင်း ကိစ္စတုန်းကကဲ့သို့ အရပ်ဘက် ပြဿနာ တစ်ရပ်မဟုတ်။ အာဏာပိုင် အဖွဲ့တို့၏ ပြဿနာ ဖြစ်သည်ကို အထူးသတိပြုရပေမည်။

မြန်မာနိုင်ငံတွင်းရှိ ပြည်သူအများစုမှာ မစ္စတာကင်တားနားကို မွတ်ဆလင်များဘက်ပါသူဟု စွပ်စွဲကြသည်။ မစ္စတာကင်တားနားကိုလည်း အစ္စလာမ်ဘာသာဝင် ဖြစ်သည်ဟုပင် မှတ်ယူထားကြသည်။ ထို့ကြောင့် ပိုမို ဆူပွက်လွယ်ကြခြင်း ဖြစ်သည်။ သို့သော်လည်း အကယ်၍သာ ရဲတပ်ဖွဲ့ အကူအညီ မပါဘဲဆိုလျှင် ယင်း လူ ၂၀၀ ၏ ဒေါသအောက်တွင် ဆိုးဆိုးဝါးဝါး ဖြစ်သွားနိုင်မည်လား တွေးမိသည်။ နောက်တစ်ချက်မှာ ယင်းလူ ၂၀၀ ခန့် အုပ်စုမှာ တစ်ဦးဦး၏ စေခိုင်းမှုကြောင့် ဆိုလျှင်လည်း ရဲတပ်ဖွဲ့၏ အကူအညီမှာ အလဟဿ ဖြစ်ပေလိမ့်မည်။ ထို့အတူ အခြားနိုင်ငံများတွင် ဆန္ဒပြကြသကဲ့သို့ သတ်မှတ်နေရာတွင် စနစ်တကျ ဆန္ဒပြခြင်းမျိုး မဟုတ်ဘဲ ကားနားသို့ ဝိုင်းအုံလာကြခြင်း၊ ကားတံခါးကို ထုနှက်ကြခြင်းမှာ မြန်မာတို့အား ‘အကြမ်းဖက်သည်’ ဟူသည့် ခေါင်းစဉ်အောက်သို့ ကုလသမဂ္ဂ ကိုယ်စားလှယ် သက်သေတစ်ယောက် တိုးလာခြင်း ဖြစ်သွားသည်။ နိုင်ငံတကာ မီဒီယာများကလည်း ထိုသို့ ပုံဖော်ကြသည်။ ကုလသမဂ္ဂယာဉ်တန်း တိုက်ခိုက်ခံရသည် ဟူသတတ်။

ကုလသမဂ္ဂ လူ့အခွင့်အရေး ကိုယ်စားလှယ်၏ရှေ့တွင် မြန်မာတို့ မျက်နှာပျက်ခဲ့ရသည်မှာမူ အမှန်ဖြစ်သည်။ သို့သော်လည်း မစ္စတာကင်တားနား အနေနှင့် မြန်မာလူမျိုးတို့၏ စရိုက်သဘာဝကို ယခုထက် ပိုမိုနားလည်ရန် လိုအပ်သည်ကိုလည်း တွေ့မြင်ရသည်။ ကုလသမဂ္ဂအနေနှင့် လူ့အခွင့်အရေးဆိုင်ရာ ကိစ္စရပ်အတွက် နှစ်ဖက်လုံးကို မျှတစွာ ကြည့်မြင်နိုင်သော ဘက်လိုက်မှုကင်းသည့် ကိုယ်စားလှယ်တစ်ဦး ခန့်အပ်နိုင်မည်ဆိုပါက ပိုသင့်တော်မည်လား စဉ်းစားမိသည်။

မစ္စတာကင်တားနားကို မျက်နှာပျက်စရာ ဖြစ်ခဲ့ရခြင်းမှာ မကောင်းလှသော်လည်း မစ္စတာကင်တားနား အနေနှင့် လူ့အခွင့်အရေးများကို ယခုပုံစံအတိုင်း ဆက်လက်ကိုင်တွယ် ဆောင်ရွက်မည်ဆိုပါက မြန်မာနိုင်ငံ ပဋိပက္ခမှာ ပိုမိုကြီးထွားလာရန်သာ ရှိပါသည်။ ဒေါသဖြစ်နေသော၊ မကျေမနပ် ဖြစ်နေသော လူထုမှာ နောက်ကွယ်မှ စေခိုင်းသည့် လူတစ်စုကြောင့်ချည်း မဟုတ်ဘဲ ၎င်းတို့၏ ဓလေ့ထုံးစံအရ ဖြစ်ပေါ်လျက် ရှိသော စိတ်အခံကြောင့် ဖြစ်သည်ကို မစ္စတာကင်တားနား နားမလည်ပါက နားလည်နိုင်မည့် ကိုယ်စားလှယ်တစ်ဦး မြန်မာနိုင်ငံသို့ လာရောက် လေ့လာသင့်ကြောင်း မြန်မာအာဏာပိုင်များမှ တောင်းဆိုမှု ပြုသင့်သည်။ မြန်မာနိုင်ငံသည်လည်း ကုလသမဂ္ဂ အဖွဲ့ဝင် နိုင်ငံတစ်နိုင်ငံပင် ဖြစ်သောကြောင့် ယင်းအခွင့်အရေးရှိမည် ထင်ပါသည်။ မရှိပါကလည်း ရှိလာအောင် ကြိုးစားရမည် ဖြစ်သည်။ သို့မဟုတ်ပါက နိုင်ငံတကာတွင် မြန်မာနိုင်ငံ၏ ပုံရိပ်သည် အကြမ်းဖက်မှုကဲသည့် ပုံရိပ်ဖြစ်လာမည်ကို စိုးရိမ်ဖွယ် တွေ့မြင်နေရသည်။

ထို့ပြင် မြန်မာအာဏာပိုင်များဘက်မှ ယခုကိစ္စကို တုံ့ပြန်ကြရာတွင် ယုတ္တိတန်သော၊ ထိရောက်သော တုံ့ပြန်မှုများ ပြုလုပ်ရန် လိုအပ်သည်။ မစ္စတာကင်တားနားက ရိုဟင်ဂျာဟု မသုံးတော့ဘဲ မွတ်ဆလင် အသိုင်းအဝိုင်းဟု သုံးနှုန်းလာသည်မှာ မြန်မာနိုင်ငံရှိ မွတ်ဆလင် အားလုံးအတွက် ထိခိုက်စေသဖြင့် ဦးရဲထွဋ်က ကန့်ကွက်ခဲ့သည်။ ရဲများက လုံခြုံရေး အပြည့်အဝ မပေးဘဲ ၎င်းအနေနှင့် အကြောက်တရားနှင့် ရင်ဆိုင်ခဲ့ရပါသည်ဟု ပြောဆိုသွားသော မစ္စတာကင်တားနားအနေနှင့် ရိုဟင်ဂျာအစား မွတ်ဆလင် အသိုင်းအဝိုင်း ဖိနှိပ်ခွဲခြားခံနေရပါသည်ဟု ပြောခြင်းမှာ ရခိုင်ဒေသတစ်ခု တည်းကို ရည်ရွယ်ခြင်း မဟုတ်တော့ဘဲ မြန်မာနိုင်ငံတစ်ဝန်း မွတ်ဆလင်များ အားလုံးကို တမင်ရည်ရွယ် ပြောခြင်းပင် ဖြစ်သည့်အတွက် ဦးရဲထွဋ်၏ ကန့်ကွက်မှုမှာ အရာမရောက်ပေ။ မစ္စတာကင်တားနား၏ ကားကို အချို့က ဒေါသအလျောက် ထုနှက်ခဲ့သည်မှာ ကင်တားနား၏ ပြောစကားများအရ နိုင်ငံတကာမှ ယုံကြည်လောက်သည်ဟု ယူဆရပါသည်။ မြန်မာတို့သည် ခံစားချက်ကဲသော လူမျိုးများ ဖြစ်ကြပြီး မစ္စတာကင်တားနား၏ လုပ်ကိုင်ဆောင်ရွက်ပုံ လိုအပ်ချက်များကြောင့် အစကတည်းက မျက်မုန်းကျိုးနေကြသည့်အတွက် ထိုကဲ့သို့ ဖြစ်နိုင်သည်ဟုလည်း ယူဆရပါသည်။ ကားကို ထုနှက်သူများတွင် ကင်တားနားသို့ ‘အိတ်ဖွင့်ပေးစာ’ နှင့် ‘ကင်တားနား အလိုမရှိ တီရှပ်’ ပေးလို၍ ထုနှက်သူများ ပါမည်ဖြစ်သကဲ့သို့ ရဲသားများကလည်း ‘လူအုပ်ကို မနိုင်တော့ဘူး။ ကားမြန်မြန်ထွက်တော့’ ဟူသည့် သဘောဖြင့် ထုနှက်အချက်ပေးသည်လည်း ဖြစ်နိုင်ပါသည်။

မည်သို့ပင်ဖြစ်စေ ပြန်လည် ဖြေရှင်းသင့်သည်မှာ ‘မစ္စတာ ကင်တားနား၏ကားကို မထုနှက်ခဲ့ပါ။ နားလည်မှု လွဲခြင်းသာ ဖြစ်ပါသည်’ ဟု မဟုတ်ဘဲ ‘မစ္စတာကင်တားနား၏ လုပ်ကိုင်ဆောင်ရွက်မှုများ မမျှတဟု ထင်မြင်ယူဆသည့် ပြည်သူလူထုက ဆန္ဒထုတ်ဖော်ခဲ့ခြင်း ဖြစ်ကြောင်း၊ အချို့သောသူများက ၎င်းတို့၏ မကျေနပ်မှုကို ထုတ်ဖော်ပြသကြသော်လည်း ရဲ/လုံခြုံရေးများက ကာကွယ်ထိန်းသိမ်း စောင့်ရှောက်ပေးခဲ့ကြောင်း’ ဖြင့် ပါးနပ်လိမ္မာစွာ သတင်းထုတ်ပြန်ကြရမည် ဖြစ်သည်ဟု ထင်မြင်မိပါသည်။ 

Credit To The Voice Weekly

Read More »

သမိုင်းသင်ခန်းစာကို အကျိုးရှိအောင် ပြန်လည်အသုံးချဖို့လိုပါသည်



၂၀၁၃ ခုနှစ် သြဂုတ်လ ၆ ရက်၊ ၇ ရက်၊ ၈ ရက်နေ့များက ရန်ကုန်မြို့တော် မင်းဓမ္မလမ်းရှိ မြန်မာကွန်ဗင်းရှင်းစင်တာတွင် ကျင်းပပြုလုပ်ခဲ့သည့် ရှစ်လေးလုံးအရေးတော်ပုံ၊ ၂၅ နှစ်မြောက်(ငွေရတု) အထိမ်းအမှတ် အခမ်းအနားသို့ တက်ရောက်လာသော သမ္မတရုံးဝန်ကြီးဌာန ပြည်ထောင်စုဝန်ကြီး ဦးအောင်မင်းက "သမိုင်းကို ဖျောက်လို့မရဘူး၊ သမိုင်းက အားနည်းချက် တွေကို ဖော်ထုတ်ပြီး အားသာချက်တွေ လုပ်ဖို့က လက်ရှိလူသားတွေရဲ့ တာဝန်ပေါ့" ဟူ၍ ပြောကြားခဲ့ကြောင်း ၈.၈.၂ဝ၁၃ ရက်နေ့ထုတ် 7 Day Daily နေ့စဉ်သတင်းစာတွင် ဖတ်ရှုလိုက်ရပါသည်။

၁၉၆၂ ခုနှစ်က အာဏာသိမ်းပြီးနောက် ဗိုလ်ချုပ်ကြီးနေဝင်းသည် ၁၉၆၄ ခုနှစ်တွင် မြန်မာ့ဆိုရှယ်လစ် လမ်းစဉ်ပါတီကို ထောင်ပြီး ဥက္ကဋ္ဌ လုပ်ခဲ့သည်။ တစ်ပါတီစနစ်ကို ခိုင်မာစေသည့် အခြေခံဥပဒေ တစ်ရပ်ရေး ရေးဆွဲကာ ၁၉၇၃ ခုနှစ်တွင် ပြည်လုံးကျွတ် ဆန္ဒခံယူပွဲပြုလုပ်ပြီး ၁၉၇၄ ခုနှစ် ဇန်နဝါရီလ ၃ ရက်နေ့တွင်ပြဋ္ဌာန်းကာ ထိုနှစ် မတ်လ ၂ ရက်နေ့တွင် ပြည်သူ့ လွှတ်တော်နှင့် နိုင်ငံတော် အာဏာပိုင် အဖွဲ့အစည်းများ ပေါ်ပေါက်လာခဲ့ သည်။ ဦးနေဝင်းသည် နိုင်ငံတော်ကောင်စီဥက္ကဋ္ဌ အဖြစ် ရွေးချယ်တင်မြှောက် ခြင်းခံရသည်။ နိုင်ငံတော်ကောင်စီဥက္ကဋ္ဌသည် အခြေခံဥပဒေအရ နိုင်ငံတော် သမ္မတဖြစ်သည်။

ကျွန်တော်ဤသို့ အတိတ်သမိုင်းကို ရေးပြနေရခြင်းမှာ ပြည်သူတွေ လက်ခံသည်ဖြစ်စေ၊ လက်မခံသည်ဖြစ်စေ ဖွဲ့စည်းပုံ အခြေခံဥပဒေကို (ပြည်လုံးကျွတ် ဆန္ဒခံယူပွဲကို အသုံးချလျက်) အတည်ပြုချက် ရယူနိုင်ခြင်း၊ ပြည်သူ့လွှတ်တော် ကိုယ်စားလှယ်များက သဘောကျသည်ဖြစ်စေ၊ မကျသည် ဖြစ်စေ မိမိလိုချင်သော ရာထူးနေရာကို ထောက်ခံဆန္ဒမဲဖြင့် ရရှိအောင် ဆောင်ရွက်နိုင်ခြင်းတို့သည် ဦးနေဝင်း၏ ထူးခြားသောစွမ်းရည်များပင် ဖြစ်ပါသည်။ သူ့ကိုဆက်ခံသော နှောင်းလူများကလည်း သမိုင်းသင်ခန်းစာရယူ၍ ဆရာ့ခြေဖဝါး ထက်ကြပ်မကွာ လိုက်ပါနိုင်ကြသည်သာ ဖြစ်ပါသည်။

ယခုအခါ နိုင်ငံရေးပါတီများ၊ တိုင်းရင်းသားလက်နက်ကိုင် အဖွဲ့အစည်းများ၊ ၈၈ ခုနှစ် ဒီမိုကရေစီအရေးတော်ပုံကြီးကို စတင်ဦးဆောင် အကောင်အထည်ဖော် ခဲ့ကြသူများနှင့် ပြည်သူ့လွှတ်တော် ကိုယ်စားလှယ်များ ကိုယ်တိုင်ပင်လျှင် ပြင်မည်တကဲကဲ လုပ်နေကြသော ၂၀၀၈ ခုနှစ် ဖွဲ့စည်းပုံ အခြေခံဥပဒေကြီးမှာ ညောင်နှစ်ပင်ဆိုသော စခန်းသာကြီးတွင် အလွှာ ပေါင်းစုံမှ ကိုယ်စားပြုသူများ ပါဝင်လျက် ၁၃ နှစ်တိုင်တိုင် မူဝါဒများချမှတ်ကာ အခြေခံဥပဒေကိုမူ တစ်နှစ်ခန့်သာ တက်သုတ်ရိုက် ရေးဆွဲခဲ့ကြပြီး ပြည်လုံးကျွတ် ဆန္ဒခံယူပွဲကြီး ပြုလုပ်၍ ဆန္ဒမဲပေးသူများ၏ (၉၂ ဒသမ ၄၈) ရာခိုင်နှုန်း ထောက်ခံမဲဖြင့် အတည်ပြုခဲ့သည့် အခြေခံဥပဒေကြီးပင် မဟုတ်ပါလော။

ဤသို့ဆိုလျှင် ပြည်သူတွေ မနှစ်သက်သော ဤအခြေခံဥပဒေကြီးကို မည်သူတွေကများ မူဝါဒချမှတ် ရေးဆွဲခဲ့ကြပါသနည်း။ စားကောင်းသောက်ဖွယ်များ စားပြီး ဆေးဝါး အပါအဝင် အသုံးအဆောင်ပစ္စည်းများကို အလကားနီးပါးရသောဈေးဖြင့် ဝယ်ယူခွင့်ရကြသော ဝန်ထမ်းကိုယ်စားလှယ်များ၊ အလုပ်သမားကိုယ်စားလှယ်ဟု ဆိုသူများ၊ တောင်သူလယ်သမား ကိုယ်စားလှယ်ဟု ဆိုသူများ၊ အနုပညာရှင်၊ အတတ်ပညာရှင် ကိုယ်စားလှယ်များ၊ နိုင်ငံရေး ပါတီတို့၏ ကိုယ်စားလှယ်များ(NLD မပါ)၊ ထိုအချိန်က ငြိမ်းချမ်းရေး ရယူထားကြသည့် တိုင်းရင်းသား လက်နက်ကိုင် အဖွဲ့အစည်း အချို့မှ ကိုယ်စားလှယ်များ စသည့်၊ စသည့် ပုဂ္ဂိုလ်တို့ရေးဆွဲခဲ့ကြခြင်း မဟုတ်ပါလား။

အဆိုပါပုဂ္ဂိုလ်များအားလုံးကို ကျွန်တော်ကတော့ သမိုင်းတရားခံများဟု မသတ်မှတ်လိုပါ၊ သွားလေသူဆရာ၏ သမိုင်းသင်ခန်းစာကို အမိအရ ဆုပ်ကိုင်ရယူ၍ (မည်သည့် တပည့်သားမြေးကိုမှ စိတ်ချယုံကြည်ခြင်း မပြုတော့ဘဲ) မိမိတို့ လုပ်ဆောင်ခဲ့သမျှကို အပြည့်အဝ အကာအကွယ်ပေးရန်
(ပြင်ဆင်ရန်ခက်ခဲအောင် တမင်ပြုလုပ်ထားသော) အခြေခံဥပဒေကြီး၏ အကာအကွယ်ကို အရယူခဲ့ခြင်းမှာ ဆရာ့ထက် လက်စောင်းထက်စွာ သမိုင်းသင်ခန်းစာကို လက်တွေ့ ကျင့်သုံးခြင်းပင်ဖြစ်ပါသည်။

ထို့ပြင် “အကြံတူ နောက်လူသာစမြဲ” ဟူသောဆိုရိုးစကားအတိုင်း မိမိကိုယ်တိုင် အာဏာကို မရယူတော့ဘဲ အာဏာရှိသူတို့၏နောက်ဝယ် အခြေခံဥပဒေ၏ အကာအကွယ်ဖြင့် ငြိမ်းအေးစွာနေထိုင်နိုင်ခြင်းမှာ သမိုင်းသင်ခန်းစာကို ရယူအသုံးချခြင်း မဟုတ်ပါဟူ၍ မည်သူက ပြောနိုင်ပါမည်နည်း။ အခြေခံဥပဒေသာမက ၂၀၁၀ ပြည့်နှစ်တွင် ပြုလုပ်ခဲ့သော ရွေးကောက်ပွဲကား ၁၉၉၀ ပြည်နှစ်ရွေးကောက်ပွဲမှ ရရှိသော သမိုင်းသင်ခန်းစာကို အပြည့်အဝ ရယူအသုံးချခဲ့ခြင်း မှာကား သြချလောက်ပါပေသည် ဟူ၍ပဲ ဆိုလိုက်ပါရစေ။ အဘယ်ကြောင့် ဤသို့ပြောရသနည်းဆိုသော် ကျွန်တော်ကိုယ်တိုင်ပင်လျှင် မြို့နယ်ကော်မရှင်အဖွဲ့ ဥက္ကဋ္ဌ တာဝန်ကို ထမ်းဆောင်ခဲ့ရသည့် အတွက်ဖြစ်ပါသည်။

၁၉၉၀ ရွေးကောက်ပွဲအတွက် ရွေးကောက်ပွဲ ဥပဒေ၊ နည်းဥပဒေနှင့် ကော်မရှင်ဥပဒေတို့ကို နဝတ အစိုးရက ပြဋ္ဌာန်းပေးပါသည်။ ကျွန်တော်တို့အား အဆိုပါဥပဒေများကို စနစ်တကျ ကိုင်တွယ်ကျင့်သုံး ဆောင်ရွက်နိုင်စေရန် သင်တန်းပို့ချသဖြင့် ဗဟိုဝန်ထမ်းတက္ကသိုလ်(ဖောင်ကြီး) တွင် သင်တန်း တက်ရပါသည်။ ထိုစဉ်က ကော်မရှင်ဥက္ကဋ္ဌကြီး ဦးဘဌေးနှင့် အဖွဲ့ဝင်များဖြစ်သည့် ဦးစန်းမောင်၊ ဆရာချယ် စသူတို့ကလည်း ရွေးကောက်ပွဲကို သန့်ရှင်းမျှတစွာ ကျင်းပပေးမည် ဖြစ်ကြောင်းနှင့် နဝတအစိုးရကလည်း ရွေးကောက်ပွဲကို လွတ်လပ်၍တရားမျှတသော ရွေးကောက်ပွဲ ဖြစ်စေရမည် ဟူ၍ ကမ္ဘာသို့ ကြေညာထားပါသည်။

နဝတ အစိုးရက ဤကဲ့သို့ရဲဝံ့စွာ စိန်ခေါ်ရဲခြင်းမှာ ၄င်းတို့ရရှိခဲ့သော ထောက်လှမ်းရေး သတင်းများအရ “မဆလ” ပါတီတစ်ဖြစ်လဲ “တစည” ပါတီ သည် အနိုင်ရရှိရန် အခြေအနေကောင်းသည် ဟူ၍ သိရှိထား သည့်အတွက်ကြောင့် ဖြစ်ပါသည်။ ထိုအချိန်က NLD ပါတီဝင်များကို နှိပ်ကွပ်ခြင်း၊ ဖမ်းဆီး ထောင်ချခြင်းများ ပြုလုပ်၍ ဒေါ်အောင်ဆန်းစုကြည် ကိုလည်း အပုပ်ချဆောင်းပါးများ ရေးသားနေပြီး ရွေးကောက်ပွဲ ဝင်ခွင့်မပြုပါ။ ဒေါ်အောင်ဆန်းစုကြည်ကို ရွေးကောက်ပွဲဝင်ခွင့် ပြုသော ရန်ကုန်မြို့နယ်စု ကော်မရှင်အဖွဲ့ခွဲဥက္ကဋ္ဌ ကိုလည်း အဝေးတစ်နေရာသို့ ပြောင်းပို့ခဲ့ပါသည်။ တိုင်းကော်မရှင်အဖွဲ့ ခွဲက ပယ်ချမှသာလျှင် ဇာတ်လမ်းပြတ်ပါသည်။

မြန်မာတွင်သာမက ကမ္ဘာတွင်ပါ ကျော်ကြား၍ အလေးထား၊ ပြောကြား၊ ရေးသားခဲ့ကြသော ၁၉၉၀ ပြည့်နှစ် ရွေးကောက်ပွဲကြီးကား ကျွန်တော့် ဘဝအတွက်ပါ အမှတ်တရ များစွာရှိသဖြင့် ထိုနေ့ကဖြစ်စဉ်တစ်ခုကိုဖြင့် မှတ်တမ်းပြု ဖော်ပြအပ်ပါသည်။ မင်္ဂလာတောင်ညွန့်မြို့နယ်၊ ရပ်ကွက် အသီးသီးရှိ မဲရုံများတွင်မဲပေးသည့် အခြေအနေများကို တစ်နေကုန် လိုက်လံ စစ်ဆေး ကြည့်ရှုရာတွင် ရပ်ကွက်ကော်မရှင်အဖွဲ့ဝင်များ၊ မဲရုံအဖွဲ့ဝင်များ သည် ကျွန်တော်တို့ပြောဆို မှာကြားထားသည့်အတိုင်း လွတ်လပ်၍ တရားမျှတသော ရွေးကောက်ပွဲကြီးအဖြစ် သမိုင်းမှတ်တမ်း ပြုနေကြသည်မှာ များစွာဂုဏ်ယူဖွယ် ကောင်းပါသည်။ ညနေမဲရုံပိတ်သည့် အချိန်တွင်တော့ ကျွန်တော်တို့ မြို့နယ်ကော်မရှင် အဖွဲ့ဝင်များသည် သိမ်ဖြူလမ်း၊ လမ်းငါးခွဆုံ မီးပွိုင့်အနီးရှိ မြို့နယ်ကော်မရှင် အဖွဲ့ ခွဲရုံးတွင် ရပ်ကွက်/မဲရုံအသီးသီးမှ ရောက်ရှိလာသော မဲစာရင်းများကို ကျွန်တော်ကိုယ်တိုင် ဖွင့်ဖောက်စစ်ဆေး ရေတွက်ရာတွင် အမျိုးသားဒီမိုကရေစီအဖွဲ့ချုပ်မှ ကိုယ်စားလှယ်နှစ်ဦးမှာ ပါတီအသီးသီးမှ ကိုယ်စားလှယ်များနှင့် ပြည်သူများ၏ ရှေ့မှောက်တွင် ပြတ်သားစွာ အနိုင်ရရှိသွားပါသည်။

၁၉၉၀ ပြည့်နှစ် ရွေးကောက်ပွဲတွင် သန့်ရှင်း၊ မျှတ၊ လွတ်လပ်သော ရွေးကောက်ပွဲ၏ ရလဒ်အရ ဒေါက်တာအောင်ခင်ဆင့်နှင့် ဒေါက်တာ သန်းအောင်တို့မှာ အမျိုးသားဒီမိုကရေစီအဖွဲ့ချုပ်ကို ကိုယ်စားပြု၍ မင်္ဂလာတောင်ညွန့်မြို့နယ် မဲဆန္ဒနယ်အမှတ် ၁ နှင့် အမှတ် ၂ တို့မှ ရွေးချယ်ခံ ရသော လွှတ်တော်ကိုယ်စားလှယ်များ ဖြစ်ကြပါသည်။

ကျွန်တော်သည် လွတ်လပ်၍ တရားမျှတသော ရွေးကောက်ပွဲတစ်ခုကို အောင်မြင်စွာ ကျင်းပပေးနိုင်ခဲ့သော ကော်မရှင်အဖွဲ့ခွဲ ဥက္ကဋ္ဌ တစ်ဦးအနေဖြင့် တက်ကြွသောခြေလှမ်းများဖြင့် မြို့တော်ခန်းမရှိ မြို့နယ်စု ကော်မရှင် အဖွဲ့ခွဲရုံးသို့ ရွေးကောက်ပွဲရလဒ်များကို သွားရောက် ပို့ဆောင်ခဲ့ပြီးနောက် ရုံးသို့ပြန်ကာ မြန်မာ့အသံက ရွေးကောက်ပွဲရလဒ်များ ကြေညာသည်ကို နားထောင်နေမိပါသည်။

ပထမဆုံးကြေညာသည်က ဆိပ်ကမ်းမြို့နယ်မှ ရွေးကောက် တင်မြှောက်ခြင်းခံရသည့် အမျိုးသားဒီမိုကရေစီ အဖွဲ့ချုပ်မှ လွှတ်တော်ကိုယ်စားလှယ် ဒေါ်စန်းစန်း၏အမည် ဖြစ်သည်။ ဆက်လက်၍ ကြေညာသွားရာ ၄င်းပါတီမှပင် ဖြစ်ပြီး လေးငါးယောက် ကြေညာပြီးသောအခါ ဆက် လက်ကြေညာခြင်းမပြုဘဲ ရပ်သွားပါသည်။ ကျွန်တော့်မြို့နယ်မှ အမည်စာရင်းကို အချိန်မီ ပေးပို့နိုင်သော်လည်း မကြေညာသဖြင့် ကျွန်တော့်မှာနားမလည် နိုင်အောင်ဖြစ်ရသည်။ နောက်မှကြားသိရသည်မှာ မမျှော်လင့်ထားသော ရလဒ်များ(အထူးသဖြင့် မှော်ဘီ၊ မင်္ဂလာဒုံ စသည့် မြို့နယ်များမှာပင်) ရရှိခဲ့သဖြင့် စစ်ဗိုလ်ချုပ်ကြီးများ ဒေါသူပုန်ထပြီး နားထောင်နိုင်စွမ်း မရှိတော့ သဖြင့် ရပ်နားလိုက်ရခြင်းဖြစ်ပါသည်။ နောက်နေ့နံနက် နေ့စဉ်ထုတ် သတင်းစာများမှပင် ဖတ်ရှုရပါတော့သည်။

ဤသမိုင်းသင်ခန်းစာကို နအဖ အစိုးရသည် ကောင်းစွာ အသုံးချနိုင်ခဲ့ ပါသည်။ ၁၉၉၀ ပြည့်နှစ်က ရွေးကောက်ပွဲကို တရားမျှတစွာကျင်းပပေးခဲ့သူ အများစုမှာ အငြိမ်းစား ယူကြပါပြီ၊ ကျန်သူများမှာ အမှည့်ခြွေ ခြွေခံခဲ့ ကြရပါသည်။ ၄င်းတို့၏နေရာ များတွင် မိုးကျရွှေကိုယ် တို့ဖြင့် အစားထိုးခဲ့ပါသည်။ ၂၀၁၀ ရွေးကောက်ပွဲ ကျင်းပချိန်တွင် ပြည်ခိုင်ဖြိုး အသင်းတဖြစ်လဲ ပါတီသည် ယခင်အသင်းဝင် ဆရာ/ဆရာမ များအပေါ်တွင် သြဇာလွှမ်းမိုးလျက်ပင် ရှိပါသေးသည်။ ၄င်းတို့ကို မဲရုံမှူးကဲ့သို့ တာဝန်များပေးပါသည်။ ရယက အဖွဲ့ဝင်များမှာ ထိုအချိန်က ယင်းပါတီ၏ ပါတီဝင်များဖြစ်ကြပါသည်။ အချို့ကို ရပ်/ကျေး ကော်မရှင် အဖွဲ့ဝင်များအဖြစ် တာဝန်ပေးအပ်ပါသည်။

ရွေးကောက်ပွဲ ကျင်းပသောနေ့တွင် သွားရောက် မဲပေးသောအခါ ကြုံတွေ့ရသည်များမှာ အများသိပြီး ဖြစ်ကြသည့်အတိုင်း မဲဆန္ဒရှင်စာရင်း တွင် မိမိအမည်မပါရှိခြင်း၊ ပါရှိသော်လည်း တစ်စုံတစ်ယောက်က မိမိကိုယ်စား မဲပေးပြီးဖြစ်နေခြင်း၊ ခရီးလည်းမသွား၊ ဆေးရုံလည်းမတက်၊ ထောင်နန်းစံရသူလည်း မဟုတ်ပါဘဲ ကြိုတင်မဲပေးပြီး ဖြစ်နေခြင်း စသည့် ထူးဆန်းအံ့သြဖွယ်ရာ အဖြစ်ဆန်းများကို အများသူငါ ကြုံတွေ့ခဲ့ကြရ သည်ဆိုလျှင် ယုံတမ်း စကားဟု ဆိုကြပါမည်လား...။

ထိုစဉ်က ကျွန်တော်နေထိုင်ခဲ့သည့် ရွှေပြည်သာမြို့နယ် တွင်လည်း အလားတူပင် ကြုံတွေ့ခဲ့ရပါသည်။ ရွေးကောက်ပွဲ ဥပဒေ၊ နည်းဥပဒေများ အရလည်းကောင်း၊ ရွေးကောက်ပွဲ မတိုင်မီ ကော်မရှင်ဥက္ကဋ္ဌနှင့် တာဝန်ရှိသူ များ၏ ပြောကြားချက်များအရ လည်းကောင်း ဆန္ဒမဲလက်မှတ်များ ရေတွက်သည့် အချိန်တွင် မဲဆန္ဒရှင်များအနေနှင့် လာရောက်ကြည့်ရှု နိုင်သည်ဟု သိရှိထားသဖြင့် သွားရောက် ခဲ့ပါသည်။ သို့ရာတွင် မဲရုံအပေါက်နားသို့ပင် ကပ်၍မရခဲ့ဘဲ ဆက်နေလျှင် မဲရုံကိုနှောင့်ယှက်မှုဖြင့်
အဖမ်းခံရတော့မည့် အမူအရာများကြောင့် အလျင်အမြန်ပင် ပြန်လှည့်ခဲ့ပါသည်။ ၁၉၉၀ ပြည့်နှစ်က တရားမျှတသော၊ လွတ်လပ်သော ရွေးကောက်ပွဲ တစ်ခုကို အောင်မြင်စွာ ကျင်းပပေးခဲ့သော ကော်မရှင်အဖွဲ့ခွဲ ဥက္ကဋ္ဌတစ်ဦး၏ တရားမျှတမှုမရှိသော၊ လွတ်လပ်ပွင့်လင်းမှု မရှိသော ရွေးကောက်ပွဲတစ်ခု၏ အနီးကပ် အတွေ့အကြုံပင် ဖြစ်ပါသည်။

ဆန္ဒမဲလက်မှတ်များ ရေတွက်ပြီးစီး၍ ရွေးကောက်ခံရသူများ၏ အမည်စာရင်းများ ထွက်ပေါ်လာ သောအခါ အံ့အားသင့်ရသူတို့ကား မဲဆန္ဒရှင်များပင် ဖြစ်ကြပါသည်။ မိမိတို့လူအများစု ဆန္ဒပြုခဲ့ကြသော ပါတီမှ ကိုယ်စားလှယ်၏ အမည်နှင့် ရွေးချယ်ခံရသည်ဟူ၍ ကြေညာခြင်းခံရသူတို့၏ အမည်မှာ ကွဲလွဲနေသော်လည်း မည်သို့မျှစောဒကတက်ရန် မတတ်နိုင်သော အခြေအနေပင် မဟုတ်ပါလား။ အချို့မြို့နယ်များ ဆိုလျှင် ညကကြေညာစဉ်က ရွေးချယ်ခံရသူတစ်ဦး ဖြစ်ပြီး နောက်တစ်နေ့ နံနက်တွင် ထပ်မံကြေညာသောအခါ ရွေးကောက်ခံရသူ အမည်တစ်မျိုး ဖြစ်နေခြင်းကား အံ့သြကုန်နိုင်ဖွယ် ဖြစ်ရပ်များသာတည်း။

၂၀၀၈ ခုနှစ်အခြေခံဥပဒေ မဲပေးစဉ်ကလည်း မိသားစု လေးဦးရှိသည့် ကျွန်တော်တို့အိမ်တွင် ဇနီးတစ်ဦးတည်း ရှိနေစဉ် ရပ်ကွက်ကော်မရှင် အဖွဲ့ခွဲဝင်များ ရောက်ရှိလာပြီး လေးဦးစလုံးအတွက် ကြိုတင်မဲများ ထည့်ခိုင်းသဖြင့် ဇနီးဖြစ်သူက ဖြည့်စွက်၍ လက်မှတ်ရေးထိုး ပေးလိုက်ရပါသည်။ ကျွန်တော်က ဇနီးဖြစ်သူကို “မင်းက ငါ့ကိုယ်စား ဘာဖြစ်လို့ ထောက်ခံဆန္ဒမဲ ပေးလိုက်ရတာလဲ” ဟူ၍ပြောသောအခါ ၄င်းက“သူတို့က ဝိုင်းပြီးကြည့်နေ ကြတာ ကျွန်မက သူတို့ရှေ့မှာ ဘယ်လိုလုပ်ပြီး ကန့်ကွက်မဲပေးလို့ ဖြစ်မလဲ” ဟု ပြန်ဖြေပါသည်။ ထို့ကြောင့် ကျွန်တော်သည် ၂၀၀၈ ဖွဲ့စည်းပုံအခြေခံ ဥပဒေကို မထောက်ခံပါ၊ သို့သော် ကျွန်တော် ထောက်ခံဆန္ဒမဲ ပေးခဲ့ရပါသည်။

ထို့ကြောင့် သူတို့တစ်တွေ (အာဏာရှင်ဘက်တော်သားတွေ) သမိုင်း သင်ခန်းစာကို ကောင်းကောင်း ယူတတ်ကြသလို ဒီမိုကရေစီ ဘက်တော်သားများ အနေနှင့်လည်း သမိုင်းသင်ခန်းစာများကို ကောင်းစွာ ယူတတ်ကြဖို့ လိုပါသည်။

ရှစ်လေးလုံး အရေးတော်ပုံ ငွေရတု အခမ်းအနား ဒုတိယနေ့တွင် ဒေါ်အောင်ဆန်းစုကြည် တက်ရောက်၍ အမှာစကား ပြောကြားရာ၌ “သမိုင်းကို စနစ်တကျ လေ့လာရန် လိုကြောင်း၊ အတိတ်ဖြစ်ရပ်များအပေါ် သုံးသပ်ဖော်ထုတ်သည့် သင်ခန်းစာများသည် နိုင်ငံအတွက် အကျိုးရှိသော သင်ခန်းစာ ဖြစ်ရန်လိုကြောင်း၊ သမိုင်းစိတ်ဓာတ်သည် အပြုသဘောဆောင်ရန် လိုကြောင်း၊ မည်သည့်စိတ်ဓာတ်မဆို အပြုသဘော မဆောင်ပါက နိုင်ငံအတွက် အကျိုးမရှိကြောင်း” စသည်ဖြင့် ပြောကြားသွားသည်ကို ၉.၈.၂၀၁၃ ရက်နေ့ထုတ် ကြေးမုံသတင်းစာတွင် ဖတ်ရှုလိုက်ရပါသည်။
ထို့ကြောင့် အထက်တွင် ရေးသားဖော်ပြချက်များအရ သမိုင်းသင်ခန်းစာများကို ရယူခြင်း၊ ထိုသို့ရယူထားသော သင်ခန်းစာများမှ အားနည်းချက်များကို ပြန်လည်ပြုပြင်၍ အသုံးပြုခြင်းသည် နိုင်ငံတော်အတွက် အကျိုးဖြစ် မဖြစ်နှင့် မည်သူတွေ အကျိုးရှိသွားကြသည်ကို စာရှုသူများ ပညာဉာဏ်ကြီးစွာဖြင့် သုံးသပ်ကြရန် ဖြစ်ပါသည်။

ထို့ကြောင့် ကျွန်တော်တို့သည် သမိုင်းထဲမှ သင်ခန်းစာများကို ရယူခြင်း၊ သုံးသပ်ခြင်း၊ သုံးသပ်ချက်များအရ တွေ့ရှိရသော အားနည်းချက်များကို အားသာချက်အဖြစ် ပြန်လည် အကောင်အထည်ဖော် ဆောင်ရွက်ကြ သည့်အခါ မိမိအကျိုး၊ မိမိပါတီ/အဖွဲ့အစည်း၏ အကျိုးကိုသာ ရှေ့တန်းတင်ခြင်း မပြုကြပဲ နိုင်ငံတော်နှင့် ပြည်သူအကျိုးကိုလည်း ကိုယ်စွမ်း/ဉာဏ်စွမ်း ရှိသရွေ့ ဆောင်ရွက်သွားကြရမည် ဖြစ်ပါသည်။

(သိန်းထက်အောင်)

Credit To The Voice Weekly
Read More »

David Proctor (Chairman, Consilium Co.,Ltd) နှင့် တွေ့ဆုံခြင်းWritten by အငယ်ထွေး



'အခုဆိုရင် အိမ်ခြံမြေ ဈေးနှုန်းတွေ မြင့်တက်နေတာက ရန်ကုန်တစ်မြို့တည်း ပြဿနာ မဟုတ်တော့ဘူး။ တစ်နိုင်ငံလုံး အတိုင်းအတာနဲ့ ဖြစ်လာတာ'
မြန်မာနိုင်ငံ၌ Housing survey ကို ၁၉၅၂ ခုနှစ် ဦးနုလက်ထက်တွင် အိမ်ပေါင်း ၂၀၀၀၀ ကျော်ကို စစ်တမ်းကောက်ယူ၍ ပြုလုပ်ခဲ့သော်လည်း နောက်ပိုင်း ကာလများတွင် အစိုးကဏ္ဍမှ လုပ်ယူနိုင်မှု မရှိခဲ့ဟု သိရသည်။ သို့သော် လက်ရှိအစိုးရသစ် လက်ထက်တွင် private sector မှ ကောက်ယူမှုများ ရှိနေပြီး တစ်လောကပင် JICA မှ အိမ်ပေါင်း ၁၀၀၀၀ ကျော်ကို ပြုလုပ်ခဲ့သည်ဟု သိရသည်။ အထူးသဖြင့် ရန်ကုန်မြို့သည် မြို့ပြရွှေ့ပြောင်း နေထိုင်မှုကြောင့် လူဦးရေထူထပ် များပြားလာသည့်အပြင် အိမ်ခြံမြေ ဈေးကွက်တွင် ၀င်ရောက် ကစားမှုများကြောင့် အိမ်ခြံမြေ အပါအ၀င် တိုက်ခန်းမှအစ လူနေအဆောက်အအုံ များအားလုံး ဈေးနှုန်းများ မြင့်တက်နေသောကြောင့် ယင်းပြဿနာကို ဖြေရှင်းပေး နိုင်ရန်လည်း လိုအပ်လျက် ရှိပေသည်။ အိုးအိမ်မှ နှစ်ရှည်ချေးငွေနှင့် ရောင်းပေးရန် ရည်ရွယ်ချက်ရှိသည် ဆိုသော်လည်း မည်သည့်အချိန်တွင် အကောင်အထည် ပေါ်မည်ကို ပြောရခက်နေသေး သကဲ့သို့ မည်သည့် အတိုင်းအတာအထိ ဖြေရှင်းနိုင်မည်ကိုလည်း မပြောနိုင်သေးပေ။ ယင်းသို့ ချေးပေးရန်ပင် အတိုးနှုန်းကို ထည့်သွင်း တွက်ချက်ပါက မူလတန်ဖိုးထက် များစွာမြင့်သွား နိုင်သည့်အတွက် အခက်အခဲ ရှိနေကြောင်းလည်း သိရသည်။ ၁၉၅၀ ခုနှစ်တွင် ရန်ကုန်မြို့၌ လူဦးရေ ၁၈ သန်းရှိခဲ့ပြီး ထိုစဉ်က လူတစ်ယောက်နှင့် မြေကြီးအချိုးအစား အဆင်ပြေ နေသော်လည်း လက်ရှိအချိန်တွင် ပြည်သူများ မြို့ပြရွှေ့ပြောင်း နေထိုင်မှု၊ လူဦးရေ တိုးတက်လာမှုကြောင်နှင့် မြေယာပေါ်လစီ ပိုင်းဆိုင်ရာ အားနည်းချက်များကြောင့် ပြည်သူများ အိုးပိုင်အိမ်ပိုင် နေနိုင်ရေးမှာ အတော်ပင် ခက်ခဲသော ပြဿနာတစ်ခု ဖြစ်နေသည့် အတွက် မြန်မာနိုင်ငံတွင် housing survey လာရောက် ပြုလုပ်နေသော ကုမ္ပဏီတစ်ခုမှ CEO တစ်ဦးနှင့် တွေ့ဆုံမေးမြန်းမှုအား ရေးသားဖော်ပြ လိုက်ပါသည်။
မေး - မြန်မာနိုင်ငံရဲ့ housing နဲ့ ပတ်သက်ပြီး သုတေသန လုပ်နေတယ်လို့ သိရတယ်။ ကုမ္ပဏီရဲ့ background လေးနဲ့ပတ်သက်ပြီး ပြောပြပေးပါလား။
ဖြေ - ကျွန်တော့် အနေနဲ့ကတော့ ဘဏ်လုပ်ငန်းမှာ နှစ်ပေါင်း ၃၀ လောက် လုပ်ကိုင်ခဲ့တဲ့ Banker တစ်ယောက်ပါ။ အေးရှားမှာ ရှိနေတဲ့ နိုင်ငံခြားဘဏ် အချို့ရဲ့ CEO တစ်ယောက်လည်း ဖြစ်ပါတယ်။ အရှေ့အလယ် ပိုင်းမှာလည်း ဘဏ်လုပ်ငန်းတွေ တည်ထောင်ထားပါတယ်။ အခုတော့ အဲဒီဘက်မှာ ဘဏ်တွေကို အကြံပေးတဲ့ လုပ်ငန်းကို ရပ်နားထားပြီးတော့ မြန်မာနိုင်ငံကို ကုန်ခဲ့တဲ့ နှစ်နှစ်လောက်က ရောက်လာခဲ့တာပါ။ စင်ကာပူနဲ့ သြစတြေးလျမှာလည်း ရုံးခွဲတွေ ဖွင့်ထားပါတယ်။
မေး - အခုရန်ကုန်မြို့ရဲ့ အိမ်ရာအနေအထားတွေနဲ့ ပတ်သက်ပြီး လေ့လာနေတယ်ဆိုတော့ ယေဘုယျအားဖြင့် ဘယ်လိုအနေအထားမျိုးတွေ တွေ့ရှိရပါသလဲ။
ဖြေ - မြန်မာနိုင်ငံရဲ့ လက်ရှိအနေအထားကတော့ Housing နဲ့ ပတ်သက်ပြီး ပြဿနာအချို့ တွေ့နေရတယ်။ အစိုးရအနေနဲ့ ဒါကိုကိုင်တွယ်ဖို့ ကျတော့လည်း အခက်အခဲ ရှိနေတာ တွေ့ရတယ်။ ဘာကြောင့်လဲဆိုတော့ ဒီမှာက Private sector တို့က အစိုးရကို မကူနိုင်ဘူး။ ဥပမာ ရန်ကုန်ကွန်ဒို ဈေးကွက်ကို လေ့လာတယ် ဆိုပါတော့ အရမ်းဈေးကြီး နေတာကို တွေ့ရတယ်။ ဒါတွေကို အရမ်းငွေကြေး ချမ်းသာတဲ့ လူတွေနဲ့ နိုင်ငံခြားသားတွေ အတွက်ပဲ ဖြစ်မယ်။ ဒီလို ကွန်ဒိုတွေ ဆောက်ပေမယ့်လည်း ဒါဟာ Housing issues တွေကို ဖြေရှင်းနိုင်မယ့် နည်းလမ်းတစ်ခုတော့ မဟုတ်ပါဘူး။ နောက်တစ်ခုက ဘာလဲဆိုတော့ မြန်မာနိုင်ငံမှာ သုံးနေတဲ့ အသုံးအနှုန်းတွေပေါ့။ တချို့က affordable housing လို့ သုံးတယ်။ တချို့က low cost housing လို့ သုံးနေတယ်။ အမှန်က ဒီနှစ်ခုက မတူပါဘူး။ တချို့က social housing လို့ ပြောတယ်။ ရှုပ်ထွေးနေတယ်။ ဒါတွေကို ရှင်းရှင်းလင်းလင်း ဖြစ်စေချင်တယ်။ ကျွန်တော့် အမြင်ကတော့ ဘယ်နိုင်ငံမှာမဆို လူမှုအဖွဲ့အစည်းမှာ ရှင်သန်နေတဲ့ လူတွေ အကုန်လုံးတော့ ကိုယ်ပိုင်အိုးအိမ် မ၀ယ်နိုင်ကြပါဘူး။ ၀ယ်နိုင်တဲ့သူ ရှိသလို မ၀ယ်နိုင်သူလည်း ရှိတယ်။ ဒါကြောင့် ဘယ်နိုင်ငံရဲ့ အစိုးရမဆို အမေရိကန်ပဲဖြစ်ဖြစ်၊ သြစတြေးလျပဲဖြစ်ဖြစ်၊ မြန်မာနိုင်ငံပဲဖြစ်ဖြစ်၊ လူတွေကို ကြည့်ရှုစောင့်ရှောက်ရဖို့ တာဝန်ရှိပါတယ်။ ဒါပေမဲ့ တစ်ပြိုင်နက်တည်းမှာပဲ Private sector တွေကလည်း အိုးပိုင်အိမ်ပိုင်နဲ့ မနေနိုင်တဲ့ သူတွေကို ကြည့်ရှုစောင့်ရှောက်ဖို့ တာဝန်ရှိပါတယ်။ ချမ်းသာတဲ့ လူတွေအတွက်တင် ပြောတာမဟုတ်ပါဘူး။ အခြားအလွှာတွေ ရှိပါတယ်။ ဒါကြောင့် ကျွန်တော်တို့ ပထမဦးဆုံး အနေနဲ့ ဘာတွေဆုံးဖြတ်လဲဆိုတော့ affordable housing ဆိုတဲ့အပေါ်မှာ သီခြား focus လုပ်သင့်တယ်လို့ ဆုံးဖြတ်တယ်။ နောက်တစ်ခုက low cost housing ပေါ့။ သူကတော့ ကိုယ်ပိုင်အိမ်ဝယ်ဖို့ကို မတတ်နိုင်တဲ့ သူတွေပေါ့။ မြန်မာနိုင်ငံမှာက လေလောဆယ်မှာ private sector က ဒါတွေကို ၀င်မလုပ်နိုင်သေးဘူး။
မေး - ၀င်မလုပ်နိုင်ဘူး ဆိုတာက အဓိက ဘာကြောင့်ဖြစ်မလဲ။
ဖြေ - ဘာကြောင့်လဲဆိုတော့ ဘဏ်လုပ်ငန်းနဲ့လည်း ဆိုင်တယ်။ ဒီမှာက ဘဏ်လုပ်ငန်းတွေရဲ့ ဖွံ့ဖြိုးတိုးတက်မှုဟာ အကန့်အသတ်နဲ့ ဖြစ်နေတာပါ။ ဒါကြောင့် ဒီမှာ ကိုယ်ပိုင်အိမ် ၀ယ်ဖို့ဆိုတာ အရမ်းခဲယဉ်းတယ်။ ဖြစ်နေတာက ဘဏ်လုပ်ငန်း အားနည်းတဲ့ အချိန်မှာပဲ အိမ်ခြံမြေ ဈေးတွေကလည်း ခေါင်ခိုက်နေတယ်။ ဈေးကစားလို့လို့ ပြောကြတာတွေ ရှိတယ်။ မြန်မာပြည်မှာ ဈေးကစားမှုတွေ ရှိခဲ့တဲ့အတွက် ဒီလိုတက်လာတယ် ဆိုတာလည်း မှန်ပါတယ်။ ဒါကတစ်ပိုင်းပေါ့။အဲဒီကနေ တစ်ဆင့် အခုလို နိုင်ငံခြား ရင်းနှီးမြှုပ်နှံမှုတွေ ၀င်ရောက်လာတဲ့ အချိန်မှာ ပိုပြီးဈေးကောင်း လာတာပါ။ အခုဆိုရင် အိမ်ခြံမြေဈေးနှုန်းတွေ မြင့်တက်နေတာက ရန်ကုန်တစ်မြို့တည်း ပြဿနာ မဟုတ်တော့ဘူး။ တစ်နိုင်ငံလုံး အတိုင်းအတာနဲ့ ဖြစ်လာတာ။ ဒါကြောင့် ကျွန်တော်တို့ ဆုံးဖြတ်တာက ပထမဦးဆုံး အနေနဲ့ မြန်မာနိုင်ငံမှာ affordable housing တွေ ဖြစ်လာဖို့ အကူအညီ ပေးသင့်တယ်လို့ မြင်လာတယ်။
မေး - မြန်မာနိုင်ငံရဲ့ housing ကဏ္ဍမှာ နိုင်ငံခြား ရင်းနှီးမြှုပ်နှံမှုတွေ ၀င်လာနိုင်တဲ့ အနေအထားနဲ့ ပတ်သက်လို့ကော။
ဖြေ - နိုင်ငံခြားသားတွေနဲ့ ပတ်သက်ရင် တူညီတဲ့ complaint နှစ်ချက်ရှိတယ်။ တစ်ခုက မြေဈေးတွေ မေးတယ်။ နားထောင်ပြီး လန်ပြေးတယ်။ နောက်တစ်ခုက နိုင်ငံခြားသားတွေက preconceived idea နဲ့ လာကြတယ်။ ဒီလိုပြဿနာမျိုးတွေကို သူတို့ ဗီယက်နမ်မှာလည်း ကြုံရတယ်။ ကမ္ဘောဒီးယားမှာလည်း ကြုံရတယ်။ သူတို့က ပြောတတ်ကြတယ်။ ဒါပေမဲ့ မြန်မာက သီးခြား အနေအထားတစ်ရပ် ဖြစ်နေတယ်။ ဥပမာ ရန်ကုန်နဲ့ မန္တလေးနဲ့ မတူသလို ပုသိမ်နဲ့ မန္တလေးနဲ့လည်း မတူပါဘူး။ ဒါကြောင့် ဒီပြဿနာကို အဖြေရှာရင် သီးခြားအဖြေ ရှာရမှာပါ။ ဒီမှာ ဖြစ်လာနိုင်တဲ့ အမှားတွေ ရှိနိုင်တယ်။ ဒါကြောင့် စစ်တမ်းကောက်ဖို့ လိုအပ်ပါတယ်။ အခုရန်ကုန်မှာ ကျွန်တော်တို့ ကုမ္ပဏီက အိမ်ပေါင်း ၃၂၀၀ ကို ကောက်ထားပြီးပါပြီ။ ဆောက်လုပ်ရေး ၀န်ကြီးဌာနကလည်း ဒီအပေါ်မှာ အကူအညီပေးပါတယ်။

တချို့မြို့ပြင်ဘက်လို နေရာမျိုးတွေမှာ ၀ယ်မယ်ဆို ၀ယ်ယူလို့ရနိုင်တဲ့ သူတွေရှိတယ်။ ဒီလူတွေကိုလည်း private sector က ကူညီသင့်တယ်။ ဆိုလိုတာက ဒီလူတွေနဲ့ သင့်တော်တဲ့ အိမ်မျိုးတွေ ဆောက်ပေးပြီး ဈေးကွက်တင်နိုင်ဖို့ လိုတယ်။ ပြီးရင်ဒီလူတွေကို အိမ်ဝယ်နိုင်ဖို့ ချေးငွေတွေ ပေးနိုင်ဖို့ လိုအပ်ပါတယ်။ ဒါကြောင့် private sector ကအစိုးရကို ကူညီသင့်တယ်။ အစိုးရကနေပြီးတော့ အိမ်မ၀ယ်နိုင်တဲ့ သူတွေကို ၀ယ်နိုင်အောင် လိုအပ်တဲ့ အကူအညီလေးတွေ ပေးနိုင်ဖို့လိုပါတယ်...
မေး - ဘဏ်လုပ်ငန်းတွေက အကန့်အသတ်နဲ့ ဖြစ်နေတယ်။ အခြားတစ်ဖက်မှာ Private sector ကလည်း အားမကောင်းဘူးဆိုတော့ ဒီအနေအထားကို ဘယ်လိုကျော်ဖြတ်မလဲ။
ဖြေ - ကျွန်တော်ကတော့ Private sector ကလည်း အားမကောင်းဘူးလို့ မထင်ပါဘူး။ အစိုးရကို မကူနိုင်ဘူးပဲ ပြောတာပါ။ မြန်မာနိုင်ငံရဲ့ Private sector မှာ အားကောင်းတဲ့ အင်အားကြီးတဲ့ လုပ်ငန်းတွေ ရှိပါတယ်။ အခုမှအလျင်အမြန် ကြီးထွားလာတဲ့ ကုမ္ပဏီလေးတွေလည်း ရှိပါတယ်။ အထူးသဖြင့် အသေးစားနဲ့ အလတ်စား စက်မှုလုပ်ငန်းတွေ အများကြီး တိုးတက်လာနိုင်တဲ့ အလားအလာတွေလည်း တွေ့ရပါ တယ်။ တကယ်တော့ နိုင်ငံတကာ စီးပွားရေး လုပ်ငန်းတွေက ဘယ်လောက် ကူညီနိင်မလဲ၊ ဆိုလိုတာက ဘယ်လောက် နည်းပညာ အကူအညီ ပေးနိုင်မလဲ။ ဥပမာ affordable housing တွေအတွက် နိုင်ငံတကာက ကူညီမယ်ဆိုတော့ ပထမတစ်ခုက ဆောက်လုပ်ရေး နည်းပညာရှိမယ်။ ဒုတိယက စံမီတဲ့ ဒီဇိုင်းတွေရမယ်၊ တတိယကတော့ ငွေကြေး အထောက်အပံ့ပေါ့။
မေး - လက်ရှိမှာ ပြည်တွင်းက ဘဏ်တွေရဲ့ အနေအထားကကော Private sector ကို အကူအညီ ပေးနိုင်တဲ့ အနေအထားမျိုး ရှိပြီလား။
ဖြေ - ပြည်တွင်းက ဘဏ်တွေရဲ့ လုပ်ကိုင်နိုင်မှုက အကန့်အသတ်နဲ့ ရှိနေပါသေးတယ်။ ဒါပေမဲ့ ကျွန်တော်တို့ ဗဟိုဘဏ် ဥပဒေကို ကြည့်ပါတယ်။ မြန်မာနိုင်ငံမှာ Banking conference လုပ်တော့ ကျွန်တော် Chairman လုပ်ခဲ့ပါတယ်။ ကျွန်တော် အဲဒီမှာဘာပြော ခဲ့လဲဆိုတော့ ကျွန်တော်က နိုင်ငံခြားသား တစ်ယောက် ဆိုပေမယ့် ကျွန်တော်မြင်ချင်တာက မြန်မာနိုင်ငံ အနေနဲ့ အခြားနိုင်ငံတွေ ကြုံတွေ့ခဲ့တဲ့ အမှားမျိုးတွေကို ရှောင်နိုင်ဖို့ပါ။ နိုင်ငံခြားသားတွေက အကောင်းတွေကို ယူလာနိုင်ပါတယ်။ တစ်ပြိုင်နက်ထဲမှာပဲ နိုင်ငံခြားသား တွေကြောင့် ပျက်စီးဆုံးရှုံး မှုတွေလည်း ရှိနိုင်ပါတယ်။ အထူးသဖြင့် ဖွံ့ဖြိုးဆဲ နိုင်ငံတွေကိုပေါ့။ ဆိုပါတော့ မြန်မာနိုင်ငံရဲ့ Banking sector မှာ နိုင်ငံဘဏ်တွေကို joint venture အနေနဲ့ ခွင့်ပြုမပေးခင် ပြည်တွင်းဘဏ် လုပ်ငန်းတွေ စွမ်းဆောင်ရည် ကောင်းမွန်ပြီး ဖွံ့ဖြိုးတိုးတက် လာစေဖို့ အချိန်နည်းနည်း ပိုပေးသင့်တယ်လို့ မြင်ပါတယ်။ foreign banking ကို အမြန်ဖွင့်ပေးလိုက်တာ ကောင်းတယ်လို့ ကျွန်တော် မမြင်ပါဘူး။ နိုင်ငံခြား ဘဏ်တွေက banking sector မှာလာပြီး control လုပ်တာ မကောင်းပါဘူး။ နိုင်ငံခြား ဘဏ်တွေကို မြန်မြန်ကြီးဖွင့်ပေးတာ risk တစ်ခုလို့မြင်တယ်။ သူတို့ပဲ လွှမ်းမိုးသွားလိမ့်မယ်။ သူတို့က အင်အားကြီးတယ်လေ။ မပေးနဲ့လို့ မပြောပါဘူး။ step by step ပဲဖြစ်သင့်တယ်။ ပထမအဆင့် ကိုယ်စားဘဏ်တွေ ဖွင့်တာမျိုးပေါ့။ သူတို့ အဲဒီအဆင့်မှာ ဒီမှာဘာစီးပွားရေးမှ မလုပ်သေးဘူး။ ဈေးကွက်ကို လေ့လာရုံလောက်ပဲ။ ဒါပေမဲ့ မြန်မာနိုင်ငံအနေနဲ့ ဘယ်အချိန်မှာ foreign banking ကိုလက်ခံမယ်၊ မခံဘူး ဆိုတာကတော့ အစိုးရရဲ့ဆုံးဖြတ်ချက် ပေါ်မှာပဲ မူတည်ပါတယ်။ ကျွန်တော့် အမြင်ကတော့ အလျင်မလိုသင့်ဘူး လို့ပဲ မြင်ပါတယ်။
မေး -ဘဏ်လုပ်ငန်းကလည်း သိပ်မဖွံ့ဖြိုးသေးဘူး။ private sector ကိုလည်း အထောက်အပံ့ သိပ်မပေးနိုင်ဘူးဆိုတော့ ဒီ housing market ရဲ့ အနေအထားမှာ ဘယ်လိုပါဝင် လာနိုင်မလဲ။
ဖြေ - နောက်ထပ် အားနည်းချက်တစ်ခု ရှိသေးတယ်။ မြန်မာနိုင်ငံမှာလည်း private sector ကိုလည်း ပြည်သူက သိပ်ပြီးတော့ အားမကိုးဘူး။ အားမကိုးဘူး ဆိုတာကလည်း private sector ရဲ့ သဘောကလည်း အမြတ်အစွန်းဘက်ကို ဦးစားပေးတာကိုး။ ဒါကြောင့် ကျွန်တော်တို့က အကောင်းဆုံး နည်းလမ်းကို ရွေးချယ်နိုင်ဖို့နဲ့ ဘယ်လိုကူညီမလဲ ဆိုတာကို ဆုံးဖြတ်နိုင်ဖို့ လိုပါတယ်။ ဥပမာကျွန်တော်ဆို private sector ကပဲ။ ဒါပေမဲ့ ကျွန်တော်တို့မှာ Academic sector နဲ့ ကောင်းမွန်တဲ့ ဆက်ဆံရေး တည်ဆောက်ထားတာ ရှိပါတယ်။ ဒါကြောင့် Australia နည်းပညာကို ဒီကိုယူလာ ပေးပါတယ်။ ဥပမာ သြစတြေးလျ နည်းပညာ သက္ကသိုလ်နဲ့ ချိတ်ပေးထားပါတယ်။ ဆိုလိုတာက Academic တွေက အမြတ်မစွန်းကို အဓိက မထားပါဘူး။ သူတို့က ဘယ်ဟာ အဖြေမှန်လည်း ဆိုတာပဲ စဉ်းစားပါတယ်။ ဒါကြောင့် ဒီတက္ကသိုလ် နဲ့ပေါင်းပြီး သုတေသနတွေ ပြုလုပ်သွားဖို့ ရှိပါတယ်။ Capacity building လုပ်သွားဖို့ ရှိပါတယ်။ ဘာကြောင့်လဲဆိုတော့ မြို့ ပြဖွံ့ဖြိုးမှုနဲ့ ပတ်သက်တဲ့ education system တွေ ဒီမှာ ဖွံ့ဖြိုးလာဖို့ လိုပါသေးတယ်။ ဒီလိုလုပ်ခြင်းအားဖြင့် ဒီပြဿနာကို ဖြေရှင်းနိုင်မယ်လို့ ယုံကြည်ပါတယ်။
မေး - မြန်မာနိုင်ငံမှာ အိမ်ခြံမြေ ဈေးကွက်တွေမှာ ဈေးကစားမှုတွေ ရှိနေတယ်။ အဲဒီအနေအထားကြောင့် ဈေးတွေအရမ်း မြင့်နေတယ်လို့ ပြောတာရှိတယ်ဆိုတော့ ဈေးနှုန်းတွေပြန်ကျဖို့ လူတွေသင့်တင့် လျောက်ပတ်တဲ့ ဈေးနှုန်းနဲ့ ၀ယ်ယူနိုင်ဖို့ ဆိုတာကော ဘယ်လေက်ဖြစ်နိုင်ခြေ ရှိမလဲ။
ဖြေ - ဈေးကစားမှုတွေက မြန်မာတစ်နိုင်ငံတည်း မဟုတ်ပါဘူး။ နေရာတော်တော်များများမှာ ရှိပါတယ်။ မြန်မာနိုင်ငံကို ကြည့်မယ်ဆိုတော့ မြန်မာနိုင်ငံဟာ ကမ္ဘာမှာ အကျယ်အ၀န်းအားဖြင် အဆင့် ၄၀ မြောက် အကြီးဆုံး နိုင်ငံပါ။ ပြောရမယ်ဆိုရင် ဂျာမနီနဲ့ အီတလီပေါင်းထားတာနဲ့ အတူတူပဲ။ ဒါပေမဲ့ ဂျာမနီမှာ ဒီမှာလို land price problem မရှိဘူး၊ ဒါဆိုဘာကြောင့် နိုင်ငံအကြီးကြီး၊ မြေပိုင်ဆိုင်မှု ပိုကြီးတဲ့ နိုင်ငံက ဒီပြဿနာမျိုး ရှိနေရတာလဲလို့ မေးလို့ရတယ်။ ပြဿနာက မြေမဟုတ်ဘူး။ ဒီမြေတွေကို ဘယ်လိုမှန်မှန်ကန်ကန်နဲ့ အသုံးချသလဲဆိုတဲ့ ပြဿနာပဲ။ နောက်တစ်ခုက စက်မှုလုပ်ငန်းတွေ ဖွံ့ဖြိုးတိုးတက်လာဖို့ ဘယ်လို အားပေးမလဲဆိုတဲ့ ပြဿနာပဲ။ ဘာကြောင့်လဲဆိုတော့ စက်မှုလုပ်ငန်းတွေက စိုက်ပျိုးရေး မွေးမြူရေး လုပ်ငန်းတွေမှာ ၀င်ရောက်နေရာ ယူလာလိမ့်မယ်။ အရင်တုန်းက စိုက်ပျိုးရေး၊ မွေးမြူရေး လုပ်ငန်းတွေမှာ ၀င်ရောက်လုပ်ကိုင် နေသူတွေ အလုပ်အကိုင် ရှာဖွေပေးဖို့ လိုအပ်လာလိမ့်မယ်။ ဒါကြောင့် အစိုးရအနေနဲ့ တစ်ချိန်တည်း လုပ်ရမှာက Tourism master plan လိုဟာမျိုး၊ Banking master plan လိုဟာမျိုးတွေ ရေးဆွဲသလိုမျိုးပဲ affordable housing နဲ့ပတ်သက်ရင်လည်း master plan တွေရေးဆွဲဖို့ လိုအပ်တယ်လို့ မြင်တယ်။ ဒါဟာဖြစ်ပေါ်နေတဲ့ မြေဈေးနှုန်းတွေ ကြီးမြင့်တဲ့ ပြဿနာကို ဖြေရှင်းနိုင်လိမ့်မယ်လို့ ယူဆပါတယ်။ စိုးရိမ်တာ တစ်ခုက မြေဈေးကစားမှုတွေဟာ ရေရည်မှာကျတော့ ထိခိုက်မှုတွေ အများကြီး ရှိစေတယ်။ ဘာကြောင့်လဲဆိုတော့ အခြားနိုင်ငံတွေမှာ မြေဈေးတွေ ပြုတ်ကျနေတယ်။ ကျွန်တော်စိုးရိမ်တာ တစ်ခုက မြေဈေး အများကြီး မြင့်တက်လာမယ်လို့ချည်း မျှော်လင့်ပြီး အများကြီး ရင်းနှီးမြုပ်နှံထားတဲ့ သူတွေပါ။ ဘာကြောင့်လဲဆိုတော့ မြေဈေးဆိုတာ အမြဲတမ်း မြင့်တက်နေတာမျိုး မဟုတ်ပါဘူး။တစ်ချိန်ချိန်မှာ ပြန်ကျမှာပဲ။ အခု ရွှေဈေးတွေတောင် ပြန်ကျနေပြီလေ။ ဒါကြောင့် မြေဈေးနှုန်းတွေ အမြဲတမ်း တက်နေလိမ့်မယ်လို့ အလွန်အကျွံမျှော်လင့်ပြီး ရင်းနှီးမြှုပ်နှံမှုတွေ အများကြီး လုပ်တာကိုတော့ အားမပေးပါဘူး။
မေး - ဒါဆို အဓိကပေးချင်တဲ့ message က ဘာဖြစ်မလဲ။
ဖြေ - key message က ဘာဖြစ်မလဲ ဆိုတော့ ပထမဆုံး အနေနဲ့ private sector ကနေပြီးတော့ အစိုးရကို ကူညီသင့်တယ်။ လောလောဆယ်မှာ housing နဲ့ပတ်သက်တဲ့ ၀န်ထုပ်ဝန်ပိုး အားလုံးက အစိုးရဆီကို ရောက်နေတယ်။ အမှန်တော့ ဒါမျိုးမဖြစ်သင့်ဘူး။ အစိုးရအနေနဲ့ ၀န်ပိုးဝန်ပိုးယူသင့်တဲ့ အပိုင်းကတော့ ပြည်သူတွေကို ကိုယ်ပိုင်အိမ်တွေနဲ့ နေနိုင်အောင် အကူအညီပေးနိုင်ဖို့။ ကျွန်တော်မြင်နေတာက တချို့မြို့ပြင်ဘက်လို နေရာမျိုးတွေမှာ ၀ယ်မယ်ဆို ၀ယ်ယူလို့ရနိုင်တဲ့ သူတွေရှိတယ်။ ဒီလူတွေကိုလည်း private sector က ကူညီသင့်တယ်။ ဆိုလိုတာက ဒီလူတွေနဲ့ သင့်တော်တဲ့ အိမ်မျိုးတွေ ဆောက်ပေးပြီး ဈေးကွက်တင်နိုင်ဖို့ လိုတယ်။ ပြီးရင်ဒီလူတွေကို အိမ်ဝယ်နိုင်ဖို့ ချေးငွေတွေ ပေးနိုင်ဖို့ လိုအပ်ပါတယ်။ ဒါကြောင့် private sector ကအစိုးရကို ကူညီသင့်တယ်။ အစိုးရကနေပြီးတော့ အိမ်မ၀ယ်နိုင်တဲ့ သူတွေကို ၀ယ်နိုင်အောင် လိုအပ်တဲ့ အကူအညီလေးတွေ ပေးနိုင်ဖို့လိုပါတယ်။ 
Credit To First -11
Read More »

မုန့်လုံးစက္ကူကပ် နိုင်ငံရေး၊ လွှတ်တော်များနှင့် လူထုဆန္ဒWritten by ဒေါက်တာ ရန်မျိုးသိမ်း



သြဂုတ် ၂၂ ရက်က ပြုလုပ်သော ပြည်ထောင်စု လွှတ်တော်မြင်ကွင်း
ဒီမိုကရက်တစ် လူ့အဖွဲ့အစည်းတွင် ပြည်သူလူထု၏ လွတ်လပ်သောဆန္ဒ၊ လွတ်လပ်သော ပူးပေါင်းပါဝင်မှု တို့ကို အလေးထားသည့် အလျှောက် ပြည်သူကို ရှေ့တန်းတင်သော၊ ပြည်သူကို မျက်နှာမူသော နိုင်ငံရေး ပုံစံများသည် အုတ်မြစ်ကောင်းများ ဖြစ်သည်။ မြန်မာ့နိုင်ငံရေးတွင် အစိုးရနှင့် လွှတ်တော်များကို ၂၀၀၈ ခုနှစ် ဖွဲ့စည်းပုံ အခြေခံ ဥပဒေနှင့်အညီ တည်ဆောက်ခဲ့သည့် အလျှောက် ၂၀၀၈ ခုနှစ် အခြေခံ ဥပဒေအကြို အမျိုးသား ညီလာခံနှင့် အခြေခံ ဥပဒေအလွန် ၂၀၁၀ ပြည့်နှစ် ရွေးကောက်ပွဲတို့ကို ဆက်စပ်သုံးသပ်ရန် လိုအပ်သည်။
မျက်မှောက်လွှတ်တော် အသီးသီးရှိ ကိုယ်စားလှယ် အများစုသည် ၂၀၁၀ ပြည့်နှစ် ရွေးကောက်ပွဲတွင် ရွေးကောက်ခံခဲ့ရသူများ ဖြစ်သည်။ အမျိုးသား ညီလာခံမှ ချမှတ်သည့် အခြေခံမူများအတိုင်း ရေးဆွဲခဲ့သော ၂၀၀၈ ခုနှစ်ဖွဲ့စည်းပုံ အခြေခံဥပဒေပါ ပြဋ္ဌာန်းချက်များနှင့်အညီ ၂၀၁၀ ပြည့်နှစ် ရွေးကောက်ပွဲများကို ကျင်းပခဲ့သောကြောင့် လက်ရှိနိုင်ငံရေး အခင်းအကျင်းသည် ၁၉၉၃ ခုနှစ်တွင် စတင်ခဲ့သော အမျိုးသား ညီလာခံ၌ မြစ်ဖျားခံခဲ့သည်ဟု မှတ်ချက်ပြုနိုင်သည်။ အမျိုးသား ညီလာခံ၊ ပြည်လုံးကျွတ် ဆန္ဒခံယူပွဲနှင့် ၂၀၁၀ ပြည့်နှစ် ရွေးကောက်ပွဲတို့ကို ပြည်သူလူထု၏ ထောက်ခံမှု၊ စိတ်ဝင်စားမှုနှင့် ပူးပေါင်းပါဝင်မှုတို့ အပေါ်မူတည်လျက် အစိုးရနှင့် လွှတ်တော်များ၏ ပြည်သူလူထု ကိုယ်စားပြုနိုင်မှုကို ဆန်းစစ်နိုင်သည်။
အမျိုးသား ညီလာခံသည် ၁၉၉၀ ပြည့်နှစ် ရွေးကောက်ပွဲအလွန် နိုင်ငံရေး အကျပ်အတည်းကို တစ်ဖက်သတ် ဖြေရှင်းခဲ့သည်ဟု သတ်မှတ်နိုင်သော နိုင်ငံရေးမှတ်တိုင် ဖြစ်သည်။ ၁၉၉၀ ပြည့်နှစ် ရွေးကောက်ပွဲ ရလဒ်နှင့်အညီ လွှတ်တော်ခေါ် ယူပေးရမည့် အာဏာလွှဲ ပေးရမည့် အနေအထားကို ကျော်လွှားနိုင်ရန် ဖွဲ့စည်းပုံ အခြေခံဥပဒေသစ် ရေးဆွဲရေးကို ထောက်ပြလျက် အမျိုးသား ညီလာခံအား မြန်မာ့နိုင်ငံရေး ဇာတ်ခုံပေါ် ဇွတ်အတင်း ဆွဲတင်ခဲ့သည်မှာ လယ်ပြင်တွင် ဆင်သွား သကဲ့သို့ ထင်ရှားခဲ့သည်။
အမျိုးသား ညီလာခံ အကြိုညှိနှိုင်း ဆွေးနွေးပွဲများနှင့် ကနဦး အမျိုးသားညီလာခံ အစည်းအဝေးများအပေါ် ပြည်သူလူထု၏ စိတ်ဝင်စားမှု အတန်အသင့် ရှိခဲ့သော်လည်း ၁၉၉၆ ခုနှစ် နောက်ပိုင်းတွင် လူထုစိတ်ဝင်စား မှုသည် အလွန်အမင်း ကျဆင်းလာခဲ့ပြီး စိတ်ပျက်သည့် အဆင့်ကို ရောက်ရှိခဲ့သည်ဟု နိုင်ငံရေး လေ့လာသူ အချို့က မှတ်ချက်ပြုကြသည်။ ၂၀၀၄ ခုနှစ် အမျိုးသား ညီလာခံ ပြန်လည်မစတင်မီ အမျိုးသား ဒီမိုကရေစီ အဖွဲ့ချုပ် အနေဖြင့် အစိုးရနှင့် ဆွေးနွေးညှိနှိုင်း သဘောတူပါက ညီလာခံကို တက်ရောက်နိုင်ဖွယ် ရှိသည်ဆိုသည့် သတင်းကြောင့် လူထုစိတ်ဝင်စားမှု အတန်အသင့် မြင့်တက်ခဲ့သော်လည်း အမျိုးသား ဒီမိုကရေစီ အဖွဲ့ချုပ်နှင့် တိုင်းရင်းသား ပါတီများ တက်ရောက်ခြင်း ရှိမည်မဟုတ်ဟု အတည်ပြုပြီးနောက်ပိုင်း စိတ်ဝင်စားမှုသည် အလွန်အမင်း ကျဆင်းခဲ့သည်ဟုလည်း အကဲခတ်များက သုံးသပ်ကြသည်။
၁၉၉၃ ခုနှစ် အမျိုးသား ညီလာခံ နှင့် ၂၀၀၄ ခုနှစ် အမျိုးသား ညီလာခံတို့ကို သုံးသပ်လျှင် အစကတည်းက ပြည်သူလူထုနှင့် အလှမ်းဝေး နေသည်ဟု မှတ်ချက်ပြုနိုင်သည်။ ၁၉၉၃ ခုနှစ် ဇန်န၀ါရီ ၉ ရက်တွင် စတင် ကျင်းပခဲ့သော အမျိုးသား ညီလာခံ၏ ကိုယ်စားလှယ် ၇၀၂ ဦးအနက် ၁၉၉၀ ပြည့်နှစ် ရွေးကောက်ခံ လွှတ်တော် ကိုယ်စားလှယ် ၉၉ ဦး ပါဝင်သဖြင့် ပြည်သူ့ ကိုယ်စားလှယ်များ၏ လွှမ်းခြုံနိုင်မှုသည် ၁၅ ရာခိုင်နှုန်း ရှိသည်ဟု သတ်မှတ်နိုင်သည်။ ၂၀၀၄ ခုနှစ် မေ ၁၇ ရက် တွင် ပြန်လည် ကျင်းပခဲ့သော အမျိုးသား ညီလာခံတွင်မူ ကိုယ်စားလှယ် စုစုပေါင်း ၁၀၈၈ ဦးအနက် လွှတ်တော် ကိုယ်စားလှယ် ၁၅ ဦးသာ ပါဝင်သဖြင့် ပြည်သူ့ကိုယ်စားလှယ်များ၏ လွှမ်းခြုံနိုင်မှုသည် ၀ ဒသမ ၀၁ ရာခိုင်နှုန်းသို့ သိသိသာသာ ကျဆင်းခဲ့သည်ကို တွေ့ရသည်။ အမျိုးသား ညီလာခံအပေါ် လူထုစိတ်ဝင်စားမှုနှင့် ထောက်ခံမှုကို ဆန်းစစ်လျှင် အလွန်နည်းပါးပြီး လူထုသည် အမျိုးသား ညီလာခံနှင့် ပတ်သက်လျှင် နိုင်ငံရေး ဥပေက္ခာထုံးကို နှလုံးမူခဲ့သည်ကို တွေ့ရှိရသဖြင့် အမျိုးသားညီလာခံအစည်းအဝေးများကို ပြည်သူလူထုက ထောက်ခံခဲ့သည်ဟု မှတ်ချက်ပြုရန် ခဲယဉ်းသည်။

ပြည်ထောင်စု လွှတ်တော်နာယက သူရဦးရွှေမန်းက မိမိတို့ မြန်မာနိုင်ငံတွင် ကာလအတော်ကြာ ဒီမိုကရေစီစနစ် ကျင့်သုံးမှု မပြုနိုင်ခြင်းမှာလည်း လွှတ်တော်များ မရှိခြင်းကြောင့်ပင် ဖြစ်ပါတယ်။ လွှတ်တော်များ ရှိခဲ့သော ကာလတွင်လည်း လက်ညှိုးထောင် ခေါင်းညိတ် မည်ကာမတ္တသာဖြစ်ပြီး လွှတ်တော်များသည် ပြည်သူများအား ကိုယ်စားမပြု နိုင်ခဲ့ကြောင်းကို သတိပြုရမှာ ဖြစ်သလို ယနေ့လွှတ်တော်များသည်...


အမျိုးသားညီလာခံ ကိုယ်စားလှယ်များအား မည်သည့်စနစ်၊ မည်သည့် အရည်အချင်း သတ်မှတ်ချက်များ အပေါ် အခြေခံလျက် ရွေးချယ်ခဲ့သည်ကို အများပြည်သူ သိရှိနိုင်အောင် ထုတ်ပြန်ရန် ပျက်ကွက်ခဲ့သည်။ အမျိုးသား ညီလာခံအတွင်း ဆွေးနွေးမှုများကိုလည်း လိုအပ်သလို ဖြတ်တောက်ပြီးမှသာ ပြည်သူလူထုကို အသိပေးခဲ့သည်။ အမျိုးသား ညီလာခံနှင့် ပတ်သက်၍ ဝေဖန်ပြောဆို မှုများကို တားမြစ်နိုင်ရန် ၅/၉၆ ဥပဒေတစ်ရပ် ထုတ်ပြန်ခဲ့သည်အထိ ဆောင်ရွက်ခဲ့သည်ကို ကြည့်လျှင် ပြည်သူလူထု၏ စိတ်ဝင်စားမှု၊ ထောက်ခံမှု၊ ပူးပေါင်းပါဝင်မှုထက် အမျိုးသား ညီလာခံကြီး ချောချောမွေ့မွေ့ အဆင်ပြေပြေ ပြီးစီးရေးကိုသာ ရှေ့တန်းတင်ခဲ့သည်ဟု မှတ်ချက်ပြုနိုင်သည်။ ထို့ကြောင့် အမျိုးသား ညီလာခံသည် မြန်မာပြည်သူလူထု အများစုကြီးနှင့် ကင်းကွာလျက် အစိုးရမှ ခေါင်းခေါက်ရွေးချယ်ခဲ့သော ကိုယ်စားလှယ်နှင့်သာ စခန်းသွားခဲ့သည်ဟု အကဲခတ်များက မှတ်ချက်ပြုကြသည်။
အမျိုးသား ညီလာခံ ကိုယ်စားလှယ်များကို နယ်ပယ်၊ လူမျိုးစု အလွှာစုံမှ ကိုယ်စားပြု ရွေးချယ်ခဲ့သည်ဟု ဖြေရှင်းချက်အချို့ ရှိလင့်ကစား တိတ်တဆိတ် လူမသိ သူမသိ ပွင့်လင်းမြင်သာမှုမရှိ ရွေးချယ်ခဲ့သည်မှာ အထင်အရှားဖြစ်သည်။ ညီလာခံ ကိုယ်စားလှယ်များအကြား ဖွဲ့စည်းပုံ အခြေခံဥပဒေဆိုင်ရာ အခြေခံမူများကို အပြင်းအထန် ဆွေးနွေးညှိနှိုင်းခဲ့သည့် လက္ခဏာများကိုလည်း မတွေ့ရှိခဲ့ရပေ။ ထို့အပြင် အမျိုးသား ညီလာခံတွင် ချမှတ်ခဲ့သော အခြေခံမူများကို မည်သည့် ပုံစံဖြင့်သဘောတူ အတည်ပြုချက် ရယူခဲ့သည် ကိုလည်း မသိရှိခဲ့ရပေ။ ကိုယ်စားလှယ် အများစု၏ ဆန္ဒသဘောထားနှင့် အတည်ပြု ဆုံးဖြတ်ခဲ့သည်ဟု ချေပလျှင် ကိုယ်စားလှယ် ရွေးချယ်မှုတွင် ပွင့်လင်းမြင်သာမှု မရှိခြင်း၊ ကိုယ့်လူကိုယ် ခေါင်းခေါက် ရွေးချယ်ခြင်း၊ မတူခြားနားသော အမြင်အယူအဆ များကို ဆွေးနွေးအဖြေရှာခွင့် မပြုခြင်းတို့ကို မည်သို့ ဖြေရှင်းမည်နည်းဟု ထပ်ဆင့်မေးခွန်း ထုတ်လိုပါသည်။ အကယ်စင်စစ် ၂၀၀၈ ခုနှစ် ဖွဲ့စည်းပုံ အခြေခံဥပဒေ၏ အခြေခံမူများကို ရေးဆွဲရာတွင် ပြည်သူလူထု၏ ဆန္ဒသဘောထားများနှင့် ပါဝင်မှု အပိုင်းတို့တွင် အလွန်အားနည်းခဲ့သည်။ ၂၀၁၃ ခုနှစ် ဇူလိုင် ၃၁ ရက်တွင် ကျင်းပခဲ့သော ပြည်ထောင်စု လွှတ်တော် အစည်းအဝေး၌ ပြည်ထောင်စု လွှတ်တော်နာယက သူရဦးရွှေမန်းက မိမိတို့ မြန်မာနိုင်ငံတွင် ကာလအတော်ကြာ ဒီမိုကရေစီစနစ် ကျင့်သုံးမှု မပြုနိုင်ခြင်းမှာလည်း လွှတ်တော်များ မရှိခြင်းကြောင့်ပင် ဖြစ်ပါတယ်။ လွှတ်တော်များ ရှိခဲ့သော ကာလတွင်လည်း လက်ညှိုးထောင် ခေါင်းညိတ် မည်ကာမတ္တသာဖြစ်ပြီး လွှတ်တော်များသည် ပြည်သူများအား ကိုယ်စားမပြု နိုင်ခဲ့ကြောင်းကို သတိပြုရမှာ ဖြစ်သလို ယနေ့လွှတ်တော်များသည် ပြည်သူများကို ကိုယ်စားပြုပြီး ပြည်သူ့အသံ၊ ပြည်သူ့ဆန္ဒ၊ ပြည်သူ့သဘောထား၊ ပြည်သူများ၏ လိုအပ်ချက်များကို သိရှိခံစားပြီး ပြည်သူများ အတွက် အမှန်တကယ် ဆောင်ရွက်ပေးရမှာ ဖြစ်ပါတယ်ဟု ပြောကြားခဲ့သည်။
ဒီမိုကရေစီစနစ် ကျင့်သုံးမှု မပြုနိုင်ခြင်းသည် လွှတ်တော်များ မရှိခြင်းကြောင့်ဟု ဆိုခြင်းထက် ဒီမိုကရေစီ စနစ်ကို ပုံဖော်မည့် ဖွဲ့စည်းပုံ အခြေခံဥပဒေ မရှိခြင်းကြောင့်ဟု သုံးသပ်ပါက ပိုမိုလျော်ကန်မည် ဖြစ်သည်။ မြန်မာ့သမိုင်းတွင် တပ်မတော်မှ အာဏာသိမ်းယူခဲ့ပြီး ဖွဲ့စည်းပုံ အခြေခံ ဥပဒေမရှိ၊ အုပ်ချုပ်ခဲ့သော ကာလမှာ ၃၅ နှစ်၊ ၈ လခန့် ရှိသည်ဟု မှတ်တမ်းများအရ သိရသည်။ အနာဂတ် နိုင်ငံရေးတွင် တပ်မတော်မှ အာဏာသိမ်းယူသည့် နည်းလမ်းဖြင့် ဖွဲ့စည်းပုံ အခြေခံဥပဒေကို ဖျက်သိမ်းပြီး အခြေခံဥပဒေ မရှိသော စစ်အုပ်ချုပ်ရေး စနစ်မျိုး ထူထောင်ကာ သမိုင်းဘီး တစ်ပတ်ပြန်လည် လာမည်ဆိုလျှင် ဒီမိုကရေစီစနစ် ကျင့်သုံးမှုကို အကြီးအကျယ် ထိခိုက်စေနိုင်သည့်အပြင် ဒီမိုကရက်တစ် လူ့အဖွဲ့အစည်း တည်ဆောက် ရေးသည်လည်း ရှေ့မတိုးနိုင် ဖြစ်လာနိုင်ဖွယ် ရှိသည်ကိုလည်း သတိချပ်သင့်သည်။ နိုင်ငံရေး သမိုင်းတွင် စစ်တပ်အာဏာ သိမ်းမှုဖြင့် လွှတ်တော်များ မရှိအောင် လုပ်ခဲ့သည်မှာ အထင်အရှားဖြစ်သည်။ ထို့ကြောင့် အနာဂတ် နိုင်ငံရေး အခင်းအကျင်းတွင် စစ်တပ်အာဏာ သိမ်းမှုကို နိုင်ငံရေး ပြဿနာများ၊ အကျပ်အတည်းများအား ဖြေရှင်းသည့် နည်းလမ်းတစ်ခုအဖြစ် အသုံးပြုခြင်းကို ရှောင်ကြဉ်ပြီး နိုင်ငံရေး စားပွဲဝိုင်း ဆွေးနွေးပွဲ များတွင်သာ အဖြေရှာသင့်သည် ဟူသော ဆောင်ပုဒ်ကို အစိုးရ၊ လွှတ်တော်များနှင့် နိုင်ငံရေး ခေါင်းဆောင်များက ကိုင်စွဲထားရန် လိုအပ်ကြောင်း အလေးအနက် အကြံပြု လိုပါသည်။
ပြည်ထောင်စု လွှတ်တော် နာယကကြီး၏ လွှတ်တော်များ ရှိခဲ့သော ကာလတွင် လက်ညှိုးထောင် ခေါင်းညိတ် မည်ကာမတ္တသာ ဖြစ်ခဲ့သည်ဟူသော မှတ်ချက်ကို အပိုင်းနှစ်ပိုင်း ခွဲခြားသုံးသပ်ရန် လိုအပ်သည်ဟု ထင်မြင်မိပါသည်။ မြန်မာ့နိုင်ငံရေး သမိုင်းတွင် ၁၉၄၇ ခုနှစ် ဖွဲ့စည်းပုံ အခြေခံ ဥပဒေနှင့်အညီ ဖွဲ့စည်းခဲ့သော လွှတ်တော်များနှင့် ၁၉၇၄ ခု နှစ် ဖွဲ့စည်းပုံ အခြေခံ ဥပဒေနှင့်အညီ ဖွဲ့စည်းခဲ့သော လွှတ်တော်များဟု နှစ်မျိုးနှစ်စား ရှိခဲ့သည်။ ၁၉၇၄ ခုနှစ် ဇန်န၀ါရီလ ၃ ရက်မှ ၁၉၈၈ ခုနှစ် စက်တင်ဘာ ၁၈ ရက်အထိ ကာလတွင် လွှတ်တော် ရှိခဲ့သော်လည်း ဒီမိုကရေစီ စနစ်ကို ကျင့်သုံးနိုင်ခြင်း မရှိခဲ့ဟု ကောက်ချက် ပြုနိုင်သည်။ ၁၉၇၄ ခုနှစ် ဖွဲ့စည်းပုံ အခြေခံဥပဒေကို အခြေခံ တည်ဆောက်ခဲ့သော တစ်ပါတီ စနစ်အောက် လွှတ်တော်များကို လက်ညှိုးထောင် ခေါင်းညိတ် လွှတ်တော်များ၊ ပြည်သူလူထုကို ကိုယ်စားမပြုသော လွှတ်တော်များဟု သုံးသပ်နိုင်သော်လည်း ၁၉၄၇ ခုနှစ် ဖွဲ့စည်းပုံ အခြေခံ ဥပဒေအရ ၁၉၄၈ ခုနှစ်၊ ဇန်န၀ါရီ ၄ ရက် မှ ၁၉၅၈ ခုနှစ်၊ အောက်တိုဘာ ၂၈ ရက်အထိ ကာလနှင့် ၁၉၆၀ ပြည့်နှစ် ဖေဖော်ဝါရီမှ ၁၉၆၂ ခုနှစ် မတ် ၂ ရက်အထိ ကာလတို့တွင် ဖွဲ့စည်းခဲ့သော လွှတ်တော်များမှာမူ ပါတီစုံ အထွေထွေ ရွေးကောက်ပွဲများမှ တစ်ဆင့် အနိုင်ရရှိသော လွှတ်တော် ကိုယ်စားလှယ်များဖြင့် ဖွဲ့စည်းထားသော လွှတ်တော်များ ဖြစ်သည့်အလျောက် ပြည်သူလူထုကို ကိုယ်စားမပြုသော လွှတ်တော်များ၊ လက်ညှိုးထောင် ခေါင်းညိတ် လွှတ်တော်များဟု မှတ်ချက်မပြု နိုင်သည်ကို ထောက်ပြလိုပါသည်။

လွှတ်တော်နိုင်ငံရေးတွင် ကိုယ်စားလှယ်များသည် ပြည်သူလူထု အများစုကြီး၏ ဆန္ဒသဘောထားကို ဆန်းစစ်နိုင်ရန် အထူးလိုအပ်သည်။ လွှတ်တော် ကိုယ်စားလှယ်များ အနေဖြင့် ပြည်သူလူထုကို လက်တွေ့ကျကျ မျက်နှာမူသော လမ်းကြောင်းအား လွှတ်တော်နိုင်ငံရေးတွင် လက်တွေ့ကျကျ ပုံဖော်နိုင်မည် ဆိုလျှင် . . .


လက်ရှိ လွှတ်တော်များ၏ ပြည်သူလူထုကို ကိုယ်စားပြုနိုင်မှုအား ဆန်းစစ်မည်ဆိုလျှင် ၂၀၁၀ ပြည့်နှစ် အထွေထွေ ရွေးကောက်ပွဲများ၏ လွတ်လပ်မှုနှင့် တရားမျှတမှုတို့ကို မေးခွန်းထုတ် ရမည်ဖြစ်သည်။ လွတ်လပ်၍ တရားမျှတမှုရှိရှိ၊ အနိုင်ရရှိခဲ့သော လွှတ်တော် ကိုယ်စားလှယ်များသည် ပြည်သူလူထုကို ကိုယ်စားပြုသည်ဟု မှတ်ချက်ပြု နိုင်သော်လည်း၊ မသမာသော၊ ညစ်ပတ်သော နည်းတစ်ခုခုဖြင့် အနိုင်ရရှိခဲ့သော လွှတ်တော် ကိုယ်စားလှယ်များ ရှိခဲ့ပါမူ ပြည်သူ့ ကိုယ်စားလှယ်ဟု သတ်မှတ်နိုင်ရန် ခဲယဉ်းမည် ဖြစ်သည်။ ပြည်တွင်းပြည်ပ လေ့လာသူများက ၂၀၁၀ ပြည့်နှစ် အထွေထွေ ရွေးကောက်ပွဲသည် လွတ်လပ်၍ တရားမျှတမှု အပိုင်းတွင် အလွန်အားနည်း ခဲ့သည်ဟု သုံးသပ်ခဲ့ကြသည်။ အကယ်၍ ၂၀၁၀ ပြည့်နှစ် အထွေထွေ ရွေးကောက်ပွဲသည် အမှန်တကယ် လွတ်လပ်၍ တရားမျှတ ခဲ့မည်ဆိုလျှင် အခြားဒီမိုကရက်တစ် ပါတီများနှင့် တိုင်းရင်းသား ပါတီများသည် ယခုထက် သာလွန်သော လွှတ်တော် ကိုယ်စားလှယ် နေရာများတွင် အနိုင်ရရှိ ခဲ့လိမ့်မည်ဟုလည်း လေ့လာသူများက သုံးသပ်ကြသည်။
ပြည်သူ့အသံ၊ ပြည်သူ့ဆန္ဒ၊ ပြည်သူ့သဘောထား၊ ပြည်သူတို့၏ လိုအပ်ချက်များကို သိရှိခံစားပြီး ပြည်သူများအတွက် အမှန်တကယ် ဆောင်ရွက် ပေးနိုင်ရေးတွင် လွှတ်တော် ကိုယ်စားလှယ်များသည် ပြည်သူလူထု၏ ထောက်ခံမဲကို စစ်စစ်မှန်မှန် ရရှိခဲ့ခြင်း ဟုတ်၊ မဟုတ်ကို ဦးစွာဆန်းစစ်သင့်သည်။ မည်သည့်နည်းနှင့်မဆို နိုင်ကိုနိုင်ရမည် ဆိုသော ဗျူဟာနှင့်အတူ လွှတ်တော် ကိုယ်စားလှယ် ဖြစ်လာသူများ အနေဖြင့် လွှတ်တော်ထဲ ၀င်လာခါစတွင် ပြည်သူလူထုကို ကိုယ်စားပြုနိုင်မှု အပိုင်းတွင် အားနည်းနေ နိုင်သော်လည်း နောက်ပိုင်းတွင် ပြည်သူလူထု၏ အကျိုးစီးပွားဘက်မှ မားမားမတ်မတ် ရပ်တည်လာ နိုင်မည်ဆိုလျှင် ပြည်သူ့ ကိုယ်စားလှယ်အဖြစ် ပြည်သူလူထု၏ အသိအမှတ်ပြုမှုကို လွှတ်တော်နိုင်ငံရေးမှ တစ်ဆင့် ပြန်လည်ရရှိ လာနိုင်သည့် အခွင့်အလမ်းများလည်း ရှိနေသည်ဟု နိုင်ငံရေး အကဲခတ်များက သုံးသပ်ကြသည်။
လွှတ်တော် နိုင်ငံရေးတွင် ကိုယ်စားလှယ်များသည် ပြည်သူလူထု အများစုကြီး၏ ဆန္ဒသဘောထားကို ဆန်းစစ်နိုင်ရန် အထူးလိုအပ်သည်။ လွှတ်တော် ကိုယ်စားလှယ်များ အနေဖြင့် ပြည်သူလူထုကို လက်တွေ့ကျကျ မျက်နှာမူသော လမ်းကြောင်းအား လွှတ်တော်နိုင်ငံရေးတွင် လက်တွေ့ကျကျ ပုံဖော်နိုင်မည်ဆိုလျှင် ကိုယ်စားလှယ်များ ကိုယ်စားပြုသည့် နိုင်ငံရေးပါတီ အနေဖြင့် ၂၀၁၅ ခုနှစ် အထွေထွေ ရွေးကောက်ပွဲတွင် လူထုထောက်ခံမှု ရရှိနိုင်ရေးကို အတိုင်းအတာ တစ်ခုအထိ ပံ့ပိုးပေးနိုင်မည်မှာ ငြင်းမရသော အချက်ဖြစ်သည်။ တစ်ဖက်တွင်လည်း မြန်မာ့နိုင်ငံရေး မုန့်လုံးစက္ကူ မကပ်ရေး အပါအ၀င်လာလတ္တံ့သော နိုင်ငံရေး စိန်ခေါ်မှုများကို နိုင်ငံရေး အင်အားစုများ အားလုံးပါဝင်မှု၊ အပြန်အလှန် နားလည်မှု၊ အပြန်အလှန် လေးစားမှုတို့နှင့်အတူ ပြည်သူလူထု ထောက်ခံမှုကို ရယူလျက် ဖြတ်ကျော်ရန်မှတစ်ပါး အခြားနည်းလမ်း မရှိနိုင်သည်ကို မပြတ်နှလုံး သွင်းသင့်ကြောင်း ဆော်သြလိုပါသည်။
နိဂုံး
အချုပ်အားဖြင့် ဆိုသော် လက်ညှိုးထောင် ခေါင်းညိတ်ခေတ် လွှတ်တော်များထက် မျက်မှောက် လွှတ်တော် အစည်းအဝေးများတွင် မည်သည့် အားသာချက်များရှိပြီး မည်သည့် အားနည်းချက်များ ရှိနေသေးသည်ကို မဖြစ်မနေ ဆန်းစစ်သင့်သည်ဟု အကြံပြု လိုပါသည်။ လွှတ်တော်များ ရှိရုံဖြင့် ဒီမိုကရေစီစနစ် ကျင့်သုံးနိုင်မည်ဟုလည်း လှေနံဓားထစ် မမှတ်ယူနိုင်ပါ။ ဒီမိုကရေစီစနစ် ကျင့်သုံးနိုင်ရန် ဒီမိုကရေစီနည်းကျ ဖွဲ့စည်းပုံ အခြေခံဥပဒေ၊ ဒီမိုကရေစီနည်းကျ ရွေးကောက်ပွဲ၊ ဒီမိုကရေစီနည်းကျ လူထုဆန္ဒ ခံယူပွဲများ စသည့် ဒီမိုကရေစီ အဆင်တန်ဆာများနှင့်အတူ အာဏာသုံးရပ်၏ ချည်တိုင်အစစ်ဖြစ်သော ပြည်သူလူထု၏ ထောက်ခံမှု၊ ပူးပေါင်းပါဝင်မှုတို့ကို မြှင့်တင်နိုင်မှသာ မြန်မာ့နိုင်ငံရေး ခရီးသည် အေးချမ်းသာယာမည် ဖြစ်ပါသည်။ ဒီမိုကရေစီနည်းကျ ဆိုရာတွင် အနာဂတ်တွင် အာဏာသိမ်းမှုများ ကင်းစင်ရမည့်အပြင် ဖွဲ့စည်းပုံ အခြေခံ ဥပဒေနှင့်အညီ စစ်တပ်မှ နိုင်ငံတော် အာဏာကို ထိန်းသိမ်းနိုင်ခွင့် ရှိသည်ဆိုသော အချက်မျိုးကိုလည်း ခွင့်ပြုနိုင်ခြင်း မရှိသည်မှာ မြန်မာပြည်သူလူထု အများစုကြီး၏ ဆန္ဒစစ်စစ် ဖြစ်လိမ့်မည်ဟု ယုံကြည်လျက် အများအကျိုးမျှော် နှိုးဆော် လိုက်ရပါသည်။
Credit To First-11
Read More »

စတီဖင်ဟော့ကင်း



စတီဖင်ဟော့ကင်း (Stephen Hawking) ကို ၁၉၄၂ ခုနှစ် ဇန်နဝါရီလ ၈ ရက်နေ့တွင် အင်္ဂလန်နိုင်ငံ အောက်စ်ဖို့ဒ်၌ မွေးဖွားခဲ့သည်။ ငယ်ရွယ်စဉ်ကတည်းက သိပ္ပံနှင့် အာကာသဆိုင်ရာ ပညာရပ်များကို စိတ်ပါဝင်စားခဲ့သည်။ အသက် ၂၁ နှစ်တွင် ကင်းဘရစ်ခ်ျ တက္ကသိုလ်၌ စကြဝဠာပညာရပ် (Cosmology) ကို တက်ရောက် သင်ကြားနေစဉ် ကိုယ်ခန္ဓာအကြောများ အားနည်းပြီး လှုပ်ရှားမရသည့် (Amyotrophic Lateral Sclerosis) ရောဂါဝေဒနာကို ခံစားခဲ့ရသည်။ ကိုယ်ခန္ဓာချည့်နဲ့ပြီး မလှုပ်ရှားနိုင်တော့သော်လည်း ရူပဗေဒနှင့် အာကာသသိပ္ပံဆိုင်ရာ ပညာရပ်များကို ထူးချွန်စွာ ဖော်ထုတ်တင်ပြနိုင်ခဲ့ပြီး သူရေးသားခဲ့သည့် စာအုပ်များသည် သိပ္ပံပညာလောကနှင့် ပညာရပ် လိုက်စားသူများအတွက် တန်ဖိုးမဖြတ်နိုင်သည့် လေ့လာတွေ့ရှိချက်များ ဖြစ်ခဲ့သည်။

ငယ်စဉ်ဘဝ

ဖရန့်နှင့် အိုင်ဆိုဘဲလ်ဟော့ကင်းတို့၏ မွေးချင်းလေးယောက်အနက် အကြီးဆုံးသား ဖြစ်သည်။ ဟော့ကင်းကို မွေးချိန်သည် ကမ္ဘာကျော် သိပ္ပံပညာရှင်ကြီး ဂယ်လီလီယို ကွယ်လွန်ခဲ့သည့် နှစ်ပေါင်း ၃၀၀ ပြည့် အထိမ်းအမှတ်နေ့တွင် ဖြစ်သည်။ သူ့မိခင် စကော့လူမျိုး အိုင်ဆိုဘဲလ်ဟော့ကင်းသည် ၁၉၃၀ ပြည့်နှစ်ခန့်ကတည်းက အောက်စ်ဖို့ဒ် တက္ကသိုလ်တွင် ပညာသင်ကြားခဲ့သည်။ ထိုခေတ်က အမျိုးသမီးများ ကောလိပ်တက်ရန် ရှားပါးနေချိန်၌ ကောလိပ်သို့ တက်ရောက်ခဲ့သည့် ပထမဦးဆုံး အမျိုးသမီးစာရင်းတွင် ပါဝင်ခဲ့သည်။ သူ့ဖခင် ဖရန့်ဟော့ကင်းသည် အောက်စ်ဖို့ တက္ကသိုလ် ကျောင်းဆင်းဖြစ်ပြီး ဆေးဝါး သုတေသနပညာရှင် ဖြစ်ကာ အထူးသဖြင့် အပူပိုင်းဒေသ ရောဂါဗေဒများကို ကျွမ်းကျင်သည့် ပညာရှင်လည်း ဖြစ်သည်။

စတီဖင်ဟော့ကင်းကို မွေးဖွားချိန်၌ သူ့မိဘများတွင် ငွေကြေး မပြည့်စုံသဖြင့် အတော်လေး အဆင်မပြေသည့်ကာလဟု ဆိုနိုင်သည်။ နိုင်ငံရေး အခြေအနေများကလည်း တင်းမာနေသည့် အချိန်ကာလ ဖြစ်သည်။ အင်္ဂလန်သည် ဒုတိယကမ္ဘာစစ်အတွင်း ဝင်ခဲ့ရပြီး ဂျာမန်များ ဗုံးကြဲခြင်းကို အပြင်းအထန် ခံနေရချိန်လည်း ဖြစ်သည်။ ပထမဦးဆုံး ကလေးအတွက် အလုံခြုံဆုံး နေရာကို ရှာဖွေရန် ဖရင့်သည် ကိုယ်ဝန်သည် ဇနီးနှင့်အတူ လန်ဒန်မှ အောက်စ်ဖို့ဒ်သို့ ပြောင်းရွှေ့ခဲ့ရသည်။ ဟော့ကင်းသည် အောက်စ်ဖို့ဒ်တွင် ညီမများဖြစ်သည့် မေရီ (၁၉၄၃)၊ ဖိလစ်ပါ (၁၉၄၇) တို့နှင့်အတူ ကြီးပြင်းလာခဲ့ရသည်။ ဒုတိယသား အက်ဒ်ဝပ်ကို ၁၉၅၆ ခုနှစ်တွင်မှ မိဘများက မွေးစားခဲ့ခြင်း ဖြစ်သည်။

သူတို့မိသားစုနှင့် ရင်းနှီးသူများက သူတို့ကို ‘ခပ်ကြောင်ကြောင်’ မိသားစုအဖြစ် သတ်မှတ်ကြသည်။ သူတို့သည် ညစာကို တိတ်ဆိတ်စွာ စားသောက်တတ်ကြသည်။ မိသားစုတွေက ထမင်းစားရင်းလည်း စာဖတ်ချင် ဖတ်နေကြသည်။ သူတို့ မိသားစုစီးသည့်ကားမှာ လန်ဒန်တက္ကစီ ဖြစ်သည်။ စိန့်အယ်လ်ဘန်လမ်းရှိ သူတို့၏ နေထိုင်သည့် သုံးထပ်အခန်းမှာလည်း ဘယ်တော့မှ ပြင်ဆင် မွမ်းမံထားခြင်းမရှိ။ မြေအောက်ခန်းတွင် ပျားများရှိပြီး မှန်လုံအိမ်ထဲတွင်လည်း မီးမွှေးချင် မွှေးနေကြသည်။

၁၉၅၀ ပြည့်နှစ်တွင် ဟော့ကင်း၏ ဖခင်ကို အမျိုးသား ဆေးသုတေသနတက္ကသိုလ် ရောဂါပိုးမွှား ဌာနတွင် ဌာနမှူးအဖြစ် ခန့်အပ်လိုက်သည်။ ဆောင်းရာသီကာလများတွင် အာဖရိကတိုက်သို့ သွားရောက်ပြီး သုတေသန လုပ်ငန်းများ လုပ်ရသည်။ သူက သားကြီးဖြစ်သူ ဟော့ကင်းကို ဆေးကျောင်း တက်စေချင်သည်။ သို့သော် ဟော့ကင်းသည် ငယ်စဉ်ကတည်းက သိပ္ပံနှင့် အာကာသ ပညာရပ်များတွင်သာ စိတ်ဝင်စားခဲ့သည်။ ထိုသို့ဖြစ်ရခြင်းမှာ သူ့မိခင်ကြောင့် ဖြစ်သည်။ မိခင်သည် သူမ၏ သားသမီးများကို နွေရာသီ ညချမ်းအချိန်များတွင် အပြင်သို့ ခေါ်ထုတ်ပြီး ကြယ်တွေကိုပြကာ ကြည့်ခိုင်းတတ်သည်။ “အားလုံးထဲမှာ စတီဖင်က စိတ်အားအထက်သန်ဆုံးပဲ” ဟု မိခင်ဖြစ်သူက ပြန်ပြောပြတတ်သည်။

ပညာသင်သည့်အရွယ် ရောက်ချိန်တွင် ဟော့ကင်းသည် ကျန်ကျောင်းသားများနှင့် ယှဉ်လျှင် ထူးခြားသည့် ကျောင်းသားတစ်ယောက် ဖြစ်နေသည်။ အထက်တန်း တက်ချိန်တွင် သူ့အဆင့်က အောက်ဆုံးမှ ပြန်ရေတွက်လျှင် အမြဲတတိယနေရာလောက်တွင်သာ ရှိနေတတ်သည်။ သူက ကျောင်းစာထက် ပြင်ပလောကကို ပိုပြီး စိတ်ဝင်စားသည်။ စစ်တုရင် ကစားခြင်းကို နှစ်သက်ပြီး သူနှင့် သူငယ်ချင်း တစ်သိုက်သည် အမြဲတမ်းကိုယ်ပိုင် ဂိမ်းများကို ဖန်တီးပြီးလည်း ကစားတတ်ကြသည်။ အသက် ၁၆ နှစ်တွင် ဟော့ကင်းသည် သူငယ်ချင်းများနှင့်အတူ အမှိုက်ပုံထဲက ပစ္စည်းများကိုစုပြီး ကွန်ပျူတာတစ်လုံးကို တီထွင်ခဲ့သည်။ သူတို့က သင်္ချာဆိုင်ရာ ပုစ္ဆာများကို အကြမ်းဖျင်း တွက်ချက်ပြနိုင်ရန် ထိုကွန်ပျူတာကို တီထွင်ကြခြင်း ဖြစ်သည်။

ဟော့ကင်းသည် အမြဲတမ်း တစ်ယောက်တည်းနေပြီး တွေးနေတတ်သည်။ သူညီမဖြစ်သူ မေရီနှင့်အတူ အိမ်အပေါ်ထပ်သို့ လမ်းကြောင်းပေါင်းများစွာနှင့် တက်ပြီး တိတ်တိတ်လေး သွားနေချင်လည်း နေတတ်သည်။ အသက် ၁၇ နှစ်တွင် အောက်စ်ဖို့ဒ် တက္ကသိုလ်သို့ ဝင်ခွင့်ရခဲ့သည်။ သူသည် အကကိုလည်း ဝါသနာပါသည်။ လှေလှော်ကိုလည်း စိတ်ဝင်စားသဖြင့် အောက်စ်ဖို့ဒ် လှေလှော်အသင်း၏ အဖွဲ့ဝင်တစ်ယောက်လည်း ဖြစ်ခဲ့သည်။

သူ့ဖခင်က သင်စေချင်သည့် ဆေးပညာအစား သူဝါသနာပါသည့် သင်္ချာကိုသာ လေ့လာသင်ယူခဲ့သည်။ ထိုအချိန်က အောက်စ်ဖို့ဒ်တွင် သင်္ချာဘာသာရပ်ကို ဘွဲ့မပေးပေ။ သို့ဖြစ်ရာ သူက ရူပဗေဒနှင့် စကြဝဠာ ပညာရပ်များကို လေ့လာသင်ယူခဲ့သည်။ ၁၉၆၂ ခုနှစ်တွင် ဂုဏ်ထူးတန်း တက်ခွင့်ရပြီး ကင်းဘရစ်ခ်ျ တက္ကသိုလ်တွင် စကြဝဠာဆိုင်ရာ Cosmology ဘာသာရပ်အတွက် ဒေါက်တာဘွဲ့ယူရန် ဆက်လက် တက်ရောက်ခဲ့သည်။

ALS ရောဂါစွဲကပ်ခြင်း

အောက်စ်ဖို့ဒ်သို့ သူပြန်ရောက်လာချိန်တွင် ကျန်းမာရေး ချွတ်ယွင်းလာသည်ကို သူသတိထားမိသည်။ လမ်းလျှောက်ရာမှ မကြာခဏ လဲကျတတ်သည်။ စကားပြောလျှင်လည်း ဗလုံးဗထွေး ဖြစ်လာသည်။ ၁၉၆၃ ခုနှစ်အထိ ထိုသို့ဖြစ်နေခြင်းကို ပြဿနာတစ်ခုဟု မထင်ခဲ့ပေ။ ကင်းဘရစ်ခ်ျတွင် ပထမနှစ် တက်ချိန်အထိ ထိုသို့ပင် အမှုမဲ့အမှတ်မဲ့ဖြင့် ဆက်သွားနေခဲ့သည်။ သူက ဤသို့ဖြစ်နေခြင်းကို သာမန်ဟုသာ ထင်နေခဲ့သည်။ သူ့အခြေအနေကို စတင်သတိပြုမိသူမှာ ဖခင်ဖြစ်သည်။ သူက ဟော့ကင်းကို ဆရာဝန်နှင့် သွားတွေ့ရန် ပြောသည်။ နောက်နှစ်ပတ်လောက် အကြာတွင် အသက် ၂၁ နှစ်အရွယ် ကောလိပ်ကျောင်းသားတစ်ယောက် အိမ်ကိုဆေးခန်းအဖြစ် ပြောင်းကာ စမ်းသပ်ကုသမှုများကို ခံယူခဲ့ရတော့သည်။

“သူတို့က ကျွန်တော့် လက်မောင်းက ကြွက်သား နမူနာတွေကို ယူသွားကြတယ်။ ကျွန်တော့် ကိုယ်ထဲကိုလည်း အီလက်ထရွန်နစ် လျှပ်ခေါင်းတွေ ထိုးထည့်ပြီး အမျိုးမျိုး စမ်းသပ်ကြတယ်။ ကျောရိုးထဲကို ရေဒီယိုဓာတ်တွေပါတဲ့ အရည်တွေလည်း ထိုးထည့်ပေးကြတယ်။ ပြီးတော့ တစ်ချိန်လုံး ဓာတ်မှန်တွေရိုက်ပြီး စောင့်ကြည့်နေကြတယ်။ ကျွန်တော့်ကိုလည်း အိပ်ယာထဲမှာပဲ ထားကြတယ်။ ကျွန်တော် ဘာတွေဖြစ်နေတယ်ဆိုတာ သူတို့ မပြောကြဘူး။ အသားကျွတ်ဆတ်တဲ့ ဝေဒနာဆိုတာ လောက်တော့သိတယ်” ဟု ဟော့ကင်းက ပြန်ပြောသည်။

သူ့ဖခင်က နောက်ဆုံးတွင် သူ့သား၌ ဖြစ်နေသော ရောဂါမှာ ALS ခေါ် Lou Gehrig ရောဂါ ဖြစ်ကြောင်း သိလိုက်ရသည်။ အာရုံကြောများက သူ့ ကြွက်သားများကို ထိန်းချုပ်ပြီး ဘာမျှမလှုပ်နိုင်အောင် ချုပ်ကိုင်ထားလိုက်ခြင်းကို ခံစားနေရခြင်း ဖြစ်သည်။ သူ့ကို ဆရာဝန်တွေက ၂ နှစ်ခွဲလောက်သာ အသက်ရှင်မည်ဟု ခန့်မှန်းခဲ့ကြသည်။

ထိုသတင်းကြောင့် မိသားတစ်စုလုံး ယူကျုံးမရ ဖြစ်ကြရသည်။ မျှော်လင့်ချက် မရှိတော့ဘူးဆိုသည့် ကြားမှ သူတို့ဝိုင်းဝန်း ကူညီရန် ဆုံးဖြတ်လိုက်ကြသည်။ ထိုအချိန်တွင် ဟော့ကင်းသည် ဆေးရုံ၌ မလှုပ်မယှက် နေရသည်။ လူကီးမီးယားဝေဒနာ ခံစားနေရသည့် ကလေးတစ်ယောက်နှင့် သူတစ်ခန်းတည်းတွင် တက်ရောက် ကုသခံနေရခြင်း ဖြစ်သည်။ သူ့အခန်းဖော် ကောင်လေး၏ ဆွေမျိုးများ ဝင်လိုက်ထွက်လိုက် ဖြစ်နေခြင်းကို အတော်လေး သည်းခံနေရသည်။ ဆေးရုံကဆင်းခွင့် ရသွားချိန်တွင် သူသည် စိတ်ကူးထဲကအတိုင်း စီမံတော့သည်။ သူ့ဘဝ တစ်လျှောက်လုံး တိတ်တိတ်လေး နေထိုင်ရန် ဆုံးဖြတ်လိုက်ခြင်း ဖြစ်သည်။

သူ့ဘဝတွင် အပြောင်းလဲကြီး ပြောင်းလဲသွားခဲ့ရသည့်ကိစ္စမှာ တစ်ယောက်သောသူကို ချစ်ခဲ့မိခြင်း ဖြစ်သည်။ ALS ရောဂါ မဖြစ်မီကာလ ၁၉၆၃ ခုနှစ် နှစ်သစ်ကူးပါတီပွဲ တစ်ခုတွင် ဟော့ကင်းသည် ဂျိန်းဝေဒီ ဆိုသည့် ဘွဲ့ကြိုတန်း တက်နေသော ကောင်မလေး တစ်ယောက်နှင့် တွေ့ခဲ့သည်။ ၁၉၆၅ ခုနှစ်တွင် သူတို့ လက်ထပ်ခဲ့ကြသည်။

ရောဂါ ဖြစ်သွားသဖြင့် ဟော့ကင်းကို ယခုလို သိပ္ပံပညာရှင်တစ်ယောက် ဖြစ်လာလိမ့်မည်ဟု မည်သူမျှ မထင်ကြပေ။ သူက ရောဂါ မဖြစ်မီကတည်းက သူလေ့လာသည့် ပညာရပ်များနှင့် ပတ်သက်ပြီး အမြဲဆန်းစစ်နေသူ ဖြစ်သည်။ “ကျွန်တော် မကျန်းမာစဉ်က ဘဝမှာ ပျင်းစရာတွေချည်းလို့ ထင်ခဲ့တာ။ လုပ်စရာလည်း ဘာမှမရှိသလိုပဲ” ဟုဆိုခဲ့သည်။ သို့သော် သူ့အနေဖြင့် Ph.D ဘွဲ့အတွက် အချိန်လည်း သိပ်မကျန်၊ အသက်ရှင် နေထိုင်ရမည့် ကာလကလည်း နည်းလာသည်။ သို့ဖြင့် အလုပ်နှင့် သုတေသန လုပ်ငန်းများတွင်သာ အချိန်ကုန်နေခဲ့သည်။

အာကာသတွင်းနက် သုတေသန

အခြားအာကာသသိပ္ပံ ပညာရှင်တစ်ဦးဖြစ်သည့် ရော်ဂျာပင်ရို့စ်ဆိုသူ စိတ်ကူးခဲ့သည့် ကြယ်များကြွေခြင်းနှင့် အာကာသတွင်းနက် (Black holes) အကြောင်းကို အခြေခံပြီး ဟော့ကင်းသည် စကြဝဠာ မည်သို့စတင် ပေါ်ပေါက်လာကြောင်းကို ရှာဖွေဖော်ထုတ်နိုင်ခဲ့သည်။

ဟော့ကင်းသည် သူ့ကိုယ်သူ ထိန်းချုပ်နိုင်စွမ်း လျော့နည်းလာသည်။ ၁၉၆၉ ခုနှစ်တွင် သူ့ကိုဘီးတပ် လှည်းဖြင့်သွားရန် အတင်းအကျပ် တိုက်တွန်းခဲ့ရသည်။ သူ့ခံနိုင်စွမ်းတွေကလည်း လျော့ကျလာသည်။ ၁၉၆၈ ခုနှစ် သူ့သား ရောဘတ်ကိုမွေးပြီး တစ်နှစ်အကြာတွင် ဟော့ကင်းသည် ကင်းဘရစ်ခ်ျ တက္ကသိုလ် နက္ခတ်ဗေဒ အသင်းကြီး၏ အဖွဲ့ဝင်တစ်ဦးအဖြစ် အသိအမှတ်ပြုခြင်း ခံလိုက်ရသည်။

မကြာမီ ဟော့ကင်းဘဝတွင် အကျိုးရှိသည့် ကာလများ ဖြစ်လာခဲ့သည်။ သူတို့ဇနီးမောင်နှံသည် ၁၉၆၉ ခုနှစ်တွင် သမီးလေးလူစီကို ထပ်မံမွေးဖွားခဲ့သည်။ ဟော့ကင်းသည် သုတေသန လုပ်ငန်းများကို ဆက်လက် လုပ်ဆောင်နေဆဲ ဖြစ်သည်။ သူတို့ နောက်ထပ်ကလေး တင်မိုသီကို ဆယ်နှစ်ကြာမှ ထပ်ရသည်။ ထိုအချိန်တွင် ဟော့ကင်းသည် သူ့ပထမဆုံးစာအုပ် 'The Large Scale Structure of Space-Time (1975)' ကို ထုတ်ဝေလိုက်သည်။ သူ့အစောပိုင်း လေ့လာမှုများကို ဆက်လက်လုပ်ဆောင်နိုင်ရန်အတွက် အာကာသတွင်းနက်ကို စတင်ဖော်ထုတ်ခဲ့သူ ပင်ရို့စ်နှင့်အတူ သုတေသန အဖွဲ့တစ်ဖွဲ့ကို ထူထောင်လိုက်သည်။

၁၉၇၄ ခုနှစ်တွင် ဟော့ကင်း၏ သုတေသနလုပ်ငန်းများသည် သိပ္ပံလောကအတွင်း ထင်ရှားကျော်ကြားလာပြီး အာကာသတွင်းနက် အကြောင်းကို ပိုမိုကျယ်ပြန့်စွာ လေ့လာသုတေသနပြုစရာ ဖြစ်လာခဲ့သည်။ ဟော့ကင်းက Radiation ဆိုသည့် သဘောတရားကို ဖော်ထုတ်တင်ပြပြီး ကြယ်ကြွေခြင်းနှင့် ဆွဲငင်အားမှ လွတ်မြောက်ခြင်းစသည့် သဘောတရားများကို တင်ပြရာမှာ ဟော့ကင်း၏ Radiation ဆိုသည့် သဘောတရားသည် မွေးဖွားလာခဲ့ရသည်။

ဟော့ကင်း တွေ့ရှိခဲ့သည့် Black holes များနှင့် Radiation ဆိုသည့် သဘောတရားများသည် သိပ္ပံ လောက တစ်ခုလုံးကို လှုပ်ခတ်သွားစေခဲ့သည်။ ထိုဖော် ထုတ်ချက်ကြောင့်ပင် သူ့ကို ဂုဏ်ပြုစရာ ဖြစ်လာသည်။ သူ့ကို ခေါင်းစဉ်အမျိုးမျိုးဖြင့်လည်း ချီးကျူး ဂုဏ်ပြုခဲ့ကြသည်။ သူ ၃၂ နှစ်တွင် တော်ဝင်အဖွဲ့ (Royal Society) က သူ့ကို အဖွဲ့ဝင်အဖြစ် လက်ခံခဲ့သည်။ နောက်ပိုင်း ဂုဏ်ရှိသော အဲလ်ဘတ်အိုင်စတိုင်းဆုကို ရရှိခဲ့သည်။ ၁၉၇၅ ခုနှစ်တွင် သူရောမမြို့သို့ ရောက်ရှိခဲ့သည်။ ရောမတွင် ဆဋ္ဌမမြောက် ပုပ်ရဟန်းမင်းကြီးက ချီးမြင့်သည့် Pius XI သိပ္ပံပညာဆိုင်ရာ ရွှေတံဆိပ်ဆုကို လက်ခံခဲ့သည်။

ထိုသို့ မလှုပ်ရှားနိုင်သည့် ဘဝနှင့်ပင် ကယ်လီဖိုးနီးယားပြည်နယ် ပါဆာဒီနာရှိ Caltech တွင် တစ်နှစ် ခန့်သွားပြီး ဧည့်ပါမောက္ခအဖြစ် ဆောင်ရွက်ခဲ့သည်။ အင်္ဂလန်၊ ကင်းဘရစ်ခ်ျရှိ Gonville & Caius တွင်လည်း ဝင်ရောက် စာသင်ပေးခဲ့သေးသည်။ ၁၉၇၉ ခုနှစ်တွင် ကင်းဘရစ်ခ်ျ တက္ကသိုလ်သို့ ပြန်လာပြီး သင်္ချာပါမောက္ခအဖြစ် စာသင်ကြားပေးခဲ့သည်။ သူ့ကို ကင်းဘရစ်ခ်ျက သင်္ချာဆိုင်ရာ လူကေးစီးယန်း ပါမောက္ခ ဘွဲ့ပေးသည်။ ထိုရာထူးသည် ၁၆၆၃ ခုနှစ်ကတည်းက ပေးခဲ့သည့် ဘွဲ့ဖြစ်သော်လည်း ဆာအိုင်းဆက်နယူတန် အပါအဝင် ၁၄ ဦးသာ ထိုဘွဲ့ကို ရရှိခဲ့ဖူးသေးသည်။

Credit To The Voice Weekly
Read More »

ခေတ်သစ်တောကြောင် (စိုးဇေယျထွန်း)



လေမုန်တိုင်းသည် မျက်လှည့်ပြလိုက်သလို မြို့ကြီးတစ်ခုလုံးကို စုတ်ပြတ်သွားအောင် နေ့ချင်း ညချင်းမှာပင် ဖျက်ဆီးပစ်လိုက်သည်။ ထို့အတူ ကုန်ဈေးနှုန်းသည်လည်း မျက်လှည့်ပြသလို နေ့ချင်းညချင်းမှာပင် ခေါင်ခိုက်အောင် တက်သွားသည်။

ယခင်က တစ်ချောင်းကို ကျပ် ၂၀ ခန့်သာ တန်ဖိုးရှိသည့် အိပ်သွပ်မိုး ရိုက်သည့် သံများသည် တစ်ချောင်းသုံးရာ ဖြစ်သွားသည်။ ဘဲဥတစ်လုံးကို သုံးလေးရာဖြစ်သွားသည်။ ဆန်နှင့်မီးသွေး ဈေးက နှစ်ဆ ခုန်တက်သွားသည်။ သည့်အပြင် အခြားသော စားသောက်ကုန်များနှင့် အသုံးအဆောင်ပစ္စည်း တော်တော် များများလည်း ဈေးနှုန်းတွေ အဆမတန် မြင့်တက်ကုန်ကြသည်။
ဘာကြောင့်လဲလို့မေးတော့ . . . လေမုန်တိုင်းကြောင့်တဲ့။

လေမုန်တိုင်းတိုက်ပြီးနောက် ဆန်ဆိုင်အများစုသည် ဆန်ဈေးများကို အနည်းဆုံး နှစ်ဆတင်ပြီးရောင်းကြသည်။ ထိုသို့ နှစ်ဆတင်ရောင်းသည့် ဆန်ဆိုင်လေးများတွင် ရန်ကုန်မြို့စွန်ရှိ ဆန်ဆိုင်လေး တစ်ဆိုင်လည်း ပါဝင်လေသည်။

ပုံမှန် တစ်ပြည်ကျပ်လေးရာရှိသော ဆန်ကို ထိုဆန်ဆိုင်လေးတွင် တစ်ပြည်ကို ရှစ်ရာဖြင့် ရောင်းလေသည်။ ထိုသို့တစ်ပြည်ရှစ်ရာဖြင့် နှစ်ဆတင်ရောင်း သည့်တိုင် ဝယ်ယူလိုသူများ ကြိတ်ကြိတ်တိုးကာ များပြားနေသဖြင့် ဆိုင်သံပန်း ဘာဂျာတံခါးကို ဆွဲပိတ်လိုက်သည်။ ဆိုင်က ဘာဂျာတံခါးကို ပိတ်ထားသော်လည်း ဝယ်မည့်သူများက မပြန်ကြသေးဘဲ ဆန်ပြန်ရောင်းမည့် အချိန်ကို စောင့်နေကြသည်။

ခဏလောက်ကြာတော့ ဆိုင်ထဲက လူတစ်ယောက်က လက်ထဲတွင် ဆိုင်းဘုတ်တစ်ခုကို ကိုင်ပြီး အပြင်ထွက်လာသည်။ အပြင်ရောက်တော့ ထိုဆိုင်းဘုတ်ကို ဆိုင်အရှေ့တွင် ချိတ်ဆွဲပြီး ဘာဂျာတံခါးကို ပြန်ပိတ်သွားသည်။ လူအများက ထိုဆိုင်းဘုတ်ကို ဖတ်ကြည့်တော့ “ဆန်တစ်ပြည် ၁၆၀၀ ဝယ်ချင်ဝယ် မဝယ်ချင်နေ” ဟူ၍ ရေးထားသည်။ ထိုအခါလူများက "မဝယ်ဘူးဟေ့ လုတယ်ကွာ" ဟု အော်ဟစ်ကြကာ ဆိုင်ဘာဂျာတံခါးကို ရိုက်ချိုးပြီး ဆန်များကို ဝင်လုကြသည်။

လပွတ္တာမြို့တွင် ဘာကိုစားစား၊ ဘာကိုသောက်သောက်၊ ဘာကိုဝယ်ဝယ် ပုံမှန်ထင်ထားတာထက် ဈေးကြီးနေတတ်သည်။ ဘာဖြစ်လို့ကြီးတာလဲဟု မေးလျှင် သူတို့က ပြန်ဖြေလိမ့်မည်။ နာဂစ်ဈေးတဲ့ ...

ကျွန်တော်တို့ လပွတ္တာမြို့ရှိ စားသောက်ဆိုင်တစ်ခုအတွင်း ထမင်း စားနေကြစဉ် နိုင်ငံခြားသားများ စားသောက်နေသည့် ဝိုင်းသို့ စစ်သားများ ရောက်ရှိလာသည်။ ပြီးနောက် နိုင်ငံခြားသူတစ်ဦးနှင့် စစ်ဗိုလ်တစ်ဦး စကားအချေအတင် ပြောနေကြသည်။ ကျွန်တော်တို့ ထိုင်နေသည့် စားပွဲနှင့် နိုင်ငံခြားသားများ ထိုင်နေသည့် ဝိုင်းက အနည်းငယ်ဝေးသောကြောင့် ဘာဖြစ်နေသည်ကို ကျွန်တော် အသေအချာ မသိရပေ။ သို့ပေမယ့် နိုင်ငံခြား သူကတော့ စစ်ဗိုလ်ကို စကားအချေအတင် ပြောနေသည်။

ကျွန်တော်တို့ ထင်လိုက်သည်က လပွတ္တာသို့ဝင်လာသော နိုင်ငံခြားသားကို စစ်တပ်က လာရောက်စစ်ဆေးနေသည်ဟု ထင်လိုက်သည်။ ထို့ကြောင့် အကျိုးအကြောင်းသိရအောင် စစ်ဗိုလ်နှင့် နိုင်ငံခြားသားများ အချေအတင် ပြောနေ သော နေရာသို့သွားပြီး ဘာဖြစ်တာလဲလို့ မေးကြည့်သောအခါ။ စစ်ဗိုလ်က ရှင်းပြသည်။ ယခုနိုင်ငံခြားသားများသည် အစိုးရက ဖိတ်ထားသော အဖွဲ့တစ်ဖွဲ့ ဖြစ်သည်။ ယခုဆိုင်တွင် စားသောက်ရာတွင် ပိုက်ဆံ နှစ်သောင်းပေး ထားနှင့်ပြီး ဖြစ်ကြောင်း နောက်ဆုံး ဘီလ်ရှင်းသည့်အခါတွင် ဆိုင်က နောက်ထပ် လေးသောင်း ထပ်တောင်းကြောင်း။ သူတို့ စားသောက်ထားသော တန်ဖိုးပမာဏသည် မည်သည့်နည်းနှင့်မျှ ငွေခြောက်သောင်း ကျနိုင်ဖွယ်ရာမရှိ သည့်အတွက်ကြောင့် သူ့ကိုလာခေါ်ပြီး တိုင်ကြားခြင်းဖြစ် ကြောင်း စစ်ဗိုလ်က ပြောပြသည်။

လပွတ္တာမြို့ကို လေမုန်တိုင်းတိုက်ပြီး တစ်ပတ်အကြာမှာ ကျွန်တော် တို့ရောက်သည်။ ထိုစဉ်ကလပွတ္တာမြို့ပေါ်တွင် ဒုက္ခသည် သိန်းချီရှိပြီး သောက်ဖို့ ရေပင်အခက်အခဲ ရှိနေဆဲကာလ ဖြစ်သည်။ ထိုကဲ့သို့ လူအများအတွက် သောက်စရာ ရေပင်မရှိသည့်အချိန်တွင် လပွတ္တာမြို့ပေါ် တွင် စည်ဘီယာ ရသည်။ စည်ဘီယာရသည်ဆိုတော့ ကျွန်တော် သွားသောက်ဖြစ်သည်။
မြန်မာဘရူဝါရီကုမ္ပဏီက တစ်နိုင်ငံလုံးရှိ ဘီယာဆိုင်များကို ရောင်းဈေး သတ်မှတ်ပေးထားပေမယ့် လပွတ္တာမှာတော့ ခြွင်းချက်အနေနှင့် ဈေးကြီးနေမည်မှာ စိတ်ကအလိုလို ကြိုသိနေသည်။ ထင်ထားသည့်အတိုင်း စည်ဘီယာ တစ်ခွက်ကို ၆၀၀ ကျပ်ပေးရသည်။

သွားရေးလာရေး အခက်အခဲကြောင့် ရန်ကုန်ထက် တစ်ရာပိုသည်ကို ကျွန်တော်လက်ခံ၍ ရသည်။ သို့ပေမယ့် ထည့်ထားသည့် ဘီယာကိုတော့ လက်ခံ၍ကား မရနိုင်။ ဘီယာတစ်ခွက်ဟု မှာလိုက်လျှင် ထည့်ပေးသည့် ဘီယာပမာဏသည် အမြှုပ်တောင် လက်ကိုင်ကွင်းနားမရောက်။ ကျွန်တော် က စားပွဲထိုးကို ခွက်မပြည့်ဘူးဟုဆိုကာ ပြန်ထည့်ခိုင်းသည်။ ထိုအခါ စားပွဲထိုးက ဘီယာခွက်လေးကိုယူ၊ အမြှုပ်လေး နည်းနည်းချပြီး ပြန်ယူလာသည်။

ဈေးကလည်း သူများထက် ပိုယူထားသေးသည်၊ ဈေးပိုယူထားလျှင်တော့ ဘီယာကို ပြည့်အောင်ထည့်သင့်သည်။ ထို့ကြောင့် ကျွန်တော်က ပြန်ထည့်ခိုင်းသည်။ ထိုအခါစားပွဲထိုးက မရတော့ဘူးဆရာ၊ ဒါကနာဂစ် ဘီယာတဲ့...။ ခက်သည်က လပွတ္တာမြို့မှာ ဘီယာဆိုင် တစ်ဆိုင်ပဲရှိသည်။ တခြားရွေးချယ်စရာ ဆိုင်မရှိ။ ထို့ကြောင့် သူတို့ထည့်ချင်သလောက် ထည့်၍ ရသည်ဆိုသည့် အချိုးမျိုးနှင့်ရောင်းသည်။ ဘီယာတင်လားဆိုတော့ ဟင်းပွဲများလည်း ထိုကဲ့သို့ပင်ဖြစ်သည်။ တကယ်တော့ စားသောက်ကုန်ဈေးနှုန်း များသည် ဧရာဝတီတိုင်းဒေသကြီးက ရန်ကုန်လောက် ဈေးမကြီးပါ။ လေမုန်တိုင်းတိုက်ပြီး သူတို့မြို့ကို ရန်ကုန်မှကယ်ဆယ်ရေး အဖွဲ့တွေ ဆင်းလာသည့်အခါ ရောင်းအားက ယခင်ထက် ၁၀ ဆဆောက်လောက် မြင့်တက်လာသည်။ မြင့်တက်လာသည့် ဝယ်လိုအားကို အခွင့်ကောင်းယူကာ တင်လိုက်သည့်ဈေးက ရန်ကုန်ထက် ပိုကြီးသည်။

ဈေးပိုကြီးလို့ ထည့်ပေးသည့် ပမာဏမှာလည်း ပုံမှန်မရ။ တော်တော်ကြီး နည်းပြီး တစ်ခါတစ်ရံ ဟင်းပွဲများတွင် ယင်ကောင်များ ပါလာတတ်သေးသည်။ ယင်ကောင်ပါသည်ဟုဆိုကာ သွားပြတော့ အားလုံးက မထူးဆန်းသလို ကြည့်နေကြသေးသည်။

ဈေးကလည်းကြီး၊ ထည့်ပေးတာကလည်း နည်းသည့် ထိုဘီယာဆိုင် ကို နောက်ပိုင်းတော့ ဘီယာသောက်ချင်သည့်တိုင် သွားမသောက်တော့သလို ထိုဆိုင်တွင် ထမင်းတောင် မစားတော့ဘဲ သပိတ်မှောက်ထားလိုက်သည်။

လပွတ္တာရှိ ပဲ့ထောင်ဆိပ်ကမ်းတွင် ပဲ့ထောင်ငှားဖို့ ကျွန်တော် ဆင်းလာသည်။ ထိုနေ့က ရာသီဥတု သာယာသည့်နေ့ဖြစ်သောကြောင့် အလှူရှင် တော်တော်များများ တောဘက်သို့ လှေများဖြင့် ဆင်းလှူကြသည်။ ကျွန်တော် လှေဆိပ်ကို ဆင်းလာတာ နောက်ကျသည်ကတစ်ကြောင်း၊ အလှူရှင်များ အလာများသည်က တစ်ကြောင်းကြောင့် လှေဆိပ်တွင် ပဲ့ထောင် တစ်စီးသာရှိသည်။
လှေဆိပ်မှာ ပဲ့ထောင်တစ်စီးတည်းကျန်တော့တာဆိုရင်တော့ ဈေးကိုင် တော့မှာပဲဟု ကျွန်တော်တွေးလိုက်မိသည်။ သို့ပေမယ့် ဒီတစ်စီးတည်းသာ ရှိသည့်အတွက် ဈေးကိုင်လျှင်လည်း မတတ်နိုင်၊ ပိုပေးတန် ပေးရတော့မည်ဟု တွေးပြီး ထိုပဲ့ထောင်ကို သွားငှားလိုက်သည်။
ကျွန်တော်သွားမည့် ခရီးကို ပြောတော့ ပဲ့ထောင်သမားက ငါးသောင်း တောင်းသည်။ တကယ်တော့ ထိုခရီးသည် ပဲ့ထောင်ဖြင့် မိနစ်ရှစ်ဆယ်ခန့်သာ မောင်းရမည့် ခရီးဖြစ်သည်။ ထိုခရီးကို ငါးသောင်း တောင်းသည်ကတော့ တော်တော်ကြီးကို လွန်သည်ဟု ပြော၍ရသည်။ ခါတိုင်း ထိုခရီးသွားပါက သုံးသောင်းသာ ပေးရသည်။

ထိုသုံးသောင်းဆိုသော ဈေးမှာလည်း လေမုန်တိုင်းတိုက်ပြီးမှ တက်ထားသောဈေး ဖြစ်သည်။ လေမုန်တိုင်း မတိုက်ခင်က ဆိုပါက ထိုခရီးကို နှစ်သောင်း ပေးမည့်သူပင် ရှိလိမ့်မည်မထင်။ သို့ပေမယ့် ထိုသူကအားမနာလျှာမကျိုး ငါးသောင်းတောင်းသည်။
ကျွန်တော်က ဒီခရီးက သွားနေကျခရီးဖြစ်ကြောင်း၊ ခါတိုင်းဈေး အဲဒီလောက်မရှိကြောင်း၊ သို့ဖြစ်သောကြောင့် နည်းနည်းလျှော့ပေးဖို့ လှေသမားကို ပြောသည်။ သို့ပေမယ့် လှေသမားက ငါးသောင်းမှ ငါးသောင်း ငါးသောင်း မရလျှင် မလိုက်နိုင်ဟုဆိုသည်။

တကယ်တော့ ကျွန်တော်တို့က လပွတ္တာမှာ စီးပွားလာလုပ်နေကြသူ များမဟုတ်ပါ။ သူ့လှေကိုငှားပြီး စီးပွားရေး ကိစ္စသွားမည်မဟုတ်ဘဲ သူတို့ ဒေသတွက် အလှူလာလုပ်ပေးနေခြင်း ဖြစ်သည်။ ကျွန်တော်တို့က သူတို့ ဒေသအတွက် အလုပ်လုပ်လာလုပ်ပေးနေတာကြောင့် လှေခကို လျှော့ယူ ရမည်ဟု ဆိုလိုခြင်းမဟုတ်ပါ။ တန်ရာတန်ကြေးယူ။ ယခုတော့ ထိုလူများက ထိုသို့မဟုတ်ရတုန်းကို အဆမတန် ရိတ်လိုက်မယ်ဆိုသည့် အချိုးမျိုးချိုး ချင်ကြသည်။ လှေဈေးမတည့်သဖြင့် ကမ်းပေါ်သို့ ကျွန်တော်ပြန်တက်ဖို့ လုပ်နေစဉ် မှာ နှစ်ရစ်နှင့် စစ်သားတစ်ယောက် ဆင်းလာသည်။ ထို့နောက်ထိုလှေကို ချောဆွဲပါတော့သည်။ လှေကိုချောဆွဲသည့် အချိန်ရောက်မှ လှေသမားက ကျွန်တော့်ကို လှမ်းကြည့်သည်။ ယခုအကြည့်က ငါးသောင်းမှငါးသောင်း ဆိုတုန်းက အကြည့်နှင့် လုံးဝတခြားစီ။

သူကြည့်သည့် အကြည့်ကို ကျွန်တော်သဘောပေါက်ပါသည်။ ထိုအချိန်တွင် ကျွန်တော်က ဒီလှေကို ကျွန်တော် ကယ်ဆယ်ရေးအဖွဲ့က အော်ဒါငှား ထားတာပါဟု ပြောလျှင် ထိုစစ်သားက ချောဆွဲတော့မည်မဟုတ်ပေ။ သို့ပေမယ့် ကျွန်တော်မပြောပေးနိုင်ပါ။ သာမန်အချိန်တွင် ကျွန်တော် ပြောပေးကောင်းပြောပေးလိမ့်မည်။ လောဘဇောတက်နေပြီး မတန်တဆ အမြတ်ကြီးရလိုသူ တစ်ယောက်အတွက်တော့ ကျွန်တော်မကူညီနိုင်ပါ။ ထို့ကြောင့် ကျွန်တော် ဘာမျှဝင်မပြောတော့ဘဲ ကမ်းပေါ်သို့သာ တက်လာခဲ့ တော့သည်။

တောထဲတွင် မီးလောင်ပါက တောနေသတ္တဝါလေးများ ပြေးကြ လွှားကြနှင့် ဒုက္ခရောက်ကြရသည်။ သို့ပေမယ့် တောကြောင်ကတော့ သဘာဝက ပေးထားသည့် စွမ်းအားအတိုင်း ပြေးအားရှိသည့်အတွက် တောမီးသည် သူ့အတွက် တခြားတိရစ္ဆာန်လောက်တော့ ပူစရာ မဟုတ်သည့်အပြင် တောမီးကြောင့် ပြေးထွက်လာကြသော တောနေ သတ္တဝါလေးများကို ပင် တစ်နေရာက စောင့်ကာ အသင့်ဖမ်းစားလိုက်သေးသည်။ ထိုကြောင့် တောမီးသည် တောကြောင်အတွက် ဒုက္ခမရောက်သည့်အပြင် တောမီးကြောင့် တောကြောင်ကိုများစွာ အဆင်ပြေစေသည်။

ခေတ်တစ်ခေတ် ပျက်သည့်အခါတွင် သာမန်လူများအတွက် ဒုက္ခ ရောက်စေသော်လည်း သူခိုး ဓားပြကဲ့သို့သော လူများအတွက်တော့ အကွက်ကောင်းဖြစ်သည်။ ခေတ်ပျက်သောအခါ အုပ်ချုပ်ရေး ပျက်ပြားပြီး လူအများ ဒုက္ခရောက်သည့် အခါတွင် သူခိုး၊ ဓားပြများအတွက် အခွင့်ကောင်း တစ်ခု ဖြစ်ပြီး အပျော်ကြီး ပျော်တော့သည်။

တောမီးလောင်လျှင် တိရစ္ဆာန်လေးများ ဒုက္ခရောက်ကြသည်။ သို့ပေမယ့် တောကြောင်များကတော့ အပျော်ကြီးပျော်ကြသည်။ ထို့အတူ ခေတ်ပျက်သည့်အခါ လူအများဒုက္ခရောက်ကြသည်။ သို့ပေမယ့် သူခိုးဓားပြ များကတော့ အပျော်ကြီး ပျော်ကြသည်။ အများဒုက္ခရောက် သည့်အခါတွင် အပျော်ကြီး ပျော်တတ်သည့် သူခိုးဓားပြများကို တင်စားပြီး တောကြောင်ဟု ခေါ်ကြသည်။ ထိုအခါ “တောမီးလောင် တောကြောင် လက်ခမောင်းခတ်” ဆိုသည့် စကားပုံဖြစ်လာတော့သည်။

မြန်မာ အဘိဓာန်တွင်တော့ ဓားပြဆိုသည်မှာ လက်နက်ဖြင့် အကြမ်းဖက် ခြိမ်းခြောက်၍ ပစ္စည်းလုယူသူဟု အဓိပ္ပာယ် ဖွင့်ထားသည်။ ထို့ကြောင့် သူခိုးဓားပြ ဟုပြောသည့်အခါတွင် ဓားကြီးကိုင်၊ သေနတ်ကြီး ကိုင်ပြီး ရိုက်နှက်လုယူသူများကို ပြေးမြင်ကြသည်။

တကယ်တော့ လောကတွင် သူတစ်ပါးပစ္စည်းကို မတရားသဖြင့် ရယူခြင်းသည်လည်း ဓားပြတိုက်ခြင်းတစ်မျိုး ဖြစ်သည်။ သို့ပေမယ့် ယခင် ခေတ်ဓားပြများသည် တုတ်၊ ဓားများကို အသုံးပြုကြသော်လည်း ယခုခေတ် ဓားပြများ သုံးသည့်လက်နက်က တုတ်၊ ဓားများ မဟုတ်တော့ဘဲ အသုံးပြု သည့်လက်နက်များသာ ပြောင်းသွားခြင်းသာ ဖြစ်ပါတော့သည်။

Credit To The Voice Weekly


Read More »

ဘားမိစ်ပိုင်သွန်(နီမင်းဆွေ )



အောင်နိုင်သူ ဘားမိစ်ပိုင်သွန်
ဘားမိစ်ပိုင်သွန်ဆိုတဲ့ နာမည်ကို တစ်ကမ္ဘာလုံး မသိတဲ့သူ မရှိသလောက်ပါဘဲ။ အမေရိကန် နိုင်ငံထဲမှာ ဆိုရင်တော့ ဘားမိစ်ပိုင်သွန်ဆိုတဲ့ နာမည်ကို ကြားလိုက်ရုံနဲ့ လမ်းသွားနေတဲ့ လူတွေရဲ့ခြေလှမ်းတွေ တုံ့ခနဲ ရပ်သွားကြမှာပါ။ ဒီနာမည်ဟာ အဲဒီလောက်ထိ အရှိန်အ၀ါ ကြီးမားလွန်းလို့ ဒီဆောင်းပါးရဲ့ ခေါင်းစဉ်ကို "မြန်မာစပါးအုံး" လို့ အမည်မပေးဘဲ ဘားမိစ်ပိုင်သွန်လို့ အမည်ပေးလိုက်ရတာ ဖြစ်ပါတယ်။
ဘားမိစ်ပိုင်သွန်ရဲ့ မူလဇာတိမြေဟာ တောင်အာရှနဲ့ အရှေ့တောင်အာရှ ဖြစ်ပါတယ်။ ဒါပေမဲ့ ဒီမြွေဟာ မွေးရပ်ဇာတိမှာ နာမည်မကြီးဘဲ အမေရိကားမှာ နာမည်သွားကြီး နေပါတယ်။ နာမည်ကြီးဆို ဒီမြွေဟာ တဖြည်းဖြည်းနဲ့ အခြားတိရစ္ဆာန်တွေကို သာမက လူသားတွေကိုပါ အန္တရာယ်ပေးစ ပြုလာနေပြီကိုး။ လွန်ခဲ့တဲ့ လေးနှစ်လောက်တုန်းက အမေရိကန်တောင်ပိုင်းက ဖလော်ရီဒါပြည်နယ်မှာ အိမ်မှာမွေးထားတဲ့ ဘားမိစ်ပိုင်သွန် တစ်ကောင်ဟာ ညအချိန် သူ့ကိုထည့်ထားတဲ့ သံတိုင်ကီထဲက လွတ်ထွက်လာပြီး မြွေပိုင်ရှင်ရဲ့ နှစ်နှစ်သမီးလေးကို  ညှစ်သတ်သွားခဲ့ပါတယ်။ နောက်ပြီး ၂၁.၅.၁၃ ရက်နေ့က အဲဒီဖလော်ရီဒါ ပြည်နယ်မှာပဲ ဖမ်းမိတဲ့ ဘားမိစ်ပိုင်သွန် တစ်ကောင်ဟာ ၁၈ ပေအရှည်ရှိပြီး ရင်ကိုခွဲလိုက်တဲ့အခါ အထဲမှာ သမင်တစ်ကောင် မျိုထားတာကို တွေ့ရပါတယ်။
အစတုန်းကတော့ ဖလော်ရီဒါမှာ ဒီမြွေအမျိုးအစားတွေ မရှိပါဘူး။ သူ့ရဲ့အရေခွံဟာ အင်မတန်မှ လှပပြီး အရောင်ကလည်း ဆွဲဆောင်မှု ရှိလွန်းတဲ့အတွက် အမေရိကန်တွေဟာ ဒီမြွေတွေကိုဝယ်ပြီး အိမ်မှာအလှမွေး ခဲ့ကြပါတယ်။ အဆိပ်မရှိတဲ့အတွက် ဂရုစိုက်စရာ မလိုဘူးလို့ ခပ်ပေါ့ပေါ့ သဘောထားပြီး မွေးမြူခဲ့ကြခြင်းကလည်း ပြဿနာရဲ့ အရင်းခံ တစ်ခုပါပဲ။ ဒီမြွေဟာ အလွန်ဖွံ့ထွားနှုန်း မြန်တဲ့အတွက် အိမ်မှာအကောင် သေးသေးလေး ၀ယ်မွေးပြီး ကောင်းကောင်းကျွေးထား လိုက်မယ်ဆိုရင် တစ်နှစ်အတွင်းမှာ ခုနစ်ပေအထိ ရှည်လာနိုင်ပါတယ်။ အသက်လေးနှစ်အရွယ်မှာ ၁၂ ပေအထက်ထိ ရှည်လာနိုင်ပြီး သက်တမ်းကလည်း နှစ်ပေါင်းနှစ်ဆယ်ကျော်ထိ ရှိနိုင်တယ်လို့ ဆိုကြပါတယ်။ ဘားမိစ်ပိုင်သွန်ဟာ ရေကူးအင်မတန်မှ ကျွမ်းကျင်ပြီး ရေအမြဲရှိနေတဲ့ နေရာမျိုးနားမှာသာ နေထိုင်လေ့ ရှိပါတယ်။ ဒါ့ကြောင့် မြက်ခင်းပြင်စိမ့်မြေ၊ ရွှံ့တော၊ ကျောက်တောင်တွေရဲ့ ခြေရင်း၊ သစ်တောထူထပ်တဲ့ နေရာနဲ့ မြစ်ဘေးတွေမှာ သူ့ကိုတွေ့ကြရပါတယ်။ ဒီမြွေဟာ သစ်ပင်လည်း တက်နိုင်တဲ့အပြင် သူ့ရဲ့အမြီးနဲ့ ခန္ဓာကိုယ်ဟာ သားကောင်ကို ရစ်ပတ်ပြီး ညှစ်သတ်တဲ့နေရာမှာ ကြောက်ခမန်းလိလိ စွမ်းအားကြီးမား ပါတယ်။
အရင်တုန်းကတော့ ဖလော်ရီဒါ ပြည်နယ်မှာ ဒီမြွေမျိုးတွေ မရှိခဲ့ပါဘူး။ လူတွေက ဒီမြွေတွေကို အလှမွေးလာရင်း နောက်တော့ သူတို့ကိုထားဖို့ သံတိုင်ကီတွေ ဆောက်လုပ်ရတာက ဈေးကြီး၊ အစားကြီးတဲ့ ဒီမြွေကို ကျွေးရမွေးရတဲ့ နေရာမှာလည်း အကုန်အကျက များသမို့ ဆက်မမွေးနိုင်ကြတော့ဘဲ သင့်တော်ရာ ရေစပ်နွံစပ်တွေနားမှာ သွားလွှတ်ကြရာက မမျှော်လင့်ဘဲ ပြဿနာ တက်ခဲ့ရတော့ တာပါပဲ။ ဘာ့ကြောင့်လဲဆိုတော့ သာမန်အားဖြင့် မြွေဆိုတာ တစ်နှစ်တစ်ခါ ဥလေ့ရှိပြီး ဒီမြွေအမျိုးအစား အမတစ်ကောင်ရဲ့ အသိုက်ထဲမှာ အများဆုံး တွေ့ခဲ့ရဖူးတဲ့ မြွေဥအရေအတွက်က ၈၃ လုံးတောင် ရှိတာဆိုတော့ ဘယ်လောက် အပွားမြန်လိုက်မလဲဆိုတာ စဉ်းစားလို့တောင် မကြည့်ရဲပါဘူး။ ဒါ့ကြောင့်လည်း အခုဖလော်ရီဒါ ပြည်နယ်မှာ ဒီမြွေမျိုး တစ်သိန်းရှစ်သောင်းလောက်တောင် ရှိနေပြီလို့ ဆိုပါတယ်။ ဒီမြွေတွေ ဆက်မပွားနိုင်အောင် တားဆီးကာကွယ်ရေး အဖွဲ့တွေကို ဖွဲ့ကြရပါတယ်။ ကြွက်တွေဖမ်းပြီး နောက်ကျောပေါ်မှာ အသံလွှင့် ကိရိယာတွေ တပ်ပေးကြပါတယ်။ နောက်ဒီကြွက်ဟာ အချိန်တိုအတွင်း ခရီးတစ်မိုင်လောက် ပေါက်နေတာကို တွေ့ရပါတယ်။ နောက်အဲဒီအသံလွှင့်နေတဲ့ နေရာလိုက်သွားပြီး ဖမ်းမိတဲ့ ဘားမိစ်ပိုင်သွန် တစ်ကောင်ရဲ့ရင်ကို ခွဲကြည့်တဲ့အခါ အထဲမှာ အဲဒီကြွက်ကို ပြန်တွေ့ရလို့ ရင်မောကြရပါတယ်။ ဒီမြွေဟာ ငှက်မျိုးစုံ၊ ရှဥ့်၊ တောကြောင်၊ ၀ံအငယ်စား၊ ကြွက်၊ ခရု၊ သမင်နဲ့ ငါးပေအရှည်ရှိတဲ့ မိကျောင်းငယ်ကအစ အကုန်စားပါတယ်။ ဖလော်ရီဒါမှာ ရှိသမျှအကောင် အကုန်ကုန်တာပါပဲ။ ဒါ့ကြောင့် ဘားမိစ်ပိုင်သွန် ချောက်အိပ်မက်တွေ မက်နေကြရပြီး အခုဘားမိစ်ပိုင်သွန် တစ်ကောင်ကို အလှမွေးတာမိရင် ထောင်ဒဏ်ခုနစ်နှစ်၊ ဒါမှမဟုတ် အမေရိကန်ဒေါ်လာ ငါးသိန်းဒဏ်ရိုက်ဖို့အထိ တချို့သတ်မှတ်ထားတဲ့ နေရာတွေမှာ အမိန့်တွေ ထုတ်ထားရပါပြီ။
လက်ရှိ အခြေအနေမှာ ကိုယ့်နိုင်ငံ ဘယ်လိုအခြေအနေမှာပဲ ရှိနေရှိနေ တစ်နေ့နေ့ တစ်ချိန်ချိန်ရောက်ရင် ဘားမိစ်ပိုင်သွန်ကို လူတွေမထီမဲ့မြင် မပြုရဲကြသလို ကိုယ့်နိုင်ငံသားတွေကို အများက အထင်ကြီးလေးစား ကြရတဲ့ ဘ၀မျိုးကို ရောက်လာလိမ့်မယ်လို့ ရင်ထဲမှာ အာရုံရနေ မိတာကတော့ အမှန်ပါပဲ . . . . .
အခု မြွေမဟုတ်တဲ့ ဘားမိစ်ပိုင်သွန်တစ်မျိုး အမေရိကားမှာ ပေါ်လာပြန်ပါတယ်။ အဲဒါကတော့ MMA (Mixed Martial Arts) လို့ခေါ်တဲ့ ခြောက်မြှောင့်ပုံသဏ္ဌာန် သံဆန်ခါဝိုင်း အတွင်းမှာ ငါးမိနစ်သုံးချီ သူသေကိုယ်သေ အနိုင်ထိုးသတ်ရတဲ့ ပွဲမျိုးတွေမှာ ထိုးသတ်ရတဲ့ လက်ဝှေ့သမား တစ်ဦးပါပဲ။ သူ့ကို လူတွေက "ဘားမိစ်ပိုင်သွန်" လို့ အသိများကြပြီး သူ့မူရင်း နာမည်ကတော့ "အောင်လဆန်း" (Aung La Nsang) ဖြစ်ပါတယ်။ အောင်လဆန်းဟာ ကချင်ပြည်နယ် မြစ်ကြီးနားမြို့မှာ မွေးဖွားခဲ့သူပါ။ အသက် ၂၈ နှစ်ရှိပြီး အရပ် ၆ ပေ ၁ လက်မ ကိုယ်အလေးချိန် ၁၇၅ ပေါင် ရှိပါတယ်။ အောင်လဆန်းဟာ လွန်ခဲ့တဲ့ ၁၁ နှစ်က အမေရိကားကို ရောက်လာပြီး ၁.၅.၂၀၀၅ ရက်နေ့က အဲဒီလို ကြေးစားလက်ဝှေ့ပွဲမျိုးကို စတင်ထိုးသတ် ခဲ့တာပါ။ ၂၁ ပွဲ ထိုးရာမှာ ၁၃ ပွဲနိုင်ပြီး ရှစ်ပွဲရှုံးတဲ့စံချိန် ရှိခဲ့ပါတယ်။ ၁၇.၈.၂၀၁၃ မှာ "ရှက်ဒရစ်ဂွတ်ဒရစ်ခ်ျ" (Shedrick Goodridge) လို့ခေါ်တဲ့  အမေရိကန် နိုင်ငံသား အာဖရိကနွယ်ဖွား တစ်ဦးနဲ့ ယှဉ်ပြိုင်ထိုးရတော့မယ်ဆိုတာ သိလိုက်ရတော့ သြဂုတ်လ ၁၆ ရက်နေ့ညမှာ ကိုယ်အိပ်လို့တောင် မပျော်ခဲ့ပါဘူး။ ဂွတ်ဒရစ်ခ်ျဟာ အောင်လဆန်းထက် အသက်ငါးနှစ်ငယ်ပြီး အရပ်တစ်လက်မ ပိုရှည်တဲ့အပြင် နှစ်ပေါင်လည်း ပိုလေးပါတယ်။ ဂွတ်ဒရစ်ခ်ျပုံကိုကြည့်ပြီး ကိုယ့်လူရှုံးတောင်မှ မြင်မကောင်း ရှုမကောင်းလောက်အောင် သွေးသံရဲရဲ ပက်ပက်စက်စက်နဲ့တော့ မရှုံးပါစေနဲ့လို့ ဆုတောင်းခဲ့မိတာ အမှန်ပါ။ ဘာ့ကြောင့်လဲဆိုတော့ ဒီလက်ဝှေ့ပွဲမျိုး ကြည့်ရတာ တစ်ခါတစ်ခါ အမဲပေါ်တဲ့ နေရာနား ရောက်သွားသလို ခံစားရတတ်လို့ပါပဲ။
တခြားနိုင်ငံကို ကိုယ်စားပြုပြီး ထိုးနေတာ ဖြစ်ပေမယ့် သူဟာကိုယ့်နိုင်ငံသား ကချင်တိုင်းရင်းသား လူရွယ်တစ်ဦးဆိုတော့ သူ့အပေါ် သံယောဇဉ် မဖြစ်ဘဲ ဘယ်နေနိုင်လိမ့်မတုံး။ နောက်ပြီးသူက အမေရိကားမှာ နာမည်ကြီးတဲ့ ဘားမိစ်ပိုင်သွန်ဆိုတဲ့ နာမည်ကို ယူထားတဲ့သူလေ။ ကြော်ငြာထဲမှာလည်း ရင်ဘတ်မှာ ဘားမိစ်ပိုင်သွန်ဆိုတဲ့ စာတမ်းပါတဲ့ အင်္ကျီကြီးနဲ့။ နောက်က သူ့အဖွဲ့သားတွေကလည်း အဲဒီစာတမ်းမျိုးပါတဲ့ ဆိုင်းဘုတ်တွေကို လက်ထဲမှာ ကိုင်ထားကြလို့။
တကယ်ထိုးတော့ ဒုတိယအချီ တစ်မိနစ်နဲ့ လေးဆယ့်လေးစက္ကန့်မှာပဲ အောင်လဆန်းဟာ ပြိုင်ဘက်ကို အနိုင်ရရှိ သွားပါတယ်။ ပြိုင်ဘက်ရဲ့ နောက်ကျောဘက်ကနေပြီး မေးအောက်က လည်ပင်းကို လက်နှစ်ဖက်နဲ့ အသေညှစ်ထားရတဲ့ နည်းမျိုးနဲ့ ပြိုင်ဘက်ကို အနိုင်ရသွားတာပါ။ ဒီသတ်ကွက်မျိုးကို သူအင်မတန် ပိုင်ပါတယ်။ နောက်ကနေ တစ်ဖက်လူရဲ့ခါးကို ခြေထောက်နှစ်ဖက်နဲ့ခွပြီး ချုပ်ထားနိုင်ဖို့ အရင်ကြိုးစား ရတာပါ။ ပြီးတော့ ပြိုင်ဘက်က အရှုံးပေးရတဲ့အထိ ပြိုင်ဘက်ရဲ့ လည်ပင်းကို နောက်ဘက်ကနေ လက်နှစ်ဖက်နဲ့ စပါးအုံး တစ်ကောင်လို အသေညှစ်ထားရတာ ဖြစ်ပါတယ်။ ပြိုင်ဘက်က မခံနိုင်တော့လို့ သူ့ခန္ဓာကိုယ်ကို ပဲဖြစ်ဖြစ် ကိုယ့်ခန္ဓာကိုယ်ကိုပဲဖြစ်ဖြစ် ကြမ်းပြင်ကိုပဲဖြစ်ဖြစ် လက်ဝါးနဲ့ပုတ် အချက်ပြတဲ့ အချိန်ဟာ ပွဲသိမ်းတဲ့ အချိန်ပါပဲ။ အခုတစ်ခါမှာလည်း ဂွဒ်ဒရစ်ခ်ျဟာ ဖလော်ရီဒါပြည်နယ်က ပေ ၂၀လောက် အရှည်ရှိတဲ့ ဘားမိစ်ပိုင်သွန်တစ်ကောင် သူ့နောက်ကျောပေါ် ရောက်သွားသလို ခံစားသွားရ ရှာပါတယ်။ အောင်လဆန်းဟာ ဒီပုံစံမျိုးနဲ့ပဲ ပြိုင်ဘက်အပေါ် အများဆုံး အနိုင်ယူခဲ့တာပါ။ ဘားမိစ်ပိုင်သွန်လို ပြိုင်ဘက်ကိုညှစ်ပြီး အနိုင်ယူတာမျိုးကို လူတွေက သဘောကျလွန်းလို့ သူဖွင့်ထားတဲ့ လက်ဝှေ့သင်တန်းကို လာတက်နေသူတွေ တစ်ရာနီးပါးလောက်တောင် ရှိနေပြီလို့ သိရပါတယ်။ အောင်လဆန်းနဲ့ ဂွဒ်ဒရစ်ခ်ျတို့ ယှဉ်ပြိုင်တဲ့ပွဲကို ကိုယ်တိုင်မကြည့်ရပေမယ့် အဲဒီအချိန်မှာ ပရိသတ်ကြီးက "ဘားမိစ်ပိုင်သွန်.. ဘားမိစ်ပိုင်သွန်..." လို့ ဘယ်လောက်များ အော်ဟစ်အားပေး နေကြမလဲဆိုတာ မျက်စိထဲမှာ မြင်ယောင်နေမိပါတယ်။
အားကစားဟာ လူမျိုးတစ်မျိုးရဲ့ စိတ်ဓာတ်ကို အများဆုံး မြှင့်တင်ပေးနိုင်တဲ့အရာ ဖြစ်ပါတယ်။ နိုင်ငံတကာ အားကစားလောက တစ်နေရာမှာ ကိုယ့်နိုင်ငံကို ကိုယ်စားပြုတဲ့ ထူးချွန်သူ အားကစားသမားတစ်ယောက် ပေါ်လာဖို့ဆိုတာ မလွယ်ပါဘူး။ အောင်လဆန်းဟာ အခုလက်မှတ်ထိုးထားခဲ့တဲ့ နှစ်နှစ်စာချုပ် သက်တမ်းကုန်ရင် မြန်မာနိုင်ငံကို ကိုယ်စားပြုပြီး ထိုးတော့မယ်ဆိုတာ သိရလို့ ၀မ်းသာရပါတယ်။
အခုလက်ရှိ အခြေအနေမှာ ကိုယ့်နိုင်ငံ ဘယ်လိုအခြေအနေမှာပဲ ရှိနေရှိနေ တစ်နေ့နေ့ တစ်ချိန်ချိန်ရောက်ရင် ဘားမိစ်ပိုင်သွန်ကို လူတွေမထီမဲ့မြင် မပြုရဲကြသလို ကိုယ့်နိုင်ငံသားတွေကို အများက အထင်ကြီးလေးစား ကြရတဲ့ ဘ၀မျိုးကို ရောက်လာလိမ့်မယ်လို့ ရင်ထဲမှာ အာရုံရနေ မိတာကတော့ အမှန်ပါပဲ။
မြန်မာလူမျိုးဟာ  ပင်ကိုသဘာဝ အကျင့်စရိုက်အရ ခြောက်ပြစ်ကင်းသဲလဲစင်တော့ မဟုတ်ပါဘူး။ ချို့ယွင်းချက် အားနည်းချက်တွေ ရှိပါတယ်။ ဒါပေမဲ့ အစွမ်းအစလည်း ရှိပါတယ်။ တစ်ခါတစ်ရံများဆိုရင် ကျန်တဲ့လူ အတော်များများထက်တောင် သာပါပေတယ်ဆိုတဲ့ လုပ်ဆောင်မှုတွေလည်း ရှိပါတယ်။ ချို့ယွင်းချက် အားနည်းချက် ရှိတယ်ဆိုတဲ့ အထဲမှာ အကြောင်းအရာ တစ်ခုကို ဂဃနဏ အသေးစိတ် နားလည်အောင် လုပ်ဆောင်တဲ့ နေရာမှာတော့ အတော်အားနည်းတယ်လို့ ပြောရပါမယ်။ အကြောင်းအရာ ကိစ္စတစ်ခုကို အသေအချာ အရင်မလေ့လာ မစူးစမ်းဘဲ လုပ်ငန်းကို အလျင်စလို စချင်တဲ့စိတ်တွေက သိပ်များနေပါတယ်။ အခုတလော ဒီလိုကိစ္စမျိုးတွေ နေရာတော်တော် များများမှာ တွေ့နေရလို့ သတိထားမိတာပါ။ နိုင်ငံကို အခြေခံအုတ်မြစ် ခိုင်မာအောင် စတင်ကြိုးစားနေတဲ့ ကာလမှာ ဒီအားနည်းချက်ကို သဘောပေါက်ပြီး ပြုပြင် လိုက်ကြမယ်ဆိုရင်ဖြင့် တစ်နေ့မှာ ဘားမိစ် ပိုင်သွန်ဟေ့လို့ ဆိုလိုက်တာနဲ့ အသံကြား တဲ့လူတွေရဲ့ ခြေလှမ်းတွေ တုံ့ခနဲဖြစ်သွား ကြမှာ အသေအချာပါပဲ။
Credit To First-11
Read More »

ကုလအထူးကိုယ်စားလှယ်ခရီး နောက်ဆက်တွဲစာမျက်နှာများ(ရေးသားသူ- ထားထားမြင့်)




တီဗွီခလုတ်ကိုဖွင့်၍ စီအင်န်အင်န်ကို ကြည့်မလား။ သို့မဟုတ် ဘီဘီစီကို၊ အေဘီစီ၊ အင်န်ဘီစီ။ အယ်လ်ဂျာဇီးယား။ ဘယ်ရုပ်မြင်သံကြားလိုင်းကို ကြည့်ကြည့်ထိုသတင်းက ထိပ်ဆုံးက။ အင်တာနက်စာမျက်နှာပေါ်က ဂူးဂဲလ်၊ ရာဟူးသတင်းစာမျက်နှာများကို ကြည့်မလား။ ထိုသတင်းကိုရှောင်လွှဲ၍မရ။ အင်တာနက် တီဗီရေဒီယိုမကြည့်၊ နားမထောင်သူဆို လည်းမလွတ်နိုင်ပါ။ စတိုးဆိုင်များ၊ သတင်းစာရောင်းသည့်စင်တာများမှာ တင်ထားသည့် ၀ါရှင်တန်ပို့စ်။ နယူးယောက်တိုင်းမ်သတင်းစာများမှာလည်း ထိုသတင်းက အပြည့်။ ကုလသမဂ္ဂအထူး ကိုယ်စားလှယ်ကို မြန်မာပြည်က လူအုပ်နှင့်တိုက်ခိုက်လိုက်သည့် သတင်းက နေရာတကာမှာပျံ့နှံ့ ရောက်ရှိနေသည်။

ဒေါသထွက်နေသောဗုဒ္ဓဘာသာလူအုပ်ကြီးက ကုလသမဂ္ဂအထူးကိုယ်စားလှယ်ကို တိုက်ခိုက်ခြင်းဟု ၀ါရှင်တန်ပို့စ်သတင်း စာက ခေါင်းစဉ်တပ်ထားသလို နယူးယောက်တိုင်းမ်ကလည်း ခပ်ဆင်ဆင်သတင်းရေးထားသည်။ ကုလသမဂ္ဂအထူးကိုယ်စားလှယ် တိုက်ခိုက်မှုကိုမြန်မာပြည်အစိုးရက မကာကွယ်ဘဲကြည့်နေခဲ့သည်ဟု ဖောက်စ်ရုပ်မြင်သံကြားဌာနက သတင်းကြေညာသူကလည်းအာပေါင်အာရင်းသန်သန်ဖြင့် ကြေညာနေသည်။

သြစတြေးလျအေဘီစီရုပ်သံ သတင်းမှာတော့ ရန်ကုန်လေဆိပ်မှာ ကင်တားနားက သတင်းစာရှင်းလင်းပွဲပြုလုပ်နေပုံကို ထုတ်
လွှင့်ပြသခဲ့ပါသည်။ ထိုရှင်းလင်းပွဲမှာ ကင်တားနားက “မိတ္ထီလာမြို့အုပ်ချုပ်ရေးရုံးဆီကို အသွားမှာ။ ၁၉ရက် ည ၁၀ နာရီခွဲလောက်ကပေ့ါနော်။ ကားကို လူနှစ်ရာကျော်လောက်ဝိုင်းခဲ့ပြီးသူတို့က ၀ိုင်းအော်ရင်းကားမှန်ပြတင်းကို ရိုက်တယ်။ အချို့က ကားကိုကန်ကျောက်ပါတယ်။ အဲဒီလို လုံခြုံရေးအခြေအနေကြောင့် နဂိုစီစဉ်ထားတဲ့ ပြီးခဲ့တဲ့ မတ်လက အကြမ်း
ဖက်မှုတွေကြောင့် ဒုက္ခသည်တွေဖြစ်ခဲ့တဲ့ မွတ်ဆလင် ၁၆၀၀ ရှိတဲ့ ဒုက္ခသည်စခန်းကို သွားဖို့ဖျက်လိုက်ရတယ်။ ဒီ အဖြစ်အ
ပျက်မှာ ကျွန်တော်အဲဒီလို ဖြစ်နေတုန်း အနီးကရဲကဘာမှ မကာကွယ်ပေးခဲ့တော့ ပြီးခဲ့တဲ့မတ်လတုန်းက လူအုပ်ကြီးက လူ ၄၃ ယောက်ကို မီးရှို့သတ်ခဲ့တုန်းက ဒေသခံတွေဘယ်လောက် ကြောက်ကြမလဲဆိုတာ ကျွန်တော်နားလည်ခံစားလိုက်ရတယ်”ဟု ပြောကြားခဲ့ပါသည်။

ဘင်္ဂါလီအရေးကိစ္စများတွင် ကုလသမဂ္ဂကိုယ်စားလှယ်တစ်ဦး အနေဖြင့် ကင်တားနားဆောင်ရွက်မှုကို မြန်မာပြည်က လူအများ စုက မကျေနပ်ကြပါ။ လူ့အခွင့်အ ရေးကိစ္စများတွင် သူ၏ဆောင်ရွက်ချက်အချို့က ပြောစရာမရှိ သော်လည်း မြန်မာနိုင်ငံအနောက်ပိုင်းရခိုင်ပြည်နယ်က ဘင်္ဂါလီ အရေးတွင် သူ၏ဆောင်ရွက်ချက်ကတစ်ဖက်သတ်ကျလွန်းသည်ဟု အများကမြင်ကြသည်။

“ရခိုင်အရေးမှာဆို ဘင်္ဂါလီတွေပြောသလို မွတ်ဆလင်မို့လို့ နှိပ်စက်တယ်၊ အနိုင်ကျင့်တယ်ပဲ သူနဲ့ ကုလသမဂ္ဂကပြောနေတယ်။ သူတို့တွေ မြန်မာပြည်ထဲကို ခိုးဝင်လာတာ။ အကြမ်းဖက်နေတာကြတော့မပြောဘူး”ဟု ကျောက်ဖြူမြို့မှ ရခိုင်တိုင်းရင်းသူ မခင်
ဌေးက ဆိုသည်။

သို့သော်လည်း သြဂုတ် ၁၉ ရက် ညက ကင်တားနားကို လူအုပ်နှင့်တိုက်ခိုက်ခဲ့သည့် ကိစ္စကမူ မြန်မာအစိုးရအတွက် အရှက်
ရစရာကိစ္စတစ်ခုသာဖြစ်ခဲ့သည်။ ကင်တားနားကို ကြိုက်သည်ဖြစ်စေ၊ မကြိုက်သည်ဖြစ်စေ သံတမန်တစ်ဦးကို သံတမန်လုပ်ထုံးလုပ်နည်းအရ အကာအကွယ်ပေးရ မည်မှာ သက်ဆိုင်ရာအစိုးရတိုင်း၏ တာဝန်သာဖြစ်သည်ဟု ဧည့်
လမ်းညွှန်တစ်ဦးဖြစ်သူ ဒေါ်ချောချောကြေးမုံကဆိုသည်။

“မကောင်းဘူးလေ။ မလုပ်သင့်ဘူး။ သံတမန်ကျင့်ဝတ်ကို နားမလည်ရာကျတယ်။ ကြိုက်ကြိုက်၊ မကြိုက်ကြိုက်။ သူက အ လုပ်နဲ့လာတာမဟုတ်လား။ ကင်တားနားကို မိတ္ထီလာမှာလုံခြုံရေး အပြည့်အ၀မပေးတာ။ ဂရုမစိုက်တာက ကလေးဆန်တာဖြစ်သလို တိုင်းပြည်မလုံခြုံဘူးဆိုတာ အလိုလိုပြနေတယ်။ မကောင်းတဲ့အချက်ပဲဖြစ်တယ်။ ကင်တားနား ကောင်းတယ်၊ မကောင်းဘူးဆိုတာ ကျွန်မမပြောလိုဘူး”

မြန်မာနိုင်ငံသို့ သတင်းစာပညာများလာရောက် ပို့ချပေးခဲ့ဖူးသော ကနေဒါနိုင်ငံသား သတင်းစာဆရာ ဂျက်ဖ်ပီယာကမူ ကုလ
သမဂ္ဂကိုယ်စားလှယ်ကို တိုက်ခိုက်မှုသည် အစိုးရဘက်က အာဏာပိုင်များ၏ ပြင်ဆင်ကြံရွယ်မှုဖြစ်နိုင်သည်ဟုဆိုသည်။

“ဘာလို့ ညဘက်ကြီးမှာလူတွေက ရုတ်တရက်ပေါ်လာပြီး သူ့ကိုတိုက်ခိုက်ကြသလဲ။ သူ့ကားမှန်းဘယ်လိုသိကြလဲ။ အလံ
ထောင်ထားလို့လား။ ရဲတွေကရော ဘာလို့ကြည့်နေကြတာလဲ”ဟု ဂျက်ဖ်ပီယာကမေးခွန်းထုတ်လိုက်ပါသည်။

သို့သော် ပြည်ထဲရေးဝန်ကြီး ဌာနအထွေထွေအုပ်ချုပ်ရေးဦးစီး ဌာနမှ အဆင့်မြင့်အရာရှိတစ်ဦးကမူ“ မိတ္ထီလာမှာ ဆန္ဒပြတယ်။ အဲဒီဟာတွေပေါ်မူတည်ပြီး ရဲချုပ်ကို အကူအညီတောင်းတာ။ လေးကြိမ်မြောက်လာတုန်းကတော့ သူလွတ်လွတ်လပ်လပ်သွားချင် တယ်ပြောလို့ လုံခြုံရေးကို ချပေးပေမယ့် ပေါ်ပေါ်တင်တင်မချဘူး” ဟု 7Day Daily သို့ပြောကြားသည်။

အစိုးရ၏ စနက်မပါဘူးဆိုလျှင်လည်း နိုင်ငံမှာတရားဥပဒေ စိုးမိုးမှုမရှိဆိုသည်ကို ပြသခြင်းမျိုး
ဖြစ်ခြင်းကြောင့် ကောင်းသော လက္ခဏာမဟုတ်ဟု ဒေါ်ချောချော ကြေးမုံကဆိုသည်။ အချို့ကမူ
မြန်မာပြည်မှာ လူမုန်းများနေသော ကင်တားနားကို အသုံးပြုပြီးအစိုးရကနိုင်ငံရေးလှည့်ကွက်လုပ်ခြင်းဟုဝေဖန်ကြပါသည်။ သို့သော်လည်းထိုအရာက အစိုးရ၏ လှည့်ကွက်ဟုဆိုလျှင် ကိုယ့်ကိုယ်ကိုယ်ပြန်နင်းမည့်အကွက်တစ်ခုသာဖြစ်ပေမည်။

နိုင်ငံရေး၊ စီးပွားရေးအစစ အရာရာပြုပြင်ပြောင်းလဲမှုလုပ်နေသော မြန်မာနိုင်ငံမှာ ယခုအ ချိန်အထိ ကုလသမဂ္ဂဦးဆောင် သောနိုင်ငံတကာ၏ ထောက်ခံယုံကြည်မှုကို ရရှိရန်အထူးလိုအပ်နေပါသည်။ အာရှမှာပင် မြန်မာနိုင်ငံက ဆင်းရဲဆုံးနိုင်ငံတစ်ခု လိုဖြစ်နေသည်။ ကျန်းမာရေး၊ ပညာရေး၊ လူမှုရေးများမှာ နိုင်ငံတ ကာနှင့် နှစ်ပေါင်းများစွာပြတ်ကျန်ခဲ့သလိုဖြစ်နေ၏။

ထို့အတွက်လည်း လူကုန်ကူးခြင်း၊ အခမဲ့လုပ်အားပေးစေခိုင်းခြင်း၊ ကလေးစစ်သားများပြန် လွှတ်ပေးခြင်းအစက မြန်မာအစိုး
ရက များစွာအလျှော့ပေးပြုပြင်ကာကုလသမဂ္ဂအဖွဲ့အစည်းများ နှင့် ပူးပေါင်းဆောင်ရွက်နေသည်။
နိုင်ငံတကာမှာ နာမည်ကောင်း တစ်ခုကို ထိုကဲ့သို့ကြိုးစားပမ်းစားတည်ဆောက်နေချိန်တွင် အားလုံးက မျက်စိဒေါက်ထောက်ကြည့်ရှုခံနေချိန်တွင် ကုလသမဂ္ဂကိုယ်စားလှယ်က သက်သေသက္ကာယဖြင့် မြန်မာဆိုတာဘယ်လိုမျိုးလဲ
ဆိုတာ ပြသလိုက်ခြင်းဖြစ်သည်။

ထို့အပြင် ပြီးခဲ့သည့်မတ်လက မိတ္ထီလာတွင်ဖြစ်ပွားခဲ့သော ဘာသာရေးအကြမ်းဖက်မှုများတွင်လည်း အစိုးရက ထိထိရောက်
ရောက်မဆောင်ရွက်ခဲ့ဖူးဆိုသည်ကိုလည်း ပြသလိုက်သလိုဖြစ်စေခဲ့သည်ဟု သတင်းစာရှင်းလင်းပွဲတွင် ကင်တားနားက ထောက်ပြခဲ့ ပါသည်။

“အစိုးရအနေနဲ့ လူစုနဲ့ အကြမ်းဖက်တာတွေကို တားဆီးထိန်းချုပ်ဖို့၊ လူမျိုးဘာသာမရွေးဘဲ စောင့်ရှောက်ပေးဖို့အစိုးရမှာတာ ၀န်ရှိတယ်။ တချို့ဖြစ်ရပ်တွေက မိတ္ထီလာအကြမ်းဖက်မှုမှာ သူတို့ အဲဒါတွေမလုပ်ခဲ့ဘူးဆိုတာမြင်သာစေတယ်။ ဒီကိစ္စမှာတာဝန် ပျက်ကွက်ခဲ့သူတွေကို အရေးယူဖို့လည်း အစိုးရမှာတာဝန်ရှိတယ်”

ကုလသမဂ္ဂကိုယ်စားလှယ် အတိုက်အခံရမှုနှင့် ပတ်သက်ပြီး မြန်မာအစိုးရပြန်ကြားရေး ဒုဝန်ကြီး ဦးရဲထွဋ်က ကင်တားနား၏ ပြောဆိုမှုသည် တကယ့်ဖြစ်ရပ်နှင့် ကွဲလွဲမှုရှိကြောင်း၊ ထိုနေ့က ရဲအင်အား ၃၀ ကျော်ကို ကင်တားနားကားနားမှာ ချထားခဲ့သည်ဟု ဆိုသည်။ ကားကိုထုရိုက်သည်မ ဟုတ်ဘဲ မှန်ခေါက်ပြီး စာနှင့် တီရှပ်ကို ပြခဲ့ခြင်းဖြစ်သည်ဟု သူက ပြောကြားသည်။ သို့သော်လည်း နိုင်ငံတကာသတင်းစာမျက်နှာများတွင်တော့ ထိုသတင်းက တစ်စထက်တစ်စ တောမီးပမာ ပျံ့နှံ့နေ ရာယူနေပါသည်။ ထိုအထဲတွင် အချောင်နာမည်ပျက်ရသည်မှာ တော့ မေတ္တာကရုဏာတို့ဖြင့် အ ခြေခံထားသည့် ဗုဒ္ဓဘာသာဖြစ်ပါသည်။ ကျောက်ဖြူမြို့မှ ရခိုင်တိုင်းရင်းသူ မခင်ဌေးကတော့“ကင်တားနားကို မကြိုက်ပါဘူး။ ဒါပေမဲ့ သူ့ကိုသွားတိုက်ခိုက်တာက ဘင်္ဂါလီရိုဟင်ဂျာတွေအထိနာဖို့ထက် ကိုယ်အထိနာဖို့ပဲ ဖြစ်နေပြီ။ အခုလိုသွားလုပ်လိုက်
တော့ သူတို့ပြောသလို အကြမ်းဖက်သမားဆိုတာ ဟုတ်တယ်ဆို တာမျိုးဖြစ်သွားတာပေ့ါ”။

Credit To 7Day News Journal
Read More »

နိုင်ငံသားရင်းနှီးမြှုပ်နှံမှုဆိုင်ရာ မူဝါဒအပြောင်းအလဲလော


ပြီးခဲ့သည့် သြဂုတ်လ ၁၆ ရက်နေ့တွင် အမျိုးသားစီမံကိန်းနှင့် စီးပွားရေး ဖွံ့ဖြိုးတိုးတက်မှုဝန်ကြီးဌာန၊ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၏ ကြေညာချက်အမှတ် ၃/၂၀၁၃ ထုတ်ပြန်ခဲ့သည့် သတင်းကို The Voice Daily သတင်းစာတွင် ဖတ်ရှုလိုက်ရသည်။

သာမန်အားဖြင့် မြန်မာကုမ္ပဏီများ၏ သင်းဖွဲ့စည်းမျဉ်းနှင့် သင်းဖွဲ့ မှတ်တမ်းတွင် ကုမ္ပဏီ၏ ခွင့်ပြုမတည်ငွေရင်း (Authorized Share Capital) နှင့် ကနဦးမတည်ငွေရင်း (paid up share Capital) ဟု ခွဲခြားသတ်မှတ်ထားရာ ခွင့်ပြုမတည်ငွေရင်း ပမာဏကို စိတ်ကြိုက်သတ်မှတ်ခွင့် ရှိသော် လည်း ကနဦးထည့်သွင်းရမည့် မတည်ငွေရင်းကို ဝန်ဆောင်မှု၊ ခရီးသွားလာရေးနှင့် ရောင်းဝယ်ရေး ကုမ္ပဏီများအတွက် ကျပ်သိန်းငါးဆယ်နှင့် ဆောက်လုပ်ရေးနှင့် ထုတ်လုပ်မှု ကုမ္ပဏီများအတွက် ကျပ်သိန်းငါးရာဟု ကုမ္ပဏီမှတ်ပုံတင်ရုံးက ပုံသေသတ်မှတ်ထားပါသည်။ ဈေးကွက်စီးပွားရေး ခေတ်ဦး ၁၉၈၈-၈၉ ဝန်းကျင်ကတည်းက မြန်မာနိုင်ငံကုမ္ပဏီများ အက်ဥပဒေနှင့်အညီ ဖွဲ့စည်း တည်ထောင်ကြသော မြန်မာကုမ္ပဏီအများစုမှာ အဆိုပါ ကနဦးထည့်ဝင်ငွေရင်းကို ဘဏ်စာရင်း ဖွင့်လှစ်ပြီး အမှန်တကယ် ထည့်သွင်းပြီး ဘဏ်စာရင်းရှင်းတမ်းကို ပြသရန် မလိုအပ်ခဲ့ပါ။ ထို့ကြောင့် ကုမ္ပဏီအများစုမှာ ကုမ္ပဏီ စတင်တည်ထောင်ချိန်တွင် ကုန်ကျစရိတ် အတန်အသင့်ဖြင့် ဖွဲ့စည်းတည်ထောင်နိုင်ပြီး ကုမ္ပဏီ တည်ထောင်ပြီးချိန်မှသာ ဈေးကွက်ရှာဖွေခြင်း၊ လုပ်ငန်းအဆက်အသွယ်များ ရှာဖွေခြင်း အစရှိသည်တို့ကို ဆောင်ရွက်နိုင်ကာ လုပ်ငန်းကို တဖြည်းဖြည်း တိုးတက်အောင် ကြိုးစားဆောင်ရွက်နိုင်ကြပါသည်။ ထို့အတူ သင်းဖွဲ့မှတ်တမ်း သင်းဖွဲ့စည်းမျဉ်းတွင် ဖော်ပြထားသော ကုမ္ပဏီ၏ သတ်မှတ် မတည်ငွေရင်းကိုလည်း လုပ်ငန်း အပေါ်မှ ဝင်ငွေဖြင့် အခွန်ဆောင်ရင်း စုဆောင်းရင်းဖြင့် တဖြည်းဖြည်း ပြည့်မီအောင် လုပ်ကိုင်နိုင်ခဲ့ကြပါသည်။

ထို့အတူ ... ကုမ္ပဏီ၏ ဘဏ္ဍာရေး အခြေအနေကို မြန်မာနိုင်ငံ လက်ခံကျင့်သုံးလျက်ရှိသော စာရင်းကိုင်စနစ်နှင့် ညီညွတ်ကိုက်ညီမှုရှိအောင် တရားဝင်မှုရှိအောင် ဆောင်ရွက်ကြရပါသည်။ ထိုမှတစ်ဆင့် ကုမ္ပဏီ၏ လုပ်ငန်းအခြေအနေ တိုးတက်လာသည့်အချိန်မျိုး၊ ကုမ္ပဏီလုပ်ငန်းပမာဏ အရ ... ခွင့်ပြုမတည်ငွေရင်းကို တိုးမြှင့်ရန် လိုအပ်လာသည့် အချိန်မျိုးတွင်လည်း တည်ဆဲဥပဒေ ဖြစ်သော မြန်မာနိုင်ငံ ကုမ္ပဏီများ အက်ဥပဒေနှင့်အညီ တိုးမြှင့်ရန် ဆောင်ရွက်နိုင်ကြပါသည်။

ယခုကြေညာချက်အပေါ် သက်ဆိုင်ရာ ဌာနအကြီးအကဲ၏ မှတ်ချက်စကားအရ မြန်မာကုမ္ပဏီများ၏ သက်တမ်းကို ငါးနှစ်အထိ တိုးမြှင့်ပေးလိုက်သည့်နောက်ပိုင်း အခွန်တိမ်းရှောင်မှုများ မဖြစ်ပေါ်စေရန် အတွက် ယခုလို စီစဉ်ဆောင်ရွက်ရခြင်း ဖြစ်ကြောင်း သိရှိရပြီး သက်ဆိုင်ရာဌာန အနေနှင့် အလုပ်လုပ်ခြင်းလည်းမရှိ လိပ်စာအတိအကျလည်း မရှိသဖြင့် ဆက်သွယ်၍ မရနိုင်သော ကုမ္ပဏီများကို အမိန့်ကြော်ငြာစာ ထုတ်ပြန်၍ ကုမ္ပဏီ မှတ်ပုံတင်စာရင်းမှ ပယ်ဖျက်လျက် ရှိကြောင်းကိုလည်း သိရှိရပါသည်။

အဆိုပါဌာနဆိုင်ရာ အကြီးအကဲ၏ မှတ်ချက်နှင့် ပတ်သက်ပြီး များစွာအံ့သြမိပါသည်။ အဘယ့်ကြောင့်ဆိုသော် ကုမ္ပဏီများ အခွန်တိမ်းရှောင်မှုနှင့် ပတ်သက်၍ အဓိကတာဝန်ရှိသော ဌာနမဟုတ်ဘဲ တစ်စိတ်တစ်ပိုင်းသာ တာဝန်ရှိသော ဌာနကအခွန်ငွေနှင့် ပတ်သက်၍ သိသာထင်ရှားသော ပတ်သက်မှု မရှိသည့် လုပ်ထုံးလုပ်နည်းတစ်ခုကို သတ်မှတ်ပြဋ္ဌာန်းခဲ့ခြင်းကြောင့် ဖြစ်ပါသည်။ ကုမ္ပဏီမှတ်ပုံတင်ရုံး၏ လုပ်ထုံးလုပ်နည်းအရ မြန်မာကုမ္ပဏီများအဖို့ စတင် မှတ်ပုံတင် လျှောက်ထားစဉ်ကတည်းက ကုမ္ပဏီရုံးခန်း၏ အမှန်တကယ်လိပ်စာ၊ ပထမ ဒါရိုက်တာများ၏ နိုင်ငံသားစိစစ်ရေးကတ် မိတ္တူ၊ နေရပ်လိပ်စာနှင့်တကွ တင်ပြရခြင်းဖြစ်ပြီး သက်ဆိုင်ရာ ပြည်ထဲရေးဝန်ကြီးဌာနသို့ မှတ်တမ်း အချက်အလက်များပေးပို့ပြီး မှန်ကန်ခြင်းရှိ မရှိ စိစစ်ပြီးမှ မှတ်ပုံတင် ထုတ်ပေးလျက် ရှိပါသည်။ ထို့အတူ ကုမ္ပဏီ သက်တမ်းတိုးမြှင့်ရန် လျှောက်ထားသော ကုမ္ပဏီများအတွက်လည်း သက်ဆိုင်ရာ ဘဏ္ဍာရေး ဝန်ကြီးဌာန၊ ကုမ္ပဏီများဆိုင်ရာ အခွန်ရုံးမှ အခွန်ဆိုင်ရာ ထောက်ခံချက်များ တင်ပြနိုင်မှ သက်တမ်းတိုးမြှင့်ပေးလျက် ရှိပါသည်။

သို့ဖြစ်ပါသောကြောင့် ကုမ္ပဏီများ အခွန်တိမ်းရှောင်မှုမှာ ကုမ္ပဏီမှတ်ပုံတင်ရုံး၏ အားနည်းချက် ပြဿနာဟု ရှုမြင်နိုင်စရာမရှိပါ၊ အမှန်တကယ် လုပ်ငန်းလုပ်ကိုင်လျက်ရှိသော ကုမ္ပဏီထံမှ ထိုက်သင့်သော အခွန်ဘဏ္ဍာငွေ ရရှိအောင် ကောက်ခံရမည့်တာဝန်မှာ ဘဏ္ဍာရေးဝန်ကြီးဌာန လက်အောက်ရှိ အကောက်ခွန်ဦးစီးဌာန၊ ပြည်တွင်းအခွန်များ ဦးစီးဌာနတို့နှင့်သာ တိုက်ရိုက်သက်ဆိုင်မည်ဟု ယူဆပါသည်။ ကုမ္ပဏီ မှတ်ပုံတင်ရုံးအနေနှင့် ဌာနအချင်းချင်း ချိတ်ဆက်ပြီး အခါအားလျော်စွာ ပူးပေါင်းဆောင်ရွက်ခြင်းအားဖြင့် လုံလောက်သည်ဟု ထင်ပါသည်။ နိုင်ငံအတွက် အခွန်ဘဏ္ဍာငွေ ရှာဖွေရာတွင် အခွန်ထမ်းထံမှ အခွန်ငွေကို အရအမိ ကောက်ခံနိုင်ရေးမှာ အခွန်ဆိုင်ရာ မူဝါဒများနှင့်သာ တိုက်ရိုက်အချိုးကျမည်ဟု မှတ်ယူပါသည်။ ဖြစ်သင့်ဖြစ်ထိုက်သော အခွန်နှုန်းထား၊ တရားမျှတသော အခွန်ကောက်ခံမှုစနစ်၊ အဂတိတရား ကင်းရှင်းသော ပြည်သူ့ဝန်ထမ်းများနှင့် တာဝန်သိ ပြည်သူများ ဟန်ချက်ညီညီ ပေါင်းစပ်ပြီး ရှုပ်ထွေးမှု ကင်းရှင်းသော လုပ်ထုံးလုပ်နည်းများဖြင့် ပွင့်လင်းမြင်သာစွာ ကောက်ခံပါက တိုင်းပြည်အတွက် လိုအပ်သော အခွန်ဘဏ္ဍာငွေကို အလေအလွင့် နည်းပါးစွာဖြင့် ကောက်ခံရရှိနိုင်မည်ဟု ယုံကြည်ထားပါသည်။

အစိုးရသစ် လက်ထက်တွင် မြန်မာကုမ္ပဏီများ ဖွဲ့စည်းတည်ထောင်ခြင်း သက်တမ်းတိုးမြှင့်ခြင်းတို့နှင့် ပတ်သက်၍ မြင်သာထင်သာသော တိုးတက်ပြောင်းလဲမှုများ ဖြေလျှော့ပေးမှုများကို မြင်တွေ့ခဲ့ရပါသည်။ ကုမ္ပဏီများ၏ သက်တမ်းကို တိုးမြှင့်သတ်မှတ်ပေးခြင်း၊ လုပ်ငန်းရည်ရွယ်ချက် ကန့်သတ်မှုများကို ဖြေလျှော့ပေးခြင်းမှ အစပြု၍ အာရှဖွံ့ဖြိုးရေးဘဏ်၏ အကူအညီဖြင့် အွန်လိုင်းဝန်ဆောင်မှုပေးခြင်းနှင့် ရန်ကုန်တိုင်းဒေသကြီးတွင် One Stop Service ရုံးဖွင့်လှစ်၍ ဝန်ဆောင်မှုပေးခြင်းတို့အထိ ဖြစ်ပေါ်တိုးတက်မှုများကို အားရစဖွယ် မြင်တွေ့ရပါသည်။

သို့သော် ယခုနောက်ဆုံး ကြေညာလိုက်သည့် သတ်မှတ်ချက်အတိုင်း ဆောင်ရွက်ရမည်ဆိုလျှင် အရင်းအနှီး နည်းပါးသော အငယ်စားနှင့် အလတ်စား မြန်မာလုပ်ငန်းရှင်များ အနေနှင့် ကုမ္ပဏီဖွဲ့စည်း တည်ထောင်ရန် ပိုမိုခက်ခဲသွားနိုင်ပေသည်။ အဘယ့်ကြောင့်ဆိုသော် ကုမ္ပဏီ တည်ထောင်ပြီး လုပ်ငန်းတစ်ခု စတင်ထူထောင်ရန် တာစူနေသူများအဖို့ ခွဲဝေနေရာချထားရမည့် ကုန်ကျစရိတ်မှာ များပြားလှသည်ဖြစ်ရာ ထိုကုန်ကျစရိတ်များအနက် ကုမ္ပဏီဖွဲ့စည်း တည်ထောင်ခြင်းအတွက် ငွေသား သိန်းငါးရာခန့်ကို ဘဏ်အတွင်းသို့ ထည့်သွင်းရမည့် လုပ်ငန်းမှာလည်း အခက်အခဲတစ်ခု ဖြစ်လာနိုင်ပေသည်။ ထို့ပြင်ဤမျှသော ငွေကြေးပမာဏအတွက် ခွဲဝေနေရာချထားရန် အခက် အခဲရှိသော လုပ်ငန်းငယ်များအဖို့ ဘဏ်သို့မဟုတ် အခြားငွေရှင်လုပ်ငန်းရှင်များနှင့် ညှိနှိုင်းကာ ခေတ္တခဏ ငွေချေးငှားပြီး ဘဏ်ရှင်းတမ်းပြသော လုပ်ငန်းများ ထွန်းကားလာနိုင်ဖွယ် ရှိပါသည်။ အချုပ်ဆိုရလျှင် လုပ်ထုံးလုပ်နည်း အဆင့်တစ်ဆင့် ပိုမိုလာခြင်းသာ အဖတ်တင်ပြီး အရင်းအနှီး နည်းပါးသော လုပ်ငန်းရှင်များအတွက် အခက်အခဲ အဟန့်အတားဟုသာ ရှုမြင်မိပါသည်။

ဒေသတွင်းနိုင်ငံများကို မျှော်ကြည့်လျှင် စင်ကာပူနိုင်ငံတွင် စင်ကာပူနိုင်ငံသား လုပ်ငန်းရှင်တစ်ဦးအဖို့ ကနဦး မတည်ငွေရင်း စင်ကာပူတစ်ဒေါ်လာ ထည့်သွင်းရုံမျှဖြင့် ကုမ္ပဏီမှတ်ပုံတင်ကြေး စင်ကာပူဒေါ်လာသုံးရာ ပေးသွင်းကာ ကုမ္ပဏီ တည်ထောင်နိုင်ပါသည်။ ထိုင်းနိုင်ငံတွင်မူ ထိုင်းနိုင်ငံသား သုံးဦးရှိပါက ကနဦးမတည်ငွေရင်း ၁၅ ဘတ် ထည့်သွင်းရုံမျှဖြင့် ကုမ္ပဏီမှတ်ပုံတင် ကြေး ဘတ် ၇၀၀၀ ပေးသွင်းပြီး ကုမ္ပဏီ တည်ထောင်နိုင်ပါသည်။ ယင်းကဲ့သို့ ဒေသတွင်းနိုင်ငံများတွင် မိမိနိုင်ငံသားများကို လွယ်လင့်တကူ ကုမ္ပဏီထူထောင်နိုင်ရန် လုပ်ထုံးလုပ်နည်းနှင့် ဥပဒေများ အပြိုင်အဆိုင် ဖြေလျှော့ထားသည်ကို လှမ်းမျှော်ကြည့်ပြီး အတုယူသင့်ပါသည်။ ပြိုင်ဆိုင်မှု ကြီးမားပြင်းထန်သော နိုင်ငံတကာ ဈေးကွက်တွင် တိုးဝင်ရန် သို့တည်းမဟုတ် တိုးဝင်လာသော နိုင်ငံတကာဈေးကွက်ကို ရင်ဆိုင်အန်တုရန် အချိန်အခါကို ရောက်ရှိ နေသော မြန်မာနိုင်ငံအနေနှင့် မိမိ၏ ပြည်တွင်းလုပ်ငန်းရှင်များ အထူးသဖြင့် အလတ်စားနှင့် အငယ်စား လုပ်ငန်းရှင်များ၏ ရှင်သန်ရပ်တည်ရေးကို အထူးတလည်အားစိုက်ပြီး ကျားကန်ပေးသင့်သည့် အချိန်အခါ ဖြစ်ပါသည်။ ယင်းသို့သော အချိန်အခါမျိုးတွင် ယခုကဲ့သို့ လုပ်ငန်းရှင်ငယ်များကို ပိုမိုခက်ခဲစေသည့် လုပ်ထုံးလုပ်နည်းအသစ်များ ပြဋ္ဌာန်းနေသည့်အပေါ် မည်သို့ နားလည်ရမည် မသိနိုင်ပါ။

မြန်မာနိုင်ငံ၏ လက်ရှိအနေအထားမှာ ရေရှည်ကို အမြော်အမြင်ကြီးစွာ လှမ်းမျှော်ကြည့်ပြီး ကောင်းမွန်စွာ စီမံခန့်ခွဲမည်ဆိုပါက ... အသီးအပွင့်များစွာ ဖြစ်ထွန်းလာနိုင်သော အခြေအနေကောင်း တစ်ရပ်ကို ရောက်ရှိနေပြီ ဖြစ်ပါသည်။ ဤကဲ့သို့သော အချိန်အခါကောင်းတွင် စီးပွားရေး၊ ရင်းနှီးမြှုပ်နှံမှုနှင့် သက်ဆိုင်သော အင်စတီကျူးရှင်းများသည် မူဝါဒကောင်းများ ချမှတ်ပြီး ပြည်ပရင်းနှီးမြှုပ်နှံမှု များအတွက် အခွင့်အလမ်းကောင်းများ ဖန်တီးပေးနေသည်ကို သတိပြုမိပါသည်။ ယင်းကဲ့သို့ ရင်းနှီးမြှုပ်နှံမှု မူဝါဒများ ချမှတ်ရာတွင် မိမိနိုင်ငံသားများ၏ အကျိုးစီးပွားကိုလည်း သတိကြီးကြီးထားပြီး အကာအကွယ် ပေးသင့်ပါသည်။ မိမိနိုင်ငံသားများဟု ဆိုရာတွင် ငွေကြေးပမာဏများစွာကို ရင်းနှီးပြီး လုပ်ကိုင်ဆောင်ရွက်နေသော လက်တစ်ဆုပ်စာ လုပ်ငန်းရှင်ကြီးများဆိုသည်ထက် လူများစုဖြစ်သော အလတ်စားနှင့် အသေးစားလုပ်ငန်းရှင်များ၏ အကျိုးစီးပွားကို အထူးတလည် ထည့်သွင်းတွက်ချက် သင့်ပါသည်။

ဈေးကွက်စီးပွားရေး ခေတ်ဦး မကြာသေးမီကာလများအတွင်းက လွဲမှားသည့် မူဝါဒများနှင့် နိုင်ငံရေး အခြေအနေများကြောင့် အတွင်းအပြင် အပြန်အလှန် ပိတ်ဆို့ဟန့်တားမှုများဖြင့် တိုင်းပြည် နစ်နာခဲ့ရသည်။ စီမံခန့်ခွဲမှု အလွဲအချော်များဖြင့် လူများစု၏ အကျိုးစီးပွားကို လျစ်လျူရှုထားခဲ့သည့် အတိတ်ဆိုးမှာ မဝေးကွာလှသေးပါ။ နိုင်ငံတည်ဆောက်ရေးအတွက် အရေးပါလှသည့် သမိုင်းမော်ကွန်း ရေးထိုးလျက်ရှိသော ယခုအချိန်ကဲ့သို့ ကာလမျိုးတွင် စီမံခန့်ခွဲမှု အလွဲအချော်များ၊ ကိုယ်ကျိုးစီးပွားနှင့် မကင်းသော မူဝါဒများ၊ အမှားအယွင်းကို အမှားမှန်းသိလျက်နှင့် ခေါင်းရှောင်နေသော လုပ်ရပ်များကို တွေ့မြင်နေရပါသေးသည်။ ထိုဖြစ်ရပ်များ လုပ်ရပ်များသည် များစွာ ဝမ်းနည်းစိတ်ပျက်ဖွယ် ကောင်းသလို လက်ရှိအစိုးရ ဖော်ဆောင်နေသော ပြုပြင်ပြောင်းလဲရေး လုပ်ငန်းစဉ်ကို အရုပ်ဆိုး အကျည်းတန်စေပါသည်။ ထို့အတူ ယခုနောက်ဆုံး ထုတ်ပြန်လိုက်သော ကြေညာချက်မှာ ၂၀၁၁ အစိုးရသစ် ဖွဲ့စည်းချိန်ကစတင်၍ တဖြည်းဖြည်း ဖြေလျှော့ပေးလျက်ရှိသော ရင်းနှီးမြှုပ်နှံမှု မူဝါဒများအနက် မေးခွန်းထုတ်ဖွယ် ဖြစ်လာနေသော လုပ်ထုံးလုပ်နည်း တစ်ခုအဖြစ်သာ ရှုမြင်မိကြောင်း ပြောလိုပါသည်။ ထို့အတူ အကောင်းဘက်သို့ သွားနေရာမှ နောက်ပြန်လှည့်သော မူဝါဒ အပြောင်းအလဲလောဟု မေးခွန်းထုတ်ချင်မိပါသည်။

(ဗဟိန်းဆွေ)

Credit To The Voice Weekly
Read More »

ဒေါ်စုမဟုတ်သော သမ္မတနှင့် ဒေါ်စုဦးစီးမည့် လွှတ်တော် Written by ဒေါက်တာရန်မျိုးသိမ်း



ပြည်သူ့လွှတ်တော် အစည်းအဝေးသို့ တက်ရောက်လာသည့် ဒေါ်အောင်ဆန်းစုကြည်အား သြဂုတ်၂၁ ရက်က တွေ့ရစဉ် (ဓာတ်ပုံ - ဝေယံဖြိုးဦး)
မြန်မာ့နိုင်ငံရေး အပြောင်းအလဲနှင့် ဒီမိုကရေစီ အသွင်ကူးပြောင်းရေးတို့သည် ၂၀၁၅ ခုနှစ် အလွန်တွင် နိုင်ငံရေး ထုံကူးမည်ဟု သုံးသပ်နိုင်သည်။ အမျိုးသားဒီမိုကရေစီ အဖွဲ့ချုပ်နှင့် ဒေါ်အောင်ဆန်းစုကြည်တို့သည် ပြန်လည်သင့်မြတ်ရေးနှင့် အားလုံးပါဝင်ရေးကို အခြေပြုမည့် နိုင်ငံရေး ရှေ့ခရီးကို ဦးဆောင်ရာတွင် မျက်လုံးကျယ်ကျယ်ဖွင့်၊ နားကျယ်ကျယ် စွင့်ထားရမည်။ ဒေါ်အောင်ဆန်းစုကြည် မဟုတ်သော အင်န်အယ်လ်ဒီ သမ္မတနှင့် ဒေါ်အောင်ဆန်းစုကြည် ဦးဆောင်မည့် လွှတ်တော်တို့သည် ဆင်းရဲမွဲတေမှုနွံထဲ နစ်မြုပ်နေသည့် ပြည်သူလူထု၏ ၀န်ထုပ်ဝန်ပိုးကို အတန်အသင့် ဖြေလျှော့ပေးနိုင်ရေးတွင် ယခုကာလ ဗျူဟာမြောက် ပြင်ဆင်မှုများသည် အလွန်အရေးကြီးသည်ဟု ကောက်ချက်ပြုနိုင်သည်။
မြန်မာပြည်သူလူထု အများစုကြီး၊ အထူးသဖြင့် အမျိုးသားဒီမိုကရေစီ အဖွဲ့ချုပ် ပါတီဝင်များသည် ဒေါ်အောင်ဆန်းစုကြည်ကို ၂၀၁၅ ခုနှစ် အထွေထွေရွေးကောက်ပွဲ အလွန်ကာလတွင် ပြည်ထောင်စုသမ္မတ မြန်မာနိုင်ငံတော်၏ ပထမဆုံး အမျိုးသမီး သမ္မတအဖြစ် မြင်တွေ့လိုကြသည်။ ဒေါ်အောင်ဆန်းစုကြည်၏ ဦးဆောင်မှုဖြင့် မြန်မာ့နိုင်ငံရေး အချိုးအကွေ့ကြီး တစ်ခုကို သူနိုင်ကိုယ်နိုင် အနေအထားနှင့် ကျော်ဖြတ်နိုင်ရန် အာရုံများနေသော မြန်မာပြည်သူ လူထုကြီးသည် ရွေးကောက်ပွဲအလွန် နိုင်ငံရေး အခင်းအကျင်းတွင် မှန်းချက်နှင့် နှမ်းထွက်မကိုက် ဖြစ်မည်ကိုလည်း စိုးရိမ်ကြောင့်ကြလျက် ရှိသည်။
၂၀၁၅ ခုနှစ်အလွန် မြန်မာ့နိုင်ငံရေး အခင်းအကျင်းတွင် အကယ်၍ ဒေါ်အောင်ဆန်းစုကြည် အနေဖြင့် သမ္မတနေရာနှင့် လွဲချော်သွားခဲ့မည်ဆိုလျှင် ချုံးပွဲချ ငိုမည့်သူများ၊ စိတ်ဓာတ်ကျမည့်သူများ၊ ခြေမကိုင်မိ လက်မကိုင်မိ ဖြစ်မည့်သူများ အများအပြား ရှိနေသည်မှာ ငြင်းမရသောအချက် ဖြစ်သည်။ ရန်ကုန်မြို့နှင့် မန္တလေးမြို့မှလွဲ၍ မြန်မာနိုင်ငံ၏ ကျန်မြို့များတွင် နေထိုင်သော လူငယ်များနှင့် လူထုအများစုသည် ဒေါ်အောင်ဆန်းစုကြည်ကို နောက်လာမည့် ဒုတိယငါးနှစ် သက်တမ်းအတွက် သမ္မတ ဖြစ်လာလိမ့်မည်ဟု မျှော်လင့်ချက် မြင့်မြင့်မားမား ထားလျက်ရှိသည်။ သတင်းမီဒီယာများတွင် သုံးသပ်ဖော်ပြချက်များကလည်း ဒေါ်အောင်ဆန်းစုကြည် သမ္မတ ဖြစ်နိုင်သည့်ဘက်ကို ယိမ်းနေသည့်အလျောက် ပြည်သူအများစုကြီးသည် ဒေါ်အောင်ဆန်းစုကြည် သမ္မတဖြစ်နိုင်သည်၊ သမ္မတဖြစ်အောင် ၀ိုင်းဝန်းပံ့ပိုးရမည်ဆိုသည့် လမ်းကြောင်းပေါ် ရောက်ရှိလာနေသည်ဟု ကောက်ချက်ပြုနိုင်သည်။
မျက်မှောက်နိုင်ငံရေး အခင်းအကျင်းတွင် ဒေါ်အောင်ဆန်းစုကြည် ခေါင်းဆောင်သော အမျိုးသားဒီမိုကရေစီ အဖွဲ့ချုပ်၊ အခြားဒီမိုကရက်တစ် ပါတီများ၊ တိုင်းရင်းသား လူမျိုးစု နိုင်ငံရေး ပါတီတို့သည် ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေ (၂၀၀၈ ခုနှစ်)အရ ဖွဲ့စည်းသော လွှတ်တော်အသီးသီးတွင် ပါဝင်လျက် ရှိနေသည်။ ထို့ကြောင့် ဒေါ်အောင်ဆန်းစုကြည် အနေဖြင့် သမ္မတဖြစ်နိုင်၊ မဖြစ်နိုင်ဆိုသော အချက်ကို ဆန်းစစ်ရာတွင် ဖွဲ့စည်းပုံ အခြေခံဥပဒေပါ ပြဋ္ဌာန်းချက်သည် ပဓာနကျသော အနေအထားတွင် ရှိနေသည်။ ဖွဲ့စည်းပုံ အခြေခံဥပဒေ၊ ပုဒ်မ ၅၉ (စ)ကို ပြင်ဆင်နိုင်မှသာ ဒေါ်အောင်ဆန်းစုကြည်သည် ဖွဲ့စည်းပုံ အခြေခံဥပဒေတွင် ဖော်ပြထားသော နိုင်ငံတော်သမ္မတ၏ အရည်အချင်းများနှင့် ကိုက်ညီမည် ဖြစ်သည်။ ၅၉ (စ)ကို ပြင်ဆင်နိုင်ရန် ပထမအဆင့် အနေဖြင့် ပြည်ထောင်စုလွှတ်တော် ကိုယ်စားလှယ် ၁၃၃ ဦး၏ အတည်ပြုချက်ဖြင့် လွှတ်တော်တွင်း ဆွေးနွေးနိုင်ရေး ပြင်ဆင်ရမည်ဖြစ်သည်။ ဒုတိယအဆင့် အနေဖြင့် ပြည်ထောင်စုလွှတ်တော် ကိုယ်စားလှယ် ၇၆ ရာခိုင်နှုန်းက ပြင်ဆင်မှုကို ထောက်ခံရမည် ဖြစ်သည်။ တတိယအဆင့် အနေဖြင့် ပြည်လုံးကျွတ် ဆန္ဒခံယူပွဲတွင် မဲပေးပိုင်ခွင့်ရှိသူ ၅၁ ရာခိုင်နှုန်းက ထောက်ခံရမည် ဖြစ်သည်။
လက်ရှိပြည်ထောင်စု လွှတ်တော်အတွင်း နိုင်ငံရေး ပါတီများ၏ လွှတ်တော်ကိုယ်စားလှယ်များ ဖွဲ့စည်းမှု ပုံစံကိုကြည့်လျှင် ပထမအဆင့် လွှတ်တော်ကိုယ်စားလှယ် ၁၃၃ ဦး၏ ထောက်ခံမှု ရရှိနိုင်ရေးတွင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၏ လွှတ်တော်ကိုယ်စားလှယ်များ သို့မဟုတ် တပ်မတော်သားလွှတ်တော် ကိုယ်စားလှယ်များ ပါဝင်မှု မရှိလျှင် မဖြစ်နိုင်သည်ကို တွေ့ရသည်။ အင်န်အယ်လ်ဒီပါတီ၊ အခြားဒီမိုကရက်တစ် ပါတီများနှင့် တိုင်းရင်းသား ပါတီများ၏ ကိုယ်စားလှယ်များအားလုံး ပေါင်းလျှင်ပင်၊ ၁၃၃ ဦး မပြည့်မီသည်မှာ ပကတိ အခြေအနေ ဖြစ်သည်။
ပုဒ်မ ၅၉ (စ) ပြင်ဆင်နိုင်ရေးအတွက် ဒုတိယအဆင့်ကို ကျော်ဖြတ်နိုင်ရန် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၏ လွှတ်တော်ကိုယ်စားလှယ် များသာမက တပ်မတော်သား လွှတ်တော်ကိုယ်စားလှယ်များ၏ ထောက်ခံမှုကို ရရှိရန် လိုအပ်သည်။ ဒေါ်အောင်ဆန်းစုကြည်အား နိုင်ငံတော် သမ္မတအဖြစ် ခန့်အပ်နိုင်ရန် လိုအပ်သော ဖွဲ့စည်းပုံ ပြင်ဆင်မှုကို ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ အနေဖြင့် လိုလိုလားလား ပြုလုပ်နိုင်သည်ဟု သုံးသပ်ရန် ခဲယဉ်းဆဲ ဖြစ်သည်။ ဖွဲ့စည်းပုံ အခြေခံဥပဒေ ပြင်ဆင်ရေး ဥပဒေမူကြမ်းတွင် ၅၉(စ) နှင့် အခြားအဓိက ပုဒ်မများကို မည်ရွေ့မည်မျှ ထည့်သွင်းမည်ဆိုသော အချက်သည် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဗဟိုကော်မတီ၏ ဆုံးဖြတ်ချက်ပေါ်တွင် မူတည်နေပြီး၊ ဥက္ကဋ္ဌ သူရဦးရွှေမန်း၏ ပါတီဗဟိုကော်မတီအပေါ် သြဇာသက်ရောက်နိုင်မှုမှာလည်း အကန့်အသတ်များစွာ ရှိနေသည်ဟု မှတ်ချက်ပြုနိုင်သည်။
ထို့အပြင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီသည် ဒေါ်အောင်ဆန်းစုကြည်ကို သမ္မတအဖြစ် လက်ခံနိုင်ရန် နိုင်ငံရေးအရ အဆင်သင့်ဖြစ်၊ မဖြစ်နှင့်လည်း များစွာဆက်စပ်နေသည့်အပြင် ဒေါ်အောင်ဆန်းစုကြည်အပေါ် ပြည်ခိုင်ဖြိုးပါတီ ဗဟိုကော်မတီ၏ သဘောထား၊ အကဲဖြတ်ချက်တို့နှင့်လည်း ပတ်သက်နေသည်။ လက်ရှိအခြေအနေတွင် သူရဦးရွှေမန်း ခေါင်းဆောင်သော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် ဒေါ်အောင်ဆန်းစုကြည်အား သမ္မတဖြစ်သွားနိုင်မည့်လမ်းကို သဘောထားကြီးကြီး ဖွင့်ပေးနိုင်လောက်သည်အထိ နိုင်ငံရေးအရ ပြင်ဆင်ပြီး ဖြစ်သည်ဟု ကောက်ချက်ပြုနိုင်မည့် အထောက်အထားများကို မတွေ့ရှိရပေ။
ထို့ကြောင့် ၂၀၁၅ ခုနှစ်အလွန် မြန်မာနိုင်ငံရေး အခင်းအကျင်းတွင် ဒေါ်အောင်ဆန်းစုကြည်သည် နိုင်ငံတော်သမ္မတ သို့မဟုတ် ဒုတိယသမ္မတဖြစ်ရန် အလားအလာ အလွန်နည်းပါးသည်ဟု မှတ်ချက်ပြုနိုင်ခြင်း ဖြစ်သည်။ ဒေါ်အောင်ဆန်းစုကြည် အနေဖြင့် အလွန့်အလွန်ဆုံး ပြည်သူ့လွှတ်တော် ဥက္ကဋ္ဌ၊ အမျိုးသားကာကွယ်ရေးနှင့် လုံခြုံရေးကောင်စီ(ကာလုံ)၏ အဖွဲ့ဝင် ဖြစ်လာနိုင်ခြေ ရှိသည်ဟုသာ သုံးသပ်နိုင်သည်။
အင်န်အယ်လ်ဒီပါတီ အနေဖြင့် ၂၀၁၅ ခုနှစ်အလွန် ကာလတွင် သမ္မတနေရာကို ရည်မှန်းချက်ထားရှိသည် ဆိုပါက ယခုအချိန် ကတည်းက စတင်ပြင်ဆင်သင့်သည်ဟု မြင်မိသည်။ အထူးသဖြင့် တိုင်းရင်းသား ပါတီများနှင့် မဟာမိတ် ဆက်ဆံရေးကို တည်ဆောက်နိုင်ရန် အထူးလိုအပ်သည် . . . . .
လွန်ခဲ့သော ရက်ပိုင်းက နယ်မြို့တစ်မြို့တွင် ပြုလုပ်ခဲ့သော နိုင်ငံရေး ဆွေးနွေးပွဲတွင် တက်ရောက်လာသော လူငယ်များက ၂၀၁၅ ခုနှစ် ရွေးကောက်ပွဲအလွန် ကာလတွင် ဒေါ်အောင်ဆန်းစုကြည် အနေဖြင့် သမ္မတဖြစ်ရန် အလားအလာ အလွန်နည်းပါးကြောင်းကို သိရှိရသောအခါ သူတို့အနေဖြင့် အလွန်စိတ်ဓာတ် ကျမိကြောင်း ထုတ်ပြောသောအခါ အတော်စိတ်မကောင်း ဖြစ်မိသည်။ ထိုမြို့ကလေးမှ လူငယ်များ အပါအ၀င် မြန်မာပြည်သူ လူထုအများစုကြီးအတွက် ဒေါ်အောင်ဆန်းစုကြည်သည် ကယ်တင်ရှင် သို့မဟုတ် နိုင်ငံရေး မျှော်လင့်ချက်ပင် ဖြစ်သည်။  ဒေါ်အောင်ဆန်းစုကြည်သည် သမ္မတဖြစ်နိုင်ခြေ အလွန်နည်းပါးသည်ဟု သုံးသပ်မှုသည် သူတို့အတွက် ကောင်းသတင်းမဟုတ် ရတက်မအေးစရာ ကိစ္စဖြစ်သည်။ အဆိုပါ သုံးသပ်ချက်ကို အကြောင်းပြုလျက် ကျဆင်းနေသော စိတ်ဓာတ်များကို ပြန်မြှင့်တင်နိုင်ရန် ခွန်အားတချို့ ပေးဖို့ပြောလာသောအခါ ပို၍စိတ်မကောင်း ဖြစ်ရပြန်သည်။ ဒေါ်အောင်ဆန်းစုကြည်ကို သမ္မတအဖြစ် မျှော်လင့်နေသူ များစွာတို့အတွက် သမ္မတဖြစ်နိုင်ခြေ အလွန်နည်းသည်ဆိုသော စကားကပင် အတော်ထိခိုက်သွားနိုင်သည်မှာ ပကတိ အနေအထားပင် ဖြစ်သည်။
စကားမစပ် အကြံပြုလိုသည်မှာ အမျိုးသားဒီမိုကရေစီ အဖွဲ့ချုပ်အနေဖြင့် ဒေါ်အောင်ဆန်းစုကြည်၏ သမ္မတဖြစ်နိုင်ခြေ၊ ဖွဲ့စည်းပုံ အခြေခံဥပဒေ ပြင်ဆင်နိုင်မည့် အလားအလာ ပါတီဝင်များ ခံယူရမည့် နိုင်ငံရေး ရပ်တည်ချက်တို့နှင့် ပတ်သက်၍ အောက်ခြေပါတီဝင်ထုအား စနစ်တကျ ချပြဆွေးနွေးသင့်သည်။ ထို့အပြင် ဒေါ်အောင်ဆန်းစုကြည် အနေဖြင့် သမ္မတ ရွေးချယ်ခံနိုင်ခွင့် မရှိလျှင် ပါတီအနေဖြင့် မည်သည့်လမ်းကြောင်း မည်သည့်ပုံစံဖြင့် ရှေ့ဆက်မည်ကို စနစ်တကျ ရှင်းလင်းဆွေးနွေးသင့်သည်။
၂၀၁၅ ခုနှစ်အလွန် သမ္မတဇာတ်လမ်းနှင့် ပတ်သက်လျှင် ၃၃၃ ကို ဦးစွာအသိပေးလိုသည်။ ပြည်ထောင်စုလွှတ်တော် ကိုယ်စားလှယ် (၄၉၈) နေရာအနက် လွှတ်တော်ကိုယ်စားလှယ် (၃၃၃) နေရာသည် သမ္မတကို အတည်ပြုရန် လိုအပ်သော ကိုယ်စားလှယ် အရေအတွက် ဖြစ်သည်။ အမျိုးသားဒီမိုကရေစီ အဖွဲ့ချုပ်သည် ၂၀၁၅ ခုနှစ် အထွေထွေ ရွေးကောက်ပွဲတွင် လွှတ်တော်ကိုယ်စားလှယ် (၃၃၃) နေရာ၌ အနိုင်ရရှိပါက ပြေးကြည့်စရာမလို အင်န်အယ်လ်ဒီပါတီမှ ရွေးချယ်သူသည် နိုင်ငံတော်သမ္မတနှင့် ဒုတိယသမ္မတတို့ ဖြစ်လာမည်ဖြစ်သည်။ ထို့ကြောင့် ဒေါ်အောင်ဆန်းစုကြည်ကို သမ္မတဖြစ်နိုင်ရန် လိုအပ်သော ဖွဲ့စည်းပုံ အခြေခံဥပဒေ ပြင်ဆင်မှုအား မပြုလုပ်နိုင်လျှင်ပင် အန်အယ်လ်ဒီပါတီမှ ခေါင်းဆောင်နှစ်ဦးသည် သမ္မတနှင့် ဒုတိယသမ္မတ ဖြစ်လာနိုင်ဖွယ် ရှိနေသည်။
နောက်ထပ် စိတ်ဝင်စားဖွယ် ဂဏန်းတစ်ခုမှာ ၁၃၀ ဖြစ်သည်။ ပြည်ထောင်စုလွှတ်တော် ကိုယ်စားလှယ် (၁၃၀) နေရာတွင် အနိုင်ရရှိရေးသည် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၏ နောက်ဆုံးခံစစ်ကြောင်းပင် ဖြစ်သည်။ ကိုယ်စားလှယ် (၁၃၀) နေရာသည် ပြည်ထောင်စုလွှတ်တော် ကိုယ်စားလှယ် စုစုပေါင်း၏ ၂၆ ရာခိုင်နှုန်းဖြစ်သည်။ ပြည်ခိုင်ဖြိုးပါတီသည် ၂၆ ရာခိုင်နှုန်း အနိုင်ရရှိပါက တပ်မတော်သားလွှတ်တော် ကိုယ်စားလှယ် ၂၅ ရာခိုင်နှုန်းနှင့် ပူးပေါင်းလျက် အမျိုးသားဒီမိုကရေစီ အဖွဲ့ချုပ်၏ ဒုတိယသမ္မတ တစ်ဦးအား သမ္မတဖြစ်လာမည့် အရေးကို ဟန့်တားနိုင်မည် ဖြစ်သည်။
တိုင်းရင်းသား လူမျိုးစု နိုင်ငံရေး ပါတီများနှင့် တပ်မတော်သားလွှတ်တော် ကိုယ်စားလှယ်များ၏ အခန်းကဏ္ဍသည် ၂၀၁၅ ခုနှစ် ရွေးကောက်ပွဲအလွန် ကာလတွင် ပိုမိုအရေးပါလာဖွယ် ရှိနေသည်။ ပြည်ခိုင်ဖြိုး ပါတီသည် တပ်မတော်ကိုယ်စားလှယ်နှင့် တိုင်းရင်းသား မဟာမိတ် ကိုယ်စားလှယ် နေရာများကို စုပေါင်းပြီး တပ်မတော်မှ ရွေးချယ်သည့် ဒုတိယသမ္မတကို သမ္မတအဖြစ် အရွေးခံရနိုင်ရန် ဆောင်ရွက်ခြင်းဖြင့် အင်န်အယ်လ်ဒီပါတီ၏ သမ္မတအိပ်မက်ကို အနိုင်ယူသွားနိုင်ခြေ ရှိနေသည်ဟုလည်း သုံးသပ်နိုင်သည်။ အင်န်အယ်လ်ဒီပါတီ အနေဖြင့် ၂၀၁၅ ခုနှစ်အလွန် ကာလတွင် သမ္မတနေရာကို ရည်မှန်းချက်ထားရှိသည် ဆိုပါက ယခုအချိန် ကတည်းက စတင်ပြင်ဆင်သင့်သည်ဟု မြင်မိသည်။ အထူးသဖြင့် တိုင်းရင်းသား ပါတီများနှင့် မဟာမိတ် ဆက်ဆံရေးကို တည်ဆောက်နိုင်ရန် အထူးလိုအပ်သည်။ အင်န်အယ်လ်ဒီပါတီမှ အဆိုပြုသူတစ်ဦး သမ္မတဖြစ်လာရေးတွင် တပ်မတော် ကိုယ်စားလှယ်များ၏ ထောက်ခံမှုထက်၊ တိုင်းရင်းသားလူမျိုးစု ပါတီများ၏ ထောက်ခံမှုက ပိုမိုလက်တွေ့ကျပြီး ထိရောက်နိုင်သည်ဟု သုံးသပ်နိုင်သည်။
ထို့အပြင် အမျိုးသားဒီမိုကရေစီ အဖွဲ့ချုပ်သည် ၂၀၁၅ ခုနှစ် ရွေးကောက်ပွဲမူဝါဒ၊ လမ်းစဉ်၊ ဗျူဟာနှင့် လုပ်ငန်းစဉ်များကို ယခုကတည်းက ရေးဆွဲချမှတ်ထားရန် လိုအပ်သည်။ တိုင်းပြည်နှင့် ပြည်သူလူထု အကျိုးကို လက်တွေ့ကျကျ သယ်ပိုးနိုင်မည့် လွတ်တော်ကိုယ်စားလှယ်လောင်းများ ရွေးချယ်ရေးနှင့် ပတ်သက်သော မူဝါဒ၊ သတ်မှတ်ချက်များကို ကြိုတင်ချမှတ်ထားပြီး၊ ယခုကတည်းက ရွေးချယ်လေ့ကျင့် ပျိုးထောင်ထားရန် လိုအပ်သည်ဟု အကြံပြုလိုပါသည်။
၂၀၁၅ ခုနှစ် အလွန်တွင် ဒေါ်အောင်ဆန်းစုကြည် အနေဖြင့် သမ္မတဖြစ်နိုင်၊ မဖြစ်နိုင်ဆိုသော အချက်သည် ဖွဲ့စည်းပုံ အခြေခံဥပဒေ ပြင်ဆင်ရေးနှင့် ဆက်စပ်နေသည်။ ၂၀၁၅ ရွေးကောက်ပွဲ မတိုင်မီ ဖွဲ့စည်းပုံ ပြင်ဆင်မှုသည် ဒေါ်အောင်ဆန်းစုကြည် သမ္မတ သို့မဟုတ် ဒုတိယသမ္မတ ဖြစ်ရေးအတွက် အဆင်သင့် မဖြစ်သော အနေအထား အတွက်လည်း အင်န်အယ်လ်ဒီပါတီ အနေဖြင့် ကြိုတင်ပြင်ဆင် ထားသင့်သည်ဟု အကြံပြုလိုသည်။ ထို့ကြောင့် အမျိုးသားဒီမိုကရေစီ အဖွဲ့ချုပ်သည် သမ္မတလောင်း၊ ဒုတိယသမ္မတလောင်း၊ လွှတ်တော်ဥက္ကဋ္ဌ၊ ဒုတိယဥက္ကဋ္ဌ၊ ပြည်ထောင်စုဝန်ကြီးများ၊ ဒုဝန်ကြီးများနှင့် ပြည်ထောင်စုအဆင့် အဖွဲ့အစည်းများတွင် တာဝန်ယူမည့်သူများကို ယခုအချိန်ကတည်းက ကြိုတင်သတ်မှတ် လျာထားကာ၊ လိုအပ်သော လေ့ကျင့်မှုများကို ပံ့ပိုးပေးသင့်သည်ဟု ယူဆမိသည်။ သို့မှသာ ၂၀၁၅ ခုနှစ် အလွန်တွင် စနစ်ကျ၊ အားကောင်းသော ဒီမိုကရက်တစ် အစိုးရအဖွဲ့နှင့် အားကောင်းမောင်းသန်သော လွှတ်တော်တို့ကို ဖွဲ့စည်းနိုင်မည် ဖြစ်သည်။
နိဂုံး
အချုပ်အားဖြင့်ဆိုသော် ၂၀၁၅ ခုနှစ်အလွန် အခင်းအကျင်းသည် မြန်မာ့နိုင်ငံရေး အပြောင်းအလဲတွင် မဟာဗျူဟာမြောက် အရေးပါလာမည်မှာ မုချဖြစ်သည်။ ဒေါ်အောင်ဆန်းစုကြည် အနေဖြင့် သမ္မတ၊ အစိုးရအဖွဲ့၊ လွှတ်တော်များကို မည်သို့မည်ပုံ ဖွဲ့စည်းမည်နှင့် ပတ်သက်၍ သီးခြားစဉ်းစားချက် ရှိပြီးဖြစ်လိမ့်မည်ဟု မျှော်လင့်မိသည်။ ဒေါ်အောင်ဆန်းစုကြည်၏ ဗျူဟာ၊ စီမံချက်နှင့် လုပ်ငန်းစဉ်များကို အမျိုးသား ဒီမိုကရေစီ အဖွဲ့ချုပ်အတွင်း ချပြဆွေးနွေးကာ သဘောထား မှတ်ချက်များ ရယူပြီး ပါတီ၏ ရွေးကောက်ပွဲ၊ အစိုးရနှင့် လွှတ်တော်ဆိုင်ရာ စီမံချက်၊ လုပ်ငန်းစဉ်များအဖြစ် စနစ်တကျ ထုတ်ပြန်လျက် ပါတီအောက်ခြေအထိ ချပြဆွေးနွေး အသိပေးနိုင်မည်ဆိုလျှင် ပါတီတည်ဆောက်ရေးကို အထောက်အကူ ပြုနိုင်မည့်အပြင် အကယ်၍ ဒေါ်အောင်ဆန်းစုကြည် သမ္မတဖြစ်နိုင်မည့် အခွင့်အလမ်း မရခဲ့လျှင်ပင် ပါတီ၏ စီမံချက်နှင့်အညီ ပါတီမှ ရွေးချယ်သူတစ်ဦး သမ္မတဖြစ်လာရေးကို ၀ိုင်းဝန်းကြရေး ဆော်သြပြီး ဖြစ်သဖြင့် ပါတီအောက်ခြေ အဖွဲ့အစည်း အဆင့်ဆင့်တွင် စိတ်ဓာတ်ကျဆင်းမှု အားယုတ်မှုများ ဖြစ်လာနိုင်ခြေကိုလည်း ဖြေလျှော့ပြီးဖြစ်မည်။ ဒေါ်အောင်ဆန်းစုကြည်နှင့် အင်န်အယ်လ်ဒီပါတီ အနေဖြင့် ၂၀၁၅ ခုနှစ်အလွန် အုပ်ချုပ်ရေးနှင့် ဥပဒေပြုရေး ယန္တရားအတွက် လိုအပ်မည့် အရင်းအမြစ်များကို ယခုကတည်းက ကြိုပြင်တည်ဆောက်ထားခြင်း မရှိလျှင် အရင်းအမြစ် အားကောင်းသော အခြားအဖွဲ့အစည်းများကို လိုသည်ထက်ပို၍ အားကိုးအားထား ပြုလာရနိုင်ဖွယ် ရှိနေသည်။ ဒေါ်စုမဟုတ်သော သမ္မတနှင့် ဒေါ်စုဦးဆောင်မည့် လွှတ်တော်တို့ အဓိကကျလာမည့် ၂၀၁၅ ခုနှစ်အလွန် ဒီမိုကရက်တစ် ခရီးအတွက် နိုင်ငံရေးပါတီများ အနေဖြင့် ယခုကတည်းက ပါတီတည်ဆောက်ရေးကို စနစ်တကျ ပုံဖော်နိုင်ခြင်း မရှိလျှင် မြန်မာ့အနာဂတ်သည်ေ၀၀ါးထွေပြားလျက် ပြည်သူလူထုကြီးသည် ဆင်းရဲတွင်းထဲတွင် နစ်လျက်မြုပ်လျက် ရှိနေဦးမည့် အရေးကို မျှော်တွေးစိုးရိမ်မိပါကြောင်း မီးမောင်းထိုးပြ လိုက်ရပါသည်။
Credit To First-11
Read More »