မဏ္ဍိုင်ငါးခု ပွတ်တိုက်မှု (ဌေးအောင်ကို)

နိုင်ငံတော်သမ္မတ မိန့်ခွန်းမှာ ‘ပဉ္စမမဏ္ဍိုင် မိဘပြည်သူ’ လို့ သုံးစွဲလိုက်တဲ့ နောက်မှာတော့ မဏ္ဍိုင်ငါးခုဆိုတဲ့ အသုံးအနှုန်းဟာ တွင်ကျယ်လာတယ်လို့ သဘောရပါတယ်။ အုပ်ချုပ်ရေး၊ တရားစီရင်ရေး၊ ဥပဒေပြုရေး၊ မီဒီယာနဲ့ မိဘပြည်သူများပါပဲ။ မဏ္ဍိုင်ငါးခုဟာ နိုင်ငံတော်မှာ လက်ငါး ချောင်းပမာ တာဝန်ကိုယ်စီ ရှိလာပြီး လှုပ်ရှားဆောင်ရွက် လုပ်ကိုင်ကြတဲ့ အခါမှာလည်း လက်ငါးချောင်း လှုပ်ရှားရာမှာ ပွတ်တိုက်မှု ရှိသလိုမျိုးပဲ မဏ္ဍိုင်ငါးခုရဲ့ ပွတ်တိုက်မှုတွေလည်း မလွဲမသွေ ရှိလာပါတယ်။ ဘယ်အထိ ရှိလာသလဲဆိုရင် မီဒီယာ အချင်းချင်းမှာလည်း ဘယ်ဘက်လက်ညှိုးနဲ့ ညာဘက်လက်ညှိုးတို့ရဲ့ ပွတ်တိုက်မှု ဆိုတာမျိုးတွေ ရှိလာတာပါပဲ။

ပွတ်တိုက်မှု ဆိုတာကို ဇွတ်မိုက်မှုလို့တော့ တန်းပြီးပြောလို့ မရနိုင်သေးပါဘူး။ ပွတ်တိုက်မှု ပုံသဏ္ဌာန်တွေကို အရင်လေ့လာရဦးမှာပါ။ ဘာတွေ ပွတ်တိုက်နေတာလဲ၊ ဘာကြောင့် ပွတ်တိုက်နေတာလဲ၊ ဘယ်လို ပွတ်တိုက်နေတာလဲ။ ဘယ်လောက်ကြာ ပွတ်တိုက်မှုမျိုးလဲ။

စက်တင်ဘာလ ၃ ရက်နေ့ကစတဲ့ လောလောလတ်လတ် ပွတ်တိုက်မှုလေး တစ်ခုကတော့ သမ္မတကိုယ်တိုင် မီဒီယာဥပဒေတစ်ရပ် ပေါ်ထွက်လာရန် လမ်းညွှန်ဖွဲ့စည်းပေးထားတဲ့ မြန်မာနိုင်ငံ စာနယ်ဇင်း ကောင်စီ (ယာယီ) ကို သမ္မတက ကျပ်သိန်းငါးရာ လှူဒါန်းမည် ဖြစ်ကြောင်းကို ကြားသိရာမှ အစပြုလာခဲ့ရတဲ့ မီဒီယာချင်း ပွတ်တိုက်မှုပါပဲ။

တစ်နှစ်တာ ကာလအတွင်း အစိုးရထံမှ ဘာအထောက်အပံ့မှ မရယူပါဘဲ အထွေထွေစရိတ်ကို အဖွဲ့ဝင်များ ထည့်ဝင်ငွေနဲ့သာ စိုက်ထုတ်သုံးစွဲ လည်ပတ်နေတဲ့ စာနယ်ဇင်းကောင်စီဟာ ယခုလှူဒါန်းငွေ လက်ခံခြင်းအပေါ်မှာ ဝေဖန်ခံရတာနဲ့ ပတ်သက်ပြီး “သမ္မတ အလှူငွေကို လက်ခံလို့ စာနယ်ဇင်းကောင်စီကို ဝေဖန်တဲ့သူတွေဟာ မီဒီယာအကျိုးအတွက် လုပ်တဲ့နေရာမှာ ဉာဏ်အား၊ လူအား၊ ငွေအား၊ ဘာတွေပါဖူးသလဲ ဆိုတာ မေးဖို့ကောင်းတယ်” လို့ အတွင်းရေးမှူးက ဆိုလိုက်ပါတယ်။ “ဝေဖန်သူများဟာ ဘယ်အချိန်မဆို ကောင်စီသို့ စုံစမ်းမေးမြန်းနိုင်တယ်၊ အဝေးက ဝေဖန်နေရင် အထင်အမြင် လွဲနိုင်တယ်” လို့လည်း ဆိုပါတယ်။

သတင်းစာ အယ်ဒီတာချုပ် တစ်ယောက် ထောက်ပြပုံက “စာနယ်ဇင်းကောင်စီ အနေနဲ့ သတင်းမီဒီယာ ဆိုင်ရာ ဥပဒေကိစ္စရပ်များ အတွက် ပြန်ကြားရေး ဝန်ကြီးဌာနနဲ့ အငြင်းပွားနေချိန်မှာ သမ္မတရဲ့ အလှူငွေကို လက်မခံသင့်ဘူး။ ဒီအချိန်မှာ မယူသင့်သေးဘူး” လို့ ဆိုပါတယ်။

မြန်မာဂျာနယ်လစ်ကွန်ရက် အတွင်းရေးမှူးကတော့ “လွတ်လပ်စွာ သဘောထား ကွဲလွဲလို့ ရပါတယ်၊ ဒါပေမဲ့ လက်တွေ့ လာလုပ်ကြည့်ပါ။ ပြီးမှ ဝေဖန်ကြပါ” တဲ့။

စာနယ်ဇင်းကောင်စီရဲ့ သက်တမ်း တစ်နှစ်ပြည့်ချိန်မှာ သမ္မတထံ ကိုယ်စားလှယ်အဖွဲ့က ရှင်းလင်းတင်ပြခဲ့ပြီး ကောင်စီအတွက် လိုအပ်တဲ့ ရုံးခန်းအဆောက်အအုံ ပုဂ္ဂလိက သတင်းစာတွေ ရေရှည်ရပ်တည်နိုင်ရေး ကူညီမယ်လို့ သမ္မတက ပြောကြားလိုက်ပါတယ်။ အစိုးရ သတင်းစာတွေနဲ့ ယှဉ်ရတဲ့အခါ ကာလရှည်ကြာ လုပ်ကိုင်လာပြီး ပြည်သူ့ဘဏ္ဍာနဲ့ လည်ပတ်ကာ အစိုးရရဲ့ အခွင့်အာဏာနဲ့ ဖြန့်ချိရေး ကွန်ရက်ရှိမှု အားသာချက်တွေကို ယှဉ်ပြိုင်နေရချိန်ပါပဲ။ အယ်ဒီတာချုပ် တစ်ယောက် ပြောသလို အားသာချက်က ဆယ်ချက်တစ်ချက်ပါ။

ဒီကိစ္စ စက်တင်ဘာ လဆန်းရက်မှာ ပေါ်ထွက်လာတော့ သြဂုတ်လဆန်းရက်က ပွတ်တိုက်မှုလေး ကိုလည်း ပြေးပြီး အမှတ်ရစေပါတယ်။ ရှစ်လေးလုံး ဒီမိုကရေစီ အရေးတော်ပုံ ကျင်းပ ပြုလုပ်ရာမှာ ပြည်ထောင်စုအစိုးရ အဖွဲ့အစည်းများကို ဖိတ်သင့်မဖိတ်သင့် ဆိုတဲ့ကိစ္စပါပဲ။ ၂၀၀၇ မျိုးဆက်ကျောင်းသား အဖွဲ့မှ တာဝန်ရှိသူတစ်ဦး ပြောကြားတာကတော့
“သွေးစွန်းတဲ့ လက်တွေနဲ့ အသက်သွေးချွေး ပေးဆပ်ခဲ့သူတွေ ဒီနေ့တစ်ရက် မှာတော့ အတူယှဉ်တွဲ မထိုင်လိုပါ နောက်ရက်စွဲများကို မဆိုလိုပါ” လို့ ဖွင့်ဆိုပါတယ်။

၈၈ မျိုးဆက် ကျောင်းသားများကတော့ အမျိုးသားပြန်လည် သင့်မြတ်ရေး မူဘောင်အတွင်းမှာ ကျင်းပလိုတဲ့ ရည်ရွယ်ချက်တွေနဲ့အတူ ဖိတ်ကြားဖို့ ဆုံးဖြတ်လိုက်ပါတယ်။ ဒီဆုံးဖြတ်ချက်ကို လက်မခံတဲ့အတွက် ရန်ကုန်မှာ ကျင်းပတဲ့ပွဲကို မတက်ရောက်တော့ဘဲ ဖိတ်ကြားထားခြင်း မရှိတဲ့ပွဲကိုပဲ တက်ရောက်တော့မယ်လို့ ဆိုလိုက်တာပါပဲ။

ဒါကို ဘယ်ဘက်က မှန်တယ် မှားတယ်လို့ ဆိုလိုမှာ မဟုတ်ဘဲ ဒီပွတ်တိုက်မှုဟာ ပွဲကျင်းပရက် သုံးရက်တာရဲ့ အယူအဆရေးရာ ပွတ်တိုက်မှုလို့ပဲ ဆိုချင်ပါတယ်။ ဒီအတွက် အစရှိ အနောင်နောင် ဆိုတာလို နောက်နောင် များမှာလည်း ဒီလိုပွတ်တိုက်မှုမျိုး ဆက်လက်ဖြစ်ပွား သွားနိုင်တယ်လို့တော့ ပြောလို့ မရပါဘူး။ ဒါဟာ သဘာဝကျတဲ့ ဖြစ်တတ်တဲ့ ဒီမိုကရေစီ အမြင်ပိုင်းဆိုင်ရာ အယူအဆရေးရာသာ ဖြစ်တယ်ဆိုတာ နှစ်ဖက်စလုံးက လက်ခံကြမှာပါပဲ။

ဒီပွဲကျင်းပတာနဲ့ ပတ်သက်ပြီး နိုင်ငံတော်သမ္မတရဲ့ မှတ်ချက်ပြု ပြောဆိုရာမှာတော့ “ဒီပွဲကို စိုးရိမ်ပူပန်မှုတွေ ရှိခဲ့သော်လည်းပဲ မှန်ကန်တဲ့ နိုင်ငံရေး စေတနာတွေကြောင့် အေးချမ်းစွာ ကျင်းပနိုင်ခဲ့တာ ဖြစ်ပါတယ်” လို့ ဆိုလိုက်ပါတယ်။

ကိုမြအေးက “သမ္မတရဲ့ ပြောကြားမှုကို ကြိုဆိုပါတယ်။ ကျွန်တော်တို့ ဆန္ဒမှာလည်း မတူညီမှုများကြားမှ တူညီတဲ့ အချက်တွေကို ပူးပေါင်းလုပ်ဆောင် လိုခြင်းသာ ဖြစ်ပါတယ်၊ နိုင်ငံရေး ဖြစ်စဉ်တစ်ခုရဲ့ ဖြစ်ပေါ်တိုးတက်မှု တစ်ရပ်လို့ ကျွန်တော်မြင်တယ်” လို့ပြောပါတယ်။

ဒီငွေရတုပွဲမှာ အစိုးရအဖွဲ့ဝင် ဝန်ကြီးများ တက်ရောက်ပြီး လွှတ်တော် ဥက္ကဋ္ဌများကလည်း သဝဏ်လွှာ ပေးပို့ကာ ဒီပွဲကို အသိအမှတ် ပြုခဲ့တာဟာလည်း ထူးခြားနေပါတယ်။ ဒေါ်အောင်ဆန်းစုကြည်က “ပြုပြင်ပြောင်းလဲရေးမှာ အကြမ်းဖက်တဲ့ နည်းနဲ့သွားရင် ကိုယ်လိုချင်တာ မြန်မြန်ရရင်လည်း ကုစားရမယ့် ဒဏ်ရာတွေများမယ်။ အကြမ်းမဖက်ဘဲသွားရင် အချိန်တစ်ခု ယူရနိုင်ပေမယ့် ကုစားရမယ့် ဒဏ်ရာတွေ နည်းမယ်” လို့ ဒီပွဲမှာ တက်ရောက် ပြောဆိုပါတယ်။

အယူအဆရေးရာ ပွတ်တိုက်မှုများဟာ နှိုင်းရဓမ္မတရား ပေါ်မှာ အခြေခံ ဝေဖန်ဆွေးနွေးကြရာမှ ဖြစ်လာတတ်ကြပြီး ပုထုဇဉ် သဘာဝအရ မိမိကိုင်စွဲတဲ့ ဝါဒအယူအဆကိုပဲ ဦးစားပေး အမှန်တရားအဖြစ် ရှုမြင်ကြတာဟာလည်း ဆန်းတဲ့ကိစ္စတစ်ရပ်တော့ မဟုတ်ပါဘူး။ တကယ့် ပရမတ္ထကျတဲ့ အမှန်တရား ဆိုတာကလည်း လောကုတ္တရာကိစ္စ ဖြစ်နေပြန်ပါတယ်။

အောင်ဆန်းအက်တလီ၊ နုအက်တလီ စာချုပ်တွေနဲ့ လွတ်လပ်ရေး ကြိုးပမ်းရယူတဲ့ ကာလမှာလည်း တိုက်ယူလို့ရတဲ့ လွတ်လပ်ရေး မဟုတ်ခဲ့လို့ ရွှေရည်စိမ် လွတ်လပ်ရေး အဆင့်ပဲလို့ သတ်မှတ်တဲ့ နိုင်ငံရေး ပွတ်တိုက်မှုတွေလည်း ရှိခဲ့ဖူးပါတယ်။ ဗိုလ်ချုပ်အောင်ဆန်းဟာ တပ်က နုတ်ထွက်ခဲ့ပြီး နိုင်ငံရေးခေါင်းဆောင် တစ်ဦးအဖြစ်နဲ့ တစ်နှစ်အတွင်း လွတ်လပ်ရေး ရစေရမယ်ဆိုတဲ့ ကတိနဲ့အတူ ပြည်သူ့ထောက်ခံမှုရယူပြီး လွတ်လပ်ရေးကိုလည်း ရယူနိုင်ခဲ့တာပါ။

“ဝန်ကြီးဌာနများနဲ့ ဒေသဆိုင်ရာ အုပ်ချုပ်ရေးအဖွဲ့ရဲ့ လယ်ယာမြေ ပြဿနာ ဖြေရှင်းပုံ နှေးကွေးနေလို့ တောင်းဆိုဆန္ဒပြမှု၊ အကြမ်းဖက် တိုက်ခိုက်မှုတွေ ဖြစ်ပေါ်လာပြီး ရိုးသားတဲ့ တောင်သူများ ဥပဒေကြောင်းအရ အရေးယူခံရခြင်းတွေကို တွေ့နေရပါတယ်”

ဒီစကားကိုတော့ ပြည်ထောင်စုလွှတ်တော် နာယကက ပြောလိုက်တာပါ။ ဥပဒေပြုရေးနဲ့ အုပ်ချုပ်ရေး မဏ္ဍိုင်နှစ်ခုရဲ့ကြားက ပွတ်တိုက်မှု တစ်ခုပါ။ ရံဖန်ရံခါ ပွတ်တိုက်မှုတွေ နဲ့အတူ စာနယ်ဇင်း စာမျက်နှာပေါ်မှာ နေရာယူ ဖော်ပြနေကြပြီး ဒီအတိုင်းဆိုရင် ဆက်လက်ပြီး ပွတ်တိုက်မှုတွေ အရှိန်လျော့သွားစရာ မမြင်ဘူးဆိုတဲ့ သုံးသပ်မှုတွေလည်း ရှိနေပါတယ်။

“တကယ်တော့ တချို့ ဥပဒေတွေက လိုက်နာဖို့ ခက်တဲ့ဟာတွေဆိုတော့ အလိုလို ဥပဒေချိုးဖောက် ဖြစ်သွားတာပေါ့။ အဲဒါတွေကို ပြုပြင်ခြင်းအားဖြင့် လွှတ်တော်က တရားဥပဒေ စိုးမိုးရေးကို အထောက်အကူ ပြုနိုင်မယ်။ ဆန္ဒပြမှုတွေကတော့ ဒီမိုကရေစီ နိုင်ငံတွေမှာ ရှိနေမှာပဲ၊ စည်းမျဉ်းစည်း ကမ်းတွေကိုက လိုအပ်ချက်တွေ ရှိနေတဲ့အခါကျတော့ တရားမဝင် ဆန္ဒပြမှုတွေအဖြစ် ရောက်ရောက်သွားကြတယ်” တဲ့။

တရားဥပဒေ စိုးမိုးရေးနှင့် တည်ငြိမ်အေးချမ်းရေး ကော်မတီ ဥက္ကဋ္ဌက ပြောလိုက်တာပါ။ မိဘပြည်သူနဲ့ တရားစီရင်ရေး ဥပဒေပြုရေးတို့ရဲ့ ပွတ်တိုက်မှုတွေကို ဖော်ပြနေပါတယ်။ ပုဒ်မ (၁၈) ဖျက်သိမ်းပစ် ဆိုတဲ့ ပြည်သူတွေရဲ့တောင်းဆိုမှုကို အထဲထည့်တဲ့ နည်းနဲ့ပဲ ဖြေရှင်းနေသေးတော့ တောင်းရင်း အထဲရောက်သွားရင်းနဲ့ တောင်းထဲထည့်ခံရတဲ့ ဘဝက မလွတ်မချင်း တောင်းထဲကလည်း တလှုပ်လှုပ် အပြင်ကလည်း တလှုပ်လှုပ်နဲ့ ခရီးဆက်ကြရပေဦးမယ်။

“တရားဥပဒေရဲ့အထက်မှာ ဘယ်သူ၊ ဘယ်အဖွဲ့အစည်း၊ ဘယ်ဘာသာမှ စိုးမိုးမှု မရှိရပါဘူး။ ဖြစ်ခဲ့တာတွေက တရားဥပဒေ စိုးမိုးမှု မရှိလို့ ဖြစ်ရတာ ဆိုပေမယ့် တပည့်မကောင်း ဆရာ့ခေါင်း ဆိုတာလို ရဟန်းတော်တွေ ဘက်ကလည်း ဝင်ရောက် ထိန်းသိမ်းဖို့ တာဝန်ရှိပါတယ်”
‘သင့်မြတ်ကြသူများ စကားဝိုင်း’ မှာ နာယက ဆရာတော်တစ်ပါးရဲ့ မိန့်ကြားချက်ပါ။ ယခင်က ဖြစ်ပွားခဲ့ခြင်း မရှိခဲ့ဘဲ ဒီမိုကရေစီ ကူးပြောင်းစအချိန်မှာမှ ဒီလောက် ကျယ်ကျယ်ပြန့်ပြန့် ပဋိပက္ခနဲ့ အကြမ်းဖက်မှုများ ဖြစ်ပွားလာရခြင်းအပေါ်မှာ အဖြေရှာဖို့ လိုကြောင်း၊ အဆိုပါ အကြမ်းဖက်မှုများကို မထိန်းသိမ်းနိုင်ခြင်းဟာ ရဟန်း သံဃာတော်များတွင်လည်း တာဝန်မကင်းကြောင်း နာယကဆရာတော် အရှင်ဓမ္မစာရကပဲ ဆက်လက် မိန့်ကြားလိုက်ပါတယ်။

ဘာသာရေး ပွတ်တိုက်မှု အဆင့်ကို လွန်မြောက်ပြီး အစွန်းရောက် တိုက်ခိုက်မှုတွေ မပေါ်ပေါက် ရလေအောင် ထိန်းသိမ်းမှုတွေ လိုအပ်နေပြီ ဖြစ်ပါတယ်။ ကိုယ့်ပေါင်ကို ဘယ်သူမှတော့ လှန်ပြီး မထောင်းချင်ကြရိုး အမှန်ပါ။ ဘာသာရေး သူရဲကောင်းများဟာ ခန္တီစပါရမီတွေနဲ့ ပြည့်ဝနိုင်ကြပါစေလို့ပဲ ဆုမွန်ကောင်း ချွေလိုက်ရပါတယ်။

မဏ္ဍိုင်ငါးခု ပွတ်တိုက်မှုတွေကို ဆောင်းပါးတစ်ပုဒ်နဲ့ ဖော်ပြလို့ ပြည့်စုံနိုင်မှာ မဟုတ်ပါ။ စာမြည်းသဘောအရပဲ ရေးသားဖော်ပြရင်း ကွင်းဆက်တရားတွေကို ရှာဖွေလေ့လာရင်း ချောမွတ်စေတဲ့ သစ်သားထည်တစ်ခု ဖြစ်လာအောင် ရွေပေါ်ကောင်းနဲ့ လက်သမားကောင်းတို့ရဲ့ ပွတ်တိုက်မှုမျိုးကို အားပေးရမည် ဖြစ်သော်လည်း အကြမ်းပတမ်း ပွတ်တိုက်မှုမျိုး တွေကိုတော့ဖြင့် ယောင်မှားစရာ မလိုဘဲ ရှောင်ရှားဖို့သာ လိုမှာ ဖြစ်ပါကြောင်း။
Credit The Voice Weekly