ပြည်သူ့ခေတ် ဂျာနယ် အတွဲ - ၄၊ အမှတ် - ၁၆၅ ဆရာဖေမြင့်၏ဆောင်းပါး ....

အတ္တနောမတိများ

ဒီမိုကရေစီ ရရှိရေး ဒို့ အရေး

လက်ရှိ ဖွဲ့စည်းပုံအခြေခံဥပဒေကို မပြင်ဆင်လျှင် စစ်မှန်သော ဒီမိုကရေစီ မဖြစ်ဘဲ အယောင်ဆောင် ဒီမိုကရေစီသာ ဖြစ်နေမည် ဖြစ်ကြောင်း၊ တရားမျှတမှုမရှိသော ၎င်းင်းဖွဲ့စည်းပုံ အောက်တွင် ၂၀၁၅ ရွေးကောက်ပွဲ ကျင်းပမည်ဆိုက ထိုရွေးကောက်ပွဲသည် တရားမျှတမည် မဟုတ်ကြောင်း၊ မမျှတမှုများရှိသော နိုင်ငံတွင် ပြဿနာအမျိုးမျိုး ပေါ်ပေါက် လာမည် ဖြစ်ကြောင်း၊ စသဖြင့် ပြင်းထန်သော ဝေဖန်သံများ NLDခေါင်းဆောင်ထံမှ မကြာမီက ထွက်ပေါ်လာခဲ့ရာ ယခင် ဒေါ်အောင်ဆန်းစုကြည်ကို အမှတ်ရမိ၏။

တူတာတွေ တွဲလုပ်ရန် လွှတ်တော်ထဲ ၀င်ရောက် သွားခဲ့ရာက တူတာထက် မတူတာက များနေသည်ကို တွေ့ရှိကာ သည်စကားသံများ ထွက်ပေါ်လာသည်ဟု ယူဆမိသည်။
စင်စစ်၊ ဒီမိုကရေစီ လိုလားသော မည်သည့် ပုဂ်္ဂိုလ်မဆို လွှတ်တော် လမ်းကြောင်းထဲတွင် စဉ်းစားကြည့်မည် ဆိုလျှင် ရှေ့မှာ လမ်းပိတ်နေသော အနေအထားကို မြင်ရလိမ့်မည် ဖြစ်သည်။
၊မြန်မာပြည် ဒီမိုကရေစီ ကူးပြောင်းမှု ရှေ့သို့ တိုးတက်ဖို့ ဆိုလျှင် နိုင်ငံရေးတွင် အခြေခံကျသော ပြောင်းလဲမှုတွေ လုပ်ရတော့မည်။

အဲသည်မှာ အဓိကသည် ဖွဲ့စည်းပုံ အခြေခံ ဥပဒေ ဖြစ်သည်။

လက်ရှိ ဖွဲ့စည်းပုံသည် အာဏာရှင်စနစ်မှ ဒီမိုကရေစီ စနစ်သို့ သို့မဟုတ်၊ အာဏာရှင်စနစ်ကို တစ်စုံတစ်ရာ ပျော့ပျောင်းသော အနေအထားတစ်ရပ်ဆီသို့၊ ရွှေ့ပြောင်းရန် အတွက် စီမံ ဖော်စပ်ခဲ့သည့် အာဏာ-ဒီမို နှစ်မျိုးစပ် ဖွဲ့စည်းပုံမျိုးဟု ဆိုနိုင်သည်။ ၎င်း၌ အာဏာရှင် ကဏ္ဍ ဘယ်လောက်ပါ၍၊ ဒီမို အနှစ်သာရ ဘယ်ရွေ့ဘယ်မျှ ရှိသည်ကို အငြင်းပွားနိုင်ကြသော်လည်း လောလောဆယ် တွင် သူသူငါငါ တညီတညာ ပြောဆိုနေကြသည်က ၎င်းင်းဖွဲ့စည်းပုံကို ပြင်ဆင်ရမည်ဟူ၍ ဖြစ်၏။
သည်တွင်၊ တချို့က ဟိုအချက် သည်အချက်တွေ ပြင်ချင်သည်ဟု ဆိုသည်။ တချို့ကတော့ နည်းနည်း ပြင်၍ မရ၊ အများကြီး ပြင်ရမည်။ ထို့ကြောင့် အသစ်ရေးတာ ကောင်းသည်ဟု ဆိုနေသည်။

ပြင်တာရော အသစ်ရေးတာပါ၊ နည်းနည်း ပြင်တာနှင့် များများ ပြင်တာ (သို့မဟုတ် တစ်အုပ်လုံး ပြင်တာ)ပဲ ဖြစ်ရာ၊ သည်အတွက်တော့ သိပ်အငြင်းအခုံ မပွားသင့်ဟု ထင်သည်။
သို့သော်၊ အဲဒါက တစ်ကဏ္ဍ ဆိုပါတော့။

တခြား ပြဿနာရှိသည်က၊ အရပ်ကသာ ပြင်ချင်တာ အသစ်ရေးချင်တာတွေ ရှိနေသည်။ ပိုင်ရှင်များက ဘယ်လောက် ပြင်ချင်သလဲ၊ ပြင်ဖို့ လိုမည်ကော ထင်သလား၊ မထင်ဘူးလား၊ ဟူသော အချက်ဖြစ်သည်။

ပိုင်ရှင်များ ဆိုသည်က၊....
အဲ၊ တကယ် တရားနည်းလမ်းတကျ ပြောလျှင်တော့ ဖွဲ့စည်းပုံ အခြေခံဥပဒေ၏ ပိုင်ရှင်သည် ပြည်သူလူထုပဲ ဖြစ်ရလိမ့်မည်။
သို့သော်၊ လူထုက ၂၀၁၀ ရွေးကောက်ပွဲ ဆိုတာနှင့် ကိုယ်စားလှယ်တွေ ရွေးပေးထားခဲ့ရာ ထို့ပြင်၊ လူထုမရွေးဘဲ သူ့အလိုအလျောက် နေရာယူထားသည့် ကိုယ်စားလှယ် များလည်း ရှိနေရာ၊ ပြင်ဆင်ရေး မပြင်ဆင်ရေးကိစ္စသည် အဲသည် ကိုယ်စားလှယ်များလက်ထဲမှာ ရှိသလို ဖြစ်နေ သည်။
သူတို့က မပြင်ချင်ဘူး၊ သို့မဟုတ် ဒါလေးပဲ ပြင်မယ်ဗျာ၊ ကျန်တာ မပြင်နိုင်ဘူး၊ လွှတ်တော်မှာ ကျွန်တော်တို့က အများစု၊ ကျွန်တော်တို့ သဘောပဲဟု ဆိုလျှင် ဘာတတ်နိုင်မည်နည်း။

အများစုသဘော ဆိုတော့လည်း ခွကျနေသည်။

သို့သော်၊ အများပြည်သူက အဆိုပါ ကိုယ်စားလှယ် တွေနှင့် မိမိတို့ သဘောချင်း မတိုက်ဆိုင်ပါ၊ ၎င်းင်းတို့သည် ကိုယ်စားလှယ်များဟု ဆိုသော်လည်း မူလပိုင်ရှင်စစ်စစ် ဖြစ်သော မိမိတို့၏ သဘောဆန္ဒနှင့် ဖီလာ ဆန့်ကျင် ဖြစ်နေပါသည်၊ ထို့ကြောင့်၊ ၎င်းင်းတို့ကို ကိုယ်စားလှယ်အဖြစ်မှ ရုပ်သိမ်းပယ်ဖျက်လိုပါသည်ဟု ဆိုလျှင်ကော၊ ယခု အခြေအနေမှာ အဲဒါ လုပ်ခွင့်ရှိသလား၊ လုပ်နိုင်သည့် နည်းလမ်းရှိသလား၊ လုပ်နိုင်သော အခြေအနေရှိသလား။
စဉ်းစားစရာ။

နိုင်ငံတကာကတော့ သည်တိုင်းပြည်မှာ ဒီမိုကရေစီ အသွင်ကူးပြောင်းမှုများ စတင်နေပြီဟု ရှုမြင်ကာ ဆက်ဆံ အားပေးလျက် ရှိသည်။ တကယ်တမ်း ကူးပြောင်းနေကြတာ မှန်လျှင်တော့ နိုင်ငံနှင့် နိုင်ငံသားတို့အတွက် ၀မ်းမြောက် စရာ ဖြစ်သည်။
သို့သော်၊
ဘာတွေကို ကြည့်ကာ အသွင်ကူးပြောင်းပြီဟု ရှုမြင်ခဲ့ကြသလဲ၊ ပြန်စဉ်းစားကြည့်ပါ။
နိုင်ငံရေးအကျဉ်းသားများကို (အတော် တွန့်တွန့် ဆုတ်ဆုတ်နှင့် တဖြည်းဖြည်း) လွှတ်ပေးခဲ့ခြင်း၊
အတိုက်အခံများ ရွေးကောက်ပွဲဝင်နိုင်အောင် ယခင် ကန့်သတ်ထားသော စည်းမျဉ်းတချို့ကို ပယ်ဖျက်ပေးခဲ့ခြင်း၊
စာနယ်ဇင်းများ ကြိုတင် စိစစ်ခံရန် မလိုဘဲ ရေးသား ခွင့်ပြုခြင်း၊
တိုင်းရင်းသားလက်နက်ကိုင်အဖွဲ့များနှင့် အပစ်အခတ် ရပ်စဲကာ ငြိမ်းချမ်းရေး ဆွေးနွေးရန် ပြင်ဆင်နေခြင်း၊ စတာတွေကို ကြည့်ကာ တိုးတက်တာပဲ၊ အသွင်ပြောင်း နေတာပဲဟု မှတ်ချက်ချခဲ့ကြခြင်း ဖြစ်သည်။

အဲဒါတွေ အားလုံးသည် တကယ် တိုးတက်ကောင်းမွန် သော အရာများ ဖြစ်တာ မှန်ပါ၏။
သို့သော်၊ အဲဒါတွေ အားလုံးပင် စိတ်ကောင်းစေတနာ ကောင်းတွင် အရင်းခံသလား၊ နိုင်ငံတကာ အမြင်ကောင်း အောင် ဟူသော သဘောသက်သက်ဖြင့် ဆောင်ရွက်တာ လား ခွဲခြားရန် ခက်သည့် “အပြုအမူကောင်းများ”သာ ဖြစ်ရာ၊ အကယ်၍ မကောင်းချင်တော့ဘူး ဆိုပါက အချိန်မရွေး နဂိုပုံစံသို့ ပြောင်းလဲသွားနိုင်ပါသည်။

သည်အတိုင်း ဆက်လက် တည်ရှိရမည်ဟု အာမခံ နိုင်သည့် ခိုင်မာသော အခြေခံ မရှိ။
သည်ဟာတွေကို လည်းကောင်း၊ သည်ဟာတွေထက် ပိုအရေးကြီးသည့် တန်းတူညီမျှရေး၊ တရားဥပဒေစိုးမိုးရေး၊ ငြိမ်းချမ်းရေး၊ ပြည်သူ့အခြေခံရပိုင်ခွင့် လွတ်လပ်ခွင့်များ ခံစားနိုင်ရေး စတာတွေကို တကယ် အာမခံနိုင်ရန်အတွက်က၊
တိုင်းရင်းသားလူမျိုးပေါင်းစုံ နေထိုင်ရာ ဤနိုင်ငံ အနှံ့အပြားမှ၊ အများပြည်သူ့ သဘောဆန်္ဒများကို သယ်ဆောင်လာမည့် ကိုယ်စားလှယ်စစ်စစ်များ ကျယ်ပြန့် ပြည့်စုံစွာ ပါဝင်သည့် အမျိုးသား ညီလာခံသစ်တစ်ရပ် ကျင်းပကာ လွတ်လပ်စွာ နှီးနှော တိုင်ပင် ရေးဆွဲပြဋ္ဌာန်းသည့် ဖွဲ့စည်းပုံ အခြေခံဥပဒေသစ်တစ်ရပ် တည်ရှိဖို့၊
အဲသည် ဖွဲ့စည်းပုံအရ ရွေးကောက်တင်မြှောက်သည့် အစိုးရ(တို့)သည် အဲသည် ဖွဲ့စည်းပုံကို စကားလုံးရော၊ အဓိပ်္ပာယ်အနှစ်သာရအရပါ လေးစားလိုက်နာဖို့၊
ပြည်သူက တာဝန်လွှဲအပ်ထားသည့် အစိုးရသည် ဖွဲ့စည်းပုံပါ ပြဋ္ဌာန်းချက်များနှင့် မညီညွတ်စွာ၊ ဆန့်ကျင် ကွဲလွဲစွာ ဆောင်ရွက်ခဲ့သည်ရှိသော်၊ အစိုးရထဲတွင် မပါဝင်သည့် အခြား ပါတီအဖွဲ့အစည်းတို့မှ ပြည်သူ့ ကိုယ်စားလှယ်များ၊ ပြည်သူများ၊ ပြည်သူကြားက လူထု အဖွဲ့အစည်းများ၊ စတုတ္ထမဏ္ဍိုင်ဟု ခေါ်သော စာနယ်ဇင်း များက ဝေဖန် ထိန်းကွပ်ဖို့၊ လိုအပ်လျှင် တာဝန်မှ ရုပ်သိမ်း ပယ်ဖျက်ရန် လုပ်ဆောင်ဖို့၊...စတာတွေ လိုသည်။

အဲသည် အနေအထားတွေ တည်ရှိလာမှသာ ဒီမိုကရေစီအသွင်ကူးပြောင်းမှု ဖြစ်စဉ်၌ ပြောင်းလဲပြီးသော အခြင်းအရာတို့ တည်တံ့ခိုင်မာ၍ ပြောင်းလဲမှု ဖြစ်စဉ်သည် လည်း ရှေ့သို့ တိုးတက်ဖြစ်ပေါ်သကဲ့သို့ နိုင်မည် ဖြစ်သည်။
၊

၂၀၁၀ တုန်းက သည်တိုင်းပြည်တွင် လူမပြောင်းသော်လည်း မူပြောင်းပြီဟု ဆိုခဲ့ကြသည်။
အစပထမမှာတော့ ဘာမှ မပြောင်းတာနှင့်စာလျှင် နည်းနည်း ပြောင်းလျှင်လည်း အင်း၊ ပြောင်းသည်ဟု ယူဆကြရသည်ပေါ့။
သို့သော်၊ ၂၀၁၅ လောက် ရောက်လျှင်တော့ လူရော မူပါ ပြောင်းလဲတာ စတင် မြင်တွေ့ရဖို့ သင့်ပါပြီ။ သို့မှသာ၊ ကူးပြောင်းမှုဖြစ်စဉ်သည် တကယ် တိုးတက် ရွေ့လျား နေသည်ဟု ဆိုနိုင်ပါမည်။

သည်အတွက်၊ ရှေ့မှာ ပြောခဲ့သလို တိုင်းပြည်၏ အခြေခံပန္နက်ဖြစ်သည့် ဖွဲ့စည်းပုံ ပြင်ဆင် ပြောင်းလဲရေးကို အချိန်မဆွဲဘဲ ဆောင်ရွက်ဖို့ လိုပါသည်။

သို့သော်၊ အရပ်ရပ်က တောင်းဆိုနေတာကို မသိ ကျိုးကျွန်ပြုကာ ဖွဲ့စည်းပုံကို လူထုက ပြင်ချင်တာ ဟုတ်ရဲ့ လား၊ လူထုဆိုတာက ဒါကို တကယ်ကော စိတ်ဝင်စားရဲ့ လား။လူထုဆိုတာမှာ ဒါတွေ နားလည်လောက်အောင်၊ အသိဉဏ်ကော ရှိသလား၊ လူထုနာမည်သုံးပြီး ကိုယ် လိုရာတွေ ပြောနေကြတာလား၊ စသဖြင့် အချို့ အချို့ ပုဂ်္ဂိုလ်တွေ ငြင်းဆန်နေကြတာ တွေ့နေရသည်။
အဲသည် ငြင်းဆန်သူများသည် ဒီမိုကရေစီ ဂိတ်တံခါးမှာ စောင့်ကြပ် ပိတ်ဆို့နေသူများ ဖြစ်သည်။
၎င်းပုဂ်္ဂိုလ်များ စဉ်းစားသင့်ပါသည်။

လူထုသည် ၁၉၈၈ ကတည်းက ဒီမိုကရေစီကို တစ်ခဲနက် တောင်းဆိုခဲ့ကြတာ ဖြစ်ပါသည်။
နိုင်ငံ တည်ဆောက်ပုံစနစ်အရ ပြောသော် ဒီမိုကရေစီ ဖွဲ့စည်းပုံကို လိုလား တောင်းဆိုကြတာ ဖြစ်ပါသည်။

ဒါကိုမှ ဟုတ်ရဲ့လားဟု ဇဝေဇ၀ါဖြစ်နေလျှင် လူထုကို တရားဝင် ကြေညာပြီး မေးကြည့်ပါ။ ခင်ဗျားတို့ သဘော ဆန်္ဒက ဘယ်လိုပါလဲဟူ၍။
အဲဒါဆိုလျှင် တစ်တိုင်းပြည်လုံးရှိ လူထုထံက အုန်းအုန်းကျွက်ကျွက် တစ်ခဲနက် တောင်းဆိုသံကို ထပ်မံ ကြားသိရပါလိမ့်မည်။
“ဒီမိုကရေစီ ရရှိရေး ဒို့ အရေး”...
“အရေးတော်ပုံ....အောင်ရမည်..."

၃၀၊ ၉၊ ၂၀၁၃
ဖေမြင့်