နိုင်ငံတော်အကြံပေး ဒေါက်တာဖေဉဏ်(ဦးပညာဝံသ)နှင့် တွေ့ဆုံခြင်း – မောင်ရေစက်

“နိုင်ငံရေးတွေပြောချင်ရာ ပြောနေတာလည်း အကုန်လုံး အမှားချည်းပဲ အမှန်တစ်ခုမှ မရှိဘူး . . .

အာဏာလွှဲတဲ့အချိန်မှာ မိန်ရာသီမှာ ဂြိုဟ်တွေ အများကြီးပဲ . . .”

 မြန်မာပြည် ပထမ လွတ်လပ်ရေးရတဲ့ အချိန်မှာ ကြာသပတေးနံပူးတယ် ရေနံ၊ သဘာဝ ဓာတ်ငွေ့ အဲဒါတွေနဲ့ ချမ်းသာတယ် ပြဿနာ ဘာပဲတက်တက် တိုင်းပြည်ကတော့ ဒုက္ခဖြစ်စရာ ဘာမှမရှိဘူး ကြာသပတေးကတော့ ဘာသာရေး ထွန်းကားတာတို့ ဆိုင်တယ် တို့တိုင်းပြည်မှာ ဗုဒ္ဓဘာ သာသာသနာပိုပြီး ထွန်းကားအောင် လုပ်ဖို့လိုတယ် ထွန်းကားလာရင် တိုင်းပြည် မှာ စောင့်ရှောက်နေတဲ့ နတ်ကောင်းနတ်မြတ်တွေ . . . သာသနာတော်တွေ ကို စောင့်ရှောက်ေ နတာ အဲဒီပုဂ္ဂိုလ်တွေက ပိုပြီးတော့ အကူအညီပေးလာမှာပေ့ါ …
http://thandawsint.files.wordpress.com/2013/12/pn2.jpg?w=253&h=380
ဘုန်းကြီးဝတ်နေသော နိုင်ငံတော်သမ္မတ အခါတော်ပေး၊ နိုင်ငံတော် အကြံပေး ဒေါက်တာဖေဉာဏ် (ဓာတ်ပုံ-ဆန်းဝင်းထွန်း)
မြန်မာနိုင်ငံတွင် လမ်းစဉ်ပါတီခေတ်၊ န၀တ နယကခေတ်၊ စစ်အစိုးရမှသည် ၂၀၁၀ ရွေးကောက်ပွဲပြီးနောက် သမ္မတ ဦးသိန်းစိန် အစိုးရလက်ထက် တိုင်အောင် နိုင်ငံတော် အကြီးအကဲများ လက်စွဲ၊ နိုင်ငံတော်အကြံပေး၊ အခါတော်ပေး အဖြစ်လည်းကောင်း၊ ပြည်တွင်း မီဒီယာလုပ်ငန်း အကြီးအကဲ အချို့နှင့် လွှတ်တော် အကြီးအကဲ အချို့ကို ဗေဒင်နက္ခတ် ပညာရပ်များ သင်ကြား ဖြန့်ဝေပေး ခဲ့ရပြီး နေပြည်တော်တွင် ကျယ်ပြန့် ကြီးမား ခံ့ညားသည့် ဗုဒ္ဓဂယာပုံစံတူ သတ္တဌာနနှင့် သတ္တဌာန တရားရိပ်သာတို့ကို သမ္မတဦးသိန်းစိန် အစိုးရမှ တည်ထား နိုင်ရန်အတွက် အဓိက အကြံပေး အကောင်အထည် ဖော်စေခဲ့သည့် နိုင်ငံတော်သမ္မတ အကြံပေး ဒေါက်တာဖေဉာဏ် (ယခုမှော်ဘီမြို့၊ ၂ ရပ်ကွက် ဧက ၃၀ ကျော် ကျယ်ဝန်းသည့် စန္ဒကူးမြိုင် သာသနာ့ ရိပ်သာကို တည်ထောင်လျက်ရှိသူ ဆရာတော်ဦး ပညာဝံသ)ကို မြန်မာသံတော်ဆင့် အယ်ဒီတာအဖွဲ့က ဒီဇင်ဘာ ၉ ရက် နံနက်ပိုင်းတွင် သွားရောက်တွေ့ဆုံ ဂါရ၀ပြုကာ နိုင်ငံတော်အရေး၊ ဘာသာရေး၊ အမျိုးသားရေး အတွက် သိလိုသည်များ မေးမြန်းခွင့် ရခဲ့ပါသည်။ နှစ်ပေါင်း ၂၀ ကျော် နိုင်ငံတော်အဆင့် အကြံပေး၊ အခါတော်ပေးအဖြစ် ယခုတိုင် ရပ်တည်လျက် ရှိသော်လည်း ရဟန်းဝတ်ဖြင့် တောရဆောက်တည်၍ သီတင်းသုံးဖော် ရဟန်းတော် နှစ်ပါးနှင့်သာ ခေါင်းပါးစွာ သီတင်းသုံးလျက် ရှိသည်ကိုလည်း ဖူးတွေ့ရပါသည်။ ဦးပညာဝံသ (ဒေါက်တာဖေဉာဏ်)၏ စန္ဒကူးမြိုင် ရိပ်သာတောအုပ်အတွင်း သမ္မတရုံး ၀န်ကြီးဦးစိုးသိန်းလှူ ဒါန်းထားသော ထုံးဖြူဖြူစေတီနှင့် သမ္မတကြီး ဦးသိန်းစိန် လှူဒါန်းထားေ သာ ကျောက်စိမ်းရုပ်ပွားတော် ကိန်းဝပ်စံပယ်မည့် သိမ်ဆောက်လုပ်မည့် နေရာတို့ကို လည်း တွေ့ရှိခဲ့ရ သည်။ နိုင်ငံတော် အကြံပေးတစ်ဦး အနေဖြင့် လစာတစ်သိန်းနှစ်သောင်းကျပ်၊ မော်တော်ယာဉ် မရရှိဘဲ အချိန်ကာလကြာမြင့်စွာ တာဝန် ထမ်းဆောင်ပြီး နိုင်ငံတော်အတွက် လိုအပ်ချက်များကို သမ္မတထံ တိုက်ရိုက်ပြောကြား တင်ပြခြင်း အခွင့်အရေး ရပါလျက် မြန်မာသံတော်ဆင့် မီဒီယာမှတစ်ဆင့် ထုတ်ဖော်ပြောကြား အသိပေးလိုသော ဆရာကြီး ဒေါက်တာ ဖေဉာဏ်၏ ပွင့်ပွင့်လင်းလင်း ပြောကြားချက်များကို ဖော်ပြလိုက်ပါသည်။  …
အရှင်ဘုရားက အစိုးရအဆက်ဆက် အနောက်တိုင်းနက္ခတ်နဲ့ ပတ်သက်ပြီး နေတစ်ဆူ၊ လတစ်ဆူလိုဖြစ်ပြီး နိုင်ငံတော် သမ္မတ ဦးသိန်းစိန် အနီးကပ် အကြံပေးဖြစ် နေရဲ့သားနှင့် အဲဒီလို အခြေအနေမျိုးက ရဟန်းဝတ်ဖို့ ဘယ်လို စိတ်ကူးလိုက်တာလဲ ဘုရား။
မြတ်စွာဘုရား လက်ထက်က ဂါထာတော်တွေကို ဖတ်ဖူးမှာပါ။ အဲဒီမှာ တကယ့် ဗြဟ္မဏ ဆရာကြီးတွေရှိတယ်။ ဗေဒင်သုံးပုံကို ရပြီးတော့မှ ရဟန်းဝတ်သွားပြီးတော့ ရဟန္တာဖြစ်သွားတဲ့ ပုဂ္ဂိုလ်တွေရှိတယ်။ တော်တော် များများက အဲဒီလိုပဲ။ လောကီပညာတောင်မှ ဗေဒင်ဖီလိုဆော်ဖီ အထွတ်အထိပ်ပဲ။ ဖီလိုဆော်ဖီကို ကျွမ်းကျင် သွားတယ်။ အဲဒီလူတွေက လောကမှာ ဗေဒင်နဲ့မပြီးဘူးဆိုတာ သိသွားတယ်။ လောကထက် လွန်မြောက်တဲ့ လောကုတ္တရာဆိုတာ ရှိတယ်။ ငယ်ငယ်တုန်းက ဘာသာတရား ကိုင်းရှိုင်းတဲ့အဖေ၊ အမေက မွေးဖွား လာတဲ့အတွက် ကံကောင်းပါတယ်။ မဟာစည် ဆရာတော် ဘုရားကြီးဆီမှာ ကျကျနန အားထုတ်ခဲ့တယ်။ အနီးကပ် ၁၂ နှစ်လောက် အားထုတ်ခဲ့တယ်။ ဖီလိုဆော်ဖီ လောကီမှာ ချမ်းသာတယ်ဆိုတာ ဘာမှ အဓိပ္ပာယ် မရှိဘူး။ လောကမှာ မှန်တယ်ဆိုတာ ဘာမှမရှိဘူး။ နိုင်ငံရေးတွေ ပြောချင်ရာ ပြောနေတာလည်း အကုန်လုံး အမှားချည်းပဲ။ အမှန်တစ်ခုမှ မရှိဘူး။ အဲဒါကြောင့် ကိုယ်ငယ်ငယ်လေးတုန်းက ရဟန်းဝတ်ချင်ခဲ့တယ်။ လူကြီးတွေက အမြဲ ဆုံးဖြတ်ရတဲ့ လူတွေလေ။ ဗေဒင်နဲ့ ပတ်သက်ပြီးတော့ အခြေအနေ ဘယ်လိုလဲတဲ့။ အိန္ဒိယမှာ ဗေဒင်ပညာ ထွန်းကားတယ်ဆိုတာ ကာလကတ္တားက ဗေဒင်နည်း ယူလာတဲ့ လူတွေဟာ အတွေးအခေါ်တွေ ရင့်ကျက်သွားမယ်ဆိုရင် တိုင်းပြည်အတွက် တစ်ချိန်မှာ အားကိုးရတယ်။ ကလေးတွေ ကတော့ လောလောဆယ် သုံးလို့ မရသေးဘူး။ အနည်းဆုံး ၁၀ နှစ်လောက်တော့ မွေးရဦးမယ်။ အတွေ့အကြုံ ၁၀ နှစ်လောက် လုပ်မှဖြစ်လာမှာ။ မြန်မာပြည်မှာ ယောအတွင်းဝန် ဦးဖိုးလှိုင်၊ ဦးသိန်းဖေတို့ ပေါ်တယ်လေ။ ပြီးရင် တကယ်မှန်အောင် ဟောနိုင်တဲ့ ဆရာစန္ဒြ ပေါ်လာတယ်။ ဦးဝေဠု ဆိုတာလည်း ရှိတယ်။ မေမြို့က။ ဦးဝေဠုက ဗေဒင်ကို ၀ါသနာပါတယ်။ အဲဒီမှာ ဘယ်အချိန်မှာ ဖြစ်တတ်တယ်။ ဘယ်အချိန် ဖြစ်မလဲဆိုတာ မပြောနိုင်ဘူး။ အနောက်တိုင်းကျတော့ အချိန်ကိုချပြတာ အရမ်းကောင်းတယ်။ အဲဒါကို ဦးဝေဠုက နားလည်တယ်။ ဦးဝေဠုဆီမှာ ဆရာစန္ဒြ သွားသင်ခဲ့တယ်။ သူတစ်ယောက်ပဲ မှန်အောင် ဟောနိုင်တယ်။ ကျန်တဲ့ လူတွေကတော့ အခြံအရံတွေပေ့ါ။ သူ့ဟာနဲ့ သူမှန်တာ ချည်းပဲလေ။ ဘယ်အချိန်ဖြစ်မလဲ ဆိုတာ ပြဿနာကိုး။
ဗိုလ်ချုပ်ကြီး . . .က မေးပါတယ်။ တို့ခေတ်တုန်းက အိန္ဒိယမှာ အက်စ်ထရော် လော်ဂျီကယ် (Astrological) မဂ္ဂဇင်းဆိုတာ လတိုင်းထွက်တယ်။ လတိုင်းဖတ်တယ်။ ဦးသန်းမောင်ဆီက ယူထားတယ်။ အင်္ဂလန်မှာ ဘွဲ့ပေးတယ် ဆိုတာလည်း ဘုန်းကြီးတွေ ဘွဲ့ပေးတဲ့ စာအုပ်လေ။ အနောက်တိုင်း နက္ခတ် ပညာ သဘောတရားများ အဲဒီစာအုပ် ပို့လိုက်သေးတယ်။ အမေရိကန်မှာ တက္ကသိုလ်တွေမှာ ပြဋ္ဌာန်းတာတွေ အဲဒီ ခေတ်တုန်းက အများကြီး ဖတ်ခဲ့တော့ နားလည်နေတာပေ့ါ။ နောက်ပိုင်းကျ ဆရာမြိုင်တို့ ပေါ်လာတယ်။ သူတို့လည်း အကြမ်းအဖျင်းတော့ ရတယ်။ တိတိကျကျ မရဘူး။ အဲဒီတော့ ဆရာမြိုင်ပြီးရင် ထူးထူးချွန်ချွန်လူ မပေါ်လာဘူး။ သို့သော် ဒဂုန်(ဆရာဒဂုန်) သူက ဦးနှောက်ရှိတယ်။ ကိုယ်နဲ့ခင်လည်း ခင်ပါတယ်။ သူမလုပ် နိုင်တဲ့ဟာ လုပ်နိုင်အောင် ဆိုပြီးတော့ လူငယ်လေးတွေ စုပြီးတော့ အိန္ဒိယက ဘွဲ့ယူအောင် လုပ်ပေးနိုင်တယ်။ သူတို့တွေ ထက်လာတယ်။ အဲဒီအဖွဲ့တွေက အများကြီး လေ့လာရဦးမယ်။ အဲဒီအဖွဲ့က အားကိုးရတဲ့ လူတွေ မြန်မာပြည်မှာ ပေါ်လာပြီ။
pn4
နေပြည်တော်၊ သတ္တဌာနတရားရိပ်သာ အုတ်မြစ်ချပွဲတွင် သမ္မတဦးသိန်းစိန် တက်ရောက်ပြီး အခါတော်ပေး ဒေါက်တာဖေဉာဏ် (ခေါင်းဖြူနှင့် လက်အုပ်ချီလျက်)ကို တွေ့ရစဉ်။
တပည့်တော်တို့ တိုင်းပြည် ဒီလိုအခြေအနေဆိုးတွေ ဖြတ်ခဲ့တော့ လွတ်လပ်ရေး ရတဲ့အချိန် ရွေးတာပေါ့။ ၄ နာရီ မိနစ် ၂၀  ရွေးလိုက်တဲ့ အခါမှာ တိုင်းပြည် ကံကြမ္မာအတွက် အကောင်းအဆိုး ဘယ်လိုရှိပါသလဲ ဘုရား။
အဲဒါပေးတော့ အင်္ဂလိပ်က ဗေဒင် အရမ်းနားလည်တယ်။ သူတို့ကို သွားယှဉ်လို့မရဘူး။ သူတို့မင်းသားတစ်ပါး၊ ဘုရင်တစ်ပါး မွေးလာတယ် ဆိုရင်လည်း ၀ှက်ထားနိုင်တယ်။ မြန်မာပြည်ကို လွတ်လပ်ရေး ပေးတဲ့အချိန်မှာ အချိန်တစ်ခု ပေးလိုက်တယ်။ ဦးသန်းမောင်ကလည်း တစ်မျိုးပေးတယ်။ သူတို့က မဟာမြိုင်ကျောင်း၊ အခု စမ်းချောင်းထဲမှာ ပါသွားပြီ။ ဥယျာဉ်တိုက်ထဲမှာ စည်းဝေးတယ်။ အဲဒီမှာ မဟာမြိုင် ဆရာတော်ဆိုပြီးတော့ ကနောင်မင်းသားကြီးရဲ့ မြေးပေါ့ အဲဒီ ဆရာတော် ဘုရားကြီးက။ အဲဒီဘုန်းကြီးမှာ မင်းမျိုးမင်းနွယ်တွေ လည်းပါတယ်။ ဦးဘဆွေတို့လည်း ပါတယ်။ ဗိုလ်ချုပ်အောင်ဆန်း တို့လည်းပါတယ်။ ဗိုလ်ချုပ်အောင်ဆန်းတော့ သေသွားပြီလေ။ ကိုသိန်းဟန် တို့လည်းပါတယ်။ မြန်မာပြည်ကို ဘယ်အချိန် ရွေးမလဲဆိုတာ ၀ိုင်းရွေးကြတာ။ ရွေးတာ နောက်ဆုံး ယူလိုက်တဲ့လူက ဘယ်သူလဲဆိုတော့ ဦးသန်းမောင်ဟာလည်း ပယ်တယ်။ ဘယ်သူ့ကို ပေးလဲဆိုတော့ ပဲခူးက ဆရာကြီး ဦးသက်တင်တို့ အဲဒီဇာတာကို ပေးလိုက်တယ်။ အဲဒီအချိန်ပေးတဲ့အထဲမှာ အဲဒီဇာတာ အကောင်းဆုံးပဲ။ ဦးသန်းမောင်ပေးတာက စနေ၊ အင်္ဂါပူးလိုက်တော့ မိသားစုတွေက ဒီ့ထက်ပိုပြီး ကွဲပြဲဖို့ပဲ ရှိတော့တယ်။ ပြည်တွင်းရေးပေ့ါ။ အခု ကြာသပတေးနံ ပူးလိုက်တော့ တိုင်းပြည်ကြီးကတော့ မပျက် စီးဘူး။ ဆူပူမှုတွေကတော့ဖြစ်တယ်။ သို့သော် တိုင်းပြည်မပျက်စီးဘူး။ အကုန်လုံးတော့ ထိန်းထားနိုင်တယ်။ ကြာသပတေးနံ အနေအထားတွေလည်း ကောင်းတယ်။ တနင်္ဂနွေလည်း အဲဒီတုန်းက အနေအထား တော်တော် ကောင်းတယ်။ တခြားနည်းလမ်းတွေ ယူလိုက်ရင် တအားဆိုးသွားလိမ့်မယ်။
ဗိုလ်ချုပ်မှူးကြီးသန်းရွှေ ဒီဘက်ကို အာဏာလွှဲတဲ့ အချိန်အခါက တိုင်းပြည် အတွက် ကောင်းနိုင်ပါသလား။
သူတို့လက်ထက်မှာ ပွင့်ပွင့်လင်းလင်း ပြောမယ်ဆိုရင် ဗေဒင် တကယ်တတ်တဲ့လူလည်း မရှိဘူး။ တို့နဲ့လည်းဝေးတယ်။ သူတို့ဆီမှာ အိမ်တော်ဝန်လုပ်တာတော့ ကိုယ်နဲ့ရင်းနှီးတာ ရှိတယ်။ ဗိုလ်ချုပ်မှူးကြီး သန်းရွှေနဲ့ ပတ်သက်ပြီး သူ့တူတွေနဲ့ ရင်းနှီးတာတွေလည်း ရှိတယ်။ သူ့အနေနဲ့လည်း အဲဒီလောက်ထိ စဉ်းစား နိုင်မှာမဟုတ်ဘူး ထင်တယ်။ အသေးစိတ် ဟောတာတော့ အဲဒီလောက်ထိလည်း ဘယ်သူမှအချိန် မပေးနိုင်ဘူး။ ကိုယ့်ကျောင်းမှာတော့ အချိန်ရတော့ လေ့လာဖို့ အချိန်ရတာပေ့ါ။
pn
ဓာတ်ပုံ – ဆန်းဝင်းထွန်း
တပည့်တော်ပြောတာက အရှင်ဘုရား အမြင်ကိုပြောတာ။ ဗိုလ်ချုပ်မှူးကြီးသန်းရွှေ အာဏာလွှဲတုန်းက အချိန်အခါ တိုင်းပြည်ကံကြမ္မာ ဘယ်လိုရှိမလဲလို့။
အာဏာလွှဲတဲ့ အချိန်မှာ မိန်ရာသီမှာ ဂြိုလ်တွေ အများကြီးပဲ။ တနင်္ဂနွေလည်း ရှိတယ်။ အင်္ဂါ၊ ဗုဒ္ဓဟူး၊ ကြာသပတေးလည်း ရှိတယ်။ မိန်ရာသီ ယူရေးနပ်စ် ၀င်လာတိုင်းမှာ ကြီးမားတဲ့ အပြောင်းအလဲတွေဖြစ် စေတယ်။ အပြောင်းအလဲကြီး တစ်ခုတော့ ဖြစ်သွားတာပေ့ါ။ အေးအေးချမ်းချမ်းတော့ မဟုတ်ဘူး။ ရေရှည် မှာတော့ အကောင်းဘက်ကို ပြောင်းသွားမှာပေ့ါ။ မိန်ရာသီ အားကြီးနေတဲ့ အချိန်မှာ ပြောင်းသွားတာ ကြောင့်လေ။
လွှတ်တော်အစည်းအဝေးတွေ ကျင်းပလိုက်တဲ့အချိန်က  တိုင်းသူပြည်သားတွေရဲ့ ကံကြမ္မာ ဘယ်လိုရှိနိုင်လဲ ဘုရား။
အာဏာလွှဲတဲ့ အချိန်တွေကတော့ အရေးကြီးတာ ပေ့ါနော်။ မိန်ရာသီရဲ့ သဘောက ပိုရင်းနှီးလိမ့်မယ်။ မြန်မာပြည် ပထမ လွတ်လပ်ရေးရတဲ့ အချိန်မှာ ကြာသပတေးနံ ပူးတယ်။ ရေနံ၊ သဘာဝဓာတ်ငွေ့ အဲဒါတွေ နဲ့ချမ်းသာတယ်။ အဲဒါတွေကို ပိုပြီးဖွံ့ဖြိုးအောင် လုပ်နိုင်ရင် ချမ်းသာလာမှာပေ့ါ။ ပြဿနာ ဘာပဲတက်တက် တိုင်းပြည်ကတော့ ဒုက္ခဖြစ်စရာ ဘာမှမရှိဘူး။ ကြာသပတေးကတော့ ဘာသာရေး ထွန်းကားတာတို့ ဆိုင်တယ်။ တို့တိုင်းပြည်မှာ ဗုဒ္ဓဘာသာ သာသနာ ပိုပြီး ထွန်းကားအောင် လုပ်ဖို့လိုတယ်။ ထွန်းကားလာရင် တိုင်းပြည်မှာ စောင့်ရှောက်နေတဲ့ နတ်ကောင်း နတ်မြတ်တွေ ဆိုတာရှိတယ်။ သာသနာတော်တွေကို စောင့်ရှောက် နေတာလည်း ရှိတယ်။ အဲဒီ ပုဂ္ဂိုလ်တွေက ပိုပြီးတော့ အကူအညီ ပေးလာမှာပေ့ါ။
သာသနာ့ဘောင်မှာ ရဟန်းဝတ်ပြီးတော့ သီတင်းသုံးနေရတဲ့ အကြောင်းက ဘာလဲဘုရား။
ရဟန်းဝတ်တယ်ဆိုတာ သံသရာဘေးကို ကြောက်လို့ ၀တ်တာပါပဲ။ ရှည်လျားစွာသော သံသရာကို ကြောက်လို့ ၀တ်ခြင်း ဖြစ်ပါတယ်။ ပြောရမယ်ဆိုရင် ကိုယ်ကျိုးအတွက် ၀တ်တာ။ ကိုယ်နိုင်တာလေးတွေ လုပ်ရမယ် ပေါ့နော်။  မြန်မာပြည်ဆိုရင်လည်း သာကီဝင် မင်းမျိုးတွေလေ။ တို့မြန်မာပြည် ဆိုရင်လည်း မြန်မာပြည်အကျိုး အတွက်ပေါ့နော်။ နောက်ပြီးတော့မှ ကိုယ်ကျိုးအတွက် လုပ်တာပေါ့။ ဒါကတော့ ဘုရားအစရှိသော အလောင်းတော်တွေကတော့ အဲလိုလုပ်တာပေါ့နော်။ တို့ကျတော့လည်း ပမွှားတွေကိုး။ ပထမကိုယ့်ကိစ္စလေး အရင် ငြိမ်းငြိမ်းချမ်းချမ်းလေး ဖြစ်သွားအောင် တရားတော်နဲ့ လုပ်တယ်။ နောက်ပြီးတော့ ကိုယ်ရလာတဲ့ ဟာလေးတွေကို ပြောရမယ် ဆိုရင်တော့ မြတ်စွာဘုရား အစရှိသော သူတော်ကောင်းတွေက နေလို လလိုထွန်း လင်းပြီးတော့ သွားကြတယ်ပေါ့နော်။ တို့ကတော့ ဆီမီးခွက်လေးတွေလိုပေါ့။ ကိုယ်နဲ့သူများလည်း လင်းပါစေ ဆိုတဲ့ဆန္ဒနဲ့။ ပြောနိုင်တာလေးတွေ ပြောလို့ရအောင် ဆိုပြီးတော့ သင်္ကန်းဝတ်တာပေါ့နော်။ အရင် တုန်း ကတော့ လူ့ဘောင်နဲ့ တရားရှာတဲ့ ပုဂ္ဂိုလ်တွေ ရှိတယ်။ ၁၉၇၀ ကျောင်းသား သပိတ်တွေဖြစ်တယ်။ သပိတ်တွေဖြစ်တဲ့ အချိန်မှာ အဒေါ်များက သီလရှင်တွေ။ သီလရှင်တွေဆိုတာ မဟာစည်ဒေသမှာ တရား ၀င်ထိုင်လိုက်တယ်။ တက္ကသိုလ် ကျောင်းသားဘ၀ပေါ့ လူငယ်ဘ၀ ၁၈၊ ၁၉ နှစ်လောက်ပေါ့။ အခု အချိန်ပြန်တွက်ကြည့်တော့ နှစ်ပေါင်း ၄၄ နှစ်ရှိသွားပြီ။ ၀င်တော့လည်း မဟာစည်ဆရာတော် ဘုရားကြီးဆီ ၀င်ရတာ။ မဟာစည်ဆရာတော် ဘုရားကြီး ဆိုတာလည်း အဓိကရ ပုဂ္ဂိုလ်ကြီးနော်။ မြန်မာပြည်မှာ အနော် ရထာမင်း လက်ထက်တုန်းက ရှင်အရဟံ လိုမျိုးပေါ့။ နောက်ပြီးတော့ ဒီဘက်ခေတ်မှာ လယ်တီ ဆရာတော်ဘုရားကြီးလိုမျိုး။ ခေတ်တစ်ခေတ် ပြောင်းအောင် သာသနာပြုနိုင်ခဲ့တဲ့ ပုဂ္ဂိုလ်ထူး၊ ပုဂ္ဂိုလ်မြတ် ပေါ့နော်။ အဲဒီ ပုဂ္ဂိုလ်မြတ်ဆီမှာ ငယ်ငယ် ၁၈ နှစ်သားလောက်တည်းက ဆရာတော်နဲ့ အနီးကပ် ၁၂ နှစ် နေခဲ့ရတယ်။ တက္ကသိုလ်ကနေပြီးမှ ဆရာဝန်ဖြစ်တဲ့အထိ ဆရာတော်ကြီးနဲ့ အနီးကပ် ၁၂ နှစ်လောက် နေပြီးတော့မှ ဆရာတော်ကြီး ပရိနိဗ္ဗာန်ပြုတဲ့ အချိန်အထိ ၁၉၈၂ ခု၊ သြဂုတ်လ ၁၄ ရက်နေ့ အထိပေါ့နော် အနီးကပ် ကြည်ညိုရတယ်။
နောက်ပိုင်းကျမှ ကိုယ့်အသက် ၅၀ လောက်မှာ ဒီသာသနာမှာ ရိပ်သာ တည်ထောင်တယ်။ တည်ထောင်တဲ့ အချိန်မှာ ကိုယ်က လူဝတ်နဲ့ဆိုတော့ တရားနာပဲ ၀င်မပြောဘူး။ ၀င်မပြောတော့ ဘာအခက် အခဲတွေ တွေ့လဲဆိုတော့ တရားအားထုတ်တဲ့ လူတွေက ဘယ်လို တွေးလဲဆိုတော့ ဒီဆရာကြီးဟာ ဆူပဲဆူတယ်ပေါ့။ တရားကျတော့ နားမလည်ဘူး ထင်တယ် ဆိုပြီးတော့။ ကိုယ်က ၀င်ပြောခွင့် မရတော့ တချို့ဟာတွေကျတော့ တရားနဲ့ ပတ်သက်ပြီးတော့ သင်တန်းပေးရတာ အခက်အခဲတွေ သွားတွေ့တယ်။ ဒီမှာ တရားအားထုတ်တဲ့ လူတွေ၊ အဲလူတွေကလည်း ဆရာပြန်ဖြစ်တော့ ထိန်းရသိမ်းရတာ နည်းနည်း ခက်လာတာပေါ့။ တို့ကတော့ မဟာစည် ဆရာတော်ဘုရားကြီးနည်းနဲ့ သင်ခဲ့ရတော့ ဒါတွေ သိပ်မဟုတ်ဘူးဆိုတာ သိတယ်။ ဒါပေမဲ့ ၀င်ပြောလို့ မရတော့ဘူး။ အခုလည်းတို့ တိုင်းပြည်မှာ သမထက အားကြီးလာတယ်လေ။ သမထနဲ့ သွားရင်တော့ ခမ်းခမ်းနားနားလေးတော့ ရတယ်။ ဈာန်ရတယ်၊ အဘိညာဉ်ရတယ်၊ ဒိဗ္ဗစက္ခုရတယ်၊ ဒိဗ္ဗ သောတ ရတယ်။ အဲလိုလေးတွေ ကြီးကြီးကျယ်ကျယ် ကြီးတော့ ဖြစ်တယ်။ နိဗ္ဗာန်သွားဖို့ဆိုတာ အချိန်ပိုကြာတယ်။ ၀ိပဿနာ နည်းနဲ့ကျတော့ မြန်မြန်ရောက်တယ်။ ဥပမာ ပါရမီရှိတဲ့ သူကျတော့ ၇ ရက်နဲ့ ရောက်တယ်။ အများအားဖြင့်တော့ တစ်လနှစ်လ လောက်မှ နေရာကျသွားတာရှိတယ်။ အဲဒါကိုမှ ဆရာတော် ဘုရားကြီးက လက်ခံတယ်ဆိုတော့ ဗုဒ္ဓ၀ိပဿနာ လမ်းစဉ်ပေါ့နော်။ အဲလိုသွားတာရှိတယ်။ တို့လည်း အဲလိုမျိုးပေါ့။ တို့ဆရာသမားရဲ့အာဘော်ကို ပြောပြချင်တယ်။ ပြောပြချင်တော့ ဘုန်းကြီးဝတ်နဲ့ ပြောပြရင် နည်းနည်းပိုပြီးတော့ အဆင်ပြေတာပေါ့။
pn3
ဓာတ်ပုံဆန်းဝင်းထွန်း
တရားပြတယ် ဆိုတာလည်း တရားနဲ့ ပတ်သက်ပြီးတော့ နည်းနည်းလေး သင်တန်းပေးချင်တဲ့ စိတ်လေးတော့ ရှိပါတယ်။ တရားပြန်တာကျတော့ ဆရာတော်ကြီးတွေလည်း ပြန်နေကြတာပဲလေ။ မြန်မာပြည်မှာဆိုရင် မဟာစည် ဆရာတော်ကြီးတွေရှိတယ်။ နောက်ပြီးတော့ မိုးကုတ် ဆရာတော် ဘုရားကြီးတွေ ရှိတယ်။ အဲဒါ တွေလည်း ပရိသတ်တွေနဲ့ အကြီးအကျယ် တရားပြနေတာနော်။ သင်တန်းပေးနေတဲ့ ဟာလေးတွေတော့ ရှိပါတယ်။ ပုဂ္ဂိုလ်ချင်း အဆင်ပြေဖို့ လိုတယ်ပေါ့။ ပုဂိ်္ဂုလ်ချင်းအဆင် ပြေဖို့ လိုတယ်ဆိုတာက တချို့ဘုန်းကြီးနဲ့ တရား လာအားထုတ်တဲ့ သူတွေနဲ့ တအား ဝေးနေတယ်။ ဝေးတယ်ဆိုတာ ဘုန်းကြီးက သူ့ဘာသာသူ တရားဟောသွားတယ် တရား လာအားထုတ်တဲ့ သူတွေကျတော့ မမေးမလျှောက်ရဲဘူး။ မမေးမလျှောက်ရဲ တော့ ဘုန်းကြီးပြောတဲ့ဟာပဲ လူအဖို့က သိပ်နားမလည်ဘူး။ နောက်ပြီးတော့ လူပုဂ္ဂိုလ်ရဲ့အခက်အခဲကိုလည်း ဘုန်းကြီးက မသိဘူး။ အဲဒီတော့ ပြီးပြည့်စုံ မရဘူး။ ဘုန်းကြီးလည်း နိုင်ငံခြားသွားတာနဲ့ ဟိုသွား ဒီသွားနဲ့ တကယ် မေးချင်တဲ့ သူတွေအတွက် အခက်အခဲရှိတယ်။ သေသေချာချာလည်း မေးလို့ မရဘူး။ အဲလို မျိုးလေးတွေ ရှိတယ်။ အဲဒါလေးတွေ ကျတော့ ကိုယ်က အနီးကပ် ကြည့်ပေးတာပေါ့နော်။ နောက်ပြီးတော့ ရာသီဥတု ဆိုတာကလည်း မြန်မာပြည်မှာ ကတော့ တစ်မြို့နဲ့ တစ်မြို့ကတော့ သိပ်မကွာပါဘူး။ ဒီမှာတော့ တောတောင်လေး ဘာလေးရှိတယ် ဆိုတော့ ဥတုသုံးပါးက မျှတတော့ အပူအအေး မျှတာပေါ့နော်။ အဆောက် အအုံကလည်း တစ်နိုင်လေး ဆောက်ထားတာပေါ့နော် တရားအားထုတ်ရင်လည်း တရားအားထုတ်လို့ ရတာပေါ့လေ။ အကောင်းကြီးတော့ မဟုတ်ဘူးပေါ့။ သာမန် အားထုတ်မယ် ဆိုရင်တော့ အားထုတ်လို့ ရတာပေါ့။ အာဟာရကျတော့လည်း သိပ်ပြီးတော့ ခက်ခဲတာ မရှိဘူး။ ဒါလေးတွေ အဆင်ပြေအောင် ကိုယ်က ပြုပြင်ပေးပြီးတော့ တရားလာထိုင်တဲ့ သူတွေကို ထိန်းပေးနေတာပေါ့။ အနီးကပ်လေး ပြောပြတာပေါ့။ တချို့ကျတော့ တကယ်လည်း တရားအားထုတ်တယ်။ ဒါပေမဲ့ နှစ်ပေါင်းများစွာ တရားအားထုတ်လာတာ သမထလေး ဖြစ်နေကြတယ်။ သမထလေးဖြစ်နေတော့ သမထလေးမှာ ပျော်ပြီးတော့ နိဗ္ဗာန်မဂ်ဖိုလ် ကျတော့ မရောက်နိုင်ကြဘူးလေ။ ပြောရမယ် ဆိုရင်တော့ နာမရူပ ပရိစ္ဆေဒဉာဏ် ဆိုတာရှိတယ်။ လောကီ ဉာဏ်တွေပေါ့။ အဲဒီအထဲမှာ အရောင်နည်းနည်းပါးပါး မျိုးစုံပေါ့။ ဒိဗ္ဗစက္ခုရတာတွေ၊ အကြားအမြင် တွေရပြီးတော့ လူတွေက အဲဒီမှာ ပျော်နေကြတယ်။ အဲဒီက ကျော်သွားမှ ဥဒယဘယဉာဏ် ဆိုတာရှိတယ်။ လောကုတ္တရာဉာဏ်ပေါ့။ ဥဒယဘယဉာဏ်မှာလည်း တစ်ခါဈာန်တွေ ရှိတယ်။ အဲဒီကနေ မလွန်မြောက် နိုင်ကြဘူး။ အဲဒါကို လွန်မြောက်အောင် ဆိုပြီးတော့ ဘယ်လိုဘယ်လို သွားတယ်ဆိုပြီးတော့ တရားလေးတွေ ရှင်းပြနေတာပေါ့။ အဲလိုမျိုးပေါ့ ကြီးကြီး ကျယ်ကျယ်တော့ မဟုတ်ဘူး။ သို့သော်လည်းပဲ လိုအပ်တဲ့ ပုဂ္ဂိုလ် တွေကို အနီးကပ်လေး ထိန်းသိမ်းပြီးတော့ ပြောပြနိုင်အောင် ဆိုပြီးတော့ အဲဒီစိတ်ကူးလေးတော့ ရှိပါတယ်။

Credit To The Myanmar Herald
Read More »

ပြည်သူက သတိ၊ အစိုးရက ကတိWritten by မောင်တင်ဦး (မြောင်းမြ)

D-16-12
မြစ်ဆုံတစ်နေရာကို တွေ့ရစဉ် (ဓာတ်ပုံ-အောင်ဇော်ထွန်း)
မြန်မာနိုင်ငံပိုင်မြစ်
ပြည်ထောင်စုသမ္မတ မြန်မာနိုင်ငံရဲ့မြောက်ဘက် ကချင်ပြည်နယ် ဒေသတစ်နေရာ မေခနဲ့ မလိခဆုံရာ အရပ်မှာ အပြစ်ကင်းစင်တဲ့ ကလေးငယ် တစ်ယောက်လို အေးချမ်းစွာ ဖြစ်တည်လျက် ရှိပါတယ်။ ဒါဟာ သဘာဝရဲ့ အဖိုးမဖြတ်နိုင်တဲ့ လက်ဆောင်ပါပဲ။
သက်မဲ့ဆိုပေမယ့် သက်ရှိလို နိုင်ငံတော်ကို အလုပ်အကျွေး ပြုနေတာ ဖြစ်ပါတယ်။ သက်ရှိသတ္တ၀ါ ငါး၊ ငှက်၊ လူသားများစွာဟာ သူ့ကိုမှီခို အသက်ရှင်နေကြ ရတာပါ။ ဒါ့အပြင် မေခနဲ့မလိခက စလိုက်တဲ့ မြစ်ဆုံဟာ မြန်မာနိုင်ငံတစ်ဝန်း လွှမ်းခြုံစီးဆင်းတဲ့ ဧရာဝတီမြစ်ကြီးရယ်လို့ ပေါ်ထွန်းလာပါတယ်။ မြန်မာပြည်တွင်းမှစပြီး မြန်မာပြည်တွင်းမှာသာ အဆုံးသတ်တဲ့ မြန်မာနိုင်ငံပိုင် မြစ်စစ်စစ် ဖြစ်ပါတယ်။
ဒီလို နိုင်ငံ့အကျိုးပြု မြစ်ဆုံကြီးကို လူတစ်စု၊ စီးပွားရေးသမားများက ပြည်ပနဲ့ပူးပေါင်းပြီး မြစ်ဆုံဆည် စီမံကိန်းကို တည်ဆောက်ဖို့ ကြိုးပမ်းအကောင်အထည် ဖော်ခဲ့ပါတယ်။
ဒါကို တိုင်းပြည်ချစ်တဲ့ ဧရာဝတီမြစ်ကိုချစ်တဲ့ ပြည်သူတွေက ၀ိုင်းဝန်းတားဆီးကြလို့ အများဆန္ဒကို ဖြည့်ဆည်းပေးချင်တဲ့ နိုင်ငံတော်သမ္မတ ဦးသိန်းစိန် မြစ်ဆုံစီမံကိန်းကို ရပ်ဆိုင်းဖို့ အမိန့်ထုတ်ပြန်ခဲ့ပါတယ်။ ပြည်သူတွေ ၀မ်းသာသွားပါတယ်။ နိုင်ငံတော် သမ္မတကြီးကိုလည်း ချီးကျူးဂုဏ်ပြုမိပါတယ်။
ဒါပေမဲ့ ၀မ်းသာမှုက သမ္မတသက်တမ်း တစ်ခုတည်းအတွက်သာဖြစ်လို့ အပြည့်အ၀ ၀မ်းမသာနိုင်ကြပါဘူး။ ခုပဲ လက်ရှိသမ္မတကြီးရဲ့ သက်တမ်းက ထက်ဝက်ကျော်လာပါပြီ။ နောင်သက်တမ်းထက်ဝက် နှစ်နှစ်ခွဲကျော် ကာလမှာ မြစ်ဆုံစီမံကိန်း ရပ်ဆိုင်းရေးဟာ ပြီးဆုံးတော့မှာပါ။
ခုပဲ CPI ကုမ္ပဏီ တာဝန်ရှိသူတွေက ဒေသခံတွေကို ပြန်စည်းရုံးနေပါပြီ။ နားမလည်တဲ့ ဒေသခံတွေ ရိုးသားတဲ့ ဒေသခံတွေ၊ ရွာသူရွာသားတွေခမျာ မျက်လုံးလေး ကလယ်ကလယ်နဲ့ ဖြားယောင်းတဲ့နောက် နားယောင်သွားမှာ စိုးရပါတယ်။ သတိလက်လွတ် ဖြစ်သွားမှာ စိုးရပါတယ်။
မြန်မာ့လျှပ်စစ်
လျှပ်စစ်ဓာတ်အား အလျှံပယ် ထွက်နေလို့ တိုင်းတစ်ပါးကို ရောင်းစားရတယ်လို့ တစ်ခါက ၀န်ကြီးတစ်ပါးပြောတာ ကြားမိလိုက်သလိုပဲ။ နယ်စပ်ချင်းကပ်နေတဲ့ ဟိုဘက်နိုင်ငံမှာ မီးတွေထိန်ထိန်လင်းလို့။ မြန်မာဘက်ခြမ်းမှာ မှောင်လို့။
ခုတော့ မကြာမီက လျှပ်စစ်ဓာတ်အားခတွေ တိုးမြှင့်ကောက်ခံမယ် ဆိုတာကို လျှပ်စစ်ဝန်ကြီးဌာနက ထုတ်ပြန်ကြေညာပါတယ်။ လက်ရှိဈေးနှုန်းက အရှုံးပေါ်နေတယ်လို့ ဆိုပြန်ပါတယ်။ ဒီတစ်ခါတော့ ပြည်သူ့ကိုယ်စားလှယ်တွေက ပြည်သူ့ဘက်က ရပ်တည်ပြလိုက်ပါတယ်။ ပြည်ထောင်စုလွှတ်တော်က ဆုံးဖြတ်တဲ့အတိုင်း ပြည်ထောင်စုဝန်ကြီး လက်ခံမယ်လို့ ဆိုလာပါတယ်။ ပြည်ထောင်စုလွှတ်တော်က လျှပ်စစ်ဓာတ်အားခ တိုးမြှင့်ကောက်ခံတာကို အရေးကြီးအဆို တင်သွင်းကာ လက်ငင်းမကောက်ခံဖို့ ဆုံးဖြတ်လိုက်ပါတယ်။
ပြည်ထောင်စုလွှတ်တော်က မည်သို့ပင် ဆုံးဖြတ်စေကာမူ နိုင်ငံတော် သမ္မတကတော့ ဒီနှစ်ဘဏ္ဍာရေးနှစ်ကုန်ရင် လျှပ်စစ်ဓာတ်အားခ တိုးကောက်ရေး အစီအစဉ်ကို အကောင်အထည် ဖော်မှာပါဆိုတဲ့ သ၀ဏ်လွှာကို ပေးပို့ပြီး ပြည်သူတွေကို သွယ်ဝိုက်သတိပေးလိုက်ပါတယ်။ လပိုင်းလေး သက်သာတာနဲ့ ပြည်သူတွေခမျာ ကျေနပ်လိုက်ရမှာလား။
သူဌေးတစ်ယောက်အတွက် သင်္ဘောမှောက်တာ အရေးမကြီးပေမယ့် သူတောင်းစား ခွက်ပျောက်သွားတဲ့ ပြည်သူတွေ ဒုက္ခပင်လယ် ဝေရပါတော့တယ်။ လူတစ်ယောက်အတွက် ဘ၀မှာ ခိုင်လုံတဲ့ အာမခံချက် တစ်ခုတော့ ရှိသင့်ပါတယ်။ နောင်နှစ်တစ်ရာ ဘာဖြစ်မှာ မသေချာပေမယ့် နောင် ၁၀ လ ဘာဖြစ်မယ်လောက်တော့ ရေရေရာရာ ရှိသင့်ပါတယ်။
ခုလည်း ဧရာဝတီ မြစ်ဆုံစီမံကိန်းကို ကန့်ကွက်စဉ်က ပြည်သူတစ်ရပ်လုံး အုန်းအုန်းကျွက်ကျွက် တစ်ခဲနက် ကန့်ကွက်ခဲ့ကြပါတယ်။ နိုင်ငံရေး ပါတီများ၊ အဖွဲ့အစည်းများ၊ ပြည်သူများ မေ့စပြုလာပါပြီ။ ပြည်သူတွေ မေ့မေ့လျော့လျော့ မနေကြပါနဲ့။ နိုင်ငံရေးသတိ၊ လူမှုရေးသတိ၊ မိမိတစ်ဦးချင်းစီရဲ့ ပါဝင်ပတ်သက်နေမှုသတိ စတဲ့အရေးကြီး ကိစ္စရပ်တွေမှာသာ သတိထားရမှာ မဟုတ်ပါဘူး . . . . .
ဘ၀မှာ အာမခံချက် ပေးနိုင်တာက ခိုင်မာတဲ့ဥပဒေမှာ တာဝန်ယူနေတဲ့ နိုင်ငံတော် အကြီးအကဲများရဲ့ ဖြောင့်မတ်မှန်ကန်တဲ့ တရားရေးမဏ္ဍိုင်များပဲ ဖြစ်ပါတယ်။ တရားရေးမဏ္ဍိုင်ဆိုတာ နိုင်ငံတော်ရဲ့ပဋိညာဉ်ပါ။ လူတစ်ဦးချင်းစီရဲ့ ကတိက၀တ်ပါ။ အစိုးရမင်းများရဲ့ သစ္စာပါ။
ဒါတွေ မခိုင်မာဘဲ မတည်တံ့ဘဲ အဲဒီနိုင်ငံရဲ့ ပြည်သူတွေရဲ့ ဘ၀ဟာ မရေမရာ ဖြစ်နေမှာပါဘဲ။
CNG Gas ဈေးနှုန်းဟာ နာရီပိုင်းအတွင်း ဈေးခုန်တက်တာ ကြုံရဖူးပါတယ်။ ဘတ်စ်ကားခ တစ်စီးဈေးနှုန်းတစ်မျိုး လမ်းပိုင်းတွေ တစ်စီးနဲ့တစ်စီး မတူအောင်ဖြတ်ပြီး ကားခကောက်လို့ ကားခတစ်ရာ ပေးရမလား၊ နှစ်ရာပေးရမလား ကားပေါ်ရောက်ပြီး စပယ်ယာ တောင်းသလောက် ပေးကြပေရော့။ ဥပဒေရဲ့ တိကျမှု မရှိတာကြောင့် စပယ်ယာတွေနဲ့ ခရီးသည်တွေ နေ့စဉ်စကားများနေ ရပါတယ်။ ဒီလိုမျိုးဖြစ်အောင်များ တမင်တကာ ဖန်တီးနေသလားလို့ တွေးစရာ ဖြစ်လာပါတယ်။ ဒါမှမဟုတ် စီမံခန့်ခွဲနေတဲ့ မထသကပဲ လွဲချော်နေတာလား ဆန်းစစ်သင့်ပါတယ်။
မနေ့ကစီးတဲ့ ကားခ ကျပ် ၁၀၀ ကျတဲ့ လမ်းပိုင်းကို ဒီနေ့စီးတဲ့ကားခက လမ်းပိုင်းချင်း တူပေမယ့်ကျပ် ၂၀၀ ကျပြန်ပါသတဲ့။
အနာဂတ်ဆိုတာ စီမံကိန်း ရေးဆွဲထားမှုရဲ့ လက်အောက်မှာ ပုံဖော်လို့ရနိုင်တဲ့ စီမံမှုတစ်ခု ဖြစ်ပါတယ်။ စီမံကိန်း ရေးဆွဲသူများရဲ့ ပညာအရည်အချင်း ရေရှည်အမြော်အမြင် ကြီးမားမှု အထပ်ထပ်အခါခါ ပြုလုပ်ထားတဲ့ သုတေသန ရလဒ်များ ပိုင်ဆိုင်ထားမှု၊ စိတ်ထားကောင်းမြတ်မှု စတာတွေကို စနစ်တကျ ပေါင်းစပ်ပြီး ရုပ်လုံးဖော်နိုင်ရင် အအနာဂတ်ဟာ ကြိုတင်ထုဆစ်လို့ရတဲ့ ဘ၀တစ်စိတ်တစ်ပိုင်းပါ။
ရေရာတဲ့ အနာဂတ်ကို ပိုင်ဆိုင်ထားသူတွေဟာ လူဖြစ်ရကျိုး နပ်သလို စိတ်ချမ်းသာတဲ့ လူစားမျိုးတွေလည်း ဖြစ်နိုင်ပါတယ်။
ခုမြစ်ဆုံရဲ့ အနာဂတ်ဟာ ရေရာပြီလား။ ဒါဆို လျှပ်စစ်ဓာတ်အားခ၊ ကားခ၊ ဖုန်းခေါ်ဆိုခ၊ စည်ပင်ခွန်အခ၊ အမှိုက်ခွန်ခ၊ မြေခွန်ခ၊ လမ်းတံတားဖြတ်သန်းခ၊ CNG Gas မနက်ဖြန်အတွက် ဘယ်လောက်အာမခံမှု ရှိပါသလဲ၊ ဘယ်သူက အာမခံမှာလဲ၊ တစ်စုံတစ်ခု လွဲချော်ရင် ကျွန်တော်တာဝန်ယူတယ်လို့ ဘယ်ပြည်ထောင်စုဝန်ကြီးက ဘယ်နှခါ အာမခံ ကတိစကား ကြားရဖူးပါသလဲ။ ရေရှည်ဖြေရှင်းရဦးမယ့် မြေပိုင်ဆိုင်မှု၊ လယ်ယာမြေပိုင်ဆိုင်မှု၊ ကုန်ဈေးနှုန်း ကြီးမြင့်မှု၊ ကားပါမစ် ရရှိမှု၊ ကားတင်သွင်းမှု၊ တက္ကသိုလ်ဝင်ခွင့် ရရှိရေးနဲ့ ရမှတ်ဆက်စပ်မှု၊ ဘွဲ့ရပြီး အလုပ်အကိုင် ရရှိမှု၊ ရာထူးမှန်မှန်ကန်ကန် တိုးမြှင့်ခံစားခွင့် ရရှိမှု၊ လုပ်အားခ ထိုက်ထိုက်တန်တန် ပုံမှန်ရရှိမှု၊ မိသားစု တစ်စုချင်းအလိုက် မနက်ဖြန်အတွက် စားဝတ်နေရေး သေချာမှု၊ လက်ပံတောင်းတောင် မြေယာပြဿနာ ဖြေရှင်းပေးမှု၊ မိကျောင်းကန် တပ်မြေသိမ်းထားခြင်းကို ညှိနှိုင်းပေးမယ့် အမှု....။
ထို့အတူ ငြိမ်းချမ်းရေးကို ရေရှည်ပြေလည်စေမယ့် နိုင်ငံရေး နည်းလမ်းတွေ မသုံးဘဲ အပေးအယူလုပ်တဲ့နည်းဟာ လာဘ်ပေးလာဘ်ယူလုပ်တဲ့နည်းနဲ့ တူနေသလား သံသယပွားသူလည်း တိုးလာနေပါတယ်။
အနာဂတ်ထဲကို မရေမရာ တိုးဝင်ရတာ မျက်ကန်းလမ်းလျှောက်ရတာနဲ့ တူပါတယ်။ ဘာတွေကို ရင်ဆိုင်ရမလဲ၊ ဘယ်လိုပြင်ဆင် ထားရမလဲ၊ ဘယ်အရာကို အားကိုးရမလဲ၊ ဘယ်အရာကို ရှောင်ရှားပစ်ရမလဲ။
ချောက်တွေရှိလား။ ကူးဖြတ်ရခက်တဲ့ မြစ်တွေရှိလား၊ တောင်တွေဆီးတားနေသလား၊ ချုံတွေပိတ်ကာထားသလား၊ ဆူးခင်းလမ်းတွေ ဖြတ်ရမှာလား၊ ပန်းဥယျာဉ်တွေ ရှိသလား၊ ပန်းခင်းလမ်းတွေနဲ့ ဖြောင့်ဖြူးနေသလား။
အသိအမြင် အတွေ့အကြုံ ကြွယ်ဝလာတဲ့ လူသားအနေနဲ့ အနာဂတ်ဆိုတာ မရေရာဘူး ဆိုပေမယ့် ခန့်မှန်းပုံဖော်လို့ ရနိုင်တဲ့ အခြေအနေကို ရောက်နေပါပြီ။
သတိ
အနာဂတ်ကို ရေရာအောင် ထုဆစ်လို့ ရနိုင်လာပါတယ်။ မိုးရွာမှာကို ကြိုတင်ခန့်မှန်း နိုင်ပါတယ်။ မုန်တိုင်းတိုက်မှာ ဘယ်နေရာမှာတိုက်မှာ၊ ဘယ်နှမိုင်နှုန်းနဲ့တိုက်မှာ၊ ဘယ်အချိန် တိုက်မှာကအစ ခန့်မှန်းပြီး အန္တရာယ်ကို ရှောင်ရှားနိုင်ပါပြီ။ တမင်တကာ ပုံမဖော်ချင်လို့ ပုံမပေါ်အောင် ဆောင်ရွက်နေတာတွေကြောင့် အနာဂတ်ဟာ စမ်းတ၀ါးဝါး ဖြစ်နေတာပါ။
လူတွေ မေ့လျော့တတ်ပါတယ်။ လက်ငင်းကြုံတွေ့ရတဲ့ ဘ၀ကိုသာ အဓိက ထားတတ်ကြပြီး ကြုံခဲ့တဲ့အတိတ်၊ ကြုံတော့မယ့် အနာဂတ်ကို မေ့မေ့လျော့လျော့ နေတတ်ကြပါတယ်။
လက်ငင်းရင်ဆိုင် မတွေ့မချင်း မခံစားတတ်ကြပါဘူး။
ခုလည်း ဧရာဝတီ မြစ်ဆုံစီမံကိန်းကို ကန့်ကွက်စဉ်က ပြည်သူတစ်ရပ်လုံး အုန်းအုန်းကျွက်ကျွက် တစ်ခဲနက် ကန့်ကွက်ခဲ့ကြပါတယ်။ နိုင်ငံရေး ပါတီများ၊ အဖွဲ့အစည်းများ၊ ပြည်သူများ မေ့စပြုလာပါပြီ။ ပြည်သူတွေ မေ့မေ့လျော့လျော့ မနေကြပါနဲ့။ နိုင်ငံရေးသတိ၊ လူမှုရေးသတိ၊ မိမိတစ်ဦးချင်းစီရဲ့ ပါဝင်ပတ်သက်နေမှုသတိ စတဲ့အရေးကြီး ကိစ္စရပ်တွေမှာသာ သတိထားရမှာ မဟုတ်ပါဘူး။ နိုင်ငံတော် အကြီးအကဲများရဲ့ ကတိပြောဆိုချက်၊ ကြေညာချက်တွေကအစ သတိရှိရှိ စောင့်ကြည့်နေကြရမှာပါ။ ပြည်သူတွေ သတိရှိခြင်းက နိုင်ငံတော် အကြီးအကဲများရဲ့ ကတိတည်ခြင်းကို တွန်းအားပေးနေတာ ဖြစ်ပါတယ်။ ပြည်သူတွေ သတိရှိရှိ စောင့်ကြည့်နေလေလေ နိုင်ငံတော် အကြီးအကဲတွေရဲ့ ကတိတည်အောင် ဂရုစိုက် ဆောင်ရွက်ရလေလေ ဖြစ်ပါတယ်။
သတိဆိုတာ ပိုတယ်မရှိပါ။ဘူး။ သတိဆိုတာ လိုတယ်သာ ရှိတာပါ။ ထို့အတူ ကတိဆိုတာ ပျက်တယ်ဆိုတာ မရှိရသလို ကတိဆိုတာ တည်ကြည်ရစမြဲ ဖြစ်ပါတယ်။
သတိသမ္ပစဉ်ကို ဥာဏ်နဲ့ယှဉ်ပြီး တိုင်းပြည်အကျိုး၊ ပြည်သူ့အကျိုးကို အစဉ်ကာကွယ်စောင့်ရှောက်တဲ့ သတိရှိကြဖို့၊ အစိုးရကလည်း ပေးထားတဲ့ ကတိတည်ကြဖို့ အသိပေးအပ်ပါကြောင်း ...။
Credit To First 11

Read More »

ယမ်းငွေ့ဝေဆဲ မန်စီနယ် ------------ ရေးသားသူ- အောင်ခိုင်၊ မရန်


အစိုးရနှင့် ကေအိုင်အိုတို့ကြား အောက်တိုဘာလအတွင်းက ပြုလုပ်ခဲ့သော မြစ်ကြီးနားငြိမ်းချမ်းရေးဆွေးနွေးပွဲအပြီး နှစ်ပတ်ကျော်ခန့်အကြာ မန်စီမြို့နယ်အတွင်း တိုက်ပွဲများပြန်လည်ဖြစ်ပွားခဲ့သည်။

မုန်းဒိန်ပါ၊ နမ့်လင်းပါကျေးရွာဝန်းကျင်များတွင် တိုက်ပွဲများပြန်လည်ဖြစ်ပွားခဲ့ပြီးနောက် ဒေသခံပြည်သူထောင်နှင့်ချီ၍ တရုတ်နယ်စပ်နှင့် ဗန်းမော်မြို့သို့ ထွက်ပြေးတိမ်းရှောင်နေခဲ့ရသည်။ ၂ နှစ်ကျော်ကာလအတွင်း စစ်ဘေးဒုက္ခသည် ပြည်သူတစ်သိန်းကျော်အရေး မဖြေရှင်းနိုင်မီ စစ်ရှောင်ပြည်သူများ ထပ်မံတိုးပွားနေဆဲဖြစ်သည်။

လက်ရှိအချိန်တွင်လည်း မန်စီမြို့နယ်အတွင်း အစိုးရတပ်နှင့် ကေအိုင်အေတပ်တို့ကြား တပ်များနေရာယူထားမှုမှာ တစ်ဖက်နှင့်တစ်ဖက် တစ်မိုင်ခန့်သာကွာဝေးနေသည်။ ယင်းကြောင့်ပင် အချိန်မရွေး တိုက်ပွဲများပြန်လည်ဖြစ်ပွားလာမည်ကို ဒေသခံပြည်သူများက စိုးရိမ်နေကြသည်။

အစိုးရနှင့် ကေအိုင်အိုကြား ငြိမ်းချမ်းရေးဆွေးနွဲပွဲများ ပြုလုပ်နေသော်လည်း တိုက်ပွဲများပြန်လည်ဖြစ်ပွားနေရခြင်းအပေါ် မေးခွန်းထုတ်စရာဖြစ်နေသည်။

ဖန်ခါးကုန်းစစ်ရှောင်စခန်း
ဗန်းမော်မြို့အစွန်ရှိ ဖန်ခါးကုန်းစစ်ရှောင်စခန်းတွင် အသက် ၆၇ နှစ်အရွယ်ရှိ စစ်ဘေးဒုက္ခသည် ဦးအင်ခွန်နော်တစ်ယောက် နိုင်ငံသားစိစစ်ရေးကတ်ပြားပြုလုပ်ရန် တန်းစီစောင့်ဆိုင်းနေပါသည်။ သူကဲ့သို့ တိုက်ပွဲများကြောင့် အ၀တ်တစ်ထည်ကိုယ်တစ်ခုဖြင့် ထွက်ပြေးတိမ်းရှောင်လာရသော စစ်ဘေးဒုက္ခသည်ပြည်သူများကို လ၀ကမှ နိုင်ငံသားစိစစ်ရေးကတ်ပြား လာရောက်ပြုလုပ်ပေးနေခြင်းဖြစ်သည်။

ဦးအင်ခွန်နော်မှာ အောက်တိုဘာလနှောင်းပိုင်းက မုန်းဒိန်ပါကျေးရွာတွင် အစိုးရနှင့် ကေအိုင်အေတို့ကြားဖြစ်ပွားခဲ့သော တိုက်ပွဲများကြောင့် ထွက်ပြေးတိမ်းရှောင်လာသူတစ်ဦးဖြစ်သည်။

“လက်နက်ကြီးသံတွေ တ၀ုန်းဝုန်းနဲ့ ရွာထဲမှာ ယာလုပ်နေရင်းက ထွက်ပြေးလာရတော့ အ၀တ်တစ်ထည်ကိုယ်တစ်ခုနဲ့ပေါ့”ဟု ဦးအင်ခွန်နော်က သူ့အတွေ့အကြုံကိုပြောပြသည်။

ကချင်ပြည်နယ်နှင့် ရှမ်းပြည်နယ်မြောက်ပိုင်းဒေသများတွင် လတ်တလောဖြစ်ပွားခဲ့သော တိုက်ပွဲများနှင့်ပတ်သက်၍ အစိုးရနှင့် ကေအိုင်အေ နှစ်ဖက်ပြောကြားချက်များမှာ ကွဲပြားနေပါသည်။

အစိုးရဘက်က မန်စီမြို့နယ်တွင် စစ်ဆင်ရေးပြုလုပ်ခြင်းမဟုတ်ဘဲ ရဲတပ်ဖွဲ့လက်လှမ်းမမီသည့် မှောင်ခိုလမ်းကြောင်းများကို တပ်မတော်ကရှင်းလင်းခြင်းဖြစ်ပြီး ကေအိုင်အေတပ်ဘက်က အထက်၏အမိန့်ကိုမလိုက်နာဘဲ စတင်ပစ်ခဲ့ခြင်းကြောင့် တိုက်ပွဲများဖြစ်ပွားရခြင်းဖြစ်ကြောင်း ပြောကြားသည်။

အောက်တိုဘာလ မြစ်ကြီးနားဆွေးနွေးပွဲအတွင်း နှစ်ဖက်သဘောတူညီခဲ့သည့် အရေးပါသော အများပြည်သူသုံးလမ်းများ ပြန်ဖွင့်နိုင်ရန် ကေအိုင်အေဘက်မှ တပ်သားများ နောက်ဆုတ်ပေးခဲ့သော်လည်း အစိုးရတပ်က သတ်မှတ်လမ်းကြောင်းအတိုင်း မ၀င်လာသည့်အတွက် မလွှဲမရှောင်သာ တိုက်ပွဲများပြန်လည်ဖြစ်ပွားရသည်ဟု ကေအိုင်အေဘက်မှ တုံ့ ပြန်ထားသည်။

ထို့အပြင် ယခုတိုက်ပွဲများဖြစ်ပွားရာ ဒေသများသည် ကေအိုင်အေတပ်များတည်ရှိရာ နယ်မြေများဖြစ်ပြီး အစိုးရတပ်များမ၀င်လာရန် ဆွေးနွေးပွဲတိုင်း၌ ပြောကြားထားခဲ့ကြောင်း ကေအိုင်အေဘက်ကလည်းဆိုပါသည်။

ငြိမ်းချမ်းရေးဆွေးနွေးပွဲများ ပိုမိုပြုလုပ်လာပြီး တိုက်ပွဲအရှိန်လျှော့ရန် သဘောတူထားကြပါလျက် မန်စီနယ်တစ်ဝိုက်တွင် တိုက်ပွဲများထပ်မံဖြစ်ပွားခြင်းအပေါ် ပြည်သူများလည်း မျက်စိလည်လျက်ရှိသည်။ ကေအိုင်အေဒုတိယစစ်ဦးစီးချုပ် ဗိုလ်ချုပ်ဂွန်မော်ကိုယ်တိုင် ပထမဆုံးအကြိမ် ရန်ကုန်မြို့သို့လာရောက်ပြီး အစိုးရတာဝန်ရှိသူအချို့နှင့် အရပ်ဘက်အဖွဲ့အစည်းများနှင့် တွေ့ဆုံခဲ့သောကြောင့် ယုံကြည်မှုပိုခိုင်မာလာအောင် ကြိုးပမ်းနေပါလျက် မရပ်တန့်သောတိုက်ပွဲများက ပဟေဠိဖြစ်စေသည်။

ကချင်အရေးလေ့လာစောင့်ကြည့်သူများနှင့် ဒေသတွင်း အဖွဲ့အစည်းများကမူ ယခုဖြစ်ပွားသောတိုက်ပွဲများကြောင့် အစိုးရဘက်မှ နယ်မြေစိုးမိုးမှုပိုမိုရရှိပြီး၊ ကေအိုင်အေတပ်များကို နယ်စပ်ဘက်သို့ ဖိတိုက်သည့်ပုံစံဖြစ်နေကြောင်း သုံးသပ်ကြသည်။

ထို့အပြင် အစိုးရနှင့်ကေအိုင်အို မေလဆွေးနွေးပွဲက သဘောတူညီခဲ့သည့် စစ်ရှိန်လျှော့ချရေး၊ တိုက်ပွဲများထပ်မံမဖြစ်ပွားရေးတို့ကို နှစ်ဖက်စလုံးမှ ချိုးဖောက်သည့် သဘောဖြစ်အောင် ပြုလုပ်နေသည့်ပုံစံဖြစ်နေကြောင်း ၎င်းတို့ကသုံးသပ်ကြသည်။

“ဆွေးနွေးပွဲတွေ ရှည်နိုင်သမျှရှည်အောင် ဆွဲဆန့်ပြီးလုပ်။ နယ်မြေစိုးမိုးရေးဝင်လုပ် နယ်စပ်ကိုတွန်းပို့၊ နောက်ဆုံးမလှုပ်သာတော့မှ လည်ပင်းညှစ်ပြီးအဖြေတောင်းမယ့် သဘောလို့မြင်တယ်”ဟု ကချင်အရေးစောင့်ကြည့်သူတစ်ဦးကဆိုသည်။

ဆွေးနွေးပွဲရလဒ်များအပေါ် ထိခိုက်မည်စိုးရိမ်သဖြင့် မြန်မာ့တပ်မတော်မှ ကေအိုင်အိုထိပ်ပိုင်းသို့ တရားဝင်အကြာင်းကြားပြီးမှ တရားဥပဒေစိုးမိုးရေးအတွက် လှုပ်ရှားခဲ့သော်လည်း အောက်ခြေကမလိုက်နာလိုသဖြင့် တိုက်ပွဲများဖြစ်ပွားနေရခြင်းဖြစ်ကြောင်း မြောက်ပိုင်းတိုင်းစစ်ဌာနချုပ် ထိပ်တန်းအရာရှိတစ်ဦးကပြောသည်။

“ရဲတပ်ဖွဲ့လက်လှမ်းမမီတဲ့ ဒေသတွေမှာ မှောင်ခိုလမ်းကြောင်းတွေတားမြစ်ဖို့ တပ်မတော်ကတာဝန်ရှိတယ်။ ဒီလိုလုပ်တာ အဲဒီဒေသမှာရှိတဲ့ ကေအိုင်အေတွေအကျိုးကို အတော်နစ်နာစေတယ်လို့ သိရတယ်။ သူတို့ရဲ့အပေါ်က ညွှန်ကြားချက်ကိုကြားရပါတယ်။ အောင်ခြေကမလိုက်နာလို့ဖြစ်ရတာ”ဟု ဆိုပါသည်။

ယခုလတ်တလော တိုက်ပွဲများဖြစ်ပွားခဲ့သော ကချင်ပြည်နယ်နှင့် ရှမ်းပြည်နယ်မြောက်ပိုင်းအစပ်ဒေသများသည် သဘာဝသယံဇာတများစွာရှိပြီး မဟာဗျူဟာကျသည့်နေရာများ ဖြစ်နေသည်ဟုလည်း ကချင်အရေးလေ့လာသူများကဆိုပါသည်။

ကေအိုင်အေ တပ်ရင်း ၂၇ မှ အရာရှိတစ်ဦးကမူ“နယ်မြေစိုးမိုးရေးလုပ်ချင်လို့လို့မြင်တယ်။ စီးပွားရေးအရပိတ်ချင်ရင် နယ်စပ်ဂိတ်ဘက်ကို ပိတ်နုိုင်တာပဲ”ဟု တိုက်ပွဲများဖြစ်ပွားနေရခြင်းအပေါ် သူ့အမြင်ကိုပြောပြသည်။

ပြီးခဲ့သည့် တစ်လကျော်ကာလအတွင်း မန်စီမြို့နယ်တွင်ဖြစ်ပွားခဲ့သော တိုက်ပွဲများကြောင့် အနည်းဆုံး ကျေးရွာ ၁၅ ရွာမှ ဒေသခံပြည်သူထောင်နှင့်ချီ၍ တရုတ်နယ်စပ် မန်ဝိန်းကြီးဒေသ လဂတ်ယန်စခန်း၊ ဗန်းမော်မြို့ဝန်းကျင်ရှိ စစ်ရှောင်စခန်းများသို့ ထွက်ပြေးတိမ်းရှောင်ခဲ့ကြရသည်။

ယခုလက်ရှိအချိန်တွင် မန်စီမြို့နယ်တွင် အစိုးရတပ်မှ စစ်ဆင်ရေးကွပ်ကဲမှုဌာနချုပ် ၂ ခုနှင့် တပ်ရင်း ၁၅ ရင်းခန့် လှုပ်ရှားနေသည်။ ကေအိုင်အေဘက်မှလည်း တပ်ရင်း ၁၊ ၁၂ နှင့်၂၇ တို့လှုပ်ရှားလျက်ရှိသည်။

နှစ်ဖက်တပ်များမှာ နီးကပ်လွန်းသည့်အပြင် စစ်ရေးလှုပ်ရှားမှုများရှိသဖြင့် အချိန်မရွေးတိုက်ပွဲပြန်လည်ဖြစ်ပွားနိုင်သည်ဟု ဒေသတွင်းအဖွဲ့အစည်းများကဆိုသည်။

“ကျွန်တော်တို့ကတော့ စစ်ပြေးဒုက္ခသည်တွေ အချိန်မရွေးထပ်လက်ခံနိုင်အောင် ပြင်ဆင်နေပါတယ်”ဟု ဖန်ခါးကုန်းစစ်ရှောင်စခန်း တာဝန်ခံဒူဝါဇော်ဘောက်ကပြောသည်။

အစိုးရနှင့်ကေအိုင်အေတို့ကြား ပြီးခဲ့သည့် ဆွေးနွေးပွဲနှစ်ခုအတွင်း စစ်ရှိန်လျှော့ချရန်၊ ရှေ့တန်းပူးတွဲစောင့်ကြည့်ရေးကော်မတီ (Joint Mointaring Committe)များ ဖွဲ့စည်းသွားကြရန် သဘောတူညီခဲ့ကြသည်။ သို့သော် လက်တွေ့အကောင်အထည်ဖော်နိုင်မှုမရှိသေးပေ။

သိန်းနှင့်ချီသည့် စစ်ရှောင်ဒုက္ခသည်များအပါအ၀င် ပြည်သူအားလုံးအတွက် စာရွက်အပေါ်မှ နှစ်ဖက်သဘောတူညီချက်များကို အမှန်တကယ်လိုက်နာပြီး လက်တွေ့အကောင်အထည်ဖော်သင့်ကြောင်း ကချင်စစ်ပွဲငြိမ်းချမ်းရေးအတွက် ပါဝင်ဆောင်ရွက်နေသူများက အကြံပြုပြောဆိုပါသည်။

“နှစ်ဖက်သဘောတူတဲ့အချက်တွေကို အပြင်မှာ လက်တွေ့အကောင်အထည်ဖော်ဖို့က အရေးကြီးပါတယ်”ဟု ငြိမ်းချမ်းရေးဆွေးနွေးပွဲဖြစ်မြောက်ရေးအဖွဲ့ (PCU)မှ ဦးအင်ရှန်ဆန်အောင်ကပြောသည်။
Credit To 7Day News Journal

ဓာတ်ပုံ- မရန်
Read More »

“အစိုးရရဲ့ နိုင်ငံရေးဆွေးနွေးပွဲ မူဘောင်ကိုတော့ သဘောမတူပါဘူး။ ဘာလို့လဲဆိုတော့ အစိုးရရဲ့မူဘောင်မှာက ထာဝရငြိမ်းချမ်းရေးရဖို့ လက်နက်စွန့်ရမှာဖြစ်တဲ့အတွက် လက်မခံနိုင်ဘူး” ------



ရှမ်းပြည်နယ်တောင်ပိုင်း RCSS/SSA ဥက္ကဋ္ဌ ဒုတိယဗိုလ်ချုပ်ကြီးယွက်စစ်နှင့်တွေ့ဆုံခြင်း
------
မောင်တာ

ရှမ်းပြည်နယ်ပြန်လည်ထူထောင်ရေးကောင်စီ၊ ရှမ်းပြည်တပ်မတော်(RCSS/SSA)သည် ရှမ်းပြည်နယ်တောင်ပိုင်း၊ ထိုင်း-မြန်မာနယ်စပ်တစ်လျှောက် အခြေစိုက်ထားသော ရှမ်းပြည်နယ်တောင်ပိုင်းတွင် အခြေစိုက်လှုပ်ရှားနေသော အင်အားကြီး ရှမ်းတိုင်းရင်းသားလက်နက်ကိုင် အဖွဲ့အစည်းတစ်ခုဖြစ်သည်။ လွန်ခဲ့သည့် ၂ နှစ်ခန့်က အစိုးရနှင့် အပစ်အခတ်ရပ်စဲရေးလက်မှတ်ရေးထိုး၊ အပစ်အခတ်ရပ်စဲပြီးနောက် RCSS ထိန်းချုပ်ဒေသတွင်း ဒေသဖွံ့ဖြိုးရေး၊ စစ်ဘေးရှောင်ဒုက္ခသည်များ နေရပ်ပြန်ပို့ရေးနှင့် မူးယစ်ဆးဝါးတိုက်ဖျက်ရေး တစ်ပြည်လုံးအပစ်အခတ်ရပ်စဲရေးကို ကြေညာခဲ့ရာ နိုင်ငံရေးဆွေးနွေးပွဲများအတွက် (RCSS/ SSA)၏ သဘောထား၊ ငြိမ်းချမ်းရေးလုပ်ငန်းစဉ်များ မည်သို့ရှေ့ဆက်သွားရန် ရည်မှန်းနေသည် စသည်တို့ကို RCSS/SSA ဌာနချုပ်ရှိရာ ထိုင်း-မြန်မာနယ်စပ် လွယ်တိုင်းလျန်းဒေသသို့သွားရောက်ကာ RCSS/SSA ဥက္ကဋ္ဌ ဒုတိယဗိုလ်ချုပ်ကြီးယွက်စစ်အား မေးမြန်းခဲ့သည်များမှ စာဖတ်ပရိသတ်အတွက် ကောက်နုတ်ဖော်ပြလိုက်ပါသည်။

မေး- အပစ်ရပ်လက်မှတ်ရေးထိုးပြီးနောက်ပိုင်း RCSS ထိန်းချုပ်ဒေသတွင်းမှာ နိုင်ငံရေး၊ စီးပွားရေး၊ လူမှုရေးစသည်ဖြင့်ပေါ့။ ဘယ်ကဏ္ဍတွေမှာ သိသိသာသာ ဖွံ့ဖြိုးတိုးတက်မှုရှိလာပါလဲ။

ဖြေ- အပစ်အခတ်ရပ်စဲထားတာ ၂ နှစ်တော့ရှိပြီပေါ့။ ဒါပေမဲ့ တိုးတက်မှုပိုင်းတော့ ဘာမှသိသိသာသာ ထင်ထင်မြင်မြင်ကြီးတော့ မရှိသေးပါဘူး။ တိုးတက်မှုပိုင်းမဖြစ်လာရတာ အပိုင်းသုံးပိုင်းရှိပါတယ်။ နံပါတ်တစ် နားလည်မှုတွေကွာခြားနေတယ်။ အပစ်ခတ်ရပ်စဲထားတဲ့ သဘောတူဆုံးဖြတ်ချက် ၃၂ ချက်ရှိတယ်။ အဲဒီ ၃၂ ချက်ထဲမှာ တပ်မတော်ဘက်က လိုက်နာတယ်ဆိုတာ နှစ်ချက်လောက်ပဲရှိတယ်။ ဒါ့အပြင် အပစ်အခတ်ရပ်စဲထားတဲ့ ၂ နှစ်လောက်အတွင်းမှာ တိုက်ပွဲပေါင်း ၁၄၄ ကြိမ် ထပ်ဖြစ်ခဲ့တယ်။ စစ်ပွဲတွေဖြစ်ရတဲ့အကြောင်းက တပ်မတော်ဘက်က RCSS အဖွဲ့ဝင်တွေကို တောထဲဝင်ပြီး လိုက်ရှာပြီးတော့ ပစ်တဲ့အတွက်ကြောင့်ပါ။ အဲဒါကြောင့် အပစ်အခတ်ရပ်စဲထားပေမယ့် နားလည်မှုသဘောထားတွေကတော့ ကွဲလွဲနေသေးတယ်။ ပထမအပစ်ရပ်ဖို့ ဦးအောင်မင်းနဲ့ ဆွေးနွေးတဲ့အချိန်မှာ ဒီ RCSS ရဲ့ စစ်သားတွေရှိတဲ့နေရာမှာ တပ်တွေချမယ်၊ နောက်ပြီး တပ်မတော်ဘက်ကလည်း တောထဲဝင်ရင် သတင်းတွေပြန်ကြားပေးဖို့၊ သတင်းပေးဖို့ သဘောတူညီထားကြတယ်။ ပြီးတော့ RCSS ဘက်ကလည်း မြို့ထဲကိုသွားမယ်၊ လက်နက်ပါမယ်ဆိုရင် အကြောင်းကြားပေးဖို့ အဲဒါတွေ သဘောတူညီထားကြပါတယ်။ ခုတော့ သဘောတူထားတဲ့အတိုင်း ဖြစ်မလာခဲ့ပါဘူး။

မေး- သဘောတူညီချက်တွေထဲက အကောင်ထည်မဖော်နိုင်သေးတဲ့အချက်တွေ များနေတာက ဘယ်လိုအနှောင့်အယှက်ဖြစ်စေနိုင်လဲ။

ဖြေ- အကောင်အထည်မဖော်နိုင်တာတွေကို ပြန်ပြီးဆွေးနွေးဖို့လိုပါတယ်။ နားလည်မှုကွဲလွဲနေတာတွေ။ သဘောထားချင်းမတူတာတွေကို ပြန်ဆွေးနွေးဖို့လိုပါတယ်။ ပြန်ဆွေးနွေးဖို့က အရေးကြီးပါတယ်။ ပြန်ပြီးဆွေးနွေးတာက သေနတ်တွေပစ်ခတ်နေတာ၊ တိုက်ခိုက်နေတာထက် ပိုကောင်းပါတယ်။ အကယ်၍ ပြန်ပြီးမဆွေးနွေးကြဘဲ ဓားတွေသုံးပြီး ဖြေရှင်းမယ်ဆိုရင် မဖြစ်နိုင်ဘူး။ နှစ် ၆၀ ကြာ ပြည်တွင်းစစ်ကလည်း ဖြစ်လာခဲ့ပြီးပြီ။ တပ်မတော်ကလည်း တိုင်းရင်းသားတွေကို အပြတ်၊ တစ်ခါတည်း မချေမှုန်းနိုင်ဘူး။ တိုင်းရင်းသားတွေဘက်ကလည်း တပ်မတော်ကိုမနိုင်ဘူး။ ပြည်တွင်းစစ်ရဲ့ဆိုးကျိုးက ပြည်သူလူထုပဲ ခံစားရတယ်။ ဒါကြောင့် ပြန်ဆွေးနွေးဖို့က အရေးကြီးတယ်။ ပိုပြီးတော့ကောင်းတဲ့လမ်းစဉ် ဖြစ်ပါတယ်။ စားပွဲဝိုင်းပေါ်မှာ ဆွေးနွေးတာကတော့ ကောင်းတဲ့လမ်းစဉ်ဖြစ်ပါတယ်။ ပြုံးပြီးတော့ ဆွေးနွေးကြပြီး ရယ်ရွှင်ပြီး တရင်းတနှီးဆွေးနွေးကြပြီး ရည်မှန်းချက်ပန်းတိုင်ကို လျှောက်ရမှာဖြစ်ပါတယ်။

မေး- ၂၀၁၄ ခုနှစ်ထဲမှာရော သဘောတူထားတဲ့အချက်တွေကို အကောင်အထည်ဖော်နိုင်မယ်လို့ ထင်ပါသလား။

ဖြေ- ငြိမ်းချမ်းရေးနဲ့ပတ်သက်ပြီးတော့ ဒေါ်အောင်ဆန်းစုကြည်ပြောထားတဲ့ စကားတွေကို သတိရပါတယ်။ ဒေါ်အောင်ဆန်းစုကြည်က ငြိမ်းချမ်းရေးနဲ့ပတ်သက်ပြီးတော့ လုပ်ချင်တယ်၊ ရချင်တယ်ဆိုရင်တော့ ခေါင်းဆောင်တဲ့သူကစပြီးတော့ လုပ်ရင်တော့ရနိုင်ပါတယ်တဲ့။ ခေါင်းဆောင်ဆိုတာ အာဏာရှိတဲ့သူပေါ့။ သူတို့က ငြိမ်းချမ်းရေးကို တကယ်ရချင်တယ်၊ တကယ်လုပ်မယ်ဆိုရင်တော့ တစ်ခါတည်းနဲ့ ပြီးသွားနိုင်ပါတယ်။ အဲဒီကိစ္စတွေမှာ အခက်အခဲဆိုတာ ဘာမှမရှိနိုင်ပါဘူး။ သူတို့က ငြိမ်းချမ်းရေးကို တကယ်မလိုချင်လို့ အကြောင်းပြချက် တစ်မျိုးပြီးတစ်မျိုးရှာပြီးတော့ ပြဿနာတွေ ရှာမယ်ဆိုရင်တော့ ငြိမ်းချမ်းရေးက ရနိုင်မှာမဟုတ်ဘူး။

မေး- RCSS အနေနဲ့ ငြိမ်းချမ်းရေးလုပ်ငန်းစဉ်ကို ဘယ်လိုမူဝါဒနဲ့ သွားနေပါသလဲခင်ဗျ။

ဖြေ- RCSS အနေနဲ့က အပစ်အခတ်ရပ်စဲရေးကို နိုင်ငံတော်သမ္မတနဲ့ ဆွေးနွေးထားတယ်။ သဘောတူညီချက်တွေလည်း ရရှိပြီးပြီ။ RCSS ဘက်ကတော့ နိုင်ငံရေးဆွေးနွေးဖို့ အဆင်သင့်ဖြစ်နေပါပြီ။ နိုင်ငံရေးဆွေးနွေးမှုအတွက်လည်း RCSS က မူဘောင်တွေရှိပြီးပါပြီ။ မူဝါဒလမ်းစဉ်တွေ ရှိပါတယ်။ ပထမတစ်ချက်ကတော့ နိုင်ငံတော်ဖွဲ့စည်းပုံအခြေခံဥပဒေပြင်ဖို့ လိုပါတယ်။ နိုင်ငံတော်ရဲ့အုပ်ချုပ်မှုမူဝါဒဟာ ဖက်ဒရယ်စနစ်ဖြစ်ဖို့လိုပါတယ်။ ဒုတိယအချက်ကတော့ ကိုယ်ပိုင်ပြဋ္ဌာန်းခွင့်ရရှိဖို့ အရေးကြီးပါတယ်။ နောက်ပြီး တတိယအချက်ကတော့ စစ်မှန်တဲ့ဒီမိုကရေစီစနစ်ဖြစ်ဖို့ အရေးကြီးပါတယ်။ အဲဒါကတော့ RCSS ရဲ့ အရေးကြီးတဲ့မူဝါဒပါပဲ။

မေး- အောက်တိုဘာလကုန်ပိုင်းက ပြုလုပ်ခဲ့တဲ့ တိုင်းရင်းသားလက်နက်ကိုင်အဖွဲ့တွေအားလုံးပါဝင်တဲ့ လိုင်ဇာဆွေးနွေးပွဲမှာ RCSS က လက်မှတ်မထိုးခဲ့ပါဘူး။ အထက်ကလူကြီးတွေနဲ့ မတိုင်ပင်ရသေးလို့ လက်မှတ်မထိုးတာလို့တော့ သိထားရပါတယ်။ အဲဒီပေါ်မှာ ဥက္ကဋ္ဌအနေနဲ့ ဘယ်လိုများပြောချင်ပါသလဲ။

ဖြေ- ဆွေးနွေးမှုရဲ့ဆုံးဖြတ်ချက်ရလဒ်က ဘယ်လိုလဲဆိုတော့ ဒီဘက်က ရည်ရွယ်ပြီးသွားတာက အပစ်အခတ်ရပ်စဲရေးနဲ့ ပတ်သက်ပြီးတော့ ဆွေးနွေးဖို့သွားတာဖြစ်ပါတယ်။ ဒါပေမဲ့ ဆုံးဖြတ်ချက်ထွက်လာတာက နိုင်ငံရေးနဲ့ပတ်သက်တယ်။ အဲဒါကြောင့် လက်မှတ်မထိုးသေးတာ။ တကယ်နိုင်ငံရေးနဲ့ပတ်သက်တယ်ဆိုရင်တော့ လိုင်ဇာတစ်ခုတည်းနဲ့ မပြီးသေးဘူး။ ရှမ်းပြည်တစ်ပြည်လုံးမှာရှိတဲ့ ပြည်သူလူထုရဲ့သဘောထားကိုလည်း တောင်းခံဖို့လိုအပ်ပါတယ်။ အဲဒါကြောင့် လက်မှတ်မထိုးသေးတာပါ။

မေး- အခုဆို အစိုးရနဲ့တိုင်းရင်းသားတွေ နှစ်ဖက်လုံးက မူဘောင်တွေထုတ်ကြတယ်။ အစိုးရကထုတ်တဲ့မူဘောင်နဲ့ပတ်သက်ပြီးတော့ရော ဥက္ကဋ္ဌအနေနဲ့ ဘယ်လိုမြင်ပါသလဲ။

ဖြေ- နိုင်ငံရေးဆွေးနွေးပွဲမူဘောင်တွေနဲ့ပတ်သက်လို့ တိုင်းရင်းသားတွေရဲ့သဘောထားကို WGEC ကနေ တင်ပြဆွေးနွေးထားတာရှိပါတယ်။ အစိုးရရဲ့ နိုင်ငံရေးဆွေးနွေးပွဲမူဘောင်ကိုတော့ သဘောမတူပါဘူး။ နိုင်ငံတော်သမ္မတကပေးလာတဲ့ မူဘောင်ကိုတော့ RCSS အနေနဲ့ သဘောမတူပါဘူး။ ဘာလို့လဲဆိုတော့ အစိုးရရဲ့ မူဘောင်မှာက ထာဝရငြိမ်းချမ်းရေးရဖို့အတွက် လက်နက်စွန့်ရမှာဖြစ်တဲ့အတွက် လက်မခံနိုင်ဘူး။ သဘောမကျဘူး။

မေး- RCSS လိုပဲ တခြားတိုင်းရင်းသားလက်နက်ကိုင်အဖွဲ့တွေကလည်း ဒီအချက်ပေါ်မှာ အခြေခံပြီးတော့ ဒီမူဘောင်ကို သဘောမတူကြဘူး။ ဒီလိုမျိုးကွဲလွဲချက်တွေ ရှိနေမယ်ဆိုရင် ရှေ့ဆက်ပြီးတော့ ငြိမ်းချမ်းရေးမှာ ဘယ်လိုမျိုးထိခိုက်မှုတွေရှိနိုင်မလဲ။

ဖြေ- အကယ်၍ အစိုးရဘက်ကနေ တပ်မတော်ဘက်က သူတို့ချထားတဲ့ နိုင်ငံရေးဆွေးနွေးပွဲမူဘောင်ကို လက်ခံပြီးတော့ ပြန်လည်မပြင်ဆင်ဘူးဆိုရင်တော့ ဒီအပစ်အခတ်ရပ်စဲရေးဟာ ပျက်စီးမှာဖြစ်ပါတယ်။ နောက်ပြီးတော့ စစ်ပွဲတွေ ထပ်ဖြစ်လာဦးမယ်ထင်ပါတယ်။

မေး- ဥက္ကဋ္ဌအနေနဲ့ အစိုးရကို ဘယ်လိုများအကြံပြုချင်ပါသလဲ။

ဖြေ- RCSS အနေနဲ့ MPC ဘက်ကိုလည်း အကြံဉာဏ်ပေးထားတယ်။ ပြီးတော့ တိုင်းရင်းသားအဖွဲ့အစည်းတွေကိုလည်း အကြံဉာဏ်ပေးထားတယ်။ ဘယ်လိုအကြံဉာဏ်ပေးထားလဲဆိုတော့ ငြိမ်းချမ်းရေးလိုလားတယ်ဆို နှစ်ဖက်အလျှော့အတင်းတွေလုပ်မှ ဖြစ်နိုင်မယ်။ အလျှော့အတင်းတွေလုပ်ပြီး တစ်ဖက်နဲ့တစ်ဖက် ဆွေးနွေးမှဖြစ်နိုင်မယ်။ အကယ်၍ ဆက်ပြီးတင်းမာနေဦးမယ်ဆိုရင် တိုက်ပွဲတွေက ဆက်ဖြစ်နေဦးမှာဖြစ်ပါတယ်။ ပြည်တွင်းစစ်ဖြစ်လာခဲ့တာလည်း နှစ် ၆၀ ကြာလာခဲ့ပြီး ဘာမှထူးခြားတိုးတက်မှုဆိုတာ မရှိခဲ့ဘူး။ အခြေအနေတွေဟာ ဘယ်အချိန်ထိဆက်ပြီး ဆိုးနေဦးမယ်ဆိုတာ မသိနိုင်သေးဘူး။ အကယ်၍ ဆက်ပြီးတင်းမာနေဦးမယ်ဆိုရင်တော့ တိုက်ပွဲတွေကထပ်ဖြစ်မယ်။

မေး- စစ်မှန်တဲ့ငြိမ်းချမ်းရေးရဖို့ နိုင်ငံရေးဆွေးနွေးပွဲတွေအပြင် ဘာတွေများထပ်ပြီး လိုအပ်သေးတယ်လို့ ထင်ပါသလဲ။

ဖြေ- ထာဝရငြိမ်းချမ်းရေးဆိုတာ ပထမအချက်အနေနဲ့ နိုင်ငံတော်သမ္မတချထားတဲ့ မူဘောင်လမ်းစဉ်အတိုင်း ဆက်လုပ်ရင်လည်း ဖြစ်နိုင်တယ်။ သမ္မတက ဘယ်လိုလဲဆိုတော့ ပထမတစ်ပြည်လုံးအပစ်အခတ်ရပ်စဲကြတယ်။ နိုင်ငံရေးမူဘောင်တွေ ရေးဆွဲကြမယ်။ နောက်တစ်ခါ နိုင်ငံရေးဆွေးနွေးပွဲကိုပြုလုပ်မယ်ပေါ့။ အဲဒီလိုဆိုရင် ထာဝရငြိမ်းချမ်းရေးဆိုတာ ဖြစ်လာမှာပါ။

မေး- ဖွဲ့စည်းပုံဥပဒေနဲ့ပတ်သက်ပြီး RCSS ရဲ့ သဘောထားက ပြင်ဆင်မှာလား။ အသစ်ပြန်ရေးချင်တာလားခင်ဗျ။

ဖြေ- ဒီဥပဒေနဲ့ပတ်သက်ပြီးတော့ RCSS ရဲ့ဘက်က ဘယ်လိုလဲဆိုတော့ ဆွေးနွေးမှုတော့ အရေးကြီးတယ်။ ဒီဘက်ကနေ အသစ်ရေးဆွဲမယ်ဆိုလည်း မဖြစ်နိုင်ဘူး။ အဲဒီတော့ အားလုံးပါဝင်ဆွေးနွေးပြီး ပြင်ဆင်ဖို့လိုပါတယ်။ အရေးကြီးတာက စစ်မှန်တဲ့ဒီမိုကရေစီအုပ်ချုပ်မှုစနစ်ပဲ။ စစ်မှန်တဲ့ ဒီမိုကရေစီအုပ်ချုပ်မှုစနစ်အရဆိုရင် အာဏာတွေက ပြည်သူတွေကို ခွဲဝေပေးရမယ်။ အခုအခြေအနေက ဒီမိုကရေစီအုပ်ချုပ်မှုစနစ် မဖြစ်သေးဘူး။ တပ်မတော်က အာဏာတွေကို ချုပ်ကိုင်ထားဆဲပဲ။

မေး- ဖက်ဒရယ်နဲ့ပတ်သက်ပြီးတော့ RCSS အနေနဲ့ ကြိုတင်ပြင်ဆင်ထားတာရှိလား။

ဖြေ- ဖက်ဒရယ်နဲ့ပတ်သက်ပြီးတော့ RCSS ဘက်က ပြင်ဆင်မှုတွေရှိပါတယ်။ နောက်ပြီး ကမ္ဘာမှာလည်း ဖက်ဒရယ်မူဆိုတာ ကြီးထွားလာနေပါပြီ။ အမေရိကန်ရဲ့ဥပဒေတွေကို ဥပမာယူပြီးတော့ လုပ်နေတာတွေရှိပါတယ်။

မေး- လွှတ်တော်မှာတော့ ဖက်ဒရယ်နဲ့ပတ်သတ်လို့ ဂျာမနီရဲ့ဖက်ဒရယ်သဘောမျိုး ပြောဆိုနေသံကြားရပါတယ်။ အဲဒီတော့ RCSS အနေနဲ့ ဘယ်လိုပြင်ဆင်ထားတာလဲခင်ဗျ။

ဖြေ- သိပ်တော့မကွဲပြားပါဘူး။ နည်းနည်းပဲကွာခြားတာပါ။ ဂျာမနီက ဥပမာပဲယူယူ၊ အမေရိကန်က ဥပမာပဲယူယူ အများကြီးကွာခြားမှုသိပ်မရှိပါဘူး။

မေး- တိုင်းရင်းသားအများစုပြောနေကြတဲ့ ဖက်ဒရယ်တပ်မတော်ကိစ္စပေါ့။ ဖက်ဒရယ်တပ်မတော်ဆိုတာ တကယ်ဖြစ်လာမယ်လို့ ယုံကြည်လား။

ဖြေ- အဲဒီကိစ္စ လွယ်ကူတဲ့ကိစ္စမဟုတ်ဘူး။ ဖက်ဒရယ်တပ်မတော်ဖြစ်ဖို့ တိုင်းရင်းသားတွေဘက်က ဦးဆောင်သူတွေ၊ ခေါင်းဆောင်တွေ၊ ပြီးတော့ တပ်မတော်ဘက်က တပ်ဦးစီးချုပ်တွေအချင်းချင်း အကြိမ်ကြိမ်ဆွေးနွေးဖို့ လိုသေးတယ်။ အခုတော့ တပ်မတော်ကို တိုင်းရင်းသားတွေက ယုံကြည်မှုတအားကြီး နည်းနေသေးတယ်။ အခု ယုံကြည်မှုတွေ တည်ဆောက်ဖို့ အရေးတကြီးလိုအပ်နေပါသေးတယ်။ ဖက်ဒရယ်မူဆိုတာ အချင်းချင်းပေါင်းစည်းနေထိုင်ကြတာပါ။ ပေါင်းစည်းမှုမဖြစ်နိုင်သေးဘူးဆိုရင်တော့ Federal Military (ဖက်ဒရယ်တပ်မတော်)ဆိုတာ မဖြစ်နိုင်သေးဘူး။ အခုတပ်မတော်ရဲ့ ရပ်တည်မှုအပေါ် အခြေခံပြီးပြောမယ်ဆိုရင်တော့ ပြည်ထောင်စုတပ်မတော်ဆိုတာ ဖြစ်လာဖို့ကိစ္စမလွယ်ကူဘူး။ မဖြစ်နိုင်ဘူး။ အကယ်၍ ဖက်ဒရယ်တပ်မတော်ဖြစ်မလာရင် ပြီးတော့တစ်ဖက်ကလည်း အချင်းချင်းအလျှော့အတင်းတွေလုပ်ပြီး ဆွေးနွေးကြ၊ အ၀င်အထွက်တွေလုပ်ပြီးတော့ အဆင်မပြေကြဘူးဆိုတော့ စစ်ပွဲတွေ ဆက်ဖြစ်နေဖို့ပဲရှိတယ်။

မေး- RCSS ကရော ပြည်ထောင်စုတပ်မတော်နဲ့ပတ်သက်လို့ ပြင်ဆင်ထားတာ
ရှိပါသလား။

ဖြေ- ဖက်ဒရယ်စနစ် ဖွဲ့စည်းပုံအရ ဒီပြည်ထောင်စုတပ်မတော်ရဲ့မူဘောင်ပေါ်မှာ RCSS ဘက်ရဲ့ သဘောထားကိုပဲ ယူလို့မရဘူး။ တပ်မတော်ရဲ့သဘောထားကိုပဲ ယူလို့မရဘူး။ အားလုံးဝိုင်းပြီးတော့ တပ်မတော်ဘက်၊ တိုင်းရင်းသားတွေဘက် အားလုံးဝိုင်းဝန်းဆွေးနွေးပြီး ၀ိုင်းဝန်းလုပ်ဆောင်မှရမယ်။ ထိုင်ပြီးဆွေးနွေးဖို့ လိုအပ်ပါတယ်။ RCSS ရဲ့ သဘောထားကိုပဲ ပြောမယ်ဆိုရင်လည်း တပ်မတော်က လက်ခံမှာမဟုတ်ဘူး။ တပ်မတော်ကချထားတဲ့ သဘောထားကိုလည်း RCSS က လက်ခံနိုင်မှာမဟုတ်ဘူး။ ညှိယူဖို့လိုပါတယ်။ စည်းလုံးမှုပေါ့။ နှစ်ဦးနှစ်ဖက်က အတူတူလက်တွဲလျှောက်ဖုိ့လိုပါတယ်။ တစ်ဖက်သက်လျှောက်လို့မရပါဘူး။ နှစ်ဖက်အတူတူလာကြမှရမှာ။ အကယ်၍ တစ်ဖက်က တအားကြီးတင်းမာပြီးတော့ လုပ်နေရင်လည်းမရဘူး။ အကယ်၍ နှစ်ဦးနှစ်ဖက်က တအားကြီးတင်းမာနေရင်တော့ အပစ်အခတ်တွေက ထပ်ပြီးတော့ဖြစ်လာဦးမှာပဲ။

မေး- ဟိုတစ်လောက ရှမ်းပြည်ပေါင်းစည်းညီညွတ်ရေးကော်မတီ ဖွဲ့တယ်ဆိုပြီး ကြားသိရပါတယ်။ SSPP/SSA ပေါ့လေ။ မြောက်ပိုင်းရှမ်းပြည်တပ်မတော်ဆိုရင် SNLD ကို နိုင်ငံရေးဦးဆောင်မှုကဏ္ဍမှာ ထားတယ်။ အဲဒီတော့ RCSS အနေနဲ့ရော နောက်ပိုင်းမှာ ဘယ်လိုအစီအစဉ်တွေနဲ့ ဆက်သွားဖို့ရှိလဲခင်ဗျ။

ဖြေ- ဖွဲ့စည်းထားတဲ့ ရှမ်းပြည်ရဲ့ UNSSC (ရှမ်းပြည်ညီညွတ်ရေးကော်မတီ)က ရှမ်းပြည်ရဲ့ကိုယ်စားပြုပြီးတော့ နိုင်ငံရေးဆွေးနွေးဖို့ ရည်ရွယ်ပါတယ်။

မေး- ပြီးခဲ့တဲ့ ၂ နှစ်လုံးလုံး UNODC ရဲ့ စစ်တမ်းတွေအရ အစိုးရနဲ့အပစ်ရပ်ထားတဲ့ တိုင်းရင်းသားလက်နက်ကိုင်တွေရဲ့ ဒေသတွေမှာ ဘိန်းနဲ့မူးယစ်ဆေးဝါး စိုက်ပျိုးထုတ်လုပ်မှုက ပိုများလာတယ်လို့ ပြောထားတယ်။ ရှမ်းပြည်နယ်မှာဆိုလည်း မြန်မာနိုင်ငံရဲ့ ဘိန်းစိုက်ပျိုးမှုအားလုံးရဲ့ ၉၀ ရာခိုင်နှုန်းရှိတယ်ဆိုတော့ ဘယ်လိုကြောင့် များလာလဲဆိုတာ သိချင်ပါတယ်ခင်ဗျ။

ဖြေ- ဒီမူးယစ်ဆေးဝါးနဲ့ ပတ်သက်တာကတော့ နိုင်ငံတော်သမ္မတက ပြည်သူလူထုရဲ့တိုးတက်မှုတွေ၊ ဖွံ့ဖြိုးမှုတွေ ဘာမှမလုပ်ပေးဘူး။ နိုင်ငံတော်သမ္မတက ပြည်သူလူထုရဲ့ တိုးတက်မှုတွေကို ဘာမှလုပ်မပေးဘူးဆိုရင်တော့ ပြည်သူလူထုက အရာရာတိုင်းကို စိုက်ပျိုးလာတာပါပဲ။ နိုင်ငံတော်သမ္မတအနေနဲ့ တပ်မတော်အနေနဲ့က ဒီမူးယစ်ဆေးဝါးတွေကို နှိမ်နင်းတယ်ဆိုပြီး ပြည်သူလူထုရဲ့ ဘိန်းစိုက်ခင်းတွေကို လိုက်ဖျက်ဆီးတယ်ဆိုတာ နည်းလမ်းမမှန်ပါဘူး။ ဥပမာအနေနဲ့ပေါ့၊ လူထုအနေနဲ့က ကိုယ်စားခါနီးထမင်းပန်းကန်ကို အဝေးကို လွှင့်ပစ်ခံလိုက်ရသလို ဖြစ်နေတယ်။ ကိုယ်စားနေတဲ့ထမင်းကို ကောက်ညှင်းနဲ့ လာလဲပေးရင်ကမှ စားနေရသေးတယ်။ အခု ပြည်သူလူထု ဘိန်းစိုက်နေရတဲ့ကိစ္စကလည်း အဲဒီလိုပါပဲ။ RCSS အနေနဲ့က ဘိန်းခင်းတွေကို တိုက်ဖျက်ဖို့ မှန်ကန်တဲ့လမ်းစဉ်မူဝါဒတွေ ရှိပါတယ်။ နိုင်ငံတော်သမ္မတနဲ့ လက်တွဲပြီးတော့ လုပ်ချင်ပါတယ်။ ဒါပေမဲ့ စစ်တပ်ဘက်က RCSS နဲ့ ပူးပေါင်းဖို့ လက်မခံဘူး။ ဘာကြောင့် ပူးပေါင်းဖို့လက်မခံတာလဲဆိုတာ သဘောမပေါက်ဘူး။ အပစ်အခတ်ရပ်စဲထားပေမယ့် သဘောထားတွေက မတိုက်ဆိုင်ကြဘူး။

မေး- စစ်ဘေးရှောင်ဒုက္ခသည်တွေကို နေရပ်ပြန်ပို့ဖို့ကိစ္စကရော ဘယ်အခြေအနေရှိပြီလဲခင်ဗျ။ ပြီးခဲ့တဲ့ဇွန်လက ဥက္ကဋ္ဌကြီးရဲ့ ရန်ကုန်ခရီးစဉ်မှာတော့ ၁၉၉၆ ခုနှစ်က တပ်မတော်ရဲ့ ဖြတ်(၄)ဖြတ်မူကြောင့် ထိုင်းနိုင်ငံဘက် တိမ်းရှောင်ထွက်ပြေးခဲ့ရတဲ့ စစ်ဘေးရှောင်ဒုက္ခသည်တွေကို နေရပ်ပြန်နိုင်ရေး ပူးပေါင်းကြိုးပမ်းမယ်ဆိုပြီး ဦးခွန်ထွန်းဦးနဲ့ ပူးတွဲကြေညာချက်ထုတ်တာ တွေ့ရပါတယ်။ အခု သူတို့ နေရပ်ပြန်နိုင်ရေး၊ ပြန်လည်နေရာချထားရေး ဘာတွေစတင်လုပ်ပေးနေပြီလဲခင်ဗျ။

ဖြေ- ပြည်သူတွေကတော့ နေရပ်ပြန်ချင်တဲ့ဆန္ဒကတော့ အမြဲရှိနေတာပေါ့။ ဒါပေမဲ့ သူတို့က နယ်မြေတည်ငြိမ်မှု၊ လုံခြုံမှုပေါ်မှာ အပူအပင်တွေရှိနေသေးတယ်။ အဲဒါကြောင့် မပြန်ရဲကြသေးတာ။ ထိုင်းဘက်မှာလည်း မြန်မာပြည်က စစ်ဘေးဒုက္ခသည်တွေ အများကြီးရှိနေသေးတယ်။ အကယ်၍ စစ်ပွဲတွေထပ်ဖြစ်နေဦးမယ်ဆိုရင်တော့ ပြည်သူတွေ လုံခြုံမှုမရှိသေးဘူး။ တိုက်ပွဲတွေထပ်ဖြစ်နေဦးမယ်၊ စစ်ကူတွေ တောင်းနေဦးမယ်ဆိုရင်တော့ ပြည်သူလူထုက ပြန်ရဲကြမှာမဟုတ်ဘူး။

မေး- ၂၀၁၂ ခုနှစ်က RCSS ဖွဲ့စည်းထားတဲ့ ရှမ်းတောင်တန်းချယ်ရီကုမ္ပဏီကရော စီးပွားရေးလုပ်ငန်းတွေ စလုပ်နေပြီလားခင်ဗျ။

ဖြေ- လုပ်ငန်းတွေ လျှောက်ထားတာတွေကတော့ အများကြီးပဲ။ အကောင်ထည်ဖော်တာ ဘာမှမဖော်နိုင်သေးဘူး။ သတ္တုတွင်းလုပ်ငန်းတွေလုပ်ဖို့ လျှောက်လွှာတွေ တင်ထားတယ်။ အစိုးရဘက်က ခွင့်ပြုချက်ကျလာပေမယ့် တပ်မတော်ဘက်က နယ်မြေထဲဝင်ဖို့ ခွင့်မပေးဘူး။ အဲဒါတွေကြောင့် ကြန့်ကြာနေတယ်။ သမ္မတဘက်ကတော့ နေပြည်တော်ကနေလည်း ခွင့်ပြုပေးတယ်။ ရှမ်းပြည်နယ်အစိုးရဘက်ကလည်း ခွင့်ပြုစာရတယ်။ စစ်တပ်ဘက်ကမရတော့ ၀င်လို့မရဘူး။ သတ္တုပိုင်းတွေ၊ စီးပွားရေးပိုင်းတွေ လုပ်မယ်ဆိုရင် လက်နက်ချမှ လုပ်ခွင့်ပေးမယ်ဆိုပြီး မိုင်းတုံရဲ့ဗျူဟာမှူးအောက်ကနေ သတင်းရတာပေါ့။ တာချီလိတ်ဘက်မှာလည်း စိုက်ပျိုးရေးလုပ်ဖို့ ဧက ၂၅၀၀၀ တောင်းထားတယ်။ အစိုးရနဲ့ ရှမ်းပြည်အစိုးရရဲ့ ခွင့်ပြုစာရတယ်။ ဒီဘက်ကတော့ ခွင့်ပြုချက်မရဘူး။ စီးပွားရေးနဲ့ပတ်သက်လို့ ဘာမှလုပ်ခွင့်မရသေးဘူး။ အဲဒီတော့ ပြဿနာက တပ်မတော်ဘက်ကနေ လာလာပြီးတော့ ခံနေတယ်။ တပ်မတော်က ကြားလာခံနေပြီး မပြီးနိုင်ဘူးဖြစ်နေတယ်။ အဲဒါကြောင့် တပ်မတော်က အပစ်အခတ်မရပ်စဲချင်ဘူးလားလို့တောင် တွေးမိတယ်။ အပစ်ရပ်တာ သမ္မတဦးသိန်းစိန်ကရပ်ချင်ပြီး တပ်မတော်ဘက်က မရပ်ချင်ဘူးလားလို့တောင် ထင်မိတယ်။

မေး- တပ်မတော်နဲ့ တိုင်းရင်းသားအဖွဲ့တွေကြားမှာ ယုံကြည်မှုလျော့နည်းနေတာနဲ့ပတ်သက်ပြီး ဘယ်လိုဖြေရှင်းရင်ရနိုင်မယ်လို့ အကြံပေးချင်လဲခင်ဗျ။

ဖြေ- ဒီပြဿနာကို ဖြေရှင်းဖို့ဆိုတာ ထပ်ကာထပ်ကာ ဆွေးနွေးဖို့လိုပါတယ်။ အ၀င်အထွက်တွေလုပ်ဖို့ ဆက်ဆံကြဖို့ လိုအပ်ပါတယ်။ ပုဂ္ဂိုလ်ခင်မှတရားမင်မယ်ဆိုတဲ့ စကားပုံလိုပေါ့။ အယုံအကြည်နဲ့လာမှာပေါ့။ အယုံအကြည်မရှိရင် ညီညွတ်မှုဘယ်ရမလဲ။ ညီညွတ်မှုမရှိရင် ပေါင်းစည်းမှုဘယ်ရမလဲ။

မေး- ငြိမ်းချမ်းရေးလုပ်ငန်းစဉ်တွေမှာ ဒေါ်အောင်ဆန်းစုကြည်ကို ပါစေချင်သလား။ ပါဝင်လာရင်ရော ငြိမ်းချမ်းရေးလုပ်ငန်းစဉ်တွေအပေါ် အကျိုးသက်ရောက်မှုရှိနိုင်မယ်လို့ ထင်ပါသလား။

ဖြေ- ပြည်ထောင်စုမြန်မာနိုင်ငံရဲ့ကိစ္စမှာ အရပ်ဘက်က အဖွဲ့အစည်းခေါင်းဆောင်တွေ ပါဝင်သင့်ပါတယ်။ ဒေါ်အောင်ဆန်းစုကြည်ကို ချန်လှပ်ထားလို့လည်း မရပါဘူး။ သူက မြန်မာနိုင်ငံကို ဒီမိုကရေစီသယ်ဆောင်လာတဲ့ ခေါင်းဆောင်ကောင်းဖြစ်ပါတယ်။

မေး- ပြည်တွင်းမှာ တိုက်ပွဲတွေကြောင့် ဒေသခံတိုင်းရင်းသားလူမျိုးတွေက နေရပ်စွန့်ခွာထွက်ပြေးပြီး စစ်ဘေးရှောင်ဒုက္ခသည်စခန်းတွေနဲ့ နယ်စပ်တွေမှာ နေထိုင်နေကြရပါတယ်။ အဲဒီအချိန်မှာ အိမ်နီးချင်းနိုင်ငံက အထူးသဖြင့် လူဦးရေများပြားတဲ့ တရုတ်နိုင်ငံလို နိုင်ငံခြားသားတွေက ပြည်တွင်းကို ၀င်လာကြတယ်။ အဲဒီတော့ ရှမ်းပြည်နယ်မှာ နိုင်ငံခြားသားစိမ့်ဝင်မှုက စိုးရိမ်ရတဲ့အနေအထားဖြစ်နေပြီလားခင်ဗျ။

ဖြေ- RCSS ထိန်းချုပ်ဒေသမှာတော့ နိုင်ငံခြားသားဝင်ရောက်မှုကို တားမြစ်ပိတ်ပင်ထားပါတယ်။ ဒါပေမဲ့ စိုးရိမ်ရတဲ့အခြေအနေဖြစ်ပါတယ်။ တရုတ်နိုင်ငံသားတွေက မြန်မာနိုင်ငံထဲကို ၀င်လာပြီးတော့ မြန်မာနိုင်ငံသားကတ်တွေ ကိုင်ဆောင်ထားတယ်။ ပြီးတော့ ပြည်နယ်ထဲက မြေတွေဝယ်ပြီး ကိုယ်ပိုင်မြေအဖြစ် ပြောင်းလဲလုပ်ကိုင်ကြတယ်။ အဲဒါတွေကို စစ်ဆေးဖို့ကတော့ နိုင်ငံတော်ဘက်က တာဝန်ဖြစ်ပါတယ်။ ရှမ်းပြည်နယ်ထဲမှာဆိုရင် ကျိုင်းတုံဘက်တွေ၊ မူဆယ်၊ နမ့်ခမ်းဘက်တွေမှာဆိုရင် တရုတ်နိုင်ငံသားတွေဝင်လာပြီး မြေတွေဝယ်ထားတာတွေ အများကြီးရှိတယ်။

မေး- လက်ရှိရှမ်းပြည်နယ်ဟာ နိုင်ငံရေးအရဆိုရင်လည်း လက်နက်ကိုင်တွေအများကြီးနဲ့ ရှုပ်ထွေးနေတယ်။ စီးပွားရေးမှာလည်း ဒေသခံတွေက စားဝတ်နေရေးမပြေလည်လို့ ဘိန်းစိုက်ပျိုးနေရတာတွေ ရှိတယ်။ ပညာရေးမှာဆိုလည်း မြန်မာနိုင်ငံရဲ့ စာတတ်မြောက်မှုအနည်းဆုံး ပြည်နယ်တွေထဲမှာ ပါဝင်နေတယ်။ နိုင်ငံခြားသားစိမ့်ဝင်မှုလို လူမှုရေးပြဿနာတွေကလည်း ရှိနေတယ်။ အဲဒီလိုအခြေအနေမှာ ရှမ်းပြည်နယ်အတွက် ဘယ်ကဏ္ဍကို အရင်ဦးစားပေးဖြေရှင်းဖို့လိုမယ်လို့ ထင်သလဲခင်ဗျ။

ဖြေ- အဓိကကျတဲ့အချက်က ငြိမ်းချမ်းရေးပဲ။ ငြိမ်းချမ်းမှုမရှိဘူးဆိုရင်တော့ ဘာမှလုပ်လို့မရဘူး။ ရှမ်းပြည်နယ်တိုးတက်မှု ကျဆင်းနေရတာလည်း တပ်မတော်ရဲ့အုပ်ချုပ်မှုအောက် အကြာကြီးနေရတာနဲ့ ပြည်တွင်းစစ်ကြောင့်ပါ။ ပြည်တွင်းစစ်တွေကြောင့် ရှမ်းပြည်နယ်မှာ တိုးတက်မှုက ဘာမှမရှိခဲ့ဘူး။ တိုက်ပွဲတွေဖြစ်၊ ပစ်ကြခတ်ကြဆိုတော့ ပြေးကြရှောင်ကြပဲရှိနေတော့ တိုးတက်မှုဆိုတာ ဘယ်မှာရှာလို့ရပါ့မလဲ။

အခုလိုဖြေကြားပေးတာ ကျေးဇူးတင်ပါတယ်။

Credit To 7Day News Journal 
Read More »

၂၀၁၅ အလွန် အကျပ်အတည်းများ Written by ပိုက်တင်

တကယ်တော့ ၂၀၁၅ အလွန်မှာ ကြုံတွေ့နိုင်တဲ့ သန်း ၆၀ ရဲ့ အကျပ်အတည်းဟာ အဲဒီအချိန်ကျမှ ရုတ်တရက် ပေါ်လာနိုင်တဲ့ ပြဿနာများ မဟုတ်ဘဲ ပြီးခဲ့တဲ့ နှစ်ပေါင်းခြောက်ဆယ် မြန်မာနိုင်ငံရေး သမိုင်းမှာ လုံးဝ အခြေခံပါတယ်။ပါလီမန်ခေတ် မြန်မာ့နိုင်ငံရေး ပြဿနာများနဲ့ အထူးသဖြင့် နှစ် ၅၀ အမှောင်ခေတ်ရဲ့ ဆိုးကျိုးများကြောင့် ဒီမိုကရေစီသို့ အကူးအပြောင်းမှာ ရင်ဆိုင်ဖြေရှင်းရမယ့် အခက်အခဲများသာ ဖြစ်ပါတယ်။ တပ်မတော်ရဲ့ အခန်းကဏ္ဍဟာ အဲဒီ အကျပ်အတည်းများကို ပြေလည်အောင် ဖြေရှင်းဖို့နဲ့ ဒီမိုကရက်တိုက်ဇေးရှင်း ဆက်လက် တည်တံ့နိုင်ဖို့ အတွက် လွန်စွာ အရေးပါနေတာ တွေ့ရပါတယ်။
လစ်ဘရယ်လိုက်ဇေးရှင်း ကာလလို့ ပြောနိုင်တဲ့ အခုရွေးကောက်ခံ အစိုးရသစ် ပထမငါးနှစ် သက်တမ်းဟာ ပြဿနာတွေ၊ စိန်ခေါ်မှုတွေ များစွာ ကြုံတွေ့နေရသော်ငြား ၂၀၁၅ အလွန် ဒုတိယမြောက် အစိုးရသစ်ကို နိုင်ငံသစ် တည်ဆောက်ရေး လက်ဆင့်ကမ်း ပေးနိုင်ဖို့က တော်တော်ကြီး သေချာနေပြီလို့ ဆိုနိုင်ပါတယ်။ လက်ရှိအစိုးရက လမ်းကြောင်း ပြောင်းသွားနိုင်လောက်တဲ့ စိန်ခေါ်မှုတွေကို ကျော်လွှား နိုင်ခဲ့ပါတယ်။ ကျန်သေးတဲ့ ၂ နှစ်ကာလမှာ နောက်ထပ် အခက်အခဲတွေ ပေါ်လာဖို့ ရှိနေသေးပေမယ့် ရွေးကောက်ပွဲ နီးလာတာ နဲ့အမျှ အားလုံးရဲ့ အာရုံစိုက်မှုနဲ့ မျှော်လင့်ချက်များဟာ ၂၀၁၅ ဆီကိုပဲ ရောက်သွားတော့မှာ ဖြစ်တာကြောင့် အခုကြုံတွေ့ပြီး ရသလောက် ခက်ခက်ခဲခဲ ဖြေရှင်းဖို့ လိုမယ် မဟုတ်တော့ပါဘူး။
ဒီတော့ အပြောင်းအလဲကို စတင်ခဲ့တဲ့ ပထမဆုံးသော အစိုးရ သက်တမ်းဟာ ချောချောမွေ့မွေ့နဲ့ အဆုံးသတ် နိုင်တော့မယ်လို့ ယေဘုယျ ကောက်ချက်ကို ဆွဲနိုင်ပါတယ်။
ဒါပေမဲ့ ဒုတိယမြောက် တာဝန်ယူရမယ့် အစိုးရနဲ့ လွှတ်တော်များ အတွက်ကတော့ အခုပထမ ငါးနှစ်ကာလထက် ပိုမိုကြမ်းတမ်း ခက်ခဲမှာ ဖြစ်ပါတယ်။ အဲဒီအခြေအနေကို ကြိုတင်တားဆီးဖို့ မဖြစ်နိုင်သလောက် ရှိသလို ကြိုတင် တွက်ဆပြီး အဖြေရှာထား လို့လည်း မရနိုင်တာကြောင့် နိုင်ငံတော်နဲ့ လူထုအတွက် ၂၀၁၅ အလွန်ကာလဟာ များစွာ အရေးကြီးပါကြောင်း အထူးတလည် ဖော်ပြလိုရင်း ဖြစ်ပါတယ်။
ဒုတိယမြောက် အစိုးရ သက်တမ်းမှာ စိန်ခေါ်မှုတွေ ပိုကြီးမားဖို့နဲ့ ပြဿနာတွေလည်း ပိုဖြေရှင်းရ ခက်ခဲဖို့အတွက် အဓိက အကြောင်းရင်းကြီး နှစ်ခု ရှိပါတယ်။
(၁) NLD နဲ့ တိုင်းရင်းသားပါတီများ (အပြတ်အသတ်) landslide အနိုင်ရရှိနိုင်ခြင်း
(၂) ၂၀၁၅ အပေါ် လူထုမျှော်လင့်ချက်များ အလွန်ကြီးမားခြင်းတို့ ဖြစ်ပါတယ်။
လူထုဟာ လက်ရှိ အချိန်အထိ အပြောင်းအလဲရဲ့အသီးအပွင့်ကို ထိထိရောက်ရောက် ခံစားနိုင်ခြင်း မရှိသေးပါဘူး။ လွတ်လပ်ခွင့် တချို့နဲ့ နိုင်ငံရဲ့ စီးပွားရေး ဖွံ့ဖြိုးတိုးတက်မှု အနည်းငယ် ရရှိခဲ့ပေမယ့် အထူးသဖြင့် အခြေခံ လူတန်းစားတွေ အတွက် အသက်ရှူ ချောင်လောက်တဲ့ အနေအထားကို မရောက်သေးပါဘူး။ နောက်တစ်ခုက မူပြောင်း လူမပြောင်း အခြေအနေကို မျှော်လင့်ချက် ရှိလာတာက တစ်ကြောင်း၊ လက်ရှိသမ္မတရဲ့ ရိုးသား ကြိုးစားမှုကို လက်ခံအသိအမှတ် ပြုတာက တစ်ကြောင်းကြောင့်သာ စိတ်ရှည်လက်ရှည်နဲ့ စောင့်နေကြတာ ဖြစ်ပြီး ၂၀၁၅ မှာ အတိုက်အခံ တို့ကို ပုံအောဖို့လည်း ပြင်ဆင်ထားကြတာ ဖြစ်ပါတယ်။ တစ်နည်းအားဖြင့် မူပြောင်းတဲ့အပြင် လူပါပြောင်းဖို့ ရည်မှန်းထားကြတာ ဖြစ်ပါတယ်။ ဒီတော့ အတိုက်အခံ ပါတီကြီးနဲ့ တိုင်းရင်းသား ပါတီများဟာ သေချာပေါက် အနိုင်ရကြမှာ ဖြစ်ပြီး လူထုကလည်း အဲဒီ အတိုက်အခံတို့အပေါ် မျှော်လင့်ချက် အလွန်အကျွံ ထားနေကြတာကြောင့် ၂၀၁၅ အလွန်မှာ နိုင်ငံရေး၊ စီးပွားရေး ပြဿနာများကို ကြီးကြီး မားမား ရင်ဆိုင် ကြုံတွေ့ကြရဖို့က သေချာသလောက် ရှိနေပါတယ်။
(လုံးဝ အပြတ်အသတ် အနိုင်မယူသင့်ဘူးလို့ အခြေအနေ တစ်ရပ်မှာ ဆရာအောင်ထွဋ် ပြောခဲ့ဖူးတာကို ဒီနေရာမှာ အမှတ်ရမိပါတယ်။)
၂၀၁၅ အလွန်မှာ ဘယ်ပါတီကပဲ အစိုးရ ဖွဲ့သည်ဖြစ်စေ၊ အဲဒီအစိုးရဟာ လူထုရဲ့ မျှော်လင့်ချက်တွေကို အပြည့်အဝ ဖြည့်ဆည်း ပေးနိုင်ဖို့ အခြေအနေတွေက အခုချိန်ထိ မရရှိသေးပါဘူး။ NLD ဟာ သေချာပေါက် လွှတ်တော်များကို အတိုင်းအတာ ကြီးကြီးမားမား လွှမ်းနိုင်မှာ ဖြစ်ပြီး အစိုးရ ဖွဲ့ခွင့်လည်း ရဖို့ ရှိနေပါတယ်။ ဒေါ်စုသာ လွှတ်တော် အကြီးအကဲ၊ ဒါမှမဟုတ် အစိုးရ အကြီးအကဲ ဖြစ်လာခဲ့ရင် သေချာပေါက် အကျပ်အတည်းများကို ကြီးကြီးမားမား ရင်ဆိုင်ရမှာပါ။
(လွှတ်တော် အကြီးအကဲ ဖြစ်နိုင်ခြေက များနေပါတယ်။ အခြားသော အတိုက်အခံ နိုင်ငံရေးသမား တစ်ယောက်ကလည်း သမ္မတ ဖြစ်လာနိုင်ခြေ ရှိပါတယ်။ ၅၉ (စ) ကြောင့်ပါ။)
(၁) လူထုရဲ့ လွတ်လပ်ခွင့်နဲ့ လူမှုဘဝ မြင့်မားလိုမှု မျှော်လင့်ချက်များ
(၂) တိုင်းရင်းသားတို့ရဲ့ တန်းတူညီမျှရေး အပါအဝင် ဖွံ့ဖြိုး တိုးတက်ရေးဆိုင်ရာ မျှော်လင့်ချက်များဟာ ဒေါ်စု ခေါင်းပေါ်ကျမယ့် ဝန်ထုပ်ဝန်ပိုးများ ဖြစ်လာပါလိမ့်မယ်။
အတိုက်အခံ ခေါင်းဆောင်ဆီကနေ လိုလားချက်တွေ လိုအပ်ချက်တွေကို သေချာပေါက်ရမယ်လို့ လိုတာထက် ပိုပြီး မျှော်လင့်နေကြပါတယ်။ ဒေါ်စုအနေနဲ့က အဲဒီမျှော်လင့်ချက်တွေကို ငြင်းဆိုဖို့ ခက်ခဲမှာ ဖြစ်သလို အပြည့်အဝ ရရှိအောင် ဖြည့်ဆည်း ပေးနိုင်ဖို့ကလည်း လွယ်ကူလှမယ် မဟုတ်ပါဘူး။
တိုင်းပြည်ကို ဦးဆောင်ဦးရွက် ပြုပြီး ဒီမိုကရေစီ ပီပြင်အောင်နဲ့ စီးပွားရေးအရ လူတန်းစေ့အောင် ဒုတိယမြောက် သက်တမ်း ငါးနှစ်အတွင်း ဖြည့်ဆည်းပေးဖို့၊ အကောင်အထည် ဖော်ပေးဖို့ဆိုရင် ဒေါ်စု တစ်ယောက်တည်းနဲ့ ဘယ်လိုမှ မဖြစ်နိုင်ပါဘူး။ နိုင်ငံတော်ကို စီမံခန့်ခွဲတဲ့ အလုပ်ဟာ Team Work ဖြစ်တယ်ဆိုတာ အထူးပြောဖို့ လိုမယ်မထင်ပါဘူး။ ဒေါ်စုမှာ Team ကောင်းကောင်းတစ်ခု လိုအပ်နေပါတယ်။ လောလောဆယ် မှာလည်း ၂ နှစ်အတွင်း ဖြည့်ဆည်းထားဖို့ ဘယ်လိုမှ မဖြစ်နိုင်တာ တွေ့ရပါတယ်။ နိုင်ငံတော်ကို ထိပ်ဆုံးကနေ အောက်ခြေအထိ တာဝန်ယူခွင့် ရတဲ့အခါ ဒေါ်စုလည်း ခက်ခဲနိုင်တာ ဖြစ်သလို လူထုလည်း ကျပ်တည်းနိုင်ပါတယ်။
အခု စီမံခန့်ခွဲမှု ညံ့ဖျင်းလို့ လက်ရှိ အစိုးရရဲ့ Team က မကောင်းလို့ တိုင်းပြည် ကြုံတွေ့နေရတဲ့ ပြဿနာနဲ့ ၂၀၁၅ အလွန်မှာ ပေါ်ပေါက်လာမယ့် အခက်အခဲတွေက လုံးဝခြားနားမှာ ဖြစ်ပါတယ်။ လူထုရဲ့ မျှော်လင့်ချက်များ မတူညီခြင်းကြောင့် ဖြစ်ပါတယ်။ ဒီမိုကရေစီကိုလည်း ဒေါ်စုက စံနှုန်းပြည့်သာ စဉ်းစားတာ ဖြစ်လေတော့ ၂၀၁၅ အလွန်မှာ အထူးသဖြင့် တိုင်းရင်းသားတို့က ဒေါ်စုဆီကနေ စံနှုန်းပြည့် ဒီမိုကရေစီကို သေချာပေါက် တောင်းဆိုကြမှာ ဖြစ်ပါတယ်။ အသိပညာရေချိန် ပြဿနာ၊ နှစ်ပေါင်း ၆၀ က ပျက်စီး ယိုယွင်းလာတဲ့ စီးပွားရေး၊ လူမှုရေး အခြေအနေများ၊ ဖွံ့ဖြိုး တိုးတက်ရေးကို ချက်ချင်း တွန်းတင်လို့ မရနိုင်တဲ့ အခြေအနေ စတာတွေက ၂၀၁၅ အလွန်မှာ တာဝန်ယူမယ့် အစိုးရနဲ့ လွှတ်တော်တို့ကို ဘေးကျပ်နံကျပ် ဖြစ်စေမှာ ဖြစ်ပါတယ်။
တစ်ဖက်မှာ တပ်မတော်နဲ့ အတိုက်အခံတို့ ရင်ကြားစေ့ရေး တည်ဆောက်နေတဲ့ ကိစ္စကလည်း ခရီးမရောက် နိုင်သေးလေတော့ တပ်မတော်နဲ့ လုံးလုံးပတ်သက်မှု မရှိတဲ့ ပါတီကဖွဲ့မယ့် အစိုးရသစ်နဲ့ တပ်အကြား ဆက်ဆံရေးဟာ တော်တော် သတိထားရမယ့် အနေအထားကို ရောက်လာတော့မှာ ဖြစ်ပါတယ်။ နောက်အစိုးရသစ် အနေနဲ့ နိုင်ငံရေး၊ စီးပွားရေးဆိုင်ရာ စိန်ခေါ်မှုတွေကို အခုလက်ရှိ အစိုးရထက်ပိုပြီး ခဲရာခဲဆစ် ရင်ဆိုင် ဖြေရှင်းရမှာလည်း ဖြစ်ပါတယ်။
ပါလီမန်စနစ် မဟုတ်လေတော့ ညွန့်ပေါင်း အစိုးရဖွဲ့ဖို့ဆိုတာ ဥပဒေအရ မဖြစ်နိုင်ပါဘူး။ သမ္မတ ဖြစ်သူက ကက်ဘိနက် ဖွဲ့ရမှာပါ။ ကက်ဘိနက်ကို တခြားပါတီများက ပုဂ္ဂိုလ်များ ခန့်အပ်ဖွဲ့စည်းလို့ ရပါတယ်။ ဒါပေမဲ့ ဒါ ညွန့်ပေါင်းအစိုးရ မဟုတ်ပါ။ ပါလီမန်စနစ် မဟုတ်တာကြောင့် ဖြစ်ပါတယ်။ သမ္မတနဲ့ ဒုသမ္မတ တွေဟာလည်း မတူညီတဲ့ ပါတီများနဲ့ တပ်မတော်က အမည်စာရင်းတင်တဲ့ ပုဂ္ဂိုလ်တို့ ဖြစ်လာဖို့ ရှိပြီး ဒါလည်းညွန့်ပေါင်း မဟုတ်ဘဲ အခြေခံဥပဒေ အရသာ ဖြစ်ပါတယ်။
၂၀၁၅ အလွန်မှာ အတိုက်အခံတို့က (၅၉ (စ) ကို မပြင်ဆင်နိုင်ဘဲ) အနိုင်ရတဲ့အခါ သမ္မတလောင်းအဖြစ် လက်ရှိ သမ္မတကို အနိုင်ရ အတိုက်အခံပါတီက တင်သွင်း အဆိုပြုလုပ်ဖို့များ ပြောခဲ့ရင်..."
၂၀၁၅ အလွန် အကျပ်အတည်းများ လျော့ပါးသင့်သလောက် လျော့ပါးဖို့ အတွက် လောလောဆယ် လုပ်သင့်တဲ့ အချက်တွေ ရှိပါတယ်။ ပြောရရင် ၂၀၁၅ မတိုင်ခင်မှာ များများစားစား မျှော်လင့်လို့ မရနိုင်တဲ့ အခြေခံဥပဒေ ပြင်ဆင်ရေး ထက်တောင်မှ အရေးပါတဲ့ အချက်ဖြစ်ပါတယ်။ အတိုက်အခံတို့ အနေနဲ့ ဒီအချက်တွေကို စိတ်ဝင်စားဖို့ သိပ်များများ မမျှော်လင့်ပေမယ့် ဖော်ပြသင့်လို့ ဖော်ပြလိုက်ပါတယ်။
(၁) ဒေါ်စုအနေနဲ့ အနည်းဆုံး အသင့်အနေနဲ့ လွှတ်တော်များကို လွှမ်းမိုးနိုင်တော့မယ့် အများဆုံး အစိုးရ ဖွဲ့နိုင်တော့မယ့် ပါတီရဲ့ ခေါင်းဆောင် တစ်ယောက်အနေနဲ့ ရွေးကောက်ပွဲ မတိုင်ခင် ၂ နှစ်တာ ကာလမှာ ပြည်တွင်းက နိုင်ငံရေး ကိစ္စများနဲ့ စီးပွားဖွံ့ဖြိုး တိုးတက်ရေး ကိစ္စများကို နိုင်ငံတကာမှာ သွားရောက် လုပ်ကိုင်နေတဲ့ ကိစ္စများထက် အများကြီး ပိုပြီးအလေးအနက် ထားသင့် အာရုံစိုက်သင့်တဲ့ အချိန်ကို ရောက်နေပြီ ဖြစ်ပါတယ်။ ၂၀၁၅ အလွန်မှာ သေချာပေါက် အနိုင်ရမယ့် ပါတီဟာ အခြေအနေ အရပ်ရပ်ကို အကောင်းဆုံး အနေအထားရနေဖို့ လုပ်နိုင်သလောက် အစွမ်းကုန် ဆောင်ရွက်ထား သင့်ပါတယ်။
(၂) အပစ်အခတ် ရပ်စဲရေးနဲ့ ငြိမ်းချမ်းရေး ကိစ္စများဟာလည်း ၂၀၁၅ အလွန်ကာလအတွက် အထူးအရေးပါ တဲ့အတွက် စစ်မှန်တဲ့ သဘောဆန္ဒနဲ့ နိုင်ငံရေး နယ်ပယ်မှာ ကျင်လည်နေကြသူ အားလုံးက အခုထက် အားသွန်ခွန်စိုက် ပါဝင်ကြိုးပမ်းမယ် ဆိုရင် ၂၀၁၅ အလွန်မှာ နိုင်ငံ တည်ဆောက်ရေး လမ်းကြောင်းက ချော်ထွက်မသွားဖို့ အများကြီး အထောက်အကူ ရစေမှာ ဖြစ်ပါတယ်။
(၃) အပစ်အခတ် ရပ်စဲရေး လက်မှတ်ရေးထိုးရန် ကိစ္စကို အခြေခံပြီး အားလုံးပါဝင်တဲ့ နိုင်ငံရေး ဆွေးနွေးပွဲ တစ်ခုကို ကျင်းပနိုင်ဖို့ အားလုံးက ကြိုးပမ်းသင့်ပါတယ်။ အဲဒီ နိုင်ငံရေး ဆွေးနွေးပွဲမှာ အခြေခံဥပဒေ ပြင်ဆင်ရေးကိစ္စ ပါဝင်ရမှာ ဖြစ်ပေမယ့် အဓိက ဖြစ်သင့်တာက ၂၀၁၅ အလွန် နိုင်ငံတော် တည်ငြိမ်ရေး ဖြစ်ပါတယ်။ အစိုးရ ဖွဲ့စည်းရေးကို လက်ရှိ အာဏာရပါတီ၊ အတိုက်အခံ ပါတီကြီး၊ တိုင်းရင်းသားပါတီများ အပါအဝင် ပါတီအားလုံးက ညှိနှိုင်း ဆွေးနွေး သင့်ပါတယ်။ အထူးသဖြင့် အာဏာရပါတီကြီးနဲ့ အတိုက်အခံ ပါတီတို့ အစိုးရ ဖွဲ့စည်းရေး ယေဘုယျ သဘောတူညီမှု (Consensus) တစ်စုံတစ်ရာ ရယူထားနိုင်ရင် အခုဒီဆောင်းပါးမှာ အဓိက ပြောချင်တဲ့ ၂၀၁၅ အလွန် အကျပ်အတည်းများ ဆိုတာ ရှိလာတော့မှာ မဟုတ်တာ သေချာပါတယ်။
(ဒါပေမဲ့ အနိုင်ရဖို့ သေချာသလောက် ရှိနေတဲ့ အတိုက်အခံ ပါတီကြီး အနေနဲ့လည်း ဒီလို Consensus မျိုးကို စိတ်ဝင်စားလာနိုင်ဖို့ အခွင့်အလမ်း ဟာလည်း အလွန်တရာ နည်းပါးလှတာကြောင့် ၂၀၁၅ အလွန်မှာ ဒီမိုကရေစီ တည်ဆောက်ရေး လုပ်ငန်းစဉ်ကြီးကို ခြိမ်းခြောက်မယ့် စိန်ခေါ်မှုတွေကို ရှောင်လွှဲနိုင်ဖို့ရာလည်း မျှော်လင့်ချက် နည်းပါးလှပါတယ်။
(၄) ၂၀၁၅ အလွန် လွှတ်တော်များမှာ အနိုင်ရ အတိုက်အခံ အမတ်များနဲ့ တပ်မတော်သား လွှတ်တော် အမတ်များ အကောင်းဆုံး လုပ်ဖော် ကိုင်ဖက်တွေ ဖြစ်ဖို့ ဘယ်လို လုပ်ကိုင် ဆောင်ရွက်ရင် အကောင်းဆုံး ဖြစ်မယ်ဆိုတာ အခုကတည်းက ကြိုတင် ပြင်ဆင်သင့်ပါပြီ။ တပ်မတော်သား ကိုယ်စားလှယ်များကို ၂၀၁၅ ဒုတိယလွှတ်တော် သက်တမ်း ကာလအတွင်းမှာ လွှတ်တော်ထဲက ဖယ်ရှားရေး ကိစ္စကို လောလောဆယ် မစဉ်းစားသေးဘဲ အလုပ်အတူတူ လုပ်ဖို့ ကြိုတင် ပြင်ဆင်ခြင်းက နှစ်ဦးနှစ်ဖက် အကျိုးများ နိုင်ပါလိမ့်မယ်။
၂၀၁၅ အလွန်မှာ အတိုက်အခံတို့က (၅၉ (စ) ကို မပြင်ဆင်နိုင်ဘဲ) အနိုင်ရတဲ့အခါ သမ္မတလောင်းအဖြစ် လက်ရှိ သမ္မတကို အနိုင်ရ အတိုက်အခံပါတီက တင်သွင်း အဆိုပြုလုပ်ဖို့များ ပြောခဲ့ရင် အားလုံးက ဝိုင်းပြီး လှောင်ပြောင်ကြမှာ ဖြစ်ပါတယ်။ ဒါပေမဲ့ ဒီမိုကရေစီ ပြောင်းလဲရေး ဖြစ်စဉ်ဟာ လမ်းကြောင်းပေါ်မှာပဲ တည်တည်ငြိမ်ငြိမ် ဆက်ရှိနေဖို့ ဆိုရင် ဒီအချက်ဟာ ရွေးချယ်စရာတွေထဲက စဉ်းစားသင့်တဲ့ တစ်ချက် ဖြစ်တယ်လို့ ယူဆပါတယ်။ ဦးနှောက် အလုပ်ပေးဖို့ အလွန်ကောင်းတဲ့ ရွေးချယ်စရာမို့ ဘယ်သူမှ ရွေးမယ့်နည်းလမ်း မဟုတ်ပေမယ့် ဖော်ပြ လိုက်ပါတယ်။ အတိုက်အခံတို့ ဘက်မှာ လက်ရှိ အနေအထားအရ ဒေါ်စုကလွဲရင် သမ္မတလောင်း အဖြစ် အမည်စာရင်းတင်ဖို့ ထင်းခနဲ လင်းခနဲ မြင်သာတဲ့ ပုဂ္ဂိုလ် တစ်ယောက်တလေမျှ မမြင်မိသေးကြောင်း ဖော်ပြလိုပါတယ်။ ဒါဟာ အတိုက်အခံတွေ ဒေါ်စုကလွဲရင် ဘယ်သူမှ အရည်အသွေး မမီဘူးလို့ ပြောလိုခြင်း မဟုတ်ဘဲ အရည်အသွေးအပြင် သြဇာလွှမ်းမိုးနိုင်မှု လူထု၊ ချစ်ခင်လေးစားမှု အစရှိသော အသွင်ကူးပြောင်းရေး ကာလအတွက် အခြားအရေးပါတဲ့ အချက်များကို ထည့်သွင်း စဉ်းစားရန် လိုအပ်တယ်လို့ ယူဆသောကြောင့်သာ ဖြစ်ပါတယ်။
(လက်ရှိ အာဏာရ ပါတီဘက်မှာလည်း ဦးသိန်းစိန်က လွဲရင် လူထု တလေးတစား လက်ခံလောက်တဲ့ ပုဂ္ဂိုလ် မရှိသလောက် ရှားပါတယ်။ သူရဦးရွှေမန်းလည်း ပါတီကျောထောက် နောက်ခံနဲ့ ဆိုရင် ပါတီကိုယ်၌က နိုင်ဖို့ အခွင့်အလမ်း နည်းနေတာကြောင့် မျှော်လင့်ချက် နည်းလွန်းပါတယ်။)
ဒါပေမဲ့ ဆောင်းပါး အစပိုင်းမှာ ပြောခဲ့သလိုပါပဲ။ တပ်မတော်ရဲ့ နိုင်ငံရေး အခန်းကဏ္ဍက ၂၀၁၅ အလွန်ကာလအတွက် အရေးပါနေတာ တွေ့ရပါတယ်။ ဒီနေရာမှာလည်း ၂၅ ရာခိုင်နှုန်းကို အလျင်အမြန် ဖယ်ရှားရေးကို လုပ်မယ်ဆိုရင် အလေးအနက် ထည့်သွင်း စဉ်းစားသင့်တဲ့ အချက်ဖြစ်ပါတယ်။ လက်ရှိ ဒီမိုကရေစီနဲ့ မကိုက်ညီသေးတဲ့ အခြေခံဥပဒေသည် လည်းကောင်း၊ အခြေခံဥပဒေအရ တပ်မတော်ရဲ့ ကဏ္ဍသည် လည်းကောင်း ဒီမိုကရေစီ ချောချောမောမော ပေါ်ထွန်းရေးအတွက် တစ်စိတ်တစ်ပိုင်း အရေးပါနေတဲ့အပြင် အခြေခံဥပဒေနဲ့ တပ်မတော်ကပဲ သန်း ၆၀ သော လူထု ရင်ဆိုင်ကြရမယ့် အခက်အခဲများကို ကျော်လွှားနိုင်ဖို့၊ အတိုက်အခံတို့ကပါ အားပြုသင့်တဲ့ အနေအထား ဖြစ်လာနိုင်ရုံမကဘဲ ဒီမိုကရေစီ ခိုင်မာစွာ ပေါ်ထွန်း တည်တံ့နိုင်ရေးအတွက် တစ်နည်းတစ်လမ်း အာမခံချက် ဖြစ်နေပါကြောင်း (လက်မခံနိုင်သူ အများအပြားရှိမှန်း သိလျက်နဲ့ပဲ) အားလုံးကို လေးစားစွာ တင်ပြလိုက်ရပါတယ်။
Credit To The Voice Weekly 
Read More »

နံရံတိုင်းတွင် နားများ ထားသင့်၊ မထားသင့် Written by အောင်ဘိုဘိုရှိန်

တပ်မတော် ထောက်လှမ်းရေး ညွန်ကြားရေးမှူးဟောင်းနှင့် ဗိုလ်ချုပ်ကြီးဟောင်း ခင်ညွန့်က ပြီးခဲ့သည့် နှစ်ပတ်ခန့်က ပြုလုပ်သော စာအုပ် မိတ်ဆက်ပွဲ တစ်ခုတွင် အမျိုးသား ထောက်လှမ်းရေးအဖွဲ့ ပြန်ဖွဲ့သင့်ကြောင်း ပြောဆိုလိုက်သည်။
သူတပ်မတော် ထောက်လှမ်းရေး အကြီးအကဲအဖြစ် တာဝန်ယူစဉ်က ‘နံရံတိုင်းတွင် နားများ ရှိနေသည်’ ဟု ၎င်း၏ ထောက်လှမ်းရေးတပ်ဖွဲ့ လုပ်ငန်းစဉ်များကို ရည်ရွယ်၍ ပြောကြားခဲ့ဖူးသည်။
ယင်းသို့ ပြောဆိုချက်မှာ အတိုက်အခံ နိုင်ငံရေးသမားတို့၏ လုပ်ငန်းများကို အမြဲမပြတ် ထောက်လှမ်းနေကြောင်း သတိပေးချက်လည်း ဖြစ်ခဲ့သည်။

ပြန်ဖွဲ့မည့် ထောက်လှမ်းရေး အဖွဲ့သည် အစိုးရ အဆက်ဆက်၏ လုပ်ရိုးလုပ်စဉ် ဖြစ်သော အတိုက်အခံ နိုင်ငံရေးသမားများ၏ လုပ်ငန်းစဉ်တို့ကို စဉ်ဆက်မပြတ် ထောက်လှမ်းနေပြီး အစိုးရ လက်ကိုင်တုတ်အဖြစ် ရောက်သွားမည်ကို အတိုက်အခံ နိုင်ငံရေးသမားများနှင့် လွှတ်တော် ကိုယ်စားလှယ်အချို့ စိုးရိမ်ကြသည်။

အချို့ကမူ ပြန်ဖွဲ့သင့်ကြောင်း ထောက်ခံကြသည်။
“နိုင်ငံတစ်နိုင်ငံရယ်လို့ ရှိရင် ထောက်လှမ်းရေး ဆိုတာလည်း ရှိရမယ်။ နိုင်ငံတော် လုံခြုံရေးကို ကာကွယ်ပေးဖို့နဲ့ တခြားနိုင်ငံတွေက အဖျက်ရန်ကို ကာကွယ် ပေးဖို့အတွက် ရှိရမယ်” ဟု အမျိုးသား လွှတ်တော် ကိုယ်စားလှယ် ဦးဖုန်းမြင့်အောင်က မှတ်ချက်ပြုသည်။

အချို့လွှတ်တော် ကိုယ်စားလှယ်များကမူ သတင်းတပ်ဖွဲ့ (Special Branch)၊ စီအိုင်ဒီ (Criminal Investigation Depart ment)၊ စစ်ဘက်ဆိုင်ရာ စုံစမ်း ထောက်လှမ်းရေး အထူးတပ်ဖွဲ့ (စရဖ)၊ အကြမ်းဖက်မှု နှိပ်နင်းရေး တပ်ဖွဲ့နှင့် ထောက်လှမ်းရေး သတင်းပေးများကို ဖွဲ့ထားပြီး ဖြစ်သည့် အတွက် နောက်ထပ် ပြန်ဖွဲ့ရန် မသင့်ကြောင်း ကန့်ကွက်ကြသည်။
“အစိုးရကို ဆန့်ကျင်တဲ့ နိုင်ငံသားတွေကို ရန်သူတွေကို ဖမ်းဆီးဖော်ထုတ် အတွက်ပဲ အလုပ်လုပ်နေကြတယ်။ အရင်ကလည်း ဒီလိုပဲ။ အခုလည်းဒီလိုပဲ။ ကျွန်တော်တို့ လွှတ်တော် ကိုယ်စားလှယ်တွေကိုတောင် အသေးစိတ် ထောက်လှမ်းနေတာတွေ ရှိနေတယ်” ဟု ပြည်သူ့လွှတ်တော် ကိုယ်စားလှယ် ဦးရဲထွန်းက ၎င်းရင်ဆိုင်နေရသည့် ထောက်လှမ်းရေး တပ်ဖွဲ့များနှင့် ပတ်သက်၍ ပြောပြသည်။

၁၉၈၈ ဒီမိုကရေစီ အရေးတော်ပုံ အပြီးတွင် တပ်မတော်က အာဏာသိမ်းပြီးနောက် တပ်မတော် ထောက်လှမ်းအဖွဲ့ကို ဗိုလ်ချုပ်ကြီးဟောင်း ကျော်ဆွေနှင့် ဗိုလ်ချုပ်ကြီး ခင်ညွန်တို့ ဦးဆောင်ကာ ပြန်လည် ဖွဲ့စည်းပြီးနောက် အမျိုးသား ဒီမိုကရေစီ အဖွဲ့ချုပ် (NLD) နှင့် အခြားအတိုက်အခံ ပါတီများ၏ လုပ်ငန်းစဉ် မှန်သမျှကို မပြတ် ထောက်လှမ်းခဲ့ပြီး အတိုက်အခံ အများစုကို ပုဒ်မရှာ ဖမ်းဆီး ထောင်ချခဲ့သည်။

၁၉၉၀ ပြည့်နှစ်မှ ၂၀၀၄ ခုနှစ်အတွင်း တပ်မတော် ထောက်လှမ်းရေး အဖွဲ့က နိုင်ငံရေး တက်ကြွ လှုပ်ရှားသူများနှင့် အတိုက်အခံ ပါတီဝင် ရာချီ၍ ဖမ်းဆီး ထောင်ချမှုများ၊ စစ်ကြောရေး ပြုလုပ်နေစဉ် လူ့အခွင့်အရေး ချိုးဖောက်မှုများ ပြုလုပ်ခဲ့သည်ဟု နိုင်ငံတကာ လူ့အခွင့်အရေး တက်ကြွ လှုပ်ရှားသူများက ဝေဖန်ခဲ့ကြသည်။

ထိုနှစ်ပိုင်းအတွင်း တပ်မတော် ထောက်လှမ်းရေးနှင့် အမျိုးသား ထောက်လှမ်းရေးတို့က အကျယ်ချုပ်ချ၊ ဖမ်းဆီးခဲ့သည့် NLD ပါတီ ခေါင်းဆောင်များဖြစ်သော ဒေါ်အောင်ဆန်းစုကြည်၊ ဦးဝင်းတင်တို့ အပါအဝင် နိုင်ငံရေး အကျဉ်းသား အရေအတွက် ထောင်ချီ ရှိသည်ဟု နိုင်ငံရေး အကျဉ်းသား ကူညီစောင့်ရှောက်ရေး အဖွဲ့များက ဆိုသော်လည်း စာရင်းမည်မျှ ရှိသည်ကို ယနေ့တိုင် ထုတ်ပြန်နိုင်ခြင်း မရှိသေးပေ။

နိုင်ငံတော်သမ္မတ ဦးသိန်းစိန် လက်ထက်တွင်မှ အမျိုးသား ထောက်လှမ်းရေး၊ စစ်ဘက်ဆိုင်ရာ စုံစမ်းစစ်ဆေးရေး တပ်ဖွဲ့၊ အထူးသတင်း တပ်ဖွဲ့တို့ အဖွဲ့က နှစ်ပေါင်း ၂၀ ကျော်အတွင်း ဖမ်းဆီးထားသည့် နိုင်ငံရေး အကျဉ်းသား ၁၃၀၀ ကျော်ကို ပြန်လွှတ်ပေးခဲ့သည်။

ဗိုလ်ချုပ်ကြီးဟောင်း ခင်ညွန့် ညွန်ကြားရေးမှူးအဖြစ် တာဝန် ထမ်းဆောင်နေသည့် အမျိုးသား ထောက်လှမ်း တပ်ဖွဲ့ကို ၂၀၀၄ ခုနှစ်တွင် နိုင်ငံတော် အေးချမ်း သာယာရေးနှင့် ဖွံ့ဖြိုးရေးကောင်စီ အစိုးရက ဖျက်သိမ်းလိုက်ပြီး ဗိုလ်ချုပ်ကြီး ခင်ညွန့် အပါအဝင် ထောက်လှမ်းရေး တပ်ဖွဲ့၏ ခေါင်းဆောင်များ ဖြစ်သော ဗိုလ်မှူးချုပ် လှအောင်၊ ဗိုလ်မှူးချုပ် ကျော်ဟန်၊ ဗိုလ်မှူးချုပ် သန်းထွန်း၊ ဗိုလ်မှူးချုပ် မြင့်ဇော်၊ ဗိုလ်မှူးချုပ် ကျော်သိန်း၊ ဗိုလ်မှူးချုပ် သိန်းဆွေနှင့် ဗိုလ်မှူးကြီး ခင်အောင်၊ ဗိုလ်မှူးကြီး စန်းပွင့် ဗိုလ်မှူးကြီး မြင့်အောင်ကျော် တို့ကို ဖမ်းဆီး အရေးယူခဲ့သည်။

ဗိုလ်မှူးချုပ် သိန်းဆွေနှင့် ဗိုလ်မှူးကြီး ခင်အောင် အပါအဝင် တပ်မတော် ထောက်လှမ်းရေး အရာရှိကြီး ၃၈ ဦးကို အကျင့်ပျက် ခြစားမှုများနှင့် အမှုဖွင့်ပြီး ထောင်ဒဏ် နှစ် ၂၀ မှ နှစ် ၁၀၀ ကျော် ပြစ်ဒဏ်များ အသီးသီး ချမှတ်ခဲ့သည်။

မြန်မာနိုင်ငံအတွင်း နိုင်ငံတော် လုံခြုံရေးအတွက် ထောက်လှမ်းရေး အဖွဲ့အစည်းများကို ဖွဲ့စည်း ခဲ့သော်လည်း ၁၉၈၀ ပြည့်နှစ်နှင့် ၂၀၀၄ ခုနှစ်တို့တွင် နှစ်ကြိမ်တိုင်တိုင် ဖျက်သိမ်းခဲ့သည်။

ယင်းနောက်ပိုင်းတွင် အမျိုးသား ထောက်လှမ်းရေး တပ်ဖွဲ့ကို ဖျက်သိမ်းပြီးနောက် စစ်ဘက်ဆိုင်ရာ စုံစမ်းထောက်လှမ်းရေးတပ်ဖွဲ့ (စရဖ) နှင့် ပြည်ထဲရေးဝန်ကြီးဌာန လက်အောက်ခံ အထူးသတင်းတပ်ဖွဲ့ (Special Branch)၊ အကြမ်းဖက်မှု နှိမ်နင်းရေး တပ်ဖွဲ့ကို ထောက်လှမ်းရေးအတွက် အသုံးရန် ပြန်လည် ဖွဲ့စည်းခဲ့ကြောင်း အထူးသတင်းတပ်ဖွဲ့(Special Branch) တာဝန် ထမ်းဆောင်နေသူ တစ်ဦးကဆိုသည်။

ယင်းအဖွဲ့များ ရှိနေခြင်းကြောင့် ထောက်လှမ်းရေးတပ်ဖွဲ့ နောက်တစ်ဖွဲ့ကို ထပ်မံ မဖွဲ့သင့်ကြောင်း နိုင်ငံတော် လုံခြုံရေးအတွက် တပ်မတော်နှင့် မြန်မာနိုင်ငံ ရဲတပ်ဖွဲ့တို့ ရှိနေသောကြောင့် အမျိုးသား ထောက်လှမ်းရေး တပ်ဖွဲ့ ဖွဲ့ရန် မလိုအပ်ကြောင်း ၈၈ မျိုးဆက် ကျောင်းသားခေါင်းဆောင် တစ်ဦးဖြစ်ပြီး အမျိုးသား ထောက်လှမ်းရေးအဖွဲ့၏ ဖမ်းဆီးမှုကို ခံခဲ့ရသူ ဦးမြအေးက ဆိုသည်။
“အမျိုးသား လုံခြုံရေးအတွက် အဖွဲ့အစည်း တစ်ခုကတော့ ရှိသင့်ပါတယ်။ ဒါပေမဲ့ အခုလည်း တပ်မတော်နဲ့၊ ရဲတပ်ဖွဲ့ ရှိနေတာပဲ။ တပ်မတော် ထောက်လှမ်းရေး ဆိုတဲ့အဖွဲ့က ဒီနိုင်ငံမှာ ကောင်းကျိုး သိပ်ပေးတာ မဟုတ်ဘူး” ဟု ရန်ကုန်တိုင်းဒေသကြီး အစိုးရအဖွဲ့ဝင် ရခိုင် တိုင်းရင်းသားရေးရာ ဝန်ကြီး ဦးဇော်အေးမောင်က ၎င်း၏ အမြင်ကို ပြောပြသည်။

မြန်မာနိုင်ငံတွင် အစိုးရ အဆက်အဆက် ထောက်လှမ်းရေး တပ်ဖွဲ့များ ဖွဲ့စည်း ခဲ့သော်လည်း လာဘ်စားမှုများ၊ နိုင်ငံရေးတွင် ဝင်ရောက် နှောင့်ယှက်မှု များကြောင့် ပြန်လည် ဖျက်သိမ်းခဲ့ရကြောင်း၊ ထိုအခြေအနေတွင် ပြည်သူများ အပေါ်သာ ဝန်ပိလာပြီး ထောက်လှမ်းရေး ကြောက်ရသော အခြေ အနေဖြင့် နေထိုင်ခဲ့ရကြောင်း ၎င်းကဆိုသည်။
“လွတ်လပ်စွာ လှုပ်ရှားနေတဲ့ ဒီမိုကရေစီ ပြောင်လဲရေးကို ထိခိုက်လာနိုင် တယ်” အမျိုးသား ထောက်လှမ်းရေး တပ်ဖွဲ့နှင့် ပတ်သက်ပြီး ၎င်းက ယင်းသို့ မှတ်ချက် ပြုသည်။

မြန်မာနိုင်ငံတွင် စစ်ဘက် အရပ်ဘက် ထောက်လှမ်းရေး အဖွဲ့အစည်းများ မဖြစ်မနေ ထားရှိရမည် ဖြစ်ကြောင်း အဆိုပါ အဖွဲ့အစည်းများကို ဒီမိုကရေစီ ဖခင်နိုင်ငံကြီးများဖြစ်သော ဗြိတိန်၊ အမေရိကန် ပြည်ထောင်စု တို့တွင်လည်း ထားရှိကြောင်း နိုင်ငံတော်သမ္မတ၏ ပြောရေးဆိုခွင့်ရှိသူ ဦးရဲထွဋ်က ပြောကြားသည်။

မြန်မာနိုင်ငံ၏ ထောက်လှမ်းရေး တပ်ဖွဲ့များကို အခြေခံဥပဒေတွင် ဖော်ပြထားသော နိုင်ငံသားများ မူလအခွင့်အရေး များကို မထိခိုက်စေဘဲ နိုင်ငံတော် လုံခြုံရေးကို လုပ်ဆောင်နိုင်ရန် ဖွဲ့စည်းထားကြောင်း ၎င်းက ထပ်လောင်း ပြောကြားသည်။

နိုင်ငံတော်သမ္မတ၏ ပြောရေးဆိုခွင့် ရှိသူ ဦးရဲထွဋ်က ယင်းသို့ ထောက်လှမ်းရေး အဖွဲ့များက နိုင်ငံသားများ၏ မူလအခွင့်အရေးကို မထိခိုက်စေဘဲ လုပ်ဆောင်မည်ဟု ဆိုသော်လည်း လောလောဆယ်တွင် လွှတ်တော် ကိုယ်စားလှယ်များကိုပင် အသေးစိတ် မျက်ခြည်မပြတ် ထောက်လှမ်း နေသေးကြောင်း ပြည်သူ့လွှတ်တော် ကိုယ်စားလှယ် ဦးရဲထွန်းက ဆိုသည်။
“တကယ် သူတို့အနေနဲ့ Reform (ပြုပြင်ပြောင်းလဲရေး) လုပ်နေတာ မှန်တယ်ဆိုရင် သမ္မတ အပါအဝင် အစိုးရ အဖွဲ့ဝင်တွေက တရားဝင် ကြေညာရမယ်။ ပြည်သူတွေ အကြောက်အရွံ့ မရှိဘဲသွားလာ လှုပ်ရှားနိုင်အောင်လို့” ဟု ၎င်းက မှတ်ချက်ပြုသည်။

အမျိုးသား လုံခြုံရေးအတွက် ထောက်လှမ်းရေး အဖွဲ့အစည်းတွေ ထပ်ဖွဲ့သင့် မဖွဲ့သင့်ဆိုသော အချက်ကို လက်နက်ကိုင် အဖွဲ့အစည်းများ၊ အတိုက်အခံ အဖွဲ့အစည်းများ တောင်းဆိုနေသော ဖွဲ့စည်းပုံ အခြေခံဥပဒေ ပြင်ဆင်မှုနှင့် ချိတ်ဆက် စဉ်းစားရန် လိုအပ်မည် ဖြစ်ပြီး ကမ္ဘာ့ ထိပ်တန်း ဒီမိုကရေစီ နိုင်ငံများ၏ ထောက်လှမ်းရေး အဖွဲ့အစည်းများသည် အရပ်ဘက် အုပ်ချုပ်ရေး တာဝန်ရှိသူများ၏ အောက်တွင်သာ ရှိကြောင်း မြန်မာ့နိုင်ငံရေး သုံးသပ် ဆောင်းပါများ ရေးသားနေသူ နေသန်မောင်က သုံးသပ်သည်။
“ဖွဲ့စည်းပုံ အခြေခံဥပဒေ ပြင်ဆင်နိုင်မှ စစ်မှန်တဲ့ အရပ်ဘက် အစိုးရတစ်ခုအဖြစ် ရပ်တည်လာနိုင်မှာ။ အဲ့ဒါမှလည်း အရပ်ဘက် အစိုးရ အဖွဲ့ရဲ့ အရပ်ဘက်အစိုးရ အရာရှိတွေ လက်အောက်မှာရှိတဲ့ ထောက်လှမ်းရေး တစ်ရပ် ဖြစ်လာနိုင်မှာပါ” ဟု ၎င်းကဆိုသည်။

လက်ရှိ ထောက်လှမ်းရေး အဖွဲ့အစည်းများ၏ လုံခြုံရေးဆိုင်ရာ စွမ်းဆောင်ရည်မှာ အားနည်းလျက် ရှိကြောင်း ပဋိပက္ခများ ဗုံးကွဲမှုများကို စုံစမ်း ထောက်လှမ်းနိုင်မှု မရှိကြောင်း ၎င်းကထပ်လောင်း ပြောကြားသည်။
“ပွင့်ပွင့်လင်းလင်း ပြောရရင် အခု ထောက်လှမ်းရေးတွေက လုံခြုံရေးအတွက် ဘယ်လိုမှ အထောက်အကူ မဖြစ်သေးဘူး။ အချင်းချင်း ချိတ်ဆက် ဆောင်ရွက်မှုတွေလည်း မတွေ့ရဘူး” ၎င်း၏ အမြင်ကိုရှင်းပြသည်။
မည်သို့ပင် ဖြစ်စေကာ အမျိုးသား ထောက်လှမ်းရေး တပ်ဖွဲ့ ပြန်ဖွဲ့သင့် မဖွဲ့သင့်ကို လွှတ်တော် ကိုယ်စားလှယ်များ အကြားတွင်ပင် သဘောထား မတူညီမှုများ ရှိနေသေးသည်။

သို့သော် နိုဝင်ဘာလအတွင်း ကျင်းပသော ရန်ကုန်တိုင်းဒေသကြီး လွှတ်တော် အစည်းအဝေးတွင် အမျိုးသား ဒီမိုကရေစီ ပါတီသစ်ပါတီမှ တိုင်းဒေသကြီး လွှတ်တော် ကိုယ်စားလှယ် ဦးကျော်က နိုင်ငံတော် လုံခြုံရေးနှင့် အကြမ်းဖက်မှု အန္တရာယ်မှ ကာကွယ်ရန် အမျိုးသား ထောက်လှမ်းရေး အဖွဲ့တစ်ဖွဲ့ အမြန်ဆုံး ပြန်ဖွဲ့သင့်ကြောင်း အဆိုတင်သွင်း တင်ခဲ့ပြီး ယင်းအဆိုကို တိုင်းဒေသကြီး အစိုးရမှ တစ်ဆင့် ပြည်ထောင်စု လွှတ်တော်သို့ တင်ပြပေးမည် ဖြစ်ကြောင်း တိုင်းဒေသကြီး လွှတ်တော် ဥက္ကဋ္ဌ ဦးစိန်တင်ဝင်းက ပြောကြား ခဲ့သည်။

ထိုကြောင့် ထောက်လှမ်းရေးအဖွဲ့ ပြန်ဖွဲ့မည်ဆိုသော သတင်းများ ကျယ်ကျယ်ပြန့်ပြန့် ထွက်ပေါ်လာပြီး ယခင် အစိုးရကဲ့သို့ အတိုက်အခံများ၏ လှုပ်ရှားမှုကို ‘နံရံတိုင်းတွင် နားများ ရှိနေသကဲ့သို့’ စုံစမ်းထောက် လှမ်းနေမည်ကို လွှတ်တော် ကိုယ်စားလှယ်များ အပါအဝင် အတိုက်အခံ ပါတီများနှင့် အရပ်ဘက် အဖွဲ့အစည်းများအကြား အတိတ်၏ အရိပ်မည်း ရှိနေသေးသည်။

“မြန်မာနိုင်ငံရဲ့ ထောက်လှမ်းရေး အဖွဲ့အစည်းတွေရဲ့ Image (ပုံရိပ်) က တော်တော်ကြီးကို ပျက်နေပါတယ်။ ထောက်လှမ်းရေး ဆိုတာနဲ့ အစိုးရ ဆန့်ကျင်သူ ဒီမိုကရေစီ ဖော်ဆောင်ရေးအတွက် လွတ်လပ်စွာ လှုပ်ရှားသူတွေကို ဖမ်းဆီး နှိမ်နှင်းတဲ့ သူတွေလို့လည်း ပြည်သူအများစုက မြင်ကြတယ်” ဟု နေသန်မောင်က ဆိုသည်။
Credit To The Voice Weekly
Read More »

ဗိုလ်ချုပ်မြ ဧ။် စည်းလုံးခြင်း မိန့်ခွန်း အပိုင်းအစ ===========================

““ရန်သူဟာ ကျွန်တော်တို့အချင်းချင်း အိုးမဲသုတ်ပြီး ပြန်တိုက်ခိုင်းခဲ့ပါတယ်။ ကျွန်တော်တို့ အချင်းချင်းတိုက်ရင် ဘယ်သူခံရမလဲ၊ ကျွန်တော်တို့ ကရင်တွေပဲခံရတာပဲ”” ဒီကေဘီအိုက ကေအင်(န်)ယူနှင့် မဆိုင်တော့ကြောင်း ကြေညာထားပြီး နောက်တစ်နေ့တွင် ကေအင်(န်)ယူ အဖွဲ့တစ်ခုလုံးရှိ ဆက်သွယ်ရေး စက်များ သို့ ပေးပို့သော မိန့်ခွန်းအပြည့်အစုံမှာ အောက်ပါ အတိုင်းဖြစ်သည်- ၂၇၃၄ ခုနှစ် ပြာသိုလဆန်း(၁)ရက်၊ ၁၉၉၅ခုနှစ် ဇန်န၀ါရီလ(၁)၊ ကရင်နှစ်သစ်ကူးနေ့တွင် ကေအင်(န်)ယူ ကရင်အမျိုးသား အစည်းအရုံး ဥက္ကဋ္ဌ ဗိုလ်ချုပ်ကြီး စောဘိုမြ၏ နှစ်သစ်ကူးမိန့်ခွန်း။ ၁၉၄၉ ခုနှစ်၊ တော်လှန်ရေး စတင်ချိန်မှစပြီး တိုက်ပွဲဝင်ခဲ့တာဟာ (၄၆)နှစ် ကြာရှည်ခဲ့ပြီး ဖြစ်ပါတယ်။ လွန်ခဲ့တဲ့ အချိန်မှာ တညီတညွတ်တည်း ရှိခဲ့သလို လွတ်မြောက်ရေး ရတဲ့အထိ ဆက်ပြီး ကေအင်(န်)ယူ အစည်းအရုံးရဲ့ ခေါင်းဆောင်မှု အောက်မှာ စုစည်းညီညာစွာ ဆက်ပြီး တိုက်ပွဲဝင်သွားရမှာ ဖြစ်ပါတယ်။ ကရင်အမျိုးသားအပေါင်းတို့- … ၁၉၉၄ ခုနှစ်ရဲ့ ၀မ်းနည်းစရာတစ်ခုမှာ ရန်သူ၏ သွေးထိုးလှုံ့ဆော်မှုကြောင့် ရဲဘော်အချို့ဟာ ခရစ်ယာန် ဘာသာဝင်တွေက ဗုဒ္ဓဘာသာဝင်တွေကို ဖိနှိပ် ချုပ်ချယ်ပါတယ်။ အခွင့်အရေး မပေးဘူးဆိုပြီး ကျွန်တော်တို့ကို အထင်အမြင် လွဲမှား ဆန့်ကျင်တာကို ၀မ်းနည်းစွာ တွေ့ရပါတယ်။ ဒီလုပ်ရပ်ဟာ ရန်သူ့ရဲ့ အစီအစဉ်ပါ။ ရန်သူ က ကျွန်တော်တို့ကို ပြိုကွဲသွားအောင် ထိုးခွဲတာ ဖြစ်ပါတယ်။ ကေအင်(န်)ယူရဲ့ ဖွဲ့စည်းပုံ အခြေခံစည်းမျဉ်း ဥပဒေမှာ တိတိကျကျ ဖော်ပြထားတာက ဘာသာတိုင်း လွတ်လပ်စွာ ယုံကြည် ကိုးကွယ်ခွင့် ရှိတယ်။ ဘာသာတိုင်းဟာ ဆူကြုံနိမ့်မြင့်မရှိ၊ တန်းတူရည်တူရှိပြီး ဘာသာတစ်ခုနှင့်တစ်ခု ပုတ်ခတ်ခြင်း မရှိစေရ။ ညီညီညွတ်ညွတ် ရှိစေရမယ်လို့ ပြဋ္ဌာန်း ထားပါတယ်။ ရှေးလူကြီးရဲ့ သွန်သင် မှာကြားချက်အရ စည်းလုံးညီညာ အောင်ကြောင်း ဖြာပါတယ်။ ရန်သူအနေနဲ့ ခရစ်ယာန် ဘာသာဝင်တွေက ဗုဒ္ဓဘာသာဝင်တွေကို ဖိနှိပ်ချုပ်ချယ်တယ်လို့ ပြောတာဟာ လုံးဝ မမှန်ပါ။ အမှန်မှာ ခရစ်ယာန်တွေနဲ့ ဗုဒ္ဓဘာသာဝင်တွေဟာ အချင်းချင်း ချစ်ကြည် ရင်းနှီးကြတယ်။ အချင်းချင်း ကူညီကြတယ်။ ဘုန်းကြီးကျောင်းများ တည်ဆောက်သည့် အခါ လိုအပ်တဲ့ သစ်နဲ့ အခြားလိုအပ်သော ပစ္စည်းများကို ပေးလှူခဲ့တယ်။ တတ်နိုင်သလောက် အချင်းချင်းအနေနဲ့ အကူအညီများ ပေးခဲ့ပါတယ်။ ကျွန်တော်တို့ ခေါင်းဆောင်များဟာ ငြိမ်းချမ်းရေးနဲ့ စည်းလုံးညီညွတ်ရေးကို အမှန်တကယ် လိုလားတဲ့ အတွက်ကြောင့် ရန်သူရဲ့ လှည့်စားမှုကို ခံရသော ရဲဘော်များအား တစ်ဦးတစ်ယောက်မျှ အရေးမယူ၊ အပြစ်မပေးပါ။ သူတို့ရဲ့ ပြစ်မှုအားလုံးကို ခွင့်လွှတ် သင်ပုန်းချေခဲ့ပါတယ်။ ရှေးလူကြီးများ ပြောသလို မိုးကောင်းကင်သည် တိမ်နှင့်မကင်းလွတ် သကဲ့သို့ မည်သူမျှ အပြစ်ကင်းသည် မရှိပါ။ ဒါကြောင့် ရန်သူလှည့်စားမှုကို ယုံစားခဲ့သူများအနေနှင့် အမှန်တရားဘက်သို့ ပြန်လာကြပြီး ကရင် ပြည်သူတွေရဲ့ အကျိုးရှိတဲ့အလုပ်မှာ စုပေါင်း လုပ်ကိုင်ကြပါ။ ၁၉၉၅ ခုနှစ်မှာ ကရင်ပြည်သူများအားလုံး စည်းလုံး ညီညွတ်ကြပြီး တစ်စိတ်တစ်ဝမ်းတည်းနဲ့ စုပေါင်း လုပ်ကိုင်ကြတာကို ကျွန်ုပ် လိုလားပါတယ်။ ကရင်ပြည်သူနဲ့ ရဲဘော်အားလုံးတို့- တိရစ္ဆာန်ဖြစ်တဲ့ ကြက်တွေကို အိုးမဲသုတ်ပြီး ခွပ်ခိုင်းရင် ခွပ်ကြတာ တွေ့ရမယ်။ ဒီလိုခွပ်ခိုင်းတဲ့ နေရာမှာ ခွပ်ခိုင်းသူက မခံရဘူး။ ခွပ်သူသာ ခံရမယ်။ အသေအချာ ပြန်စဉ်းစားကြပါ။ ရန်သူဟာ ကျွန်တော်တို့ အချင်းချင်း အိုးမဲသုတ်ပြီး ပြန်တိုက်ခိုင်းခဲ့ပါတယ်။ ကျွန်တော်တို့ အချင်းချင်း တိုက်ရင် ဘယ်သူခံရမလဲ၊ ကျွန်တော်တို့ ကရင်တွေပဲ ခံရတာပဲ။ ကရင်အချင်းချင်း ရန်ဖြစ်ကြရင် ရန်သူက လက်ခုပ်တီးပြီး ပျော်မှာပေါ့။ လွန်ခဲ့တဲ့ ဖြစ်ရပ်တစ်ခုမှာ ရန်သူတွေဟာ ကော်ကဆာစောဘဦးကြီးကို လုပ်ကြံဖို့ ကရင်ကို အသုံးချခဲ့ပါတယ်။ ရန်သူက သူတို့ကို လက်နက်ထုတ်ပေးပြီး ကေအင်(န်) ယူကို တိုက်ခဲ့တယ်။ သူတို့တစ်တွေဟာ ရန်သူတွေ အတွက် အသက်စွန့် တိုက်ပြီး သူတို့အတွက် အချည်းအနှီး ဖြစ်ခဲ့တယ်။ ဒါကြောင့် ကရင်ပြည်သူများအားလုံး စည်းလုံးညီညွတ်ရေးကို ရှေးရှုပြီး ကရင်ပြည်သူတွေရဲ့ အကျိုးရှိမယ့် စည်းလုံးညီညွတ်မှုကို တည်ဆောက်ကြပါ။ ၁၉၉၄ ခုနှစ် ကုန်တာနဲ့အတူ ဒီနှစ်သစ်မှာ ရန်သူရဲ့ သွေးဆောင် ဖြားယောင်းမှုမှ စွန့်ခွာကြပြီး စည်းလုံးညီညွတ်ရေးသို့ တက်လှမ်းကြပါ။ ကရင်နှစ်သစ်မင်္ဂလာမှာ ကရင်ပြည်သူ အပေါင်းအား ညီညွတ်ခြင်း၊ ငြိမ်းချမ်းခြင်း၊ သာယာဝပြောခြင်းနှင့် အောင်မြင်ခြင်းတို့အား အပြည့်အ၀ သက်ရောက်ပါစေ။
 မြန်မာ့သံတော်ဆင့်မှ
Read More »

နှစ်ဘက်အပြန်အလှန် ညှိနှိုင်းအလျွှော့ပေးစေ့စပ်တဲ့ဓလေ့မျိုး ထွန်းကားဖို့ လိုပါတယ် - ကျော်ဝင်း


(Myanmar Peace Chronicle နှင့်အင်တာဗျူး)

လက်ရှိ ငြိမ်းချမ်းရေးဖြစ်စဉ်ပေါ်မှာ ဆရာ့ရဲ့အမြင်ကို သိချင်ပါတယ်။

ကျွန်တော်တို့ နိုင်ငံမှာ တောတွင်းလက်နက်ကိုင်အင်အားစုတွေနဲ့၊ တစ်ချိန်တည်း တစ်ပြိုင်တည်းလောက် တွေ့ဆုံဆွေးနွေးဖို့ကြိုးစားခဲ့ကြတာ သုံးကြိမ်ရှိတယ်။ ၁၉၆၃ တော်လှန်ရေးကောင်စီခေတ်ဦးက တစ်ခါ၊ အရင် အစိုးရလက်ထက် ၁၉၉၀ ပြည့်လွန်နှစ်တွေက တစ်ခါ၊ အခုအစိုးရသစ်လက်ထက်နောက် တစ်ခါ၊ စုစု ပေါင်းသုံးကြိမ်ပေါ့။ ပထမအကြိမ်က မအောင်မြင်ခဲ့ဘူး။ အဲ့ဒီတုန်းက အိုင်ဒီယိုလိုဂျီ အကြောင်းခံတဲ့ လက်နက်ကိုင်တွေ(ဗကပနဲ့အလံနီ)နဲ့ ငြိမ်းချမ်းရေးမရခဲ့တာ၊ အပြန်အလှန်ယုံကြည်မှုမရှိလို့ပါ။ လူမျိုးစု လက်နက်ကိုင်တွေနဲ့ ဆွေးနွေးပွဲမှာ ကြုံခဲ့တဲ့ အဓိကအဖုအထစ်က ခွဲထွက်လိုက ခွဲထွက်ပိုင်ခွင့် ဆိုတဲ့ကိစ္စ။ (အခု - အိုင်ဒီအိုလိုဂျီ လက်နက်ကိုင်မရှိတော့ဘူး။ လူမျိုးစုလက်နက်ကိုင်တွေဘက်ကလဲ ခွဲထွက်ရေးကို မတောင်းတော့ဘူး။) ဒုတိယအကြိမ်မှာတော့၊ အပစ်အခတ်ရပ်စဲရေးပဲ ရခဲ့တယ်။ နိုင်ငံရေးဆွေးနွေးပွဲထိ မရောက်ခဲ့ဘူး။ ဒါကြောင့်လဲ ရေရှည်ခံတဲ့ ငြိမ်းချမ်းရေး မရခဲ့တာလို့ ထင်ပါတယ်။

အခုချိန်မှာတော့ ငြိမ်းချမ်းရေးအတွက် မျှော်လင့်စရာ ပိုများလာတယ်။ အစိုးရဘက်က နိုင်ငံရေးဆွေးနွေးပွဲ အထိ ဦးတည်ချက်ရှိတယ်။ လိုအပ်ရင် - constitution ကိုပါပြင်မယ်လို့ ဆိုတယ်။ လူမျိုးစုလက်နက်ကိုင် တွေဘက်ကလဲ ခွဲထွက်ရေးကိစ္စကို မပြောတော့ဘူး။ ပြီးတော့ ခါးသီးတဲ့ ပြည်တွင်းစစ်အတွေ့အကြုံက နှစ်ဖက်စလုံးကို ငြိမ်းချမ်းရေးဘက် မျက်နှာမူလာစေတယ်လို့ ထင်တယ်။ နောက် နိုင်ငံတကာအခင်း အကျင်း။ ဒီနေ့ကမ္ဘာကြီးမှာ ‘လက်နက်ကိုင်တော်လှန်ရေး’ တွေအတွက်ဘယ်လိုမှ အခွင့်မသာတော့ပါဘူး။ ဒါကြောင့် လက်ရှိငြိမ်းချမ်းရေးဖြစ်စဉ်အပေါ်မှာ ကျွန်တော့အနေနဲ့တော့ အများကြီးမျှော်လင့်ထားပါတယ်။

ငြိမ်းချမ်းရေးလုပ်ငန်းစဉ်တွေနဲ့ နိုင်ငံဖွံ့ဖြိုးတိုးတက်မှု ဆက်နွယ်နေတဲ့အကြောင်း သိပါရစေ။

ဒီကနေ့ ကျွန်တော်တို့နိုင်ငံသွားနေတာက သုံးပွင့်ဆိုင်အပြောင်းအလဲပါ။ နိုင်ငံရေးပြုပြင်ပြောင်းလဲမှု၊ စီးပွားရေးပြုပြင်ပြောင်းလဲမှု နဲ့ ငြိမ်းချမ်းရေးဖြစ်စဉ်ပါ။ ဒီသုံးခုလုံးရဲ့ ရည်ရွယ်ချက်က ဖွံ့ဖြိုးတိုးတက်ရေးပဲ လေ။ ဒီသုံးခုဟာ တစ်ခုနဲ့ တစ်ခုဆက်နွယ်နေတယ်။ ဒီထဲမှာမှ အရေးအကြီးဆုံး ‘ဆုံချက်’ အကျဆုံးက၊ ငြိမ်းချမ်းရေးဖြစ်စဉ်လို့ ထင်ပါတယ်။ သမိုင်းကိုပြန်ကြည့်လိုက်ရင် ဒီအဆက်အစပ်ကို ‘ဆဝါး’ နိုင်စရာ ရှိပါတယ်။ ကျွန်တော်တို့နိုင်ငံမှာ ပြည်တွင်းစစ်ကို အကြောင်းခံပြီး ‘စစ်ဘောင်’ ကျယ်လာတာ၊ ‘စစ်ဘောင်’ ကျယ်လာတာနဲ့အမျှ ‘ဒီမိုကရက်တစ်ဘောင်’ ကျဉ်းလာတာ၊ နောက်ဆုံးလုံးဝ ကိုပျောက်သွားခဲ့ရတာ။ ပြည်တွင်းစစ် တန်းလန်းနဲ့တော့၊ ‘စစ်ဘောင်’ ကိုလျှော့ချဖို့ မလွယ်ပါဘူး။ ‘ဒီမိုကရက်တစ်ဘောင်’ ချဲ့ယူ ဖို့လဲ ခက်နေဦးမှာပါ။ ဒါက နိုင်ငံရေဒပြုပြင်ပြောင်းလဲမှုနဲ့ အဆက်အစပ်။

စီးပွားရေးပြုပြင်ပြောင်းလဲမှုမှာလဲ ငြိမ်းချမ်းရေးဖြစ်စဉ်နဲ့ ဆက်စပ်နေတာတွေရှိတယ်။ စစ်ဖြစ်နေတဲ့၊ မတည်ငြိမ်တဲ့ နိုင်ငံမျိုးမှာ၊ နိုင်ငံခြားရင်းနှီးမြှုပ်နှံမှုတွေ ဝင်လာဖို့ လက်တွေ့မှာခက်တယ်။ နောက် ပွင့်ပွင့်လင်းလင်းပြောရရင် ကျွန်တော်တို့စီးပွားရေးက သယံဇာတ ထုတ်ယူသုံးစွဲမှုအပေါ် အဓိက အားပြုနေရဆဲပါ။ သယံဇာတအများစုက၊ စစ်ဖြစ်နေတဲ့ ဒေသတွေမှာ ရှိနေတော့ အပြည့်အဝထုတ်ယူသုံးစွဲဖို့ မလွယ်ပါဘူး။

တကယ်လို့ ပြည်တွင်းငြိမ်းချမ်းရေးသာ အခြေအနေကောင်းလာရင် နိုင်ငံရေးပြုပြင်ပြောင်းလဲမှုအတွက်ရော၊ စီးပွားရေးပြုပြင်ပြောင်းလဲမှုအတွက်ပါ လမ်းပွင့်လာလိမ့်မယ်။ ဒါဆိုရင် ဖွံ့ဖြိုးတိုးတက်မှုကို မျှော်လင့်လို့ရပြီပေါ့။

တခြားနိုင်ငံတွေရဲ့ ငြိမ်းချမ်းရေးဖြစ်စဉ်တွေနဲ့ မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်တွေမှာ ဘာတွေ ကွာခြားမှုရှိသလဲ။

ရေဘုယျတူညီချက်တွေ ရှိနိုင်ပေမဲ့၊ မတူတာတွေအများကြီးပါ။ ကျွန်တော်တို့ နိုင်ငံရဲ့ ‘ထူးခြားချက်’ တွေကို ညဏ်မီသမျှ တန်းစီပြောသွားပါမယ်။

၁။ ကျွန်တော်တို့ လူအဖွဲ့အစည်းရဲ့ ‘ နိုင်ငံရေးဓလေ့’ (political culture) ကိုပြန်ကြည့်ရင် ‘ယုံကြည်မှု’ သိပ်အားနည်းတာကို တွေ့ရမယ်။ ပညာရပ် ဆန်ဆန်ပြောရရင် ‘ very short radius of trust’ ပေါ့။

၂။ ကျွန်တော်တို့ရဲ့ အမျိုးသားလွတ်လပ်ရေး လှုပ်ရှားမှုကို ပြန်ကြည့်ရင် ‘ စစ်ဓလေ့’ ကဲနေတာကို တွေ့ရတယ်။ Democratic politics ထက် militant politics ကပိုရှေ့ရောက်နေတယ်။

၃။ ဒီနေ့အထိ ကျွန်တော်တို့ နိုင်ငံရေးကို ကြည့်ရင်လဲ ‘ဆန့်ကျင်လက်အချင်းချင်း၊ အပြန်အလှန်ဖယ်ထုတ်ဖို့ အားသန်တဲ့ ရယ်ဒီကယ် နိုင်ငံရေး’ (radical politics) ကသာ အပေါ်စီးရနေတယ်။ ‘ဆန့်ကျင်ဘက်တွေ၊ အကြေအလည်ညှိနှိုင်း အဖြေရှာ၊ အပြန်အလှန် အလျှော့ပေးစေ့စပ်တဲ့ ဒီမိုကရေစီနိုင်ငံရေး’ (Democratic politics) က အခုထိ အားနည်းနေဆဲပဲ။

၎။ နောက် ကျွန်တော်တို့ရဲ့ ပြည်တွင်းစစ်က လွတ်လပ်ရေးနဲ့ ဖွားဖက်တော် ကမ္ဘာပေါ်မှာ အရှည်ဆုံး။ နှစ်ပေါင်း ၆၀ ကျော်ပြီ။

၅။ ဗဟုနိုင်ငံရေး စနစ်တွေနဲ့ ဝေးခဲ့ရတာကလဲ ရာစုဝက်နီးပါး။ ‘ဗဟုနိုင်ငံရေး’ အတွေ့အကြုံ ဆိုလို့ ဆယ်စုနှစ် တစ်ခုလောက်ပဲရှိတယ်။

၆။ တခြားနိုင်ငံတွေမှာ၊ လက်နက်ကိုင်အဖွဲ့၊ လွန်ရောကျွံရော သုံးဖွဲ့လောက်ထက် မပိုဘူး။ ကျွန်တော်တို့မှာ တော့ လူမျိုးစုတိုင်းလောက်မှာ လက်နက်ကိုင်တပ်ဖွဲ့တွေရှိတယ်။ တချို့လူမျိုးစုတွေမှာ ဆိုရင် တစ်ခု မကဘူး။

၇။ ဒီလူမျိုးစုလက်နက်ကိုင်အဖွဲ့တွေဟာ၊ တစ်ခုနဲ့တစ်ခု သဘောသဘာဝ အရရော၊ လက်နက်ကိုင် တိုက်ပွဲသက်တမ်းပါ မတူဘူး။ (တစ်ချို့က  ၄၈ ကတည်းက လက်နက်ကိုင်တာ၊ တစ်ချို့က ၈၈ နောက်ပိုင်း မှ) ဒီတော့ ပြည်တွင်းစစ်ရဲ့ ဒဏ်သင့်မှုတွေအပေါ် နားလည်ပုံ အတိုင်းအတာချင်းမတူနိုင်ဘူး။ ပြီးတော့ မြန်မာနိုင်ငံရေးမှာ သြဇာကြီးခဲ့ဖူးတဲ့ ‘လက်ဝဲအိုင်ဒီအိုလိုဂျီ’ အပေါ်တိမ်းညွတ်ပုံချင်းလဲ မတူကြဘူး။

၈။ ကျွန်တော်တို့နိုင်ငံရေးမှာ group psychology သဘောတွေအများကြီးရှိတယ်။ တစ်ယောက်ချင်း၊ တစ်ဖွဲ့ချင်းအရ ကိုယ်ပိုင်ခါးသီးတဲ့ အတွေ့အကြုံတွေကြောင့် ငြိမ်းချမ်းရေးတိမ်းညွတ်မှုတွေ ရှိကြပေမဲ့ အစုအဝေးသဘောဖြစ်လာရင် တစ်မျိုးတစ်မည် ဖြစ်တတ်တယ်။ (ဒါက အတော်အရေးကြီးမယ် ထင်တယ်)

၉။ ပြည်တွင်းစစ်က အနှစ်ခြောက်ဆယ်ကျော်ပြီဆိုတော့၊ ‘စစ်စီးပွားရေး’ နဲ့ ‘စစ်အင်စတီကျူးရှင်း’တွေက နှစ်ဘက်လုံးမှာ ‘ခိုင်’နေပြီ။ ‘ငြိမ်းချမ်းရေး စီးပွားရေး’ နဲ့ ‘ဒီမိုကရက်တစ် အင်စတီကျူးရှင်း’ တွေ တည်ဆောက်ဖို့ အများကြီး ကြိုးပမ်းရဦးမယ်။ အချိန်ပေးရလိမ့်မယ်။
ဒါတွေကြောင့် ကျွန်တော်တို့ ငြိမ်းချမ်းရေးဖြစ်စဉ်ဟာ တခြားနိုင်ငံတွေထက် ပိုခက်နိုင်ပါတယ်။ ပိုအချိန်ယူ ရမယ်ထင်ပါတယ်။

အစိုးရနဲ့ တိုင်းရင်းသားလက်နက်ကိုင်တွေကြားမှာ ခိုင်မာတဲ့ အပစ်အခတ်ရပ်စဲရေးရရှိဖို့အတွက် ဘယ်အပိုင်းတွေကို  တိုးမြှင့်လုပ်ဆောင်သင့်သလဲ။

ပြောရရင် ပြည်တွင်းစစ်အစ၊ လွတ်လပ်ရေးခေတ်ဦးကတည်းက ငြိမ်းချမ်းရေးကြိုးပမ်းမှုတွေ ရှိခဲ့ပါတယ်။ ဒါပေမဲ့ ခရီးမရောက်ခဲ့ပါဘူး။ ဘာကြောင့်လဲ ပြန်ဆန်းစစ်ဖို့လိုမယ်။ ကျွန်တော်မြင်တာ ပြောရရင် အဲဒီတုန်းက တောတွင်းလက်နက်ကိုင်အင်အားစုတွေက ‘တွေ့ဆုံဆွေးနွေးရေးက ပထမ၊ ပြီးမှ လက်နက် စွန့်တန် စွန့်မယ်’ ဒီလိုရပ်တယ်၊ အစိုးရက ‘ လက်နက်အရင်စွန့်၊ တရားဝင်ပါတီအဖြစ် ရပ်တည်ခွင့်ပေးမယ်’ ဒီလိုရပ်တယ်။ ဒါနဲ့ပဲ ပြည်တွင်း စစ်မရပ်နိုင်ဘဲ ဒီမိုကရေစီသာ လုံးပါးပါးသွားခဲ့ရတာ။ အခုလည်း ဒီသဘောပဲ။ အစိုးရက ‘တပြည်လုံး အပစ်အခတ်ရပ်စဲရေး လက်မှတ်ထိုးမယ်။ ပြီးမှ နိုင်ငံရေးဆွေးနွေးပွဲတွေ လုပ်ကြမယ်’ လူမျိုးစု လက်နက်ကိုင်တွေကတော့ ‘နိုင်ငံရေး ဆွေးနွေးပွဲတွေ အရင်လုပ်မယ်။ အဖြေရမှ အပစ်အခတ်ရပ်စဲရေး လုပ်မယ်…’။ ဒါနဲ့ပဲ အရင်တုန်းကလို ‘ရွှေပြည်တော် မျှော်တိုင်းဝေး’ ဖြစ်သွားမှာ ကျွန်တော် အစိုးရိမ်ဆုံးပဲ။ အဲလိုဆိုရင် အားယူခါစ ဒီမိုကရေစီ ယိုင်လဲသွားနိုင်တယ်။ သတိပြုကြဖို့ပါ။

ကြားထဲက ကျွန်တော့်အနေနဲ့ မေတ္တာရပ်ခံချင်တာက “ယေဘုယျ နိုင်ငံရေးသဘောတူညီချက်တွေ ရအောင် အရင်လုပ်ကြပါ။ ဒါ ရရင် တပြည်လုံးအတိုင်းအတာ အပစ်အခတ်ရပ်စဲရေး လက်မှတ်ရေးထိုးကြပါ။ ပြီးမှ ကျန်တာတွေကို တစုံတရာ ငြိမ်းချမ်းတဲ့ အခြေအနေမှာ ဆက်ဆွေးနွေးကြပါ” လို့ အကြံပြုချင်ပါတယ်။

ဒီနေရာမှာ ‘ယေဘုယျ နိုင်ငံရေး သဘောတူညီချက်’ ဆိုတာကို ရှင်းပါ့မယ်။ အတိအကျ အခိုင်အမာ အနုစိတ်သဘော မဟုတ်ပါဘူး။ ယေဘုယျ သက်သက်ပါ။ နှစ်ဘက် သိပ်မဝေးတဲ့ ယေဘုယျ ဖက်ဒရယ် အနှစ်သာရပိုင်းကို ညှိကြဖို့ပါ။ တိတိကျကျ ပြောရရင် လက်ရှိ ၂၀၀၈ constitution ထဲက ဇယား ၁၊ ၂၊ ၃၊ ၅ ကို ပေးထားချက်လို့ ယူပြီး နှစ်ဘက် လက်ခံနိုင်မယ့် ကြားအဖြေ ရှာကြဖို့ပါ။ ရနိုင်စရာ ရှိပါတယ်။ လွှတ်တော် ၁၀၉ ဦး ကော်မတီရဲ့ အစီရင်ခံစာ ထွက်လာရင် အဲဒါနဲ့လည်း ဆက်စပ်ညှိနှိုင်းဖို့ လိုပါလိမ့်မယ်။ အားလုံး သဘောထား ကြီးကြရင် အကောင်းဆုံး မဟုတ်ရင်တောင်မှ ယာယီဖြစ်စေ လက်ခံနိုင်လောက်မယ့် အဖြေတစ်ခု ရနိုင်ပါတယ်။ ဒါကို မဖြစ်ဖြစ်အောင် အရယူပြီး တပြည်လုံး အပစ်အခတ်ရပ်စဲရေး လုပ်စေချင်ပါတယ်။ ဖြစ်နိုင်ရင် ၂၀၁၅ မတိုင်ခင် ဒါကို အကောင်အထည်ဖော်စေချင်တယ်။

အဲသလို ယေဘုယျနိုင်ငံရေးသဘောတူညီချက် ရတာနဲ့ ခိုင်မာတဲ့ ငြိမ်းချမ်းရေး ဖြစ်ပြီလို့တော့ မဆိုနိုင်သေးပါဘူး။ ဆက်လက်ဆွေးနွေးကြရမယ့် ပြဿနာတွေ၊ sensitive issues တွေ အများကြီး ရှိပါသေးတယ်။ လက်နက်ကိုင်တပ်တွေ လျှော့ချရေးတို့၊ ပြန်လည်နေရာချထားရေးတို့၊ ပြန်လည်ပေါင်းစည်းရေးတို့ (ပညာရပ်ဆန်ဆန် ပြောရရင် DDR - Disarmament, Demobilization and Reintegration ပေါ့)။ ဒီကိစ္စတွေက သိပ်သိမ်မွေ့တော့ ချက်ချင်းအဖြေရဖို့ မလွယ်ပါဘူး။ အချိန်အများကြီး ယူရပါလိမ့်မယ်။ ဆယ်စုတစ်ခုတောင် ကြာကောင်း ကြာသွားနိုင်ပါတယ်။ ဒါတွေအားလုံး အပြည့်အဝ ရမှ အပစ်အခတ် ရပ်မယ်ဆိုရင် ကျွန်တော်တို့ သက်တမ်းအတွင်း ပြည်တွင်းငြိမ်းချမ်းရေး ဘယ်လိုမှ ရစရာမရှိပါဘူး။ ယေဘုယျ နိုင်ငံရေး သဘောတူညီချက် ရပြီး အပစ်အခတ်ရပ်မှ တစုံတရာ ငြိမ်းချမ်းတဲ့ အခြေအနေအောက်မှာ ဒီအကဲဆတ်တဲ့ ပြဿနာတွေကို အေးအေးညောင်းညောင်း အဖြေရှာနိုင်ပါလိမ့်မယ်။

ဒီအတွက်တော့ ဘယ်လောက် အချိန်ပေးရ ပေးရပေါ့။ ဆယ်နှစ်ကြာလည်း ဘာဖြစ်လဲ။ အနှစ်ခြောက်ဆယ်ကျော် စစ်တိုက်ပြီးပြီပဲ။ ၁၀ နှစ်လောက် သည်းခံပြီး သေနတ်သံမထွက်စေဘဲ ဆွေးနွေးကြည့်ဖို့ ကောင်းပါတယ်။ ဒီလောက်မှ စိတ်မရှည်ရင် ကျွန်တော်တို့ ပြည်တွင်းစစ် အနှစ်တစ်ရာကြာလည်း အဖြေရှာရမှာ မဟုတ်ဘူး။

ဒီတော့ ယေဘုယျ သဘောတူညီချက်တွေ ရအောင် ဝါယမစိုက်ပြီး လုပ်ပေးကြပါ။ ပြီးရင် တပြည်လုံး သေနတ်သံတွေ ရပ်ပေးကြပါ။ ကျန်တာတွေကို အချိန်ယူ ညှိနှိုင်း အဖြေရှာကြပါ လို့ နှစ်ဘက်လုံးကို မေတ္တာရပ်ခံချင်ပါတယ်။

ဖက်ဒရယ်ဆိုတာကို တိုင်းရင်းသားတွေက တိုင်းရင်းသားတွေက အမျိုးမျိုး အဓိပ္ပာယ် ဖွင့်နေကြတယ်။ (ဥပမာ - ရှစ်ပြည်နယ် ဖြစ်သင့်တယ် ဆိုတာမျိုး) ဆရာ့အနေနဲ့ရော ဖက်ဒရယ်ဆိုတာကို ဘယ်လို အဓိပ္ပာယ် ဖွင့်ဆိုမလဲ။

ဒီနေရာမှာ ကျွန်တော့်လို ပါမွှားတစ်ယောက်ထက် မိတ်ဆွေကြီး “အီဂေါ”ရဲ့ အဓိပ္ပာယ်ဖွင့်ဆိုချက်ကိုပဲ ကိုးကားပြောချင်ပါတယ်။ “အီဂေါ”ဆိုတာက Educational Initiatives ရဲ့ ဒါရိုက်တာ Igor Blazevic ကိုပြောတာပါ။ သူက ဖက်ဒရယ်နဲ့ ပတ်သက်ရင် ကျွမ်းကျင်သူလို့ ဆိုနိုင်လောက်တဲ့ ပညာရှင်လည်း ဖြစ်တယ်။ ဘော့စ်နီးယား ဇာတိဖြစ်တာမို့ ‘ဘောလ်ကန်နိုက်ဇေးရှင်း’ (အစိတ်စိတ်အမွှာမွှာ ကွဲပြိုမှု) ကိုလည်း ကိုယ်တိုင် ကြုံဖူးတယ်။ ဒါကြောင့် သူ့ဖွင့်ဆိုချက်ကိုပဲ ညွှန်းပါ့မယ်။

၁။ ဗဟိုအစိုးရနဲ့ ဒေသအစိုးရကြားမှာ လုပ်ပိုင်ခွင့် အာဏာခွဲဝေကျင့်သုံးမှု ရှိမယ်။ (power sharing, tax sharing, resource sharing)

၂။ ဒါကို constitution မှာလည်း တရားဝင် ဖော်ပြထားမယ်။

၃။ ဒီခွဲဝေကျင့်သုံးမှုကို ပြောင်းချင်ရင် constitution ပြင်ဆင်ခြင်းနဲ့သာ ပြောင်းလို့ရတယ်။ လွှတ်တော်လမ်းကြောင်းနဲ့သာ ပြောင်းရမယ်။

ဒီအနှစ်သာရ သုံးခု ပြည့်စုံရင် ဖက်ဒရယ်လို့ ယေဘုယျ ပြောနိုင်တယ်လို့ ဆိုပါတယ်။ ခင်ဗျားတို့ပြောတဲ့ ရှစ်ပြည်နယ်ဆိုတာက ဒီဖက်ဒရယ် အနှစ်သာရကို အကောင်အထည်ဖော်ရတဲ့ ဖွဲ့စည်းပုံ ကိစ္စပါ။ ပုံသဏ္ဌာန် ပြဿနာပေါ့။ ဒီလိုပုံသဏ္ဌာန်မှာ တစ်နိုင်ငံနဲ့ တစ်နိုင်ငံ ဘယ်လိုမှ ထပ်တူမကျနိုင်ပါဘူး။ မူကွဲတွေ အများကြီး ရှိပါတယ်။

ဒီတော့ အထက်က ဖွင့်ဆိုချက်နဲ့ ၂၀၀၈ အခြေခံဥပဒေကို ပြန်ကြည့်ရင် လုပ်ပိုင်ခွင့်အာဏာ ခွဲဝေကျင့်သုံးမှုကို တရားဝင် ဖော်ပြထားတာ တွေ့ရတယ်။ (ဇယား ၁၊ ၂၊ ၃၊ ၅) သယံဇာတ ခွဲဝေမှုကိုတော့ သီးခြားဇယားနဲ့ ဖော်ပြမထားဘူး။ ဒါကြောင့် ၂၀၀၈ အခြေခံဥပဒေဟာ ဖက်ဒရယ်လုံးဝမဟုတ်တဲ့ တပြည်ထောင် (unitary) ဆိုတဲ့ ဝေဖန်ချက်ဟာ တစ်ဖက်သတ် ကျလွန်းတယ်လို့ မြင်ပါတယ်။ တပြိုင်တည်းမှာပဲ ၂၀၀၈ အခြေခံဥပဒေဟာ ဖက်ဒရယ်ပါပဲဆိုတာမျိုးကလည်း များလွန်းတယ်လို့ ထင်ပါတယ်။ ဘာကြောင့်လဲဆိုတော့ ပြောခဲ့တဲ့ ဇယား ၁၊ ၂၊ ၃၊ ၅ တို့ဟာ ဘက်တစ်ဘက်တည်းရဲ့ ရပ်ခံချက်ဖြစ်တော့ လူမျိူးစုတွေဘက်က (ပြောရရင်) ဒေသအစိုးရတွေဘက်က ပြောင်းချင်တာ၊ ပြင်ချင်တာ၊ ဖြည့်စွက်ချင်တာတွေ ရှိနိုင်တယ်။ ဘာပဲဖြစ်ဖြစ် ၂၀၀၈ ဖွဲ့စည်းပုံကို “ပေးထားချက်”လို့ ယူဆပြီး အကြေအလည် ညှိနှိုင်းကြရင် အားလုံးသဘောညီတဲ့ ဖက်ဒရယ် ဖြစ်နိုင်ပါတယ်။ ဒါကြောင့် ၂၀၀၈ အခြေခံဥပဒေဟာ အများညီ ဖက်ဒရယ်ကို ရောက်နိုင်တဲ့ ပလက်ဖောင်းတစ်ခုလို့ မြင်ပါတယ်။ အရေးကြီးတာက နှစ်ဘက် သဘောထားကြီးကြီးနဲ့ ညှိနှိုင်း ဆွေးနွေးကြဖို့ပါ။

အခုလက်ရှိ ဖြစ်ပေါ်နေတဲ့ ငြိမ်းချမ်းရေး ဖြစ်စဉ်အပေါ်မှာ ဆရာ့အနေနဲ့ ဘယ်လောက် အတိုင်းအတာအထိ ယုံကြည်မှု ရှိပါလဲခင်ဗျ၊

ဒီနေ့ လူမျိုးစု လက်နက်ကိုင် အဖွဲ့အစည်းတွေက ခေါင်းဆောင်တွေရော၊ အစိုးရ၊ လွှတ်တော်နဲ့ တပ်မတော် ခေါင်းဆောင်တွေပါ အနှစ် ၆၀ ကျော် ပြည်တွင်းစစ်ရဲ့ ဆိုးကျိုးတွေကို ခါးခါးသီးသီး ကြုံဖူးပြီးပြီမို့ သူတို့ရဲ့ ငြိမ်းချမ်းချင်တဲ့ ဆန္ဒကို ကျွန်တော် ယုံပါတယ်။ ဒါပေမယ့် နှစ်ပေါင်း ၆၀ ကျော် စစ်ပွဲကို နေ့ချင်း ညချင်း ရပ်ဖို့ဆိုတာ လက်တွေ့ မဖြစ်နိုင်ပါဘူး။ ကာလတစ်ခု အချိန်ယူ လုံးပမ်းဖို့ လိုပါလိမ့်မယ်။ ဒီအတွင်း ပြည်တွင်းစစ် အဆိုးကျော့သံသရာထဲ ပြန်လည်မသွားဖို့ အရေးကြီးတယ်။ ဒီအတွက် နှစ်ဖက် အပြန်အလှန် ညှိနှိုင်း၊ အလျှော့ပေး၊ စေ့စပ်တဲ့ ဓလေ့မျိုး ထွန်းကားဖို့ လိုပါတယ်။ ခက်တာက ဒီဓလေ့ဟာ အခုမှ သန္ဓေတည်စမို့ သမရိုးကျ ထိပ်တိုက်ရင်ဆိုင်ရေးဓလေ့ကို မကျော်နိုင်မှာတော့ စိုးရိမ်တယ်။

ဆရာ့အနေနဲ့ ငြိမ်းချမ်းရေးဖြစ်စဉ်နဲ့ ပတ်သက်ပြီး တခုခု ဖြည့်စွက်ပြောချင်တာများ ရှိပါသေးလား ခင်ဗျား။

ရှိတယ်။ လွှတ်တော်ရဲ့အခန်းကဏ္ဍပါ။ ရှေ့ပိုင်းက ကျွန်တော်ပြောခဲ့တဲ့ ‘ယေဘုယျသဘောတူညီချက်’ရဖို့ အဆင့်မှာကိုပဲ။ အခြေခံဥပဒေ ပြင်ဆင်ရေးနဲ့ ပတ်သက်နေတယ်။ ဒီတော့ ဥပဒေပြုရေးအာဏာ ကိုင်ထားတဲ့ လွှတ်တော်မပါဘဲ ဒီကိစ္စ မဖြစ်ပါဘူး။ ငြိမ်းချမ်းရေး ဆွေးနွေးပွဲက ရတဲ့ သဘောတူညီချက်တွေနဲ့ လွှတ်တော် ၁၀၉ ဦးကော်မတီရဲ့ တင်ပြချက်တွေကို ဆက်စပ်ညှိနှိုင်းကြဖို့ အရေးကြီးပါတယ်။

ဒီလိုပြောရတာလဲ အကြောင်းရှိလို့ပါ။ နိုင်ငံရေး အင်အားစု တစ်ခု (ပွင့်ပွင့်လင်းလင်းပြောရရင်၊ တခါက ကျွန်တော် ပတ်သက်ခဲ့ဖူးတဲ့ ပါတီ)ရဲ့ ကြေညာချက်ကို online မှာ ဖတ်ရလို့ပါ။ အဲဒီပါတီက “အခြေခံဥပဒေကို လွှတ်တော်ပြင်ပ လမ်းကြောင်းနဲ့ ဖျက်ရေး”ဆိုတာ တင်နေတယ်။ ဒီနေ့ ဒီမိုကရေစီအပြောင်းအလဲ တစ်ခုလုံးကို ကတိမ်းကပါး ဖြစ်စေနိုင်လောက်အောင် အန္တရာယ်ကြီးလှတဲ့ လက်ဝဲသွေဖီရေးလို့ ကျွန်တော် မြင်ပါတယ်။ အဲဒီသွေဖီရေး အပေါ်စီးရသွားရင် ပြည်တွင်းစစ် သံသရာထဲက ရုန်းမထွက်နိုင်ရုံတင် မကဘူး။ ဒီမိုကရေစီ အလားအလာတွေပါ ပျောက်သွားနိုင်တယ်။ ငြိမ်းချမ်းရေး အင်အားစုတွေ ကြပ်ကြပ်သတိထားစေချင်ပါတယ်။
ကျွန်တော်တို့ ငယ်ငယ်က စွဲလမ်းဖူးတဲ့ ကဗျာတစ်ပုဒ် ရှိတယ်။ ‘ဗားတော့ ဗရက်’ ရဲ့ ကဗျာပါ။ “အကုန်ရရင်ရ၊ မရရင် ဘာမှမလိုချင်ဘူး” ဆိုတဲ့ကဗျာပါ။ ဒီကဗျာစာသားကို ခိုင်ထူးကလည်း သီချင်းလုပ်ဆိုဖူးတယ်။ ကဗျာအနေနဲ့ သီချင်းအနေနဲ့ကတော့ ဖတ်ရတာ၊ ဆိုရတာ တယ်အရသာရှိတာပဲ။ လက်တွေ့မှာတော့ အလုပ်မဖြစ်ရုံသာမက အန္တရာယ်ကြီးတယ်။ နိုင်ငံရေးဆိုတာ၊ ကဗျာရွတ်တာမဟုတ်ဘူး။ လသာသာ သီချင်းအော်ဆိုရတာ မဟုတ်ဘူး။ အန္တရာယ်ကို ကြိုမြင်ရမယ်။ အမျှော်အမြင်ရှိဖို့ လိုတယ်။
ဆရာကျော်ဝင်စာမျက်နှာမှ
Read More »